Mathae 20 - সান্তালী বাইবেল

Darkha bagwanren kạmiyạko reaṅ

¹ “Serma raj do mitʼṭen oṛakʼ kisạ̃ṛ lekana, one okoe do acʼakʼ darkha bagwanre kạmiyạko lagaoko lạgitʼ paha poho jokhecʼ bahreteye oḍok calaoen.

² Uni do kạmiyạko tulucʼ dinre mimitʼ Dinar kateye rikitketʼte acʼakʼ darkha bagwanteye kolkatʼkoa.

³ Ado baskeakʼ ber okte uni do arhõ bahreteye oḍok senena ar bajarre eṭakʼko ạuṛiyakʼ teṅgo baṛa akane ńelketʼkoa.

⁴ Uni doe metatʼkoa, ‘ape hõ ińakʼ darkha bagwante kạmi lạgitʼ calakʼpe. Iń do hok reakʼ iń emkatapea.’

⁵ Onate onko hoṛ hõ kạmi lạgitʼko calaoena. “Uni kisạ̃ṛ do arhõ tikin ar tarasiń jokhecʼ bahrete senkateye onkakeda.

⁶ Arhõ uni do huḍiń dakʼ lo ber okte oḍok senkate eṭakʼko teṅgo akane ńamketʼko khane metatʼkoa, ‘ạuṛiyakʼ do cedakʼpe teṅgo akana?’

⁷ “Onko doko metadea, ‘okoe hõ kạmire bako lagaoletʼlea.’ “Uni doe metatʼkoa, ‘Do, ape hõ ińakʼ darkha bagwante senkate kạmipe.’

⁸ “Ado ạyupʼen khan darkha bagwanren mạlik do acʼren gutiye metadea, ‘kạmiyạko hoho ạgukom ar tayomtenko khon ehopʼkate lahatenko hạbicʼ mimitʼ mimitʼte kuṛại emakom.’

⁹ “Khan huḍiń dakʼ lo ber oktere okoe do kạmiko dhurạu ocolen onko do hecʼkate mimitʼ Dinarkateko idikeda.

¹⁰ Onate okoeko pạhilre kạmiko ehopʼlen onko do bạ̃ṛtigeko ńama menteko hudiskeda, menkhan onko hõ mimitʼ Dinar kategeko ńamkeda.

¹¹ Onate onko do kisạ̃ṛ upạrte karacʼ kurucʼente memenko ehopʼena,

¹² ‘Ale do goṭa din jharla jhạrli setoṅrele kạmikeda. Menkhan mucạtʼre okoe kạmireko dhurạu ocolen onko do eken mitʼ ghạṛiko kạmikeda, ar ale somangem ematʼkoa.’

¹³ “Unre mạlik do onko modren mitʼ hoṛe metadea, ‘E ho, iń ma bacoń behok akatʼme. Iń do cetʼ am tulucʼ mitʼ Dinarte bạń rikitlakʼa?

¹⁴ Amakʼ paona hataokate calao joṅme. Iń do am cetʼ lekań ematʼme, onkage nui tayomicʼ hõ emayiń menjoṅkana.

¹⁵ Ar okaṭakʼ ińakʼ kan, ona do cetʼ ińakʼ kusileka laṛcaṛ reakʼ ektiạri bạnukʼtińạ? Se ińiń dayakʼkante mẽtʼ jolokʼkan tama?’ ”

¹⁶ Golpo mucạtʼre Jisui menkeda, “Onkage okoe do tayomre menakʼko onko doko lahakʼa ar lahatenko doko tayomokʼa.”

Arhõ acʼakʼ gujukʼ reaṅe lại lahayetʼ

¹⁷ Ado Jisu Jerusalemteye rakapʼ calakʼkan tahẽkanre acʼren gelbar celako hor mitʼ aṛere hohoatʼkoteye metatʼkoa,

¹⁸ “Ńelpe, Jerusalemte bon calakʼkana; onḍe Manwa Hopon do maraṅ naekeko ar sostor baḍaekoakʼ tireko soprotea;

¹⁹ onko doko bicạrea ar gujukʼ lek kanae menteko dusi ṭarhaoea. Arko siṛogaea, arko cạbukea ar kuruskae lạgitʼ boṅgan hoṛ jạtrenkoakʼ tireko soprotea; ar pe mãhã hilokʼre uni do gocʼko khone jiwetʼ beredokʼa.”

