Mathae 4 - সান্তালী বাইবেল

Jisu soetan ṭhene biḍạu ocokʼkan.

¹ Inạ tayom Jisu do Jiu hotete hahaṅkar jaegateye idi ocoyena Soetan ṭhen biḍạu ocokʼ lạgitʼ.

² Onḍe uni do pongel siń ar pongel ńindại upạsketʼ khan reṅgecʼkedea.

³ Unre Soetan do hecʼkate uniye metadea, “Isorren Hopon kan khanem enḍekhan noako dhiri baṛe piṭhạ hoeocoyme.”

⁴ Jisui roṛ ruạṛkeda, “Sonot sostorre ol menakʼa, eken piṭhạ motote manwa do jiwetʼ bako tahena, menkhan Isorakʼ moca khon oḍokokʼ kan mitʼke mitʼ kathatege jiwetʼko tahena.”

⁵ Unre Soetan do sonot nagraha Jerusalemte Jisui idikedea ar mundil reakʼ cuṛạre teṅgokedeteye metadea,

⁶ “Isorren Hoponkan khanem ma nonḍe khon latarte donme, ente sonot sostorre ol menakʼa, Isor do acʼren goḍetko am reaṅe hukumakoa; onko do titeko sepeńmea, jemon dhirire jaṅga alo bajaokʼtam.”

⁷ Jisu do Soetane metadea, “Arhõ noa katha ol akana, amren Probhu Isor do alom biḍạuea.”

⁸ Soetan do arhõ mitʼṭecʼ ạḍi usul burute Jisui idikedete dhạrti reakʼ sanam rajosṭi ar onako reakʼ ṭhonok udukʼadeteye metadea,

⁹ “Noako joto do amiń emama, khạjuk ombakʼkate ińem sewawạń.”

¹⁰ Unre Jisu do uniye metadea, “Men ńir joṅme Soetan. Sonot sostorre ol menakʼa, am do amren Probhu Isorgem sewawaea, ar uni eskargem dewa sewawaea.”

¹¹ Unre Soetan do Jisu bạgiyadeteye calaoena, ar sermaren goḍetko hecʼkate uniko sapʼsoradea.

Probhu Jisu kạmiye ehopʼetʼkan

¹² Ado Johan hajotreye bondi ocoakana menteye ańjomketʼ khan,

¹³ Jisu do Gạlilteye calaoena ar Nasaret atoe bạgiyatʼte Sebulon ar Naphthạli elaka reakʼ doreão aṛe Kapharnạhum nagrahate senkateye berelena.

¹⁴ Noa do hoyena Jesaea nạbi hotete roṛletʼakʼ katha jemon purạukʼ; enkathae,

¹⁵ Sebulon ar Napthali elaka reakʼ, doreão secʼ, Jordan gaḍa reakʼ eṭakʼ aṛe ar boṅgan hoṛ jạtrenkoakʼ Gạlil

¹⁶ ar okoeko hoṛ ńutreko tahenkan, onko do maraṅ marsalko ńela. Ar okoe kaṛaṅ ńut reakʼ umulreko duṛupʼ akan, onko do marsal bamberakoa.

¹⁷ Un khon Jisu do nonka menkate porcare ehopʼena, “Kại khon mon ạcurtape, ente serma raj do sorakana.”

Celakoe ńametʼko

¹⁸ Jisu do Gạlil doreão aṛe aṛeteye calakʼkan tahẽkanre Simon, okoe do Patrasko metaekan ar uniren boeha Andreas tạkine ńel ńamketʼkinạ. Unkin do doreãore jhạlikin oḍaokan tahẽkana, ente unkin do jạilạkin tahẽkana.

¹⁹ Jisui metatʼkinạ, “Dela iń sãote hijukʼ ben, iń do hoṛ sasapʼ hoṛiń benao bena.”

²⁰ Unkin do unrege jhạlikin bạgi oṭowatʼte Jisukin pańjakedea.

²¹ Ado onḍe khon lahańokʼe senen khan Jakob ar Johan ńutuman eṭakʼ bar boehae ńel ńamketʼkinạ. Unkin do Sabdaeren hoponkin tahẽkana. Unkin do ạkinren apat sãote lạukạre duṛupʼkate jhạlikin jujutkan tahẽkana. Jisu do unkin hõe hohoatʼkinạ.

²² Ar unrege unkin hõ lạukạ ar apattetʼ bạgikate Jisukin pańjakedea.

Jisuakʼ porcar ar daṛe kạmi

²³ Jisu do Gạlil Prodes reakʼ sanam jaegakore dãṛã dãṛãte Jihudikoakʼ sunạgogkore cetʼakoe ehopʼena. Ona chaḍa uni do serma raj reakʼ bhage sombat porcar ar hoṛkoakʼ sanam lekan rog bighin ar ruạ hasokoe bogeyetʼtako tahẽkana.

²⁴ Uniyakʼ katha do Siriạ disạm reakʼ sanam jaegakore pasnao idiyena. Ar hoṛko do ạḍi lekan rog bighinte sasetokʼkanko, bhut capaṛ akawatʼko, mirgi ar mitʼ kaṛ gocʼ rogteko jạbun akanko Jisu ṭhenko ạguketʼkoa. Ar uni do onko sanamkoe bogeketʼkoa.

²⁵ Ar Gạlil, Dikapoli, Jerusalem, Jihudạ ar Jordan gaḍa hanasakoren ạḍi gadel hoṛ do Jisuko pańja idikedea.