Mathae 26 - সান্তালী বাইবেল

Probhu Jisu goje reakʼ soṛojontro

¹ Ado noako kathae mucạtʼketʼ khan Jisu do acʼren celakoe metatʼkoa,

² “Baḍaegeape bar din tayom khange bańcaokʼ porob do hoyokʼa, ar Manwa Hopon do kuruskae lạgitʼko soprotea.”

^3-4 Unre maraṅ naekeko ar Jihudikoren murubbiko do Kaeaphako metae maraṅ naekeakʼ oṛakʼreko jarwa mitʼena, ar Jisu hape hapete sapʼkate goje reakʼ phundiko aṭaokeda.

⁵ Menkhanko menkeda, “Porobre do babo onkaea; baṅkhan disạm hoṛko talare gulmal ehopʼ botejokʼa.”

Maejiu sunume ojokʼade

⁶ Jisu do Bethaniạre murhucʼ jom rugi Simonakʼ oṛakʼreye tahẽkanre mitʼṭen maejiu do uni ṭhene hecʼena.

⁷ Ar mitʼṭecʼ ponḍ dhiri reakʼ cukạkʼre ạḍi damanakʼ mahkaokʼ sunume ạgu darakeda. Ar Jisu tinre jojome duṛupʼ akan tahẽkan unre uni do ona mahkaokʼ sunum bohokʼreye duladea.

⁸ Ona ńelte celako do edreyenteko menkeda, “Nunạkʼ damanakʼ jinis do cedakʼ nosṭo giḍikakʼ hoyokʼ kana?

⁹ Noa ma damtege coṅ ạkhrińkokʼ ar reṅgecʼ orecʼko emdaṛekeko.”

¹⁰ Jisu onae baḍaeketʼ khan onkoe metatʼkoa, “Nui do cedakʼpe mon duk ocoyede kana? Uni do iń lạgitʼ bhageakʼgeye kạmi akada.

¹¹ Ente reṅgecʼ orecʼkoma jaoge ape tulucʼ menakʼko, menkhan iń do jao okte bape ńameńa.

¹² Uni do hoṛmore mahkaokʼ sunume dulạdińte topayiń lạgitʼe sapṛaoe edeńkana.

¹³ Sạrigeń metapekana, dhạrti reakʼ jãhã jaegarege bhage sombat porcarokʼ, onḍege nui maejiue kạmiakatʼ reakʼ katha hõ disại lạgitʼ lại torakʼa.”

Pegel ṭaka reakʼ laloc

¹⁴ Unre gelbar celako modren Jihudạ Iskạriotko metae cela do maraṅ naekeko ṭhen senkateye metatʼkoa,

¹⁵ “Apeakʼ tire Jisuń soprot lekhan cetʼpe emạńa?” Unre maraṅ naekeko do pegel rupạ ṭaka lekhawadeteko emadea.

¹⁶ Ona tayom khon Jihudạ do Jisu soprote lạgitʼ ạte ńam baṛayetʼ tahẽkana.

Bańcaokʼ porobre celako sãote

¹⁷ Ado bin khạmiyanakʼ piṭhạ porob reakʼ pạhil dinre celako do Jisu ṭhen hecʼkateko menkeda, “Sen-parom porob reakʼ bhoj do okarele tearama mentem menjoṅ kana?”

¹⁸ Jisui metatʼkoa, “Naṅgrahate calaokate uni hoṛ metaepe, Gurui meneda, ‘ińakʼ okte do sorakana. Iń do ińren celako tulucʼ amakʼ oṛakʼre bańcaokʼ porobiń porobokʼa.’ ”

¹⁹ Onate celako do Jisui hukumatʼko tahẽkan leka bańcaokʼ porob reakʼ bhojko tearkeda.

²⁰ Ado ạyupʼen khan Jisu do onko gelbar celako tulucʼ jojome duṛupʼena.

²¹ Arko jojomkan tahẽkanre uni doe metatʼkoa, “Sạrigeń metapekana, ape modre mitʼ hoṛ do bạirikoakʼ tireye soprotińạ.”

