Mathae 28 - সান্তালী বাইবেল

Jisui jiwetʼ beretʼen.

¹ Ado Jirạukʼ mãhã tayom, hapta reakʼ pạhil din paha poho jokhecʼ Magdalaren Mạriạm ar uni eṭakʼ Mạriạm do topa ńeńelkin calaoena.

² Unre ackage dhạrti laṛaoena, ente Probhu Isorren mitʼṭen goḍet do serma khone pheḍ hecʼena ar topa duạr khon dhiri ocokʼkate ona cetanreye duṛupʼena.

³ Uniyakʼ muṭhạn do bijli leka ar uniyakʼ kicricʼko do him leka pĩṛĩtʼ pĩṛĩtʼ ponḍ tahẽkana.

⁴ Uni botorte pahradarko do thar tharaokʼko ehopʼena arko gocʼ hoṛ baragena.

⁵ Serma goḍet do maejiue metatʼkinạ, “Aloben botorokʼa, ente ińiń baḍaea, aben do kurus ocolen Jisu ben ńam baṛayede kana.

⁶ Nonḍe do bạnugicʼan. Uni do cetʼlekae menletʼ onkageye jiwetʼ beretʼ akana. Dela, hijukʼte uniye giticʼlen jaega ńel ben.

⁷ Ar usạra senkate uniren celako lạiyako ben uni do gocʼko khone jiwetʼ beretʼ akana ar onko lahate Gạlilteye calakʼ kana. Onko do onḍegeko ńelea. Ar ńelben, iń doń lại lahawatʼbena.”

⁸ Unkin do botor ar rạskạ salakʼ usạrate topa khon oḍokkate Jisuren celako noa khobor lạiyako lạgitʼkin ńir calaoena.

⁹ Ar ackage unkin samaṅre Jisui hecʼenteye joharatʼkinạ. Unkin do sen sorkate jaṅgakin hạṛupʼkedea arkin sewawadea.

¹⁰ Jisui metatʼkinạ, “Aloben botorokʼa; aben do calaokate ińren boehako Gạlilte senokʼ metakoben. Onko do onḍegeko ńeleńa.”

Pahradarkoakʼ lại jạhir

¹¹ Adokin calakʼkan tahẽkan jokhecʼ, ńelpe, pahradarko mod khon adomko do nagrahate senkate one hoyenakʼ reakʼ joto do maraṅ naekekoko lạiyatʼkoa.

¹² Unre naekeko ar murubbiko do jarwa mitʼkateko sopolhawana ar palṭonko aema ṭaka ematʼkoteko metatʼkoa,

¹³ “Ape do menpe, ‘ńindạle jạpitʼ akatʼ tahẽkanre uniren celako hecʼkateko kombṛo idikedea.’

¹⁴ Ar noa katha disạm cakʼlaoyicʼe baḍae lekhan unrele bujhạuaea ar sạjại khonle bańcaopea.”

¹⁵ Unre pahradarko do ṭaka hataokate cetʼlekako men ocolen onkageko lại baṛakeda. Onate teheń hạbicʼ ona katha do Jihudiko talare pasnao akana.

Gạlilre Jisuakʼ ses hukum

¹⁶ Ado Jisu Gạlil reakʼ okaṭakʼ burute calakʼe metatʼko tahẽkan onko gel mitʼ celako do ona buruteko calaoena.

¹⁷ Ar onḍe Jisuko ńelkede khan uniko sewawadea, menkhan adomko do digdhạ hecʼatʼkoa.

¹⁸ Unre Jisu do hecʼsorkateye metatʼkoa “Serma ar dhạrti reakʼ sanam ektiạri do iń ṭhen emakana.

¹⁹ Onate sanam jạtren hoṛko ṭhen calakʼpe ar ińren cela hoyocokope. Ar Baba, Hopon, Sonot Jiu ńutumte bạptiskope.

²⁰ Ar okakoń hukum akatʼpe onako doho cetʼakope. Ńelpe, jug mucạtʼ hạbicʼ iń do ape tulucʼ minạńa.