Mathae 24 - সান্তালী বাইবেল

Jug mucạtʼ reakʼ dinko

¹ Jisu mundil khone oḍok calakʼkan tahẽkanre celako do mundil reakʼ bhitko udukʼae lạgitʼ uni ṭhenko hecʼ sorena.

² Unre Jisui metatʼkoa, “Ape ma noakope ńeletʼ, menkhan ińiń metapekana, nonḍe do mitʼṭecʼ dhiri hõ eṭakʼ dhiri cetanre baṅ tahena, joto do rạputʼ giḍikʼa”

Besuluk ar santao reaṅ

³ Jisu Jạitun burureye duṛupʼ akan tahẽkanre celako do uni ṭhen hecʼkate hape hapeteko metadea, “Lạiyaleme, noako do tis hoyokʼa ar oka lekan cinhạko hotetele bujhạu daṛeakʼa amakʼ hijukʼ ar jug mucạdokʼ reakʼ okte do seṭer akana mente?”

⁴ Jisui roṛ ruạṛatʼkoa, “Men sontorokʼpe, okoe hõ jemon aloko bulạupe,

⁵ ente ḍher horge in ńutumte hecʼkateko mena, ‘Iń doń Mạsi kana,’ ar ḍher hoṛko bulạukoa.

⁶ Ape do lạṛhại reakʼ saḍekope ańjomma. Menkhan sontorokʼpe! Noate alope botorokʼa, ente noako do hoyokʼgea; menkhan unre hõ mucạtʼtetʼ do ạuriyakʼa.

⁷ Mitʼ jạtrenko do eṭakʼ jạtrenko upạrte ar mitʼ rajosṭi do eṭakʼ rajosṭi upạrteko lạṛhạiya. Jaega jaegakore akal hoyokʼa ar dhạrti laṛaokʼa.

⁸ Menkhan noako do eken bedon reakʼ ehopʼkana.

⁹ “Unre santaope lạgitʼko soprotʼpea arko gocʼpea. Iń iạte sanam hoṛko hirkhạwapea.

¹⁰ Unre ạḍi hoṛko tạkijokʼa ar mitʼ hoṛ do eṭakʼ hoṛe soprotea are hirkhạwaea.

¹¹ Ạḍi utạr eṛe nạbiko oḍok hijukʼa ar aema hoṛko bulạukoa.

¹² Ar bedhoromge ḍherokʼte ḍher hoṛkoakʼ dulạṛ do reaṛokʼtakoa.

¹³ Menkhan mucạtʼ hạbicʼ okoeye ṭarhao tahen uni do bańcaoe ńama.

¹⁴ Sanam jạtko ṭhen goha emokʼ lạgitʼ serma raj reakʼ bhage sombat do goṭa dhạrtire porcarokʼa ar ona tayom do mucạtʼ hoyokʼa.

Mucạtʼ din reakʼ sasetko

¹⁵ “Daniel nạbi hotete ujạṛ reakʼ hirkhạwakʼ reaṅ oka roṛ akan ona sonot jaegare teṅgo akanpe ńellere (okoeye paṛhaoetʼkan uni doe bujhạuma),

¹⁶ Unre Jihudạre tahenko do buruteko ńir pharakokʼma.

¹⁷ Ar sạṛimre menaeicʼ do oṛakʼ khon jãhãnakʼ hatao lạgitʼ latarte aloe pheḍokʼma.

¹⁸ Okoe khetreye tahen uni hõ acʼakʼ oyonakʼ ạgui lạgitʼ aloe ruạṛma.

¹⁹ Unre bhạrti hoṛmoanko ar gidrạ nunuako kan onkore do hae hae!

²⁰ Koejoṅpe jemon rabaṅ din se jirạukʼ mãhãre dạdạṛ alo hoyokʼtape.

²¹ Unre nunạkʼ bạṛicʼ kosṭo hoyokʼa one oka do dhạrti etohopʼ khon ńit hạbicʼ baṅ hoyakan ar tisge baṅ hoyokʼa.

²² Ona saset reakʼ dinko Isor bae khaṭo lekhan okoe hõ ohoko bańcaolena. Menkhan acʼren bachao hoṛko lạgitʼ Isor do onako dine khaṭo ocoya.

²³ “Unre jãhãegeko metape, ‘ńelpe, Mạsi do nonḍe menaea,’ se ‘hanḍe menaea,’ alope pạtiạuakʼa;

²⁴ ente aema eṛe Mạsi ar eṛe nạbikoko upelokʼa ar maraṅ maraṅ hahaṛa kạmi ar cinhạkoko uduga jemon Isorren bachao akan hoṛkoko bulạu daṛeako.

²⁵ Ńelpe, iń do laharege noakoń lại dohowatʼpea.

²⁶ “Onate hoṛko metape khan, ‘ńelpe, uni do hahaṅkarre menaea,’ alope oḍok calakʼa. Se ‘uni do bhitri oṛakʼre menaea,’ alope pạtiạukʼa.

²⁷ Cetʼleka bijli do purub khon oḍokokʼte pạchim hạbicʼ malkao calakʼ, onkage Manwa Hopon reakʼ seṭerokʼ hõ hoyokʼa.

