Mathae 6 - সান্তালী বাইবেল

Dan emokʼ reaṅ sikhạuna

¹ “Husiạrokʼpe, hoṛ ṭhen ńel ocokʼ leka do alope dhorom koroma; arpe onkae khan aperen sermaren Baba ṭhen khon jãhãn kuṛại do bape ńama.

² “Onate koeyem emokʼre phạsiạra hoṛko leka do alom onkaea. Ente onko do hoṛko ṭhen sarhao ocokʼ lạgitʼ sunạgogre ar kulhikore siṅgạ oroṅate koeko emakokana. Sạrigeń metapekana, onko do akoakʼ kuṛạiko ńam horayeda.

³ Menkhan am do reṅgecʼ orecʼko jãhãnakʼem danakore amakʼ leṅga ti hõ aloe baḍaetam ma jojom ti cetʼe cekayeda mente.

⁴ Jemon amakʼ dan emokʼ do okoge tahentam. Enḍekhan okoe danaṅ khon jotowakʼe ńeńelkan uni amren Baba do kuṛạiye emama.

Koejoṅ reaṅ sikhạuna

⁵ “Apepe koejoṅre phạsiạra hoṛko leka do alope onkaea, ente onko do hoṛko ṭhen ńel ocokʼ lạgitʼ sunạgog ar dobạṭiạkore teṅgokate koejoṅko kusiyakʼ kana. Sạrigeń metapekana, onko do akoakʼ kuṛạiko ńam horayeda.

⁶ Menkhan amem koejoṅre bhitri oṛakʼre bolokate duạr sińme, ar amren Baba, okoe do bae ńelokʼkanre hõ hạjirge menae, uni ṭhen koejoṅme. Enḍekhan amren Baba okoe do danaṅ khon jotowakʼe ńeńel kan, unige kuṛạiye emama.

⁷ “Apepe koejoṅre boṅgan hoṛ jạtrenko leka ạuṛiyakʼ do alope boktaokʼa. Ente onko doko hudisa, bạ̃ṛti katha roṛle khan Isor do koejoṅe ańjomtakoa.

⁸ Onko leka do alope onkaea, ente ape ạuripe koeyerege aperen Baba do apeakʼ sanam jạruṛakʼkoe baḍaekana.

⁹ Onate ape do nonka leka koejoṅpe; E aleren sermare menam Baba, amakʼ ńutum sonotokʼ ma.

¹⁰ Amakʼ raj hijukʼ ma. Amakʼ sana leka hoyokʼ ma, cetʼ leka sermare, onkage otre hõ.

¹¹ Aleakʼ jạruṛ jomakʼ de teheń emalem.

¹² Ar aleakʼ dosko ikạ katalem, cetʼ leka ale hõ aleakʼ dodoskole ikạ katako kan;

¹³ ar biḍạute alom aderlea, menkhan bạṛicʼakʼ khon bańcaolem. [Ente raj ar daṛe ar ṭhonok jaejug hạbicʼ amakʼge, Amen.]

¹⁴ Ape do eṭakʼkoakʼ doskope ikạletako khan enḍekhan aperen sermaren Baba hõ apeakʼe ikạitapea.

¹⁵ Menkhan eṭakʼko bape ikạleko khan aperen Baba hõ apeakʼ ghạṭko bae ikạitapea.

Upạs tahen reakʼ sikhạuna

¹⁶ “Apepe upạsre phạsiạrako leka mẽtãhã do alope mirluṅtapea. Ente onko do hoṛko ṭhen udugokʼ lạgitʼko upạseda ar bohokʼ ar mẽtãhãre torocʼko ojokʼ joṅkana. Sạrigeń metapekana onko do akoakʼ kuṛạiko ńam horayeda.

¹⁷ Menkhan amem upạsre bohokʼre sunum ojogme ar mẽtãhã apʼ saphakʼme,

¹⁸ jemon eṭakʼko aloko baḍae daṛeakʼ, am dom upạsetʼ kana. Enḍekhan amren Baba okoe do bae ńelokʼkanre hõ hạjirge menae ar danaṅ khon jotowakʼe ńeńelkan unige kuṛạiye emama.

