Mathae 5 - সান্তালী বাইবেল

Buru binti

¹ Jisu do ạḍi utạr hoṛe ńelketʼko khan buruteye decʼena. Are duṛupʼen khan acʼren celako hõ uni ṭhenko hecʼ sorena.

² Unre uni do celako nonka menkate cetʼakoe ehopʼena:

Bhạganko reaṅ

³ “Monre reṅgejokʼkogeko bhạgana, ente serma raj do onkoakʼ kangea.

⁴ Dukokʼ kogeko bhạgana, ente onko do jiwi raṛecʼko ńama.

⁵ Mạ̃hir kogeko bhạgana, ente dhạrti do onkogeko ạidạrijoṅa.

⁶ Mon ar ontorte Isorakʼ sanaleka calakʼkogeko bhạgana, ente onkoakʼ monejoṅakʼ do purạukʼtakoa.

⁷ Mãyãkʼkogeko bhạgana, ente onko do mãyãko ńama.

⁸ Okoeyakʼ ontor khạṭigetako onkogeko bhạgana, ente onko do Isorko ńelea.

⁹ Sulukokʼkogeko bhạgana, ente onko do Isorren hoponko ńumogokʼa.

¹⁰ Dhorom iạte santao ar khed ocokʼkogeko bhạgana; ente serma raj do onkoakʼ kangea.

¹¹ “Bhạgangeape iń iạte hoṛko opoman arko santao lepere ar ạuṛiyakʼte sanam lekan bạṛicʼakʼ reaṅko roṛlepere.

¹² Ape do rạskạ ar hulạsokʼpe, ente sermare ape lạgitʼ maraṅ kuṛại menakʼa. Ente ape laha okoe nạbikoko tahẽkan onko hõ nonkageko santaoletʼkoa.

Celako do buluṅ ar marsal leka

¹³ “Ape do dhạrti reakʼ buluṅ kanape, menkhan buluṅ sabakʼlen khan cekate rahamokʼa? Ona do ar okaṭakʼ kạmirege baṅ lagaokʼa. Eken bahrete giḍikakʼ ar hoṛko lebetʼakʼ lekge hoyokʼa.

¹⁴ “Ape do dhạrti reakʼ marsal kanape. Buru coṭ reakʼ nagraha do oho danaṅ daṛelena.

¹⁵ Okoe hõ diuhe jeretʼkate khạclạkʼte do bako hạrupʼ esetʼkakʼa, bickom diuhe dohowakʼ cetanregeko dohoya. Onate oṛakʼren sanam hoṛge marsalko ńama.

¹⁶ Onkage apeakʼ marsal do hoṛko samaṅre jolokʼtapema, jemon apeakʼ bhage kạmi ńelte aperen sermaren Babako sarhaoe.

Moseyakʼ ạn-ạriko reaṅ sikhạuna

¹⁷ “Noa do alope hudisa, Moseyakʼ ạn-ạri ar nạbikoakʼ olakʼko mạutại lạgitʼ iń hecʼakana mente. Iń do mạutại lạgitʼ do baṅ, bickom purạu lạgitʼgeń hecʼakana.

¹⁸ Sạrigeń metapekana, serma ar dhạrti ạuri cabakʼ hạbicʼ, ar ạn-ạri reakʼ sanamakʼ kathako ạuri purạukʼ hạbicʼ ona ạn-ạri reakʼ mitʼ akhor se ṭuḍạkʼ hõ oho meṭaolena.

¹⁹ Onate jãhãege noa kạṭicʼ utạrakʼ hukumko modre mitʼ goṭecʼe rạpud ar onkage hoṛkoe cetʼako, uni do serma rajre huḍiń utạricʼe ńumogokʼa. Menkhan jãhãege onakoe senakʼ are cetʼako uni do serma rajre maraṅe ńum ocokʼa.

²⁰ Ińiń metapekana, apeakʼ dhorom do Phạrusiko ar sostor baḍaeko khon baṅ soroslentape khan ape do serma rajre ohogepe bolo daṛelena.

Edre babotre sikhạuna

²¹ “Ańjom akadape, sedaeren hoṛko ṭhen noa katha roṛlena mente, ‘Alom khũna’ ar okoeye khũna uni do bicạrre dạyike hoyokʼa.”

²² Menkhan ińiń metapekana, okoe acʼren boeha cetanreye edrekʼ, uni do bicạrre dạyike hoyokʼa. Ar okoe acʼren boehae metae, ‘Eya orlo,’ uni do maraṅ bạisire dạyike hoyokʼa. Okoe acʼ boehae metae, ‘Eya dundhạ,’ uni do norok seṅgelre khadle ocokʼ leke hoyokʼa.

²³ “Onate Isor samaṅre amakʼ samaṅokʼakʼem samaṅre, am upạrte amren boehawakʼ jãhãnakʼ menakʼtaea mentem disạle khan,

²⁴ amakʼ ona dan do pinḍ samaṅre bạgi oṭowakʼme. Ar senkate amren boeham tulucʼ solho maṛaṅokʼme ar inạ tayom do hecʼkate amakʼ dan samaṅme.

