Mathae 23 - সান্তালী বাইবেল

Sostor baḍaeko upạrte Probhu Jisuakʼ katha

¹ Unre Jisu do gadel hoṛko ar acʼren celakoe metatʼkoae,

² “Sostor baḍaeko ar Phạrusiko do ạn-ạriko cecetʼakʼ babotre Moseyakʼ jaegaregeko duṛupʼ akana.

³ Onate jãhãnakʼgeko metape ona kạmipe ar jãhãnakʼgeko hukumape ona senakʼpe. Menkhan onkoakʼ kạmi leka do alope kạmiya, ente onko do mocate okako roṛ kạmite ona bako purạua.

⁴ Onko do hamal hamal bojha tolkate hoṛkoakʼ tarenreko ladea, menkhan ako do kạtupʼte hõ bako laṛao legaea.

⁵ Hoṛko ṭhen ńelocokʼ lạgitʼ onko do sanamakʼko kạmiyeda. Sonot sostor reakʼ olakʼ tạbijkoko lạṭuiyeda ar dhorom ńel ocokʼ lạgitʼ oyonakʼ reakʼ ańcarkore jeleń jeleńko dạsiyeda.

⁶ Ar bhojkore laha jaega ar sunạgogkore asol asol duṛupʼakʼre duṛupʼko kusikʼ kana.

⁷ Onko do hạṭiạ bajarkore johar ocokʼ ar hoṛko ṭhen guru men ocokʼgeko kusikʼkana.

⁸ “Ape do guru mente alope hoho ocokʼa, ente mitʼṭengeae aperen Guru do, ar ape do jotokogepe boeha kana.

⁹ Dhạrtire aperen baba mente okoe hõ alope metakoa, ente mitʼ goṭengeae aperen baba do, uni sermare menayicʼge.

¹⁰ Ạyurko hõ alope ńum ocokʼa, ente aperen ạyuricʼ doe mitʼ goṭengea, uni do Mạsige.

¹¹ Ape modre maraṅicʼ do aperen sapʼdapʼicʼe hoyokʼma.

¹² Okoe acʼteye usulokʼ, uni doe copotʼ ocokʼa ar okoe acʼteye copodokʼ uni doe usul ocokʼa.

Phạsiạrako reaṅ

¹³ “Hae, ape sostor baḍaeko, Phạrusiko ar phạsiạrako do! Ente ape do hoṛko samaṅre serma raj reakʼ duạrpe siń esetʼkakʼ kana. Onare ape hõ bape bolokʼkana ar okoe bolokʼ lạgitʼko kurumuṭukan onko hõ bape bolo ocoakokana.

¹⁴ “Hae, ape sostor baḍaeko, Phạrusiko ar phạsiarako do! Ape do hoṛko ṭhen ńel ocokʼ lạgitʼ jeleń jeleńpe koejoṅ kana, ar eṭakʼ secʼ do rạnḍi maejiukoakʼ oṛakʼ duạrkope jom ujạṛetʼtakoa. Onate ape do artetʼ bạ̃ṛti sạjại hoyokʼtapea.”

¹⁵ “Hae, ape sostor baḍaeko, Phạrusiko ar phạsiạrako do! Eken mitʼ hoṛ apeakʼ dhoromre ạguiye lạgitʼ dhạrti reakʼ oka jaegare bape dãṛãn kana. Ar aperen celae hoylenre uni do ape khon hõ bạ̃ṛti norokre khadlekʼ lekpe hoeocoyedea.

¹⁶ “Hae ape do! Apepe kãṛãgere hõ eṭakʼko horpe udukʼako kana. Arpe menetʼkana, jãhãe mundil ńutumteye kiriạlen khan cetʼ hõ baṅ hoyokʼtaea, menkhan mundil reakʼ sona ńutumteye kiriạlen khan uni do dạyike hoyokʼa.

¹⁷ E lelha ar kãṛãko, okaṭakʼ maraṅa? Sona, se ona mundil, one okaṭakʼ sona do Isor lạgitʼ begar dohoakan?

¹⁸ Ape do arhõpe meneda, pinḍ ńutumte jãhãegeye kiriạlen khan cetʼge baṅ hoyokʼtaea, menkhan jãhãe ona pinḍ cetanre samaṅ akan dãṛẽ ńutumteye kiriạkʼ uni do ona reakʼ dạyike hoyokʼa.

¹⁹ E kãṛãko, okaṭakʼ maraṅa? Ona dãṛẽ se pinḍ, one okaṭakʼ dãṛẽ do Isor lạgitʼ begar dohokʼkan?

²⁰ Onate pinḍ ńutumte okoeye kiriạkʼkan uni do pinḍ ar ona cetan reakʼ jotowakʼ ńutumtegeye kiriạkʼ kana.

