Mathae 2 - সান্তালী বাইবেল

Purub disạmren gonok ponḍitko

¹ Jihudạ disạm reakʼ Betlehem atore Jisuakʼ janam do hoylena. Unre Herod do raje tahẽkana. Ar purub disạmren gonok ponḍetko do Jerusalemte hecʼkateko menkeda,

² “Jihudikoren janam akan raj do okare menaea? Ale do uniren ipil purubrele ńelakadea ar uni sewawae lạgitʼle hecʼakana.”

³ Noa katha ańjomkate Herod raj ar uni sãote goṭa Jerusalemrenko doko torasena.

⁴ Herod do sanam maraṅ naekeko ar sostor baḍaeko hoho jarwakate onko ṭhene kuliyana Mạsi do okareye janamokʼa mente.

⁵ Adoko lạiyadea, “Uni do Jihudạ reakʼ Betlehemreye janamokʼa, ente nạbi hotete nonkage ol akana, enkathae;

⁶ ‘E Jihudạ reakʼ Betlehem, am do Jihudạren ạkʼyurko khon oka secʼte hõ bam huḍińa, ente am bhitri khon nonkan mitʼṭen ạyuricʼe oḍokokʼa, okoe do ińren Israel jạtrenkoe ạyurko.’ ”

⁷ Unre Herod do onko gonok ponḍetko oko okoteye hohoatʼkoa ar oka okte ipile ńellen onae kuli ṭhikketʼkoa.

⁸ Ar noa menkate Betlehemteye kolketʼkoa, “Do senkate uni gidrạ reakʼ mońjte suṭhik ạguiype. Arpe ńamle khan baḍae ocoyińpe jemon iń hõ senkateń sewa daṛeae.”

⁹ Ado rajakʼ katha ańjomkate gonok ponḍetko doko calaoena. Ar purubreko ńellede uni ipil do onko laha lahateye calao idiyena. Ar gidrạ okareye tahẽkan ona oṛakʼ coṭre seṭerkate ạuriye teṅgokʼ hạbicʼ ipil do calakʼtegeye tahẽyena.

^10-11 Ar ipilko ńelkede khan gonok ponḍetko do ạḍi rạskạ salakʼ oṛakʼteko boloyena ar bale gidrạ do uniren eṅgattetʼ Mạriạm ṭhenko ńel ńamkedea. Unre onko do ombakʼkateko sewawadea ar akoakʼ baksa jhicʼkate Sona, Kunduru ar Gondhorosko samaṅadea.

¹² Ar Isor do Herod ṭhen aloko ruạṛ calakʼa mente kukmũte onkoe sontorkatʼkoa. Unre onko do eṭakʼ horte akoakʼ disạmteko ruạṛ calaoena.

Misorte ńir paskaokʼ

¹³ Gonok ponḍetkoko calaoen khan Probhu Isorren mitʼṭen goḍet do kukmũte Joseph ṭhen ńel ocoyenteye menkeda, “Ma beretʼme, gidrạ ar eṅgattetʼ sotokʼkinte Misor disạmte dạṛme ar ạuriń metam hạbicʼ onḍege tahẽ hataṛokʼme, ente Herod do gidrạ goje iạteye sendra lạgidokʼ kana.”

^14-15 Unre Joseph do beretʼkate gidrạ ar eṅgattetʼe sotokʼketʼkinte ńindạge Misor disạmteye calaoena ar Herod ạuriye gujukʼ hạbicʼ onḍegeye tahẽyena. Noa do hoyena nạbi hotete Probhu Isore roṛletʼakʼ katha jemon purạukʼ; enkathae, “Iń do Misor khon ińren Hoponiń hoho ạgukedetińạ.”

Gidrạko gocʼ ocokʼkan

¹⁶ Herod do gonok ponḍetkoko eṛekedea menteye baḍaeketʼ khan ạḍi ãṭe raṅgaoena. Ar onko ṭhen khone baḍaeletʼ tahẽkan okte reakʼ hisạb lekate bar bochor ar ona khon latar umerren tinạkʼ koṛa gidrạ Betlehem ar ona aḍepase jaegakoreko tahẽkan onko joto gocʼko lạgitʼe hukumkeda.

¹⁷ Onate Jirimiạ nạbi hotete noa roṛlenakʼ katha purạuena: enkathae,

¹⁸ “Ramare ãṭ aṛaṅte rakʼjoṅ ar hae hae ańjomokʼkana; Rahel do acʼren gidrạko lạgitʼe rakʼeda, ar cetʼte hõ jiwi do baṅ raṛejokʼ kantaea, ente onko do ar bạnukʼkotaea.”

Misor khon ruạṛokʼ

¹⁹ Herode gocʼen khan Probhu Isorren mitʼṭen goḍet do Misor disạmre Joseph ṭhen kukmũte ńel ocoyenteye menkeda,

²⁰ “Ma beretʼme, gidrạ ar uniren eṅgattetʼe sotokʼkinte Israel disạmte ruạṛ calakʼme. Ente gidrạ goje lạgitʼ okoeko sendrakan tahẽkan onko doko gocʼena.”

²¹ Unre Joseph doe beretʼente gidrạ ar uniren eṅgattetʼe sotokʼketʼkinte Israel disạmteye ruạṛ calaoena.

²² Ona jokhecʼ Jihudạre Herod tayom uniren hopon Arkhilạus do raje tahẽkana. Ar Joseph do noa kathae ańjomketʼ khan onḍe calakʼ doe botorena. Tayomte uni do kukmũte hukume ńamketʼ khan Gạlil Prodesteye calaoena,

²³ ar Nasaretko metakʼ mitʼṭecʼ atore senkateye berelena. Noa do hoyena nạbiko hotete roṛlenakʼ katha jemon purạukʼ: enkathae, “Uni do Nasario menteye hoho ocokʼa.”