Mikạ 2 - সান্তালী বাইবেল

Sasantaokoakʼ sạjại

¹ Hae onko do, one okoe do behok lạgitʼko goṭayetʼkan, one okoe do apnarakʼ aṭetʼre bạṛicʼakʼ reakʼ phundiko aṭaoetʼkan. Ar setakʼlen khan do onka lekako kạmikana, ente ona onkae reakʼ daṛe do akoakʼ tire menakʼa.

² Onko do ot-baṛge ar oṛakʼ duạr cetanreko lalockate onako rerecʼa. Onko do hoṛko ṭhokakoa ar oṛakʼ-duạr ar jaega-jumiko recʼkoa.

³ Ona iạte Probhu Isore meneda, “Ape upạrte iń do bin bhạlạiyakʼ iń goṭa akada one ona khon apnarte ohope rukhiyạ daṛelen, ente okte do muhin reakʼge hoyokʼa.

⁴ Enhilokʼ do maraṅ homor halaṅge hoyokʼa ar noa duk reakʼ sereń hoyokʼa. Ale dole marao utạr akana; ale jạtrenkoakʼ sompotti do recʼidi ocoakana. Probhu Isor do ale ṭhen khon onae idi akada. Aleakʼ khet-baṛge do bepạtiạrankoe emakawatʼkoa.”

⁵ Onatege ape talare okoehõ Probhu Isorren hoṛko sãote jumi reakʼ hạṭiń do bako ńama.

⁶ Aperen nạbiko do aleko metalekana, “Noako katha do alope mena, ar niạko reaṅ jãhãn katha hõ alope roṛa, ente ale cetanre opoman do baṅ hijukʼa.”

⁷ E Jakob bõsrenko, apeakʼ noa katha roṛ do baṅ ganokʼa, “Probhu Isorren Jiu do bae ạṛis akana; ar uni do noako kạmi bae kạmiya.” Probhu Isore meneda, “Okoe dhorom horteye calakʼ eken onko cetanrege ińakʼ katha do bhạlạiye ạguiya.

⁸ Nebetar ińren hoṛ do bạiri lekako hoyakana. Lạṛhại khon ruạṛ hecʼakan hoṛko leka okoe do khạtirjomako dãṛãnkan onkoakʼ hoṛmo khon kicricʼpe or totʼetʼtakoa.

⁹ Ińren hoṛkoren maejiuko do onkoakʼ oṛakʼ duạr khonpe laga ńiretʼkoa. Ińakʼ bhor khon onkoren hopon ar hoponerako jaejugpe recʼetʼkoa.

¹⁰ Ape do beredokʼte, calakʼpe, ona do apeakʼ jirạukʼ jaega do baṅkana; ente ape do disạmpe bhonḍakada, ona iạtege ona do marao utạrokʼa.

¹¹ Ar jãhãe ekʼṛeyicʼ ar ṭhok hoṛ hecʼkateye men, ‘ińiń meneda je, apeakʼ bạ̃ṛti bubulakʼ ar darkha rasa hoyokʼtapea,’ enḍekhan unige noko jạtrenko lạgitʼ lek lekanicʼ nạbiye hoyokʼa!”

Bańcao reaṅ gokʼakʼ

¹² Probhu Isore meneda, “E Jakob, iń do khạṭige ape sanamkoń jarwa mitʼpea; iń do khạṭige Israelren bańcao tahen sarecʼ hoṛkoń jarwa mitʼkoa. Bosraren bhiḍiko leka, khạṛre tahen bhidi palko leka iń do onkoń jarwa mitʼkoa; disạm do arhõ hoṛkote perejokʼa.”

¹³ Bondi dosa khon ruạṛ hijukʼ lạgitʼ okoe do hore jhij uni do onko laha lahateye calakʼa; onko do phaṭok duạr rạputʼkateko oḍok calakʼa. Probhu Isor, okoe doe onkoren rajkan, uni do onkoe ạyur idikoa.