Jakob ar Johanren eṅgatakʼ nehõr

²⁰ Ado Sabdae hoponkinren eṅgattetʼ do acʼren hoponkine soṅgeketʼkinte Jisu ṭhene hecʼena ar jãhãnakʼ koyea mente uniye ḍobokʼadea.

²¹ Jisu do uniye metadea, “Cetʼem khojkana?” Uni doe menkeda, “Noa hukum emokʼme, amakʼ rajre jemon nukin modre mitʼ hoṛ do amakʼ jojomsa aṛere ar eṭagicʼ do amakʼ leṅgasa aṛere kin duṛupʼ ńam.”

²² Jisui menkeda, “Ape cetʼpe khojkan ona do bape baḍaea. Okaṭakʼ bạṭi reakʼ iń ńũi lạgidokʼkan, ona reakʼ do cetʼ ben ńu daṛeakʼgea?” Metadeakin, “Daṛeakʼ gealiń.”

²³ Unre Jisui metatʼkinạ, “Ińakʼ bạṭi reakʼ ma ben ńũiyge, menkhan ińakʼ jojomsa ar ińakʼ leṅgasa aṛere duṛupʼko reakʼ ektiạri do bạnukʼtińạ. Ona do ińren Baba okoe lạgitʼe dohoakatʼ onkogeko ńama.”

²⁴ Noa katha ańjomkate, gel celako do unkin banar boeha upạrteko edreyena.

²⁵ Unre Jisu do celako hohoatʼkoteye metatʼkoa, “Noa kathape baḍaegea baṅma, boṅgan hoṛ jạtrenko do rapajkoge onkoren Probhu kanako ar onkoren mukhiyạkoge ektiạriko calaoeda.

²⁶ Menkhan ape talare onka hoyokʼ do baṅ ṭhika. Ape modre jãhãe maraṅ hoyokʼe menetʼ khan uni do aperen sapʼ dapʼicʼe hoyokʼma.

²⁷ Ar jãhãege pạhilicʼ hoyokʼe menetʼ khan uni do aperen golame hoyokʼma.

²⁸ Manwa Hopon do sapʼsor ocokʼ do bae hecʼakana, bickom sapʼsosor lạgitʼge, ar ạḍi utạr hoṛko bodolte chaḍaokʼ reakʼ dam menkate acʼakʼ jiwi emokʼgeye hecʼakana.”

Barea kãṛã hoṛkin bogeyen

²⁹ Jisu ar uniren celako do Jerikho nagraha khonko oḍok calakʼkan tahẽkanre gadel hoṛ do uniko pańja idikedea.

³⁰ Ar ńelpe, barea kãṛã hoṛ do hor aṛere kin duṛupʼakan tahẽkana. Ado Jisu ona horteye parom calakʼkan kin ańjomketʼ khan unkin do hohoatekin menkeda, “E Probhu, Dạudren Hopon, mãyãwạlińme.”

³¹ Khange gadel hoṛ do thir hapekʼa mente unkinko dhomkaoketʼkinạ. Menkhan unkin do artetʼ ãṭ aṛaṅte hohoatekin menkeda, “E Probhu Dạudren Hopon mãyãwạlińme baṛe.”

³² Unre Jisu doe teṅgoyena ar hohoatʼkinteye metatʼkinạ, “Iń do aben lạgitʼ cetʼ iń cekaea?

³³ Metadeakin, “E Probhu, mẽtʼ jhicʼkataliń me.”

³⁴ Unre Jisu do mãyã hecʼadea ar unkinakʼ mẽtʼe joṭetʼketʼtạkina, ar unrege unkin do ńeńelkin ehopʼena, ar unikin pańjakedea.