Mathae 22 - সান্তালী বাইবেল

Bapla bhoj reaṅ phen

¹ Jisu do sostor baḍaeko cetʼako lạgitʼ arhõ mitʼṭecʼ phene lạiyatʼkoa,

² “Serma raj do nonkan mitʼṭen raj lekana, one okoe do acʼren hopon lạgitʼ bapla bhoje tearketʼ.

³ Ado ona bhojre neota ocoakanko hoho ạguko lạgitʼ acʼren gutikoe kolketʼkoa, menkhan neota akan hoṛko do hijukʼ bako rebenlena.

⁴ Unre uni do arhõ eṭakʼ gutiko noa menkateye kolketʼkoa, ‘ńelpe bhojiń tear akada, ar ińren daṅgra ar posaokoń gur akatʼkoa. Ar ńitokʼ do sanamakʼ sạt akana, ado dela hijukʼ tabonpe.’

⁵ “Menkhan neota akan hoṛko do gutikoakʼ katha bako hetawada; calao baṛayenako, okoe do acʼakʼ khette, okoe do acʼakʼ bạnij beparte.

⁶ Ar sarecʼko do rajren guti sapʼkateko opomanketʼkoa arko gocʼketʼkoa.

⁷ Unre raj doe raṅgaoena ar acʼren palṭonkoe kolketʼkote khũniạhikoe maraoketʼkoa ar onkoakʼ nagrahakoe jeretʼ giḍikatʼtakoa.

⁸ Ado acʼren gutikoe metatʼkoa, ‘bhoj do tear ṭhikgea, menkhan neota ocolenko do noaren lek bako tahẽkana.

⁹ Onate dobạṭiạkore calakʼpe, ar tinạkʼpe ńamko jotoge bapla bhojte hoho ạgukope.’

¹⁰ Unre onko gutiko do horkore oḍok senkate boge bạṛicʼ tinạkʼko ńamketʼko, jotogeko hoho ạguketʼkoa. Ar nonkate bapla oṛakʼ do onko peṛakote perecʼena.

¹¹ “Inạ tayom raj do peṛa ńelko lạgitʼ bhitriteye boloyena,

¹² ar bapla bhoj kicricʼ baṅ horokʼ akatʼ mitʼ hoṛe ńel ńamkedea. Raj do uniye kulikedea, ‘henda ho, bapla bhoj kicricʼ begorte cekate nonḍe dom boloyena?’ Khange uni doe keklesetʼena ar cetʼge bae roṛ ruạṛ daṛeada.

¹³ Unre raj do acʼren gutikoe metatʼkoa, ‘ti jaṅgare tolepe ar bahre ńutre giḍikaepe. Onḍe do rakʼjoṅ ar togocʼ ḍaṭa hoyokʼa.’ ”

¹⁴ Ado mucạtʼre Jisui menkeda, “Ḍher hoṛgeko hoho ocoakana, menkhan bachaoko doko thoṛagea.”

Khajna emokʼ reaṅ

¹⁵ Unre Phạrusiko doko calaoena ar Jisu acʼakʼ kathate cekateko jhạliyea ona reakʼ sopolhako dhurạuena.

¹⁶ Onko do Herod secʼrenko sãote akoren celako uni ṭhenko kolketʼkoa. Onko do Jisuko metadea, “E Guru, alele baḍaea am dom sạri hoṛ kana. Ar Isorakʼ hor reaṅ sạritegem cetʼako kana. Am do okoe hõ bam hetawako kana, ente hoṛkoakʼ mẽtãhã do bam beṅgetʼakʼ kana.

¹⁷ Ado mase lạiyaleme, Moseyakʼ ạn lekate Romren maharaj do cetʼ khajna emae ganokʼgea se baṅa? Am do cetʼem menkea?”

¹⁸ Jisu do onkoakʼ monsubại baḍaeketʼ khane metatʼkoa, “E phạsiạrako, cedakʼpe biḍạuediń kana?

¹⁹ Oka ṭaka khajnape emetʼkan ona udukʼạńpe.” Onko do mitʼṭecʼ Dinarko ạguadea.

²⁰ Unre Jisui metatʼkoa, “Noa muṭhạn ar noa ńutum do okoeyakʼ kana?

²¹ Adoko menkeda, “Romren maharajakʼ.” Jisui metatʼkoa, “Enḍekhan okaṭakʼ maharajakʼ kan ona do maharajge emaepe, ar okaṭakʼ Isorakʼ kan ona do Isorge emaepe.”