²⁵ “Jãhãe am upạrteye mamblae khan adalotte ạuri calakʼrege uni sãote samka sạṭikʼme. Ar baṅkhan uni do hạkim ṭhene soprotmea, ar hạkim do pulis ṭhen, ar pulis do hajotreye bhoraomea.

²⁶ Sạrigeń metam kana, kạuḍi kạuḍi ạurim hala cabae hạbicʼ onḍe khon okalekate hõ ohogem oḍok daṛelena.

Laṭghaṭ reaṅ sikhạuna

²⁷ “Ańjom akadape roṛlena mente, ‘alom laṭghaṭa.’

²⁸ Menkhan ińiń metapekana, jãhãe hoṛ bạṛicʼ sanate maejiue beṅgetʼae uni do unrege acʼakʼ ontorre uni tulucʼe laṭghaṭeda.”

²⁹ Amakʼ jojom mẽtʼe kại ocome khan ona do hoṭor oḍokkakʼme. Amakʼ goṭa hoṛmo norokre khadlekʼ khon ona mitʼ hạṭiń bạṛicʼ ocoakʼge am lạgitʼ bhagea.

³⁰ Amakʼ jojom tiye kại ocome khan ona do samakʼ giḍikakʼme. Amakʼ goṭa hoṛmo norok seṅgelre khadlekʼ khon hoṛmo reakʼ mitʼ hạṭiń nosṭo ocoakʼge am lạgitʼ do bogea.

³¹ “Arhõ roṛ akana, ‘Jãhãe hoṛ bạhuttetʼe bạgiye khan uni do bapag dolele emaema.’

³² Menkhan ińiń metapekana, jãhãe hoṛ laṭghaṭ chaḍa eṭakʼ karonte bạhuttetʼe bạgiye uni doe loṭghuṭi ocoyea, ar jãhãege uni bạgi ocoyicʼ maejiue baplaye, uni hõe loṭghuṭiya.

Kiriạkʼ reaṅ sikhạuna

³³ “Arhõpe ańjomakada, ạgil hapṛamko ṭhen roṛlena, ‘eṛe eṛe alom kiriạkʼa, bickom amakʼ sanam kiriạwakʼko Probhu Isor purạuaeme.’

³⁴ Menkhan ińiń metapekana, alotetʼgepe kiriạkʼa. Serma ńutumte hõ alo, ente ona do Isorakʼ siṅghạson kana.

³⁵ Dhạrti ńutumte hõ alo ente ona do uniyakʼ jaṅga lebedokʼ jaega kana. Jerusalem ńutumte hõ alo, ente ona do maraṅ rajakʼ nagraha kana.

³⁶ Amakʼ bohokʼte hõ alo, ente ona reakʼ mitʼṭen upʼ hõ bam ponḍ oco daṛeakʼa se bam hende daṛeakʼa.

³⁷ Apeakʼ katha do, ‘Hẽ khan hẽ,’ ar ‘Baṅ khan baṅ hoyokʼma,’ ar noa khon bạ̃ṛtiyakʼ okaṭakʼkan, ona do Soetan ṭhen khonge hijukʼa.

Hala hạlikʼ reaṅ

³⁸ “Ańjomakadape roṛlena mente, ‘Mẽtʼ hala hạli mẽtʼ ar ḍaṭa hala hạli ḍaṭa.’

³⁹ Menkhan ińiń metapekana, jãhãe ape tulucʼ bạṛicʼko beohar khan onko upạrte cetʼhõ alope cekaea; bickom jãhãe jojom johae thapame khan uni do leṅga joha hõ thapa ocoaeme.

⁴⁰ Jãhãe amakʼ aṅgrop hatao lạgitʼe lạlis khan uni do oyonakʼ hõ idiocoaeme.

⁴¹ Jãhãe acʼakʼ bojha mitʼ mail iditae lạgitʼe sapʼlem khan uni tulucʼ bar mail calakʼme.

⁴² Koyetʼmekạnicʼ do emaeme, ar okoe am ṭhen pańcae khojkan uni hõ alom dea giḍikaea.

Bạiriko dulạṛko reaṅ sikhạuna

⁴³ “Ańjom akadape, roṛlena mente, ‘Am aḍepaseren hoṛ dom dulạṛea ar amren bạiri dom kurudaea.’

⁴⁴ Menkhan ińiń metape kana, aperen bạiriko dulạṛkope. Ar okoe apeko santaoetʼpe onko do koeakope.

⁴⁵ Jemon hoṛko ńelpe ape do sạrige serma Babaren hoponko kanape mente. Uni do jotoko cetanre acʼren siń candoe rakapʼ ocoyedea ar dhoromko ar bedhoromkoe dakʼako kana.

⁴⁶ Okoe apeko dulạṛetʼpe eken onkogepe dulạṛetʼko khan enḍekhan cetʼ kuṛại menakʼtapea? Mạsul uṭhạuko hõ cetʼ bako onkayeda?

⁴⁷ Eken apekoren hoṛgepe joharako kan khan enḍekhan eṭakʼko khon bạ̃ṛti do cetʼpe cekayeda? Boṅgan hoṛ jạtrenko hõ cetʼ bako onkayeda?

⁴⁸ Onate aperen sermaren Baba cetʼlekae khạṭige, onkage ape hõ khạṭi hoyokʼpe.