Mathae 27 - সান্তালী বাইবেল

Pilạt samaṅre Probhu Jisu

¹ Ado setakʼen khan maraṅ naekeko ar murubbiko do Jisu goje reakʼko goṭakeda.

² Onko do Jisu tolkateko idikedete disạm cakʼlaoyicʼ Pilạt ṭhenko soprotkedea.

Jihudạ reakʼ gujukʼ

³ Ar bạirikoakʼ tireye soprotlede Jihudạ do Jisuko bicạr dusikede khan ạḍi ãṭe kastaoena. Uni do maraṅ naeke ar murubbiko ona pegel rupạ ṭaka ruạṛatʼkoteye metatʼkoa,

⁴ “Kại akadạń, ente bin dusạnicʼ gocʼ ocoye lạgitʼ iń soprot akadea.” Onkoko metadea, “Onate aleakʼ do cetʼ? Amge ńeljoṅme.”

⁵ Unre Jihudạ do ona ṭaka mundilre capatʼ giḍi oṭokateye calaoena are pạsi gocʼena.

⁶ Ar maraṅ naekeko do ona ṭaka halaṅkateko menkeda, “Mundil reakʼ sundukre noa doho do baṅ ṭhikokʼa, ente noa do mãyãm reakʼ dam kana”

⁷ Ado solha mitʼkate ona ṭakate upriạ hoṛ topako lạgitʼ kuṅkạlakʼ mitʼṭecʼ goḍako kirińkeda.

⁸ Onate teheń hạbicʼ ona goḍa do mãyãm reakʼ goḍako metakʼkana.

⁹ Noate Jirimiạ nạbi hotete roṛlenakʼ katha purạuena: “Onko do pegel rupạ ṭakako hataokeda. Noa ṭaka do uniyakʼ dam kana. Israelko do uni lạgitʼ noa damko ṭhik dohoakatʼ tahẽkana.

¹⁰ Probhu Isor cetʼlekae hukumletʼ tahẽkan onkage onko do kuṅkạl reakʼ goḍa lạgitʼ ona ṭakako emkeda.”

Probhu Jisuakʼ bicạr

¹¹ Jisu do disạm cakʼlaoyicʼ Pilạt samaṅreko teṅgokedea. Unre Pilạt do Jisui kulikedea, “Am do cetʼ Jihudikoren raj kanam?” Jisui roṛ ruạṛkeda, “Am do ṭhikgem meneda.”

¹² Maraṅ naekeko ar murubbiko aemako dusikedea menkhan Jisu do cetʼ hõ bae roṛ ruạṛleda.

¹³ Unre Pilạt do uniye metadea, “Tinạkʼko dusiyetʼme kan ona do cetʼ bam ańjomeda? Menkhan Jisu do mitʼṭecʼ katha hõ bae roṛ ruạṛleda.

¹⁴ Onate disạm cakʼlaoyicʼ do ạḍiye hahaṛayena.

Jisu do gujukʼ sạjạiye ńametʼ

¹⁵ Disạm cakʼlaoyicʼ do bańcaokʼ porobre hoṛkoakʼ kusileka jaoge mitʼṭen kạidiye aṛakʼede kan tahẽkana. Ar noage uniyakʼ cạli do tahẽkantaea.

¹⁶ Ona jokhecʼ Barabbako metae mitʼṭen kạidiye tahẽkana.

¹⁷ Ado hoṛkoko jarwayen khan Pilạt do onkoe kuliketʼkoa, “Cetʼpe khojkana? Ape ṭhen okoeṭakʼ iń aṛagea, Barabba, se Mạsiko metae Jisu?”

¹⁸ Ente Pilạt doe baḍaekan tahẽkana, onko do hiskạ iạte Jisuko soprot akadea.

¹⁹ Ado Pilạt tinre bicạr duṛupʼakʼreye duṛupʼ akan tahẽkana unre uniren oṛakʼ hoṛ do kathae roṛgotʼkada, “Uni dhoromicʼ do jãhãnakʼ alom cekayea, ente uni iạte teheń kukmũte ạḍi duk iń ńam akada.”

²⁰ Menkhan maraṅ naekeko ar murubbiko do hoṛkoko rạmjạuketʼkoa jemon Barabbako khoje ar Jisu do goje reakʼ kathako roṛ.

²¹ Tayomte disạm cakʼlaoyicʼ do hoṛkoe kuliketʼkoa, “Nukin bar hoṛ modre okoeṭakʼiń aṛakʼapepe khojkana? Onkoko menkeda, “Barabbage.”

²² Unre Pilạte metatʼkoa, “Enḍekhan Mạsiko metae Jisu doń cekaea?” Onkoko menkeda, “Kuruskae me.”