²² Noa katha ańjomkate onko doko hahaṛayena ar bạgiyadeteko calaoena.

Jiwetʼ beredokʼ reaṅ

²³ Enhilokʼge adom Sạdukiko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reaṅ do cetʼge bạnukʼa.

²⁴ Onate onko do Jisuko kulikedea, “E Guru, Moseye men akada, jãhãe hoṛ begor gidrạwanteye gocʼlen khan bokottetʼ do hilit erae baplayete dadattetʼ lạgitʼ bõse teṅgokoma.

²⁵ Ale nonḍe do eae boehako tahẽkana. Ar pạhilicʼ do baplakateye gocʼena ar begor gidrạwanrege acʼren oṛakʼ hoṛ do bokottetʼ ṭhene bạgi oṭoadea.

²⁶ Onkage dosaricʼ, tesaricʼ, ar eaeyicʼ boeha hạbicʼ uni maejiuko baplakedea.

²⁷ Ar mucạtʼre uni maejiu hõe gocʼena.

²⁸ Enḍekhan gocʼkoko jiwetʼ beretʼlenre onko eae boehako modre uni maejiu do okoeṭakʼren bạhui hoyokʼa? Onko ma coṅ jotogeko doholede.”

²⁹ Jisui roṛ ruạṛatʼkoa, “Bhuletʼ kanape, ente ape do sostor hõ bape baḍaea, ar Isorakʼ daṛe reaṅ hõ bape baḍaekana.

³⁰ Gocʼkoko jiwetʼ beredokʼ tayom do bạhu hõ bako bạhu joṅa ar jãwãe hõ bako jãwãeyokʼa; onko do sermaren goḍet lekako hoyokʼa.

³¹ Gocʼkoko jiwetʼ beredokʼ reaṅ Isor okae menakatʼ, ona do cetʼ sostorre bape paṛhao akada?

³² Onare ol akana, ‘Ińge Abrahamren Isor, Isahakren Isor, ar Jakobren Isor.’ Menkhan Isor do gocʼkoren Isor doe baṅkana, uni do jiwetʼkoren Isor kanae.”

³³ Noa katha ańjomkate hoṛko do uniyakʼ cecetʼakʼteko hahaṛayena.

Ạn reakʼ maraṅ hukum

³⁴ Jisu do Sạdukikoakʼ mocae bond akatʼtakoa mente Phạrusikoko ańjomketʼ khan onko do mitʼ ṭhenko jarwayena.

³⁵ Onko modren mitʼṭen ạn guru do Jisu biḍạuea menteye kulikedea,

³⁶ “E Guru, Moseyakʼ ạn-ạriko modre joto khon maraṅ hukum do okaṭakʼ kana?”

³⁷ Jisu do uniye metadea, “Sanam khon maraṅ ar jạruṛokʼakʼ hukum do hoyokʼ kana,

³⁸ ‘Probhu amren Isor do, amakʼ goṭa ontorte, goṭa jiwite ar goṭa daṛete dulạṛem.’

³⁹ Ona tayom dosarakʼ do; ‘am aḍepaseren hoṛ apnar leka dulạṛem.’

⁴⁰ Moseyakʼ ạn ar nạbikoakʼ sanam cecetʼakʼ do noa barea hukumrege guṭmitʼ menakʼa.”

Sostor baḍaeko ṭhen Probhu Jisuakʼ kukli

⁴¹ Phạrusiko mitʼ ṭhenko jarwa akan tahẽkanre Jisu do onkoe kuliketʼkoa,

⁴² “Ape do Mạsi reaṅ cetʼpe bujhạueda? Uni do okoe bõsren kanae? Onkoko menkeda, “Dạud bõsren.”

⁴³ Unre Jisui metatʼkoa, “Enḍekhan Dạud do cekate Mạsi do sonot Jiu reakʼ ạyurte Probhu Isor menteye hohoade tahẽkana? Uniye menleda,

⁴⁴ ‘Probhu Isor do ińren Probhui metadea, tin hạbicʼ amren bạiriko amakʼ jaṅga latarre ạuriń dohoko, un hạbicʼ am do ińakʼ jojomsa aṛere duṛupʼme.’

⁴⁵ Enḍekhan Dạud do Mạsige Probhui metaekan khan enḍekhan Mạsi do cekate Dạudren hopone hoydaṛekokʼa?”

⁴⁶ Onko do okoege mitʼṭen katha hõ bako roṛ ruạṛ daṛeadea ar enhilokʼ khon okoege jãhãnakʼ kuliye bako dillakʼa.