Mathae 16 - সান্তালী বাইবেল

Hoṛko do cinhạko khojkan

¹ Phạrusiko ar Sạdukiko do Jisu bidạue lạgitʼ uni ṭhenko hecʼena ar serma khon mitʼṭecʼ cinhạ udukʼako lạgitʼko metadea.

² Jisui roṛ ruạṛatʼkoa, “Ạyupʼ jokhecʼ dope mena, ‘dhạrungeae ente serma do arakʼgea.’

³ Ar setakʼ jokhecʼ dope mena, ‘teheń doe hoe daga ente serma do arakʼ ar dhũndgea.’ Serma reakʼ muṭhạn papachnao dope baḍaekana, menkhan okte reakʼ cinhạko do bape bujhạu daṛeakʼ kana.

⁴ Niạ bạṛicʼ ar laṭghaṭ piṛhiren hoṛge cinhạ doko ńam bakʼṛakana, menkhan Jona reakʼ chaḍa ar okaṭakʼ hõ onko do baṅ udukʼakoa.” Inạ tayom Jisu do onko bạgiyatʼkoteye calaoena.

Celakoe sontoretʼko

⁵ Doreão hanasako parom calakʼkan tahẽkanre celako do soṅgete piṭhạ iditorako hiṛińkeda.

⁶ Ado Jisui metatʼkoa, “Phạrusiko ar Sạdukikoakʼ khạmi khon sontor akan tahenpe.”

⁷ Noate celako do ako ako talare kheńjer-meńjer baṛayenteko menkeda, “Piṭhạ babon ạgu toraletʼte noa kathae metabon kana.”

⁸ Jisu onae baḍaeketʼ khan onkoe metatʼkoa, “E nase pạtiạukʼko, piṭhạ bạnukʼtapete cedakʼpe kheńjer meńjerokʼ kana?

⁹ Ape do cetʼ ńit hõ bape bujhạueda se bape disạyeda, onko mõṛẽ hajar hoṛ lạgitʼ mõṛẽ goṭecʼ piṭhạ reakʼ katha, ar ona tayom do tinạkʼ khạclạkʼpe halaṅ jarwaleda?

¹⁰ Se pon hajar hoṛ lạgitʼ eae goṭecʼ piṭhạ reakʼ katha, ar tinạkʼ khạclạkʼpe halaṅleda?

¹¹ Piṭhạ reakʼ katha bạń metapekan do cetʼ bape bujhạueda? Menkhan Phạrusi ar Sạdukikoakʼ khạmi khon sontor akan baṛe tahenpe.”

¹² Ado un utạrko bujhạukeda, piṭhạ reakʼ khạmi khon sontor akae do baṅ, menkhan Phạrusi ar Sạdukiko reakʼ cecetʼakʼ khon sontor tahene metako kana mente.

Probhu Jisugeye Mạsi kana

¹³ Jisu do Kạisạriạ Philipi reakʼ elakateye hecʼenre acʼren celakoe kuliketʼkoa, “Hoṛko do Manwa Hopon okoe kanae menteko meneda?”

¹⁴ Onkoko menkeda, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda Jirimiạ; ar baṅkhan nạbiko modren mitʼ hoṛ.”

¹⁵ Unre Jisui metatʼkoa, “Menkhan ape do okoe kạnạń mentepe meneda?”

¹⁶ Simon Patrase roṛ ruạṛkeda, “Am do Mạsi, jiwetʼ Isorren Hopon kanam.”

¹⁷ Jisui roṛ ruạṛadea, “Jona hopon Simon, am dom bhạgangea, ente okoe manwa hõ am ṭhen noa do bae sodor akada; menkhan ińren sermaren Babageye sodor akatʼmea.

¹⁸ Ińiń metam kana, am dom Patras kana, ar noa dhiri cetanrege ińakʼ manḍereń benao rakaba. Norok reakʼ oka daṛege onare bae jitạu daṛeakʼa.

¹⁹ Iń do serma raj reakʼ kạṭhikoń emama, ar jãhãnakʼge dhạrtirem tol ona do sermare hõ tolge tahena ar jãhãnakʼge dhạrtirem raṛae ona do sermare hõ raṛage tahena.”

²⁰ Ona tayom uni do celakoe sontorkatʼkoa jemon okoe hõ aloko lại baṛaye, acʼ doe Mạsi kanae mente.

Acʼakʼ gujukʼ ar jiwetʼ beredokʼ reaṅe lại lahayetʼ

²¹ Un khonge Jisu do acʼren celako lạiyakoe ehopʼena je, acʼ do Jerusalemte calakʼ hoyokʼtaea ar murubbiko, maraṅ naekeko, ar sostor baḍaeko hotete ạḍi okocʼ duk jojom hoyokʼtaea. Are gocʼ ocokʼa ar pe mãhã hilokʼre gocʼko khon uni do jiwetʼ beredokʼ hoyokʼtaea.

²² Unre Patras do begar idikedete nisṛạueye ehopʼkeda, “E Probhu Isor noa do am khon sahaṛokʼma. Am cetanre nonka do tisge oho hoydaṛelena.”

²³ Jisu do ạcurente Patrase metadea, “Eya Soetan iń samaṅ khon pharakokʼme. Am do iń tạkʼkicʼicʼ kanam. Isor reakʼakʼko do bam moneyakʼ kana menkhan manwa reakʼakʼgem moneyakʼ kana.”

²⁴ Ona tayom Jisu do acʼren celakoe metatʼkoa, “Jãhãe ińakʼ horte hijukʼ sanayede khan uni do acʼakʼ kusi sanaleka aloe calakʼma; menkhan acʼakʼ kuruse gogma ar ińe pańjańma.

²⁵ Jãhãege acʼakʼ jiwi bańcaotae reakʼe monejoṅ, uni doe khuạutaea; menkhan jãhãege iń lạgitʼ acʼakʼ jiwiye khuạutae uni do onae ńama.

²⁶ Jãhãege goṭa dhạrtiye hameṭte acʼakʼ jiwiye khuạutae enḍekhan cetʼ porho hoyokʼtaea? Se mitʼṭen hoṛ acʼakʼ jiwi bodolte cetʼe emkea?

²⁷ Manwa Hopon do acʼren goḍetko soṅgekate apat reakʼ ṭhonokanteye hijukʼa. Ar mimitʼ hoṛ akoakʼ kạmi lekae halawakoa.

²⁸ Sạrigeń metapekana, nonḍe teṅgo akanko modre adom hoṛ menakʼkoa onko do Manwa Hopon acʼakʼ rajre ạuriko ńele hạbicʼ bako gujukʼa.”