²¹ Okoe mundil ńutumteye kiriạkʼkan uni do mundil ar ona bhitrire tahenkạnicʼ ńutumtegeye kiriạkʼ kana.

²² Okoe serma ńutumteye kiriạkʼkan uni do Isorakʼ siṅghạson ar onare tahenkạnicʼ ńutumtegeye kiriạkʼkana.

²³ “Hae, ape sostor baḍaeko, Phạrusiko ar phạsiạrako do! Ape do ṭhik lekage pudina, muhori ar jirạ reakʼ bhag do gel hạṭiń reakʼ mitʼ hạṭińge Isorpe emaekana; menkhan bicạr, mãyã, ar pạtiạr, okaṭakʼ do Moseyakʼ ạn-ạriko reakʼ arhõ jạruṛanakʼ kan ona dope bạgi oṭoakawada. Onate lahateakʼko são sãote tayomakʼko hõ manao lektapea.

²⁴ E kãṛã ạyurko; mitʼṭen sĩkṛĩcʼ dope chakao giḍiyedea, menkhan ũṭ dope utʼgotʼkae kana.

²⁵ “Hae, ape sostor baḍaeko, Phạrusiko ar phạsiạrako do! Ape do thạri bạṭi reakʼ bahretetʼgepe saphayeda, menkhan bhitritetʼ do luluṭ ar bin sambṛaoakʼte perecʼgea.

²⁶ E kãṛã Phạrusiko, lahare ona reakʼ bhitritetʼ sapha maṛaṅpe, inạ khan bahre secʼ hõ saphakʼtapea.

²⁷ “Hae, ape sostor baḍaeko, Phạrusiko ar phạsiarako do! Ape do cunte potao akatʼ topa lekanko kanape, one oka bahre ma mońjge ńelokʼkan, menkhan bhitri do gocʼ hoṛakʼ jaṅ ar joto lekan mạilạte perecʼge.

²⁸ Onkage, ape hõ bahre do hoṛko ṭhen dhorompe ńel ocokʼkana, menkhan bhitri do bạṛicʼ ar kạite perecʼgetapea.

Phạsiạrakoakʼ bicạr

²⁹ “Hae, ape sostor baḍaeko, Phạrusiko ar phạsiạrako do! Ape do nạbikoakʼ topako nãwãtepe tol aroyeda ar dhorom hoṛkoakʼ topakope sajaoeda.

³⁰ Arpe meneda, ‘aleren hapṛamko bidạlrele tahẽlen khan nạbikoakʼ mãyãm joroyre onko são do ohole seletʼkokʼa.’

³¹ Onate apnar upạrte gohape emeda je, ape do nạbikoko khũnletʼkoren hoponko kanape mente.

³² Enḍekhan aperen hapṛamko okaṭakʼko ehopʼ oṭoletʼ ona reakʼ sarecʼakʼ do apege mucạtʼ gotʼkakʼpe baṛe.

³³ “E bińko ar bińkoren hoponko! Cekate norok reakʼ sạjại khonpe bańcaokʼa?

³⁴ Ona iạte iń do nạbiko, ạkilanko, ar sostor baḍaeko ape ṭheniń koletʼkoa. Ar ape do onko modren adomko dope gocʼkoa ar adomko dope kuruskoa. Ar adomko do apeakʼ sunạgogkorepe cạbuktepe dalkoa ar mitʼ nagraha khon eṭakʼ nagrahatepe laga baṛakoa.

³⁵ Onate Habel reakʼ mãyãm khon Borkhiạren hopon Sakariạ reakʼ mãyãm hạbicʼ one sonot jaega ar pinḍ talarepe khũnlede, uni Sakariạ khũn hạbicʼ dhạrtiren tinạkʼ bin dusạnkoko khũn ocoakan onko sanamkoakʼ mãyãm reakʼ dạyikpe hoyokʼa.

³⁶ Sạrigeń metapekana, niạ bidạlren hoṛkoge ona mãyãm reakʼ dạyik doko hoyokʼa.

Jerusalem lạgitʼe dukokʼ kan

³⁷ “E Jerusalem! E Jerusalem! Am do nạbikom khũnetʼkoa ar am ṭhen kol ocokʼkanko do dhiritem tińetʼkoa. Sim eṅga cetʼleka acʼren hoponko acʼakʼ phạ̃kṛạ̃kʼ latarreye guṅgutʼko onkage iń hõ amren hoṛko hạr samṭaokoń menleda, menkhan onko do bako rebenlena.

³⁸ E Jerusalemren hoṛko, apeakʼ oṛakʼ do ujạṛokʼa.

³⁹ Ińiń metapekana, tin hạbicʼ ạuripe men ‘Bhorangeae Probhu Isor ńutumte daraekanicʼ do’ unhạbicʼ ape do ar bape ńel ńameńa.”