Mathae 18 - সান্তালী বাইবেল

Maraṅicʼ doe okoe kana?

¹ Ona jokhecʼ celako do Jisu ṭhen hecʼkateko menkeda, “Serma rajre maraṅicʼ doe okoe kana?”

² Unre Jisu do mitʼṭen kạṭicʼ gidrạ hoho sorkate onko talare teṅgo kedeteye metatʼkoa,

³ “Sạrigeń metapekana, mon ạcurkate kạṭicʼ gidrạko leka bape hoylen khan serma rajre ohogepe bolo daṛelena.

⁴ Onate jãhãege nui kạṭicʼ gidrạ leka acʼteye nindhạnokʼ unige serma rajre sanamko khone maraṅokʼa.

⁵ Ar jãhãege iń ńutumte nonkan kạṭicʼ gidrại ataṅe uni do ińgeye ataṅińạ.

Kại horte idiko reaṅ

⁶ “Ińreko pạtiạu akan noko kạṭicʼko modren mitʼ goṭecʼ jãhãege kại horteye idiye enḍekhan uni do hoṭokʼre jante dhiri akawaete jalapuri reakʼ khạndri dakʼre unum giḍikaege bhagekʼa.

⁷ Hae hae! Kại horte idiko lạgitʼ tinạkʼ uskạu baṅ amre menakʼ! Ente uskạu do hijukʼgea; enhõ hae uni hoṛ do, one okoe hotete ona uskạuko hijukʼkan!

⁸ “Amakʼ ti se jaṅga kại horteye idime khan ona do samakʼ giḍikakʼme. Banar ti ar banar jaṅga tahen tulucʼ jaejug seṅgelrem khadle ocokʼ khon ṭhunṭạ se leḍhage jionrem bolokʼge am lạgitʼ bogea.

⁹ Amakʼ mẽtʼ kại horteye idime khan ona hõ hoṭor totʼ giḍikakʼme. Banar mẽtʼ tahentam tulucʼ norok seṅgelrem khadle ocokʼ khon mitʼ mẽtʼante jionrem bolokʼge am lạgitʼ bogea.

Atʼ akan bhiḍi reaṅ

¹⁰ “Ńelpe, noko kạṭicʼko modren mitʼ goṭen hõ alope nihạ̃tkoa; ińiń metapekana sermare onkoren goḍetko do sanam ghạṛicʼ ińren sermare menae Babawakʼ mẽtãhãko ńeleda.

¹¹ “Ente Manwa Hopon do atʼakanko bańcaoko lạgitʼgeye hecʼakana. Ape do cetʼpe hudiskea?

¹² Mitʼ hoṛren mitʼ sae bhiḍiko tahentae. Ar onko modren mitʼ goṭene chingạulen khan onko are gel are goṭen burure bạgi oṭoakote uni chingạu akanicʼ cetʼ bae ńam baṛayea?

¹³ Sạrigeń metapekana, uniye ńamlere onko bako chingạu akan are gel areko khon chingạuicʼ iạte uni do arhõ bạ̃ṛtiye rạskạkʼa.

¹⁴ Nonkage, aperen sermare menae Babawakʼ hõ mone bạnukʼtaea; noko kạṭicʼko mod khon mitʼ goṭene adokʼ.

Okoe boehae behoketʼkan

¹⁵ “Amren boeha am upạrteye kại lekhan uni ṭhen senokʼme ar aben eskar tahenrege uniyakʼ dosko lại bujhạuaeme. Ar amakʼ kathae ańjom khan enḍekhan amren boeham dom ńam ruạṛkedea.

¹⁶ Menkhan bae ańjomletam khan eṭakʼ mitʼ se bar hoṛ soṅge torajoṅme, jemon bar se pe hoṛakʼ goha do sạriyakʼ mente sạbudokʼ.