²² Unre celako do ạḍiko bhabnayente mimitʼ hoṛ Jisu kuliyeko ehopʼena, “E Probhu Isor uni do cetʼ iń kạnạń?”

²³ Uniye roṛ ruạratʼkoa, “Iń tulucʼ bạṭire okoe tiye topoyetʼkan unige iń doe soprotińạ.

²⁴ Manwa Hopon reaṅ sonot sostorre okaleka olakan onkage uni doe gujukʼa, menkhan uni hoṛre do hae hae, okoe bạirikoakʼ tire Manwa Hopone soprot ocoye! Uni do aloe janamlen khange honaṅ boge hoykokʼtaea.”

Probhu kedokʼ

²⁵ Ado okoe bạirikoakʼ tire Jisui soprot ocoye lạgidokʼkan tahẽkan uni Jihudại menkeda, “E Guru, uni do cetʼ iń kạnạń?” Jisu do uniye metadea, “Am do ṭhikgem meneda.”

²⁶ Adoko jojom kan tahẽkanre, Jisu do piṭhạ halaṅkateye bhorada. Ar kecakʼkate celako ematʼkoteye menkeda, “Ne ataṅpe ar jompe, noa do ińakʼ hoṛmo kana.”

²⁷ Inạ tayom bạṭi halaṅkate gun manao joharkate ematʼkoteye, metatʼkoa, “Ne, noa reakʼ ńũiype sanamko,

²⁸ ente noa do bondobos reakʼ ińakʼ mãyãm kana, oka do ạḍi hoṛko ńutumte jorokʼkan kại ikạkʼ lạgitʼ.

²⁹ Ińiń metapekana, ińren Babawakʼ rajosṭire ape tulucʼ nãwãnakʼ darkha rasa ạuriń ńũi hạbicʼ ńit khon noa do ar bạń ńũiya.”

³⁰ Ado mitʼṭecʼ sarhao sereńate onko doko oḍokente Jạitun buruteko rakapʼena.

Patras Jisui baṅekan

³¹ Unre Jisui metatʼkoa, “Niạ ńindạ ape jotoge ińrepe tạkijokʼa. Sonot sostorre ol akana, ‘gupiyicʼ iń mageya, enḍekhan palren bhiḍikoko chirchạturokʼa.’

³² Menkhan ińiń jiwetʼ beredokʼ tayom iń do ape lahate Gạlilteń calakʼa.”

³³ Unre Patras doe roṛ ruạṛadea, “Amre jotokogeko tạkicʼlenre hõ iń do ohogeń tạkicʼlena.”

³⁴ Jisu do uniye metadea, “Sạrigeń metamkana, niạ ńindạge sim sạnḍi ạuriye ragre am do pe dhaoem baṅeńa.”

³⁵ Patrase menkeda, “Am saõte gujukʼ hoyokʼtińre hõ iń do ohogeń baṅlema.” Ar eṭakʼ celako hõ onka lekako menkeda.

Jisu do Gethsemane bagwanreye koejoṅkan

³⁶ Unre Jisu do onko tulucʼ Gethsemaneko metakʼ mitʼṭecʼ jaegate senkate celakoe metatʼkoa, “Iń do onḍe senkate tin hạbicʼ iń koejoṅ unhạbicʼ ape do nonḍe duṛupʼ hataṛokʼpe.”

³⁷ Noa menkate uni do Patras ar Sabdaeren banar hopon soṅge toraketʼkinteye calaoena. Ar bhabnate uniyakʼ mon do dhak dhakaokʼ ehopʼentaea.

³⁸ Uniye metatʼkoa, “Gujukʼ dạkhil jiwi lokʼkantińa. Ape do onḍege tahẽ hataṛokʼpe ar iń tulucʼ jagwar akae tahenpe.”

³⁹ Khan laha ńokʼ senkate uni doe taberena ar koeketʼteye menkeda, “E Baba, hoedaṛeakʼ khan noa duk reakʼ bạṭi do iń khon pharakokʼma. Enhõ ińiń menjoṅkan leka do baṅ, bickom amakʼ sana lekage baṛe hoyokʼma.”

