Mathae 10 - সান্তালী বাইবেল

Gelbar apostolko

¹ Jisu do acʼren gelbar celakoe hohoatʼkoa ar bạṛicʼ jiu oḍok giḍikako ar sanam lekan rog bighinko bogey reakʼ ektiạriye ematʼkote onkoe kolkatʼkoa.

² Onko gelbar apostolkoakʼ ńutum do nõkʼõe nonka; pạhil do Patrasko metae Simon, ar uniren boeha Andreas, Sabdaeren hopon Jakob ar uniren boeha Johan, Philip ar Bartholomae;

³ Thoma ar mạsul-uṭhạuicʼ Mathae; Alphaeren hopon Jakob ar Thaddae;

⁴ Moulobadi Simon ar okoe do Jisu bạiriko ṭhene soprot ocolede uni Jihudi Iskoriạt.

Gelbarkoko kol ocokʼkan

⁵ Jisu do onko gelbarko noa hukumatʼkoteye kolketʼkoa, “Boṅgan hoṛ jạtrenko ṭhen do alope calakʼa ar Samariạkoakʼ okaṭakʼ atote hõ alope bolokʼa,

⁶ menkhan Israel jạtren atʼakan bhiḍiko ṭhen calakʼpe.

⁷ Ar calakʼ calakʼte noa porcarpe, serma raj do sor akana.

⁸ Ona chaḍa rugiko bogekope, gocʼko jiwetʼkope, murhucʼ jom hoṛ bogekope ar bạṛicʼ jiuko oḍok giḍikope. Ape do begor damtepe ńamakada, begor damtege emakope.

⁹ Apeakʼ ḍanḍa totolakʼre sona, rupạ se tama reakʼ poesa hõ alope soṅge torajoṅa.

¹⁰ Horte lạgitʼ jãhã lekan thuli hõ alo, babar goṭecʼ aṅgrop hõ alo, panahi se ṭheṅga hõ alo, ente okoeye kạmikan uni do jojom ar ńũiyakʼ ńam lek kanae.

¹¹ “Jãhãṭakʼ nagraha se atotepe bolokʼre onḍenicʼ mitʼṭen mukhiyạ hoṛ ńamepe ar eṭakʼte ạuripe oḍokʼ calakʼ hạbicʼ uniyakʼ oṛakʼrege tahenpe.

¹² Ar ona oṛakʼtepe bolokʼre oṛakʼrenko joharakope.

¹³ Jodi ona oṛakʼ lekgepe bujhạu enḍekhan apeakʼ suluk do ona oṛakʼre paṛaokʼma. Menkhan ona oṛakʼ lek leka bape bujhạu enḍekhan apeakʼ suluk do aperege ruạṛ hijukʼma.

¹⁴ Jãhãe bako ataṅpe se apeakʼ kathako bako ańjom enḍekhan ona oṛakʼ se ato khonpe oḍokokʼre apeakʼ jaṅga reakʼ dhuṛi hõ koṭa giḍi oṭokakʼpe.

¹⁵ Sạrigeń metapekana, bicạr dinre ona nagraha reakʼ khon Sodom ar Gomora reakʼge boroṅ ḍher sahaokʼa.

Darakan santao reaṅ

¹⁶ “Ńelpe, iń do hunḍạrko talare bhiḍiko lekań koletʼpea. Onate biń leka husiạrokʼpe ar parwa leka soṛa hoyokʼpe.

¹⁷ Sontor akae tahenpe, ente maraṅ bạisiren hoṛkoakʼ tireko soprotpea ar onkoakʼ sunạgogkore cạbukteko dalpea.

¹⁸ Iń khạtirte disạm calaoko ar rapajko ṭhenko idipea, jemon onko ar boṅgan hoṛ jạtrenko ṭhen gohape em daṛeakʼ.

¹⁹ Hoṛkoko soprot lepere alope bhabnakʼa cetʼ leka se cetʼkope roṛa mente. Ente cetʼko roroṛ hoyokʼa ona do unregepe lại ocokʼa.

²⁰ Ape do roroṛko dope baṅkana, menkhan aperen Baba Isorren Jiuge ape bhitrite kathae roṛa.

²¹ “Boeha do boehattetʼe soprotea gocʼ ocoye lạgitʼ ar apat do hopontetʼ, ar hoponko do go-baba upạrteko teṅgona arko gocʼ ocokoa.

²² Iń khạtirte sanam hoṛko hirkhạwapea, menkhan okoe mucạtʼ hạbicʼ ṭarhaoe tahen unigeye bańcaokʼa.