²³ Pilạte metatʼkoa, “Cedakʼ, cetʼe dos akatʼte?” Menkhan onko do arhõ ãṭ aṛaṅte hohoate memenko ehopʼena, “Uni do kuruskae me.”

²⁴ Pilạt do cetʼ hõ bae dhejeda bickom arhõ gulmal hoyokʼ kane ńelketʼ khan dakʼ hataokate hoṛko samaṅre ti ạbukenteye menkeda, “Nui hoṛakʼ mãyãm lạgitʼ iń do bạń dạyikokʼa; apege ńeljoṅpe.”

²⁵ Sanamkoko roṛ ruạṛadea, “Ale ar aleren gidrạkoge uniyakʼ mãyãm reakʼ dạyikle hoyokʼa.”

²⁶ Unre Pilạt do Barabbageye aṛakʼatʼkoa, menkhan Jisu do cạbuk baṛakate kuruskae lạgitʼe soprotkedea.

Sipạhikoko siṛogaekan

²⁷ Unre disạm cakʼlaoyicʼ Pilạtren palṭonko do oṛakʼ bhitrite Jisuko aderkedea ar goṭa palṭon dolrenko Jisu beṛhaeteko jarwaketʼkoa.

²⁸ Onko do Jisuakʼ kicricʼko totʼkeda ar jeṅgetʼ arakʼ aṅgropko horokʼadea.

²⁹ Ar jạnum nạ̃ṛĩ reakʼ mukuṭ galaṅkate bohokʼreko horokʼadea, ar jojom tire mitʼṭecʼ ṭheṅgako sapʼadea. Ona tayom ikhṛumkate siṛogateko metadea, “Johar Jihudikoren raj.”

³⁰ Onko do hoṛmoreko thoadea ar ona ṭheṅga hatao ruạṛkate bohokʼreko dal daladea.

³¹ Adoko siṛog baṛawade khan horokʼakʼko totʼketʼtaea ar acʼakʼ kicricʼ horokʼadete kuruskae lạgitʼko idikedea.

Kurus cetanre Probhu Jisu

³² Ado onḍe khonko oḍok hijukʼkan tahẽkanre palṭonko do Kureni nagraharen Simon ńutuman mitʼṭen hoṛko ńamkedea. Ar Jisuakʼ kurus gokʼ iditae lạgitʼko sapʼ paṭetʼkedea.

^33-34 Onko do ‘Golgatha’ mane do ‘bohokʼ khạpriko’ metakʼ jaega ṭhenko hecʼen khan Jisu do haṛhatʼ sisir mesalakatʼ darkha rasa ńũi lạgitʼko emadea. Ar Jisu onae cakha ạikạuketʼ khan ńũńũ bae rebenlena.

³⁵ Ado Jisuko kuruskede khan palṭonko do gulibãṭkate uniyakʼ kicricʼko hạṭińana.

³⁶ Ar duṛupʼkate onḍe horhoyeko ehopʼena.

³⁷ Onko do Jisuakʼ bohokʼ cetanre noa dos olakʼko bạisạukeda, “Nui do Jisu, Jihudikoren raj.”

³⁸ Ar barea dạku hõ Jisu sãoteko kurusketʼkinạ, mitʼ do uni jojomsa aṛere ar eṭagicʼ do leṅgasare.

³⁹ Ar ona horte parom calakʼkanko do bohokʼ ruku rukute Jisu siṛogadeteko metadea,

⁴⁰ “Eya mundil dhaṅ dhasericʼ ar pe mãhãte benaoicʼ! Enḍekhan ńitokʼ apnarte bańcaokʼme. Isorren Hopon kan khanem enḍekhan kurus khon pheḍ hijukʼme.”

⁴¹ Maraṅ naekeko ar sostor baḍaeko ar murubbiko hõ siṛogadeteko menkeda,

⁴² “Uni do eṭakʼkoe bańcaoetʼko tahẽkana; acʼ do bae bańcao daṛeakʼkana; Israelkoren raj kanae men khan, ńitokʼ kurus khone pheḍ hijukʼma. Enḍekhan ale hõ unirele pạtiạukʼa.

⁴³ Uni do Isorreye bhorsa akana; ńitokʼ Isor unire kusiye tahen khan enḍekhane bańcaoema. Uni ma apnarte Isorren Hopone ńumugokʼ kan tahẽkana.”

⁴⁴ Ar uni sãoteko kurusletʼkin dạku hõ onkage kin siṛogadea.

Probhu Jisuakʼ gujukʼ

⁴⁵ Enhilokʼ tikin gelbar baja khon pe baja hạbicʼ goṭa disạm do ńutge tahẽyena.

