Mathae 15 - সান্তালী বাইবেল

Calao hijukʼkan ạn reaṅ

¹ Unre Jerusalem khon adom Phạrusiko ar sostor baḍaeko do Jisu ṭhen hecʼkateko menkeda,

² “Amren celako do cedakʼ hapṛamko khon hecʼ ạguwakʼ ạn bako manaoeda? Onko do jom lahare ti bako ạbukokʼ kana.”

³ Jisui roṛ ruạṛatʼkoa, “Oka ạri-cạliko calao hijukʼkan onakote ape hõ cedakʼ Isorakʼ hukumkope bemanoteda?

⁴ Isore men akada, ‘eṅgam ạpum ganaokinme’ ar ‘okoe eṅgat se apat bạṛicʼe metakin uni do gocʼte hõ goje hoyokʼa.’

⁵ Menkhan apepe meneda, jãhãe hoṛ acʼren eṅgat se apate metae, ‘ińakʼ okaṭakʼtem porhokokʼ, ona do Isor ṭhen emakana,’

⁶ enḍekhan uni do eṅgat se apat manotkin reakʼ jạruṛ bạnukʼtaea. Apeakʼ noako ạri-cạli iạtege ape do Isorakʼ kathape mạutạ akada.

⁷ E Phạsiạrako! Jesaea nạbi do ṭhikge ape reaṅe nạbileda,

⁸ noko hoṛ do mocategeko ganaoedeń kana, menkhan onkoakʼ ontor do iń khon sạṅgińgetakoa.

⁹ Onko do ạuṛiyakʼgeko sewawạń kana, ar manwakoakʼ hukumkoge onko do dhorom reakʼ sikhnạt menteko cetʼako kana.

Cetʼlekate hoṛkoko bhõnḍokʼkan

¹⁰ Jisu do gadel hoṛko acʼ ṭhen hoho sorketʼkoteye metatʼkoa, “Ińakʼ kathako ańjompe ar bujhạujoṅpe.

¹¹ Moca secʼte oka bolokʼkan onate manwa do bae bhõnḍokʼa, menkhan moca khon oka oḍokokʼkan onatege manwa doe bhõnḍokʼ kana.”

¹² Unre celako hecʼkateko metadea, “Amakʼ noa kathate Phạrusikoko tạkijokʼkan dom baḍae kangea?”

¹³ Uniye roṛ ruạṛatʼkoa, “Sermaren ạpuń bae rohoe akatʼ mitʼke mitʼ poha do totʼ giḍi ocokʼa. Onate onkoakʼ katha do bạgiyakʼpe.

¹⁴ Onko do apnartetʼko kãṛãgere hõ kãṛã ạyurko kanako. Ar kãṛã do kãṛãye ạyure khan banarge ghaḍlakʼrekin ńurokʼa.”

¹⁵ Unre Patras do Jisui metadea, “Okaṭakʼ phenem lạiketʼ ona baṛe bujhạu aleme.”

¹⁶ Jisui metatʼkoa, “Ńit hạbicʼ hõ bebujge menakʼpea?

¹⁷ Cekate bape bujhạueda, moca secʼte oka bolokʼkan ona do lacʼte bolokʼkana, ar mucạtʼre do ṭanḍite oḍok giḍikʼa?

¹⁸ Menkhan okaṭakʼ moca khon oḍok hijukʼkan ona do ontor khonge hijukʼ kana, ar onakotege hoṛ doe bhõnḍokʼkana.

¹⁹ Ente ontor khonge bạṛicʼ cintạ, khũn, laṭghaṭ, kombṛo, eṛe goha, ar opomanko do oḍok hijukʼa.

²⁰ Ar noakotege hoṛ doe bhõnḍokʼa, menkhan ti begor ạbukte jom lekhan manwa do bae bhõnḍokʼa.”

Boṅgan hoṛ jạtren maejiuakʼ pạtiạu

²¹ Ado Jisu ona jaegae bạgiyatʼte Tur ar Sidon elakateye calaoena.