⁴⁰ Inạ tayom acʼren celako ṭhene hecʼen khan jạpitʼ akatʼe ńelketʼkoa. Uni do Patrase metadea, “Iń tulucʼ cetʼ mitʼ ghonṭa hõ jagwar bape tahẽ daṛeada?

⁴¹ Jagwar tahenpe ar koejoṅpe jemon biḍạure alope paṛaokʼ. Jiure sana menakʼgea, menkhan hoṛmo do nijorgea.”

⁴² Uni do ruạṛ senkate dosar dhao koeketʼteye menkeda, “E Baba, noa bạṭi iń ṭhen khon baṅ ocogokʼ khan begor onań ńũite, enḍekhan amakʼ sana lekage baṛe hoyokʼma.”

⁴³ Adoe ruạr hecʼen khan arhõ jạpitʼ akatʼe ńamketʼkoa, ente onko do dudṛumte ạḍiko laṅga akan tahẽkana.

⁴⁴ Uni do arhõe bạgi oṭowatʼkote tesar dhao senkate inạ kathageye koekeda.

⁴⁵ Ar celako ṭhen hecʼkateye metatʼkoa, “Ape do ńit hõpe jạpitʼ jirạu joṅkana? Ńelpe, okte do seṭerena; Manwa Hopon do kại hoṛkoakʼ tireko soprotea.

⁴⁶ Ma beretʼpe, dela bon calakʼa. Ńelpe, bạirikoakʼ tire okoeye soprotiń uni doe seṭerena.”

Bạirikoakʼ tire Probhu Jisu

⁴⁷ Jisui roroṛkan tahẽkanrege, ńelpe, Jihudạ do onḍeye hecʼena. Uni do gelbar celako modren mitʼ hoṛe tahẽkana. Uni sãote ạḍi utạr hoṛ do tarwaṛe ar ṭhengawanteko hecʼena. Onko do maraṅ naekeko ar murubbikoko kol akatʼko tahẽkana.

⁴⁸ Jisu bạirikoakʼ tire okoeye sapʼ ocoye uni do onko tulucʼ mitʼṭecʼ cinhại ṭhik dohoakatʼ tahẽkana; uni doe metatʼko tahẽkana, “Jãhãeṭakʼgeń cokʼae, uni kangeae, ape do unigepe sabeya.”

⁴⁹ Onate Jihudạ do Jisu ṭhen hecʼkateye menkeda, “Johar Guru,” Ar noa menkateye cokʼadea.

⁵⁰ Jisu do uniye metadea, “E gate, okaṭakʼ lạgitʼem hecʼakan, ma onkaeme.” Ar soṅge soṅgete onko hoṛ do hecʼkate Jisuko sapʼkedea.

⁵¹ Jisu soṅgete tahẽkanko modren mitʼ hoṛ do acʼakʼ tarwaṛeye oḍokkeda ar maraṅ naekeren gutiyakʼ mitʼ luture heseketʼtaea.

⁵² Unre Jisui metadea, “Amakʼ tarwaṛe do khapre bhoraokakʼme. Ente tarwaṛe sasapʼko do jotoge tarwaṛeteko gujukʼa.

⁵³ Am do cetʼ bam moneyakʼ kana, ińren Babań hohoae khan ńitge hajar hajar serma goḍetko cetʼ bae kolạńạ? Enḍekhan cekate sostorko reakʼ katha do purạukʼa?

⁵⁴ Sostorre ma coṅ olge menakʼ, noako hoyokʼ do jạruṛgea.”

⁵⁵ Uni do gadel hoṛkoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawante iń sasapʼpe hecʼakana? Iń ma coṅ jaoge mundilre duṛupʼkateń cetʼako kan tahẽkan, ar unrema bacope sapʼlediń.

⁵⁶ Menkhan noa joto do hoyena jemon nạbiko reakʼ olakʼko purạukʼ.” Unre celako do Jisuko ńir bạgiyadea.

Probhu Jisu maraṅ bạisi samaṅre

⁵⁷ Ado okoeko Jisuko sapʼlede onko do maraṅ naeke Kaeapha ṭhenko idikedea. Onḍe do sostor baḍaeko ar murubbikoko jarwa akan tahẽkana.