²⁸ Jãhãrege mạ̃ṛĩ tahen onḍege gidi hõko jarwakʼa.

Manwa Hopon hijukʼ reakʼ

²⁹ “Onako din reakʼ santao tayomge siń cando doe ńutokʼa, ar ńindạ cando do bae terdeja, ipilko hõ coṭ khonko ńurokʼa ar siń cando, ńindạ cando, ar ipilko do bako ṭarhao tahena.

³⁰ Unre Manwa Hopon reakʼ cinhạ do sermare ńelokʼa. Ar dhạrtiren sanam gusṭirenko do dukte koṛamko ceṭagokʼa. Onko do Manwa Hopon daṛe ar ṭhonokante rimilte hijukʼkanko ńelea.

³¹ Ar murukte siṅgạ saḍekʼa ar ona são sãote Manwa Hopon do acʼren goḍetkoe kolkoa. Onko do dhạrti reakʼ mitʼ mucạtʼ khon eṭakʼ mucạtʼ hạbicʼ ar ponon secʼ khon acʼren bachao akan hoṛkoko jarwakoa.

Loa dare khon sikhạuna

³² “Loa dare ńelte cetʼjoṅpe. Ona reakʼ ḍạrko bale ruạṛkate sakam sagen len khangepe baḍae daṛeakʼ kana je setoṅ din do seṭerakana.

³³ Onkage ape hõ noako sanamakʼpe ńellere baḍaepe, Manwa Hopon doe seṭer akana, hẽ duạr ṭhengeye teṅgo akana.

³⁴ Sạrigeń metapekana, tinre noako joto hoyokʼa unre niạ piṛhiren thoṛa hoṛ do bańcaoko tahena.

³⁵ Serma ar dhạrti do cabakʼa, menkhan ińakʼ katha do jaejug hạbicʼ tahena.

Din ar okteko baḍae reakʼ

³⁶ “Menkhan okoe hõ ona din ar ona okte reakʼ do bako baḍaea, sermaren goḍetko hõ baṅ, Hopon hõ baṅ, eken Babageye baḍaea.

³⁷ “Noha oktere cetʼleka hoylen onkage Manwa Hopone hijukʼre hõ hoyokʼa.

³⁸ Ente ḍubạ laha dinkore Noha do jahajre ạuriye bolokʼ hạbicʼ hoṛko doko jom ńũiyetʼ tahẽkana, arko bạhu joṅkan tahẽkana ar jãwãe hõko jãwãeyokʼ kan tahẽkana.

³⁹ Ar ḍubạ dakʼ hecʼkate sanamko ạuriye ạtu idiko hạbicʼ onko do cetʼge bako bujhạu daṛeada. Manwa Hoponakʼ hijukʼ hõ ṭhik onkage hoyokʼa.

⁴⁰ Unre bar hoṛ do goḍarekin tahena; mitʼ hoṛ doe idiocokʼa, ar eṭagicʼ doe bạgi oṭokʼa.

⁴¹ Barea maejiu do jantekin riritʼa; mitʼṭen doe idi ocokʼa, ar eṭagicʼ doe bạgi oṭokʼa.

⁴² “Onate ape do jagwar akae tahenpe, ente bape baḍae hilokʼge aperen Probhu Isor doe hijukʼa.

⁴³ Menkhan noa baḍaekakʼpe, oṛakʼ kisạ̃ṛe baḍaele khan oka pohor kombṛoe hijukʼa, enḍekhan uni do ebhengeye tahẽkokʼa, ar acʼakʼ oṛakʼ do ohogeye bhugạkʼ ocolea.

⁴⁴ Onate ape hõ sapṛao akan tahenpe, ente bape hudisetʼkan ghuṛirege Manwa Hopon doe hijukʼa.

Pạtiạu tahen reaṅ cehaona

⁴⁵ “Uni pạtiạricʼ ar budanicʼ guti doe okoe kana, one okoe acʼren kisạ̃ṛ do guti ar kạ̃ṛmĩko okte nạpitre jomakʼ emakoa mente acʼ gharońjrenko cetanreye dohokede?

⁴⁶ Bhạgangeae uni guti do, one uni kisạ̃ṛtetʼ onkayetʼkane hecʼ ńame.

⁴⁷ Sạrigeń metapekana, unige acʼakʼ menakʼtaeakʼ sanamakʼko cetanreye dohoyea.

⁴⁸ Menkhan, uni bạṛicʼ sordar do acʼakʼ monreye menle khan, ‘ińren kisạ̃ṛ do hijukʼe bilomeda.’

⁴⁹ Ar acʼ sãoten gutiko dadale ehob, ar bulokʼko tulucʼe jom ńũi;

⁵⁰ Enḍekhan guti bae ńel horakatʼ dinre ar bae baḍae akatʼ ghuṛire uni kisạ̃ṛ doe hijukʼa.

⁵¹ Ar unre uni doe makʼ paṛagea ar phạsiạrako tulucʼ bakhrae niṭaea. Onḍe do rakʼjoṅ ar togocʼ ḍaṭa hoyokʼa.