²³ Mitʼ nagrahare santao arko khedlepere eṭakʼ nagrahate dạṛpe. Sạrigeń metapekana, Israel disạm reakʼ sanam nagraha ar atokore ạuripe kạmi purạurege Manwa Hopon doe hijukʼa.

²⁴ “Guru khon cela do bae maraṅa, ar kisạ̃ṛ khon golam hõ baṅ.

²⁵ Cela lạgitʼ do niạge ḍhera acʼren guru lekae hoyokʼ ar golam hõ acʼren kisạ̃ṛ leka. Oṛakʼren kisạ̃ṛge Beelsebulko metaekan khan gharońjrenko do tinạkʼ artetʼgeko metakoa.

Jisuakʼ mãyã

²⁶ “Onate hoṛko do alope botorakoa, ente danaṅ reakʼ sanamakʼ do sodorokʼa ar oko reakʼ joto do baḍaeyokʼa.

²⁷ Okaṭakʼ ńutreń lại apekan, ona do marsalre roṛpe. Ar luturte okaṭakʼpe ańjometʼkan ona do sạṛim cetan khon porcarpe.

²⁸ Okoe eken hoṛmo motoko gocʼ daṛeakʼ menkhan jiwi do baṅ onko do alope botorakoa. Menkhan okoe hoṛmo ar jiwi banarge norokre marao reakʼ daṛe menakʼtae unige botoraepe.

²⁹ Barea ghaṛwa cẽṛẽ do cetʼ thoṛa damte bạkin ạkhrińokʼ kana? Enre hõ aperen Baba Isorakʼ hukum chaḍa onko modre mitʼṭen hõ otre bae ńurokʼa;

³⁰ Apeakʼ ma bohokʼ reakʼ upʼ hõ lekha akantape.

³¹ Onate alope botorokʼa. Ente aema aema ghaṛwa cẽṛẽko khon hõ apeakʼ dam do ḍher bạ̃ṛtigetapea.

Jisu aṅgoce ar baṅe reaṅ

³² “Jãhãege hoṛko samaṅre ińe aṅgociń iń hõ ińren sermare menae Baba samaṅre uniń aṅgocea.

³³ Menkhan okoe hoṛko samaṅre ińe baṅeń iń hõ ińren sermare menae Baba samaṅre uniń baṅea.

Suluk do baṅ bickom tarwaṛege

³⁴ “Dhạrtite suluk emokʼiń hecʼakana mente do alope hudisa. Suluk emokʼ do bạń hecʼakana bickom tarwaṛege.

³⁵ Hopon do apat upạrte ar hoponera do eṅgat upạrte ar bạhu kuṛi do hanhartetʼ upạrte teṅgoko lạgitʼgeń hecʼakana.

³⁶ Ar hoṛren bạiri do acʼ gharońjren hoṛgeko hoyokʼtaea.

³⁷ “Jãhãege, acʼren eṅgat-apat iń khon bạ̃ṛtiye dulạṛkin uni do ińre lek doe baṅkana. Ar jãhãe acʼren gidrạko iń khon bạ̃ṛtiye dulạṛko uni hõ ińre lek doe baṅkana.

³⁸ Okoe acʼakʼ kurus gokʼkate bae pańjayiń uni hõ ińre lek doe baṅkana.

³⁹ Okoe acʼakʼ jiwi bańcaotae reakʼe monejoṅ uni do sạriyakʼ reakʼ jione adtaea. Menkhan okoe iń lạgitʼ acʼakʼ jiwiye adtae uni do sạriyakʼ reakʼ jione rukhiyạitaea.

Kuṛại

⁴⁰ “Okoe apeko ataṅpe onko do ińgeko ataṅediń kana; ar okoe ińe ataṅediń kan uni do kol akadińicʼgeye ataṅedekana.

⁴¹ Mitʼṭen nạbi jãhãege nạbi menteye ataṅe, enḍekhan nạbi okaṭakʼ kuṛạiye ńam, uni hõ ona kuṛạigeye ńama. Isor sewawae hoṛ jãhãege Isor sewawae hoṛ menteye ataṅe enḍekhan Isor sewawae hoṛ oka kuṛạiye ńam, uni hõ ona kuṛạigeye ńama.

⁴² Jãhãege noko kạṭicʼko modre mitʼ hoṛ ińren cela mente mitʼ bạṭi reaṛ dakʼe ńũ ocoye; sạrigeń metapekana, uni do oka lekate hõ acʼakʼ kuṛại do ohoe atʼletaea.”