⁵⁸ Patras do pharak pharakte maraṅ naekeakʼ raca hạbicʼ Jisui pańja idikedea ar mucạtʼ hạbicʼe ńela mente bhitrite bolokate sipạhiko sãoteye duṛupʼ panteyena.

⁵⁹ Unre maraṅ naekeko ar maraṅ bạisiren sanam hoṛko do Jisu goje lạgitʼ eṛe gohakoko ńam baṛayetʼko tahẽkana.

⁶⁰ Ar aema eṛe gohako hõko hecʼlengea, menkhan onko do ṭhik leka goha bako ńamleda. Ado mucạtʼre bar hoṛ hecʼkate kin menkeda,

⁶¹ “Nui hoṛe men akada, Isorakʼ mundil iń dhaṅ dhasera ar pe dinte arhõń benao ruạṛa.”

⁶² Unre maraṅ naeke do teṅgoyente Jisui metadea, “Am do cetʼ jãhãnakʼ bam roṛ ruạṛa? Am upạrte nukin do cetʼ gohakin emeda?”

⁶³ Menkhan Jisu do hapegeye tahẽyena. Maraṅ naeke do arhõe metadea, “Jiwetʼ Isorreń kiriạ ocoyetʼme kana, lạiyaleme, am do Mạsi, Isorren Hopon kanam se baṅ?”

⁶⁴ Jisu do uniye metadea, “Hẽ am do ṭhikgem menakada; enḍekhan arhõń metapekana, ńit khon Manwa Hopon do sanam daṛeanicʼ Isorakʼ jojomsa aṛere duṛupʼakan ar rimilte hijukʼkanpe ńelea.”

⁶⁵ Khange maraṅ naeke do acʼakʼ kicricʼe oṛecʼketʼteye menkeda “Nui do Isore henosta akawadea. Gohako reakʼ do ar cetʼ jạruṛa bona? Ńitge coṅ ape hõpe ańjomketʼ, uni do Isore henostawae kana.

⁶⁶ Cetʼpe bujhạueda?” Onkoko roṛ ruạṛkeda, “Nui do gocʼ ocokʼ lek kanae.”

⁶⁷ Unre mẽtʼãhãreko thoadea, arko kuhạukedea arko thapakedea.

⁶⁸ Adoko metadea, “E Mạsi, mase lạime, okoeye dalketʼmea?”

Patras do Jisui baṅekan

⁶⁹ Unre Patras do bahre racareye duṛupʼ akan tahẽkana. Ar mitʼṭen kạ̃ṛmĩ kuṛi do hecʼkateye metadea, “Am hõ coṅ Gạlilren Jisu tulucʼem tahẽkan.”

⁷⁰ Menkhan Patras do jotoko samaṅre baṅketʼteye menkeda, “Am cetʼem menetʼkan ona do bạń baḍaea.”

⁷¹ Inạ tayom Patras do duạr ṭhene oḍok senena. Uni ńelte eṭagicʼ kạ̃ṛmĩ hõ onḍenko hoṛkoe metatʼkoa, “Nui hoṛ hõ Nasaretren Jisu sãoteye tahẽkana.”

⁷² Unre Patras doe kiriạyena ar baṅketʼteye menkeda, “Uni hoṛ do baḍae hõ bạń baḍae akadea.”

⁷³ Mitʼ ghạṛi tayom onḍe teṅgo akan tahẽkanko hõ Patras ṭhen hecʼkateko menkeda, “Khạṭige am hõ onko modren kangeam; ente amakʼ kathategem sapʼocokʼ kana.”

⁷⁴ Unre Patras doe sarapana ar kiriạyente memene ehopʼena, “Uni hoṛ do baḍae hõ bạń baḍae akadea.” Ar unrege saṭmente sim sạnḍiye rakʼgotʼkeda.

⁷⁵ Unre Patras do Jisui metade tahẽkan kathae disạkeda, “Sim sạnḍi ạuriye ragre pe dhaoem baṅeńa.” Ar bahrete oḍok senkate hũk hũke rakʼkeda.