Mathae 17 - সান্তালী বাইবেল

Probhu Jisuakʼ boron pheraokʼkan

¹ Ado niạ turui din tayom Jisu do eken Patras, Jakob ar uniren boeha Johan soṅgekate mitʼṭecʼ usul buruteye rakapʼ calaoena.

^2-3 Ar onko samaṅre uni doe eṭakʼ boronena. Uniyakʼ mẽtãhã do siń cando leka jhak jhak ar kicricʼko do marsal leka pĩṛĩtʼ pĩṛĩtʼ ponḍentaea. Onko do Mose ar Eliạ Jisu tulucʼ galmaraoko ńelketʼkinạ.

⁴ Unre Patras do Jisui metadea, “E Probhu Isor, bhagege hoyakana ale nonḍe menakʼle iạte do. Amem khoj khan nonḍe pea kumbạ oṛakʼ iń benaoa; mitʼṭecʼ do am lạgitʼ, mitʼṭecʼ do Mose lạgitʼ ar mitʼṭecʼ do Eliạ lạgitʼ.”

⁵ Ado Patras kathae roroṛkan tahẽkanrege mitʼṭecʼ jhalkaokʼkan rimil do onkoe umul esetʼketʼkoa. Ar ona rimil khon mitʼṭen aṛaṅ ańjomena, “Nuige ińren dulạṛiạ Hopon, iń do unireń kusi akana. Ape do uniyakʼ ańjomtaepe.”

⁶ Noa katha ańjomkate celako do ạḍiko botorena ar otreko taber hapeyena.

⁷ Unre Jisu do hecʼkate joṭetʼketʼkoteye metatʼkoa, “Ma beretʼpe, alope botorokʼa.”

⁸ Adoko beṅgetʼ rakapʼketʼ khan Jisu chaḍa ar okoehõ bako ńel ńamletʼkoa.

⁹ Ado buru khonko pheḍ hijukʼkan tahẽkanre uni do noae hukumatʼkoa, “Okape ńelketʼ, ona do Manwa Hopon gocʼko khon ạuriye jiwetʼ beredokʼ hạbicʼ okoe hõ alope lạiyakoa.”

¹⁰ Celakoko kulikedea, “Cedakʼ enḍekhan sostor baḍaeko doko meneda, pạhil do Eliạge hijukʼ reakʼ jạruṛ menakʼtaea mente?”

¹¹ Jisui roṛ ruạṛatʼkoa, “Sạrige Eliại hijukʼa ar sanamakʼ do lahate lekae teṅgo aroya.

¹² Menkhan ińiń metapekana, Eliạ doe hecʼlengea ar bako ńel oromledea. Ar hoṛko cetʼleka sanaletʼko onkage uni cetanreko kạmikeda. Manwa Hopon hõ onkage hoṛko hotete duk jojom hoyokʼtaea.”

¹³ Unre celakoko bujhạukeda je, uni do Johan bạbạptisicʼ reaṅe lạiyatʼkoa mente.

Bạṛicʼ jiu sapʼakade koṛae bogeyen

¹⁴ Jisu ar uniren celako do gadel hoṛ ṭhenko ruạṛ hecʼen khan mitʼṭen hoṛ do Jisu ṭhen hecʼkate ikhṛumenteye menkeda,

¹⁵ “E Probhu hoponiń baṛe mãyãwaeme. Uni do mirgi rogte ạḍiye sasetokʼkana. Ente ghane uni do seṅgelre ar ghane do dakʼreye bhindạṛokʼa.

¹⁶ Amren celako ṭheniń ạguledea menkhan onko do bako boge daṛeadea.”

¹⁷ Jisui roṛ ruạṛkeda, “E bepạtiạu ar peṛta piṛhirenko! Ar tinạkʼ din ape sãoreń tahena? Ar tinạkʼ diniń sahaokatapea? Dini iń ṭhen ạguiyepe.”

¹⁸ Ado Jisu uniye dhomkaokede khan bạṛicʼ jiu do uni khone oḍok calaoena, ar koṛa do unregeye boge utạrena.

¹⁹ Inạ tayom celako do hape hapete hecʼkate Jisuko metadea, “Ale do cekate bale oḍok daṛeadea?”

²⁰ Jisui metatʼkoa, “Apeakʼ nase pạtiạu iạte bape daṛeada. Sạrigeń metapekana, tuṛi jaṅ inạkʼ hõ biswạs tahentape ar noa burupe metakʼ, ‘nonḍe khon hanḍe ucạṛokʼme,’ enḍekhan ona do ucạṛokʼgea.

²¹ Ape lạgitʼ bin daṛeanakʼ do cetʼge bạnukʼa. Menkhan nui jạtrenko do koejoṅ ar upạs begor ohogeko oḍoklena.

Jisu do acʼakʼ gujukʼ reakʼ arhõe lại lahayetʼ

²² Ado Gạlil Prodes talateye parom calakʼkan tahẽkan jokhecʼ Jisu do acʼren celakoe metatʼkoa, “Manwa Hopon do hoṛkoakʼ tireko soprotea.

²³ Ar hoṛko do uniko gojea, ar pe mãhã hilokʼre uni do gocʼko khone jiwetʼ beredokʼa.” Onate celako do ạḍiko mon dukena.

Mundil reakʼ khajna reaṅ

²⁴ Jisu ar acʼren celako do Kapharnạhum nagrahateko hecʼen khan mundil reakʼ khajna uṭhạuko do Patras ṭhen hecʼkateko kulikedea, “Aperen Guru do cetʼ mundil reakʼ khajnae emetʼkangea?”

²⁵ Patras do onkoe metatʼkoa, “Hẽ, emetʼgeae.” Inạ tayom Patras oṛakʼteye boloyen khan Jisu do roṛ daramkedeteye metadea, “E Simon, am do cetʼem hudiskea? Noa dhạrtiren rapajko do okoe ṭhen khon khajnako uṭhạueda? Nij disạmren hoṛko ṭhen khon, se bidesiạ hoṛko ṭhen khon?”

²⁶ Patrase menkeda, “Bidesiạ hoṛko ṭhen khon.” Jisu do uniye metadea, “Enḍekhan nij disạmren hoṛ do rehaeko ńam akada.

²⁷ Menkhan alaṅ iạte jemon khajna uṭhạuko aloko tạkijokʼ onate doreãote calakʼme ar bạ̃ṛsi caḍoyme, ar pạhilre okoeṭakʼ hakom rakabe unim or cahapʼle khan mitʼṭecʼ rupạ reakʼ ṭakam ńama. Ar ona hataokate iń ar am ńutumte khajna em oṭokakʼme.”