²² Ar ńelpe, Kananren mitʼṭen maejiu do oḍok hecʼkate hohoateye menkeda, “E Probhu, Dạudren Hopon, mãyãwạńme baṛe, ente hoponerań do bạṛicʼ jiue capaṛ akawadete ạḍitetʼe sasetokʼ kana.”

²³ Menkhan Jisu do cetʼge bae roṛ ruạṛadea. Unre celako do hecʼkate nehõradeteko metadea, “Uni do bidạkaeme, ente abo tayomteye hoho ạguiyeda.”

²⁴ Jisui roṛ ruạṛatʼkoa, “Iń do eken Israel bõsren atʼ akan bhiḍiko ṭhengeń kol ocoakana.”

²⁵ Menkhan maejiu do Jisu ṭhene hecʼena ar ḍobokʼadeteye menkeda, “E Probhu goṛowạńme baṛe.”

²⁶ Jisui menkeda, “Gidrạkoakʼ jomakʼ hataokate setako samaṅre lebda giḍikakʼ do baṅ bhagea.”

²⁷ Maejiue roṛ ruạṛkeda, “Katha do sạrikangea Probhu, enrehõ kisạ̃ṛakʼ mej khon hiricʼ pạsirakʼ ganḍa gunḍạ do setakogeko jomeda.”

²⁸ Unre Jisui menkeda, “E go, sạrige amakʼ pạtiạu do ḍhergea. Amem khojkan leka baṛe hoyokʼma.” Ar unrege uniren hoponera doe bogeyena.

Jisu aema hoṛe bogeketʼko

²⁹ Ado Jisu ona jaegae bạgiyatʼe Gạlil doreão aṛe aṛeteye calaoena ar mitʼṭecʼ burure rakapʼkateye duṛupʼena.

³⁰ Unre gadel hoṛ do soṅgete, leḍhako, kãṛãko, ṭhunṭạko, guṅgạko ar eṭakʼkoko ạgu daraketʼkoa. Ar uniyakʼ jaṅga ṭhenko dohoketʼko khan uni doe bogeketʼkoa.

³¹ Onate guṅgạko roroṛkan, leḍhako taṛamkan, ṭhunṭạko bogekʼkan, ar kãṛãkoko ńeńelkana menteko ńelketʼko khan gadel hoṛ doko hahaṛa cabayena, ar Israelren Isorko sarhaokedea.

Jisu pon hajar hoṛe jom bi ocoyetʼko

³² Inạ tayom Jisu do celako hohoatʼkoteye metatʼkoa, “Noko gadel hoṛkoreń mãyãkʼ kana, ente teheń pe mãhã hoyokʼ kana onko do iń sãote menakʼkoa, ar noko ṭhen jãhãn jomakʼge bạnukʼa. Ar reṅgecʼte bidạkako hõ baṅ sanań kana; ente hoedaṛeakʼa onko do horkoreko lorao botecʼjokʼa.”

³³ Ado celakoko metadea, “Noa nisun jaegare nunạkʼ hoṛ jom bi ocoko lạgitʼ piṭhạ do okare bon ńamkea?”

³⁴ Jisui metatʼkoa, “Tinạkʼ piṭhạ menakʼtapea?” Celakoko roṛ ruạṛadea, “Eae goṭecʼ piṭhạ ar thoṛagan kạṭicʼ hako.”

³⁵ Jisu do gadel hoṛko otre duṛubokʼe hukumatʼkote onko hako ar ona eae goṭecʼ piṭhại ataṅkeda.

³⁶ Ar Isore gun manao joharadete onakoe kecakʼketʼte celakoe calatʼkoa ar onko do gadel hoṛkoko ematʼkoa.

³⁷ Ar sanam hoṛko jomkeda arko biyena, ar tinạkʼ hiricʼ pạsir ńur tahẽyen celako do onakoko halaṅ jarwaketʼ khan eae khạclạkʼko perecʼkeda.

³⁸ Okoeko jomketʼ onko modre maejiu ar kạṭicʼ gidrạ chaḍa pon hajar herel hoponko tahẽkana.

³⁹ Inạ tayom Jisu do gadel hoṛko bidạkate lạukạreye decʼena ar Magadan elakateye calaoena.