¹⁷ Ar onkoakʼ katha hõ bae ańjomle khan enḍekhan manḍerrenko lạiyakome. Ar manḍerrenkoakʼ katha hõ bae ańjom khan uni do boṅgan hoṛ jạtren se mạsul uṭhạu hoṛko leka bujhạuem.

Tol ar raṛae reaṅ

¹⁸ “Sạrigeń metapekana, dhạrtire okakope tola ona do sermare hõ tolge tahena, ar dhạrtire okape raṛae ona do sermare hõ raṛage tahena.

¹⁹ “Arhõń metapekana, apeko modre bar hoṛ dhạrtire jãhãnakʼ reaṅ mitʼ montekin koe enḍekhan sermare menae Baba secʼ khon hoyokʼ getakinạ,

²⁰ ente okare bar se pe hoṛ iń ńutumteko jarwakʼa, onḍege iń do onko talareń tahena.”

Baṅ ikạ guti reaṅ

²¹ Unre Patras do hecʼkate Jisui metadea, “E Probhu Isor, boehań iń upạrteye kạilere tinạkʼ dhaoiń ikạitaea? Eae dhao hạbicʼ?”

²² Jisui metadea, “Bạń metam kana eae dhao hạbicʼ do, menkhan eae gel doboṛ eae dhao hạbicʼ ikạyem.

²³ “Ńelpe, serma raj do nonkan mitʼṭen raj lekana, okoe do acʼren gutiko ṭhen hisạb hataoe menwan.

²⁴ Ado hisạb hataoe ehopʼen khan onko modren nonkan mitʼṭen gutiye ạgu ocoyena, one okoe do raj ṭhen lakh lakh ṭakae rin akatʼ tahẽkan.

²⁵ Uniyakʼ do halateakʼ cetʼ hõ baṅ tahẽkantaea. Onate kisạ̃ṛ doe hukumkeda uni ar uniren era hopon ar uniyakʼ menakʼakʼ jotowakʼko ạkhrińkate jemon paona ạdạiyokʼtae.

²⁶ Khange uni guti do kisạ̃ṛakʼ ti jaṅgare giḍiyenteye menkeda, ‘Ma jiwi hataṛme, ado jotowakʼ iń ruạṛkatama.’

²⁷ Unre kisạ̃ṛ do mãyã hecʼadete uni gutiye aṛakʼkadea ar joto rin khone khalaskadea.

²⁸ “Tayomte uni guti do bahrete oḍok senkate acʼ sãoten mitʼṭen gutiye ńamkedea. Uni guti do acʼ ṭhen mitʼ sae ṭakae dharao akatʼ tahẽkana. Ar uni guti limbạtʼkedeteye metadea, ‘dharaoakʼ hala kạtińme.’

²⁹ “Khange sãoten guti do ti jaṅgare giḍikate nehõrenteye menkeda, ‘ma jiwi hataṛme, adoń hala ruạṛkatama.’

³⁰ Menkhan uni do bae rebenlena bickom dharaoakʼ ạuriye hala cabae hạbicʼ hajotreye bhoraokadea.

³¹ “Noako ńelkate uni sãoten eṭakʼ gutiko do ạḍiko bhabnayena. Ar senkate akoren kisạ̃ṛko lạiyadea

³² Unre kisạ̃ṛ do uni guti hoho ạgu ocokedeteye metadea, ‘Eya bạṛicʼ guti! Amem nehõrạdiń tahẽkante amakʼ sanam dharaoakʼ iń ikạletʼtama.

³³ Iń cetʼlekań dayawatʼme tahẽkan onkage uni hõ mãyãwae lek do cetʼ baṅ tahẽkantama?’

³⁴ Khange kisạ̃ṛ doe raṅgaoente joto rin ạuriye hala ruạṛ cabay hạbicʼ hajotren hoṛko ṭhene jimạkadea.

³⁵ “Onkage, ape mimitʼko aperen boehako apeakʼ ontorte bape ikạleko khan, sermare menae ińren Baba hõ apeye onkawapea.”