Sanam khon jạruṛanakʼ sikhạuna

¹⁹ “Noa dhạrtire ape lagitʼ dhon alope doho jarwajoṅa. Nonḍe do joṅ dhoraokʼte bạṛijokʼa ar tejokoko nosṭoea ar kombṛo hõ oṛakʼ bhugạkʼkateko idiya.

²⁰ Menkhan sermare do joṅhõ baṅ sabokʼa, ar tejo hõ bako nosṭoea ar kombṛo hõ bako kombṛoya. Onate ape lạgitʼ sermare dhon jarwa joṅpe,

²¹ ente okare apeakʼ dhon tahena onḍege apeakʼ mon hõ tahena.

Hoṛmo reakʼ marsal

²² “Mẽtʼ do hoṛmo reakʼ diuhe kana. Onate amakʼ mẽtʼ mońjgetam khan amakʼ goṭa hoṛmo hõ marsalte perejokʼa.

²³ Menkhan amakʼ mẽtʼ bạṛicʼ getam khan amakʼ goṭa hoṛmo hõ ńutgetama. Amre menakʼ marsal sạrige ńutgetam khan enḍekhan ona do artetʼ ńutgea!

Isor ar dhon reaṅ

²⁴ “Okoe hõ barea kisạ̃ṛ ṭhen guti do ohoe khaṭao daṛelena, ente mitʼ hoṛe dulạṛea ar eṭagicʼ doe kurudaea. Mitʼ hoṛakʼe ańjomtaea ar eṭagicʼ doe neṅghaoea. Isor ṭhen ar dhon ṭhen guti do ohogepe khaṭao daṛelena.

²⁵ “Noa iạteń metapekana, bańcao tahen lạgitʼ cetʼpe joma se cetʼpe ńũiya se hoṛmo lạgitʼ cetʼpe horokʼ-bandea ona do alope dạndikʼa. Jiwi do eken jom ar ńũi lạgitʼ do baṅkana, ar hoṛmo hõ horokʼ bandekʼ lạgitʼ do baṅa.

²⁶ “Coṭren cẽṛẽko beṅgetʼakope; itạ hõ bako era ar ir hõ bako ira, ar golare hõ bako doho jarwaea, enrehõ aperen sermaren Baba doe jom ocoyetʼkoa. Ape do cetʼ onko khon bạ̃ṛti bape damangea?

²⁷ Ape modre okoe dạndikate acʼakʼ jiwi mitʼ ghonṭa gan bạ̃ṛtiye doho daṛeketaea?

²⁸ “Horokʼ-bandekʼ lạgitʼ do cedakʼpe dạndikʼ kana? Ṭạnḍire menakʼ bahako reakʼ hudispe, cetʼ lekate harakʼkana mente. Onko do bako kạmiya ar sutạm hõ bako takoea.

²⁹ Menkhan ińiń metapekana, Solomon raj do unạkʼ jak jomoke tahẽkanrehõ noako reakʼ mitʼ goṭecʼ leka hõ bae saj daṛeada.

³⁰ Ado ṭạnḍi reakʼ ghãs teheń oka menakʼ, ona do gapa culhạre khadle ocokʼre hõ, Isor nonkae sajaoetʼ khan E nase pạtiạukʼko, unre ape do cetʼ artetʼ bạ̃ṛti bae sajpea!

³¹ Onate ‘cetʼpe joma’ se ‘cetʼpe ńũiya’ ar cetʼpe horokʼ bandea ona reakʼ do alope dạndikʼa. Boṅgan hoṛ jạtrenkoge noako reaṅ doko ńam baṛayetʼkana;

³² ona chaḍa aperen sermaren Baba doe baḍaegea noako sanamakʼ reakʼ jạruṛ menakʼtapea mente.

³³ Menkhan pạhilre ape do Isorakʼ raj ar dhorom ńam maṛaṅpe. Enḍekhan ona sanamakʼpe ńama.

³⁴ Gapa lạgitʼ do alope dạndikʼa; gapa reakʼ dạndi do gapage dạndi ocowaepe. Ar dintetʼ lạgitʼ do enhilokʼ reakʼ haronge ḍhera.