Mathae 7 - সান্তালী বাইবেল

Dos sapʼ reaṅ sikhạuna

¹ “Eṭakʼkoakʼ dosko alope ńam baṛaea, jemon apeakʼ dos hõ alo sabokʼtape,

² ente cetʼleka eṭakʼkoakʼ doskope saba onkage apeakʼ dosko hõ sabokʼtapea, ar cetʼlekape soṅakoa onkage ape lạgitʼ hõ soṅokʼa.

³ “Amren boehamakʼ mẽtʼre menakʼ cubạkʼgem ńeletʼkana, menkhan apnar mẽtʼre menakʼ jobra do cekate bam ńel ńameda?

⁴ Apnar mẽtʼrege jobra menakʼtam tulucʼ cekate amren boeha dom metaekana, ‘hape se amakʼ mẽtʼ khon cubạkʼ oḍok ocowạńme?’

⁵ E phạsiạra! Pạhilre amakʼ mẽtʼ reakʼ jobra ocokʼ maṛaṅlem, enḍekhan boehamakʼ mẽtʼ khon cubạkʼ oḍokʼ lạgitʼ pusṭạutem ńeńela.

⁶ “Okaṭakʼ sonotge ona do seta alope emakoa. Ar sukri samaṅre mạnik hõ alope giḍiya. Hoedaṛeakʼa onko do onakoko lebetʼ gasmanḍaoa ar ạcur ruạṛkate apeko hoṭakʼ cirạpea.

Koejoṅre gokʼakʼ

⁷ “Koepe, ado emapea; ńam baṛaepe, adope ńama, duạr ṭhopʼ ṭhopʼpe, ado jhicʼapea.

⁸ Ente mitʼke mitʼ kokoyicʼ do milạuaea; ar ńam baṛayicʼ doe ńama ar ṭhopʼ ṭhopʼetʼkạnicʼ do jhicʼaea.

⁹ Ape modre jãhãe nonkanicʼ menaea, one acʼren hopon piṭhại koelere dhiriye calae?

¹⁰ Se hakoe koelere bińe calae?

¹¹ Apepe bạṛicʼgere hõ aperen gidrạko bhage bhage jinisko emakope baḍaekan khan, enḍekhan sermare menae aperen Baba do tinạkʼ artetʼ acʼ koeye kanko bhageakʼkoe emakoa!

¹² Hoṛko ṭhen khon cetʼleka beoharpe khojkan onkage ape hõ onko tulucʼ beoharpe. Ente noa kangea Moseyakʼ ạn-ạri ar nạbikoakʼ cecetʼakʼ reakʼ katha do.

Sakṛa ar osar duạr

¹³ “Sakṛa duạrte bolokʼpe, ente okaṭakʼ hor bạṛicʼ secʼe idipe ona reakʼ duạr do osargea ar hor hõ phaelaogea. Ar ḍher hoṛge onateko bolokʼ kana.

¹⁴ Menkhan okaṭakʼ hor jion secʼe ạyur idi ona reakʼ hor do sakṛagea ar duạr hõ suṛucʼgea. Ar thoṛa hoṛge noa doko sendra ńametʼkana.

Eṛe nạbi oromko reaṅ

¹⁵ “Eṛe nạbiko khon sontor akae tahenpe. Onko do bhiḍi chinte ape ṭhenko hijukʼa, menkhan bhitri bhitrite onko do jojom hunḍạr kanako.

¹⁶ Onkoakʼ jion reakʼ jotege onko dope orom daṛeakoa. Jạnum dare khon darkha jo se kũṛĩtʼ rama jhạuạ khon cetʼ loa doko godgea?

¹⁷ Onkage mimitʼ bhage darere do bhagege jokʼa ar bạṛicʼ darere do bạṛicʼge jokʼa.

¹⁸ Bhage darere bạṛicʼ jo ar bạṛicʼ darere bhage jo do baṅ jo daṛeakʼa.

¹⁹ Okaṭakʼ darere bhage baṅ jokʼ ona do makʼ giḍikʼte sengelre khadle ocokʼa.

²⁰ Onateń mena, bhonḍ nạbikoakʼ jionre oka jo ńelokʼkan onatege onko dope orom daṛeakoa.

Serma rajre bolokʼ reaṅ

²¹ “Okoe ‘Probhu Isor, Probhu Isorko’ mitạńkan onko joto do serma rajre ohoko bolo daṛelena, menkhan okoe ińren serma Babawakʼ sana leka senokʼe monejoṅ, unigeye bolo daṛeakʼa.

²² Enhilokʼ do ạḍi hoṛko mitạńa, ‘E Probhu Isor, E Probhu Isor, ale do cetʼ am ńutumte bale nạbileda? Am ńutumte cetʼ bạṛicʼ jiuko bale oḍok giḍiletʼkoa? Am ńutumte cetʼ hahaṛa kạmiko bale kạmileda?’

²³ Unre pusṭạuteń lạiyakoa, ‘ape do tis hõ bạń baḍaeletʼpea. E bedhorom kạmiko, men iń khon sahaṛokʼpe.’

Bar lekan rehetʼ

²⁴ “Onateń metapekana, jãhãege noako kathae ańjom ar ona lekae calakʼ uni do nonkan budan hoṛ kanae, okoe do dhiri cetanre oṛakʼe benaoketʼ.

²⁵ Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; menkhan ona oṛakʼ do baṅ bhindạṛlena, ente ona do dhiri cetanre benao akan tahẽkana.

²⁶ Ar okoe ińakʼ katha ańjomkate ona leka bae senakʼ uni do lelha hoṛ lekanae, one okoe do gitil cetanre oṛakʼe benaoketʼ.

²⁷ Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; ar ona do lạnduṛena, ar botorge oborena!”

Jisuakʼ ektiạri

²⁸ Jisu noako kathae mucạtʼketʼ khan gadel hoṛ do uniyakʼ cecetʼakʼteko hahaṛa cabayena,

²⁹ ente uni do sostor baḍaeko leka do baṅ, bickom ektiạri menakʼtae hoṛ lekae cetʼako kan tahẽkana.