⁴⁶ Khan pe baja okte Jisu do ãṭ aṛaṅte hohoateye menkeda, “Eloi Eloi Lama Sabakthani,” metakʼme, “E ińren Isor, E ińren Isor, cedakʼem bạgi giḍiwạdińa?”

⁴⁷ Onḍe teṅgo akan tahẽkanko modren adom hoṛ do noa katha ańjomteko menkeda, “Uni do Eliại hohoae kana.”

⁴⁸ Onko modren mitʼ hoṛ do ńir senente mitʼṭecʼ spońj hataokate sirkạreye topokeda ar ṭheṅgare gutukateye cepecʼadea.

⁴⁹ Eṭakʼko doko menkeda, “Hape se ńellege bon, uni bańcaoe lạgitʼ Eliại hijukʼ kana se baṅa.” (Mitʼ hoṛ do borlome hataokeda ar kokhareye sobokʼkede khan dakʼ ar mãyãm oḍokena.)

⁵⁰ Jisu do arhõ ãṭ aṛaṅteye hohokeda ar jiwi oḍokentaea.

⁵¹ Unre mundil reakʼ orwal do coṭ khon pheḍ hạbicʼ oṛecʼente bar hạṭińena; ar dhạrti do dal dalaoena ar lạṭu lạṭu dhiriko paṛakʼena.

⁵² Ar adomakʼ topako jhicʼenate ạḍi utạr jạpitʼ akatʼ sonot hoṛkoakʼ hoṛmo do beretʼena.

⁵³ Jisu gocʼko khone jiwetʼ beretʼen khan onko do topa khon oḍokkate sonot nagrahateko boloyena. Ar ḍher hoṛko ṭhenko ńel ocoyena.

⁵⁴ Subedar ar uni tulucʼ Jisuko horhoyede tahẽkanko do dhạrti laṛao ar eṭakʼ ghoṭnako ńelkate ạḍi bạṛicʼko botorena arko menkeda, “Sạrige uni do Isorren Hopongeye tahẽkana.”

⁵⁵ Onḍe do aema maejiuko hõ pharakre teṅgokate jotowakʼko ńeńelkan tahẽkana. Onko do Jisu sapʼsorae lạgitʼ Gạlil khon soṅgeteko hecʼlena.

⁵⁶ Onko modre Magdalaren Mạriạm, Jakob ar Josephren eṅgat Mạriạm ar Sabdaeren hopon Jakob ar Johantekinren eṅgat hõe tahẽkana.

Probhu Jisuakʼ topa

⁵⁷ Ado ạyupʼen khan Arimạthiạren Josephko metae mitʼṭen kisạ̃ṛ hoṛ do onḍeye hecʼena. Uni hõ Jisuren celae hoyakan tahẽkana.

⁵⁸ Uni do Pilạt ṭhen senkate Jisuakʼ mạ̃ṛĩye koekeda. Ar Pilạt do mạ̃ṛĩ emae lạgitʼe hukumkeda.

⁵⁹ Joseph do Jisuakʼ mạ̃ṛĩ hataokate sapha musnạ kicricʼteye poṭomkeda,

⁶⁰ ar cạṭạnireye kholao dohoakatʼ acʼakʼ nãwã topareye baekada. Ar topa duạrre mitʼṭecʼ maraṅ okocʼ dhiri guṛgạu idikateye esetʼ oṭokada.

⁶¹ Menkhan Magdalaren Mạriạm ar uni eṭagicʼ Mạriạm do ona topa samaṅrege kin duṛupʼ tahẽyena.

Topa horhoko

⁶² Ado dosar hilokʼ, metakʼme sapṛaokʼ din tayom hilokʼ maraṅ naeke ar Phạrusiko do Pilạt ṭhen senkateko menkeda,

⁶³ “Hujur, disạkedale, uni bulạuicʼ do jiwetʼ tahẽkanreye menleda, ‘pe mãhã khangeń jiwetʼ ruạṛokʼa.’

⁶⁴ Onate hukum emokʼme pe mãhã hạbicʼ jemon topa do kajakte horhokʼ. Ar baṅkhan uniren celako hecʼkate uniyakʼ mạ̃ṛĩko kombṛo iditaea ar hoṛkoko lạiyakoa ‘Uni do gocʼko khone jiwetʼ beretʼ akana.’ Ar onka hoylen khan pạhilakʼ bulạu khon tayomakʼ bulạu do artetʼge bạṛicʼ hoyokʼa.”

⁶⁵ Unre Pilạt do onkoe metatʼkoa, “Pahradarko idikope ar daṛeakʼ bhor horho reakʼ bebostaepe.”

⁶⁶ Adoko calaoente dhiri cetanreko mohor chap oṭowada ar kajakte horhoe lạgitʼ pahradarkoko dohoketʼkoa.