Mathae 3 - সান্তালী বাইবেল

Johan bạbạptisicʼakʼ porcar

¹ Onako dinre Johan bạbạptisicʼ do Jihudạ reakʼ hahaṅkar jaegakore hecʼkate nonka menkate porcare ehopʼena,

² “Mon ạcurtape, ente serma raj do sorakana.”

³ Nui Johan reaṅge Jesaea nạbi doe roṛletʼa; enkathae, “Hahaṅkarre mitʼṭen hohokạnicʼ reakʼ aṛaṅ, ‘Probhu Isorakʼ hor tearkataepe uniyakʼ suṛucʼ horko sojhe kataepe.’ ”

⁴ Johan do ũṭ upʼ reakʼ aṅgrop ar ḍanḍare harta reakʼ paṭheakʼ tahẽkantaea. Uni do pohoko ar bir dumur rasae jometʼkan tahẽkana.

⁵ Unre Jerusalem, goṭa Jihudạ ar Jordan gaḍa dene banar secʼren hoṛko do uni ṭhen hijukʼko ehopʼena.

⁶ Ar tinre onko do apan ạpin kạiko aṅgocketʼtakoa unre Johan do Jordan gaḍareye bạptisketʼkoa.

⁷ Ar ạḍi utạr Phạrusiko ar Sạdukiko hõ bạptisokʼ lạgitʼ acʼ ṭhen hijukʼkane ńelketʼkoa. Uni doe metatʼkoa, “Eya kạrinạṅgin hoponko, Isorakʼ daraekan sạjại khon ńir pharakokʼ lạgitʼ do okoeye cetaoketʼpea?

⁸ Bhagegea, kại khon cetʼleka monpe ạcurakatʼ onkage apeakʼ jionre bhage jo ńel ocoytape.

⁹ Ar Abraham bõsren hoṛ kanape, mente monre alope hudisjoṅa. Ińiń metapekana, noako dhiri khon Isor do Abrahamren bõskoe benao daṛeakoa.

¹⁰ Dare gonḍarege ṭeṅgocʼ do ṭenḍar dohoakana. Oka dare bhage baṅ jokʼ ona do makʼ giḍikʼte seṅgelre khadle ocokʼa.

¹¹ Monpe ạcurakatʼte dakʼteń bạptisetʼpea, menkhan iń tayomte okoeye daraekan uni do iń khon hõe maraṅgea. Iń do uniyakʼ panahi teweńtae lek hõń baṅkana. Uni do sonot Jiu ar seṅgelteye bạptispea.

¹² Uniyakʼ haṭakʼ do tirege menakʼtaea ar khạrại do mońjteye saphaetaea. Ar phosol do acʼakʼ golareye jarwaea, menkhan bhusạ do tishõ baṅ ĩṛĩjokʼ seṅgelreye atar giḍikakʼa.”

Probhu Jisuakʼ bạptisma.

¹³ Inạko oktere Jisu hõ bạptisokʼ lạgitʼ Gạlil khon Jordante Johan ṭhene hecʼena.

¹⁴ Menkhan Johan do noa menkateye mana manakadea, “Ińge coṅ am tite bạptis maṛaṅokʼ jạruṛtiń; ar amge cetʼ iń ṭhenem hijukʼ kana.”

¹⁵ Jisui menkeda, “Niạ dom do nonkage hoyocowakʼme, ente Isorakʼ sana do nonkage purạu lek talaṅa.” Adoe aṛakʼadea.

¹⁶ Ado Jisu bạptiskate dakʼ khone rakapʼen sãote sãote uni samaṅre serma do jhicʼena. Ar Isorren sonot Jiu do parwa leka acʼ cetanre pheḍ hijukʼkane ńelkedea.

¹⁷ Unre serma khon mitʼṭen aṛaṅ ańjomena, “Nuige ińren dulạṛiạ Hopon, one unireń kusi akan.”