Mark 7 - সান্তালী বাইবেল

Calao hijukʼkan ạn reaṅ

¹ Ado okoeko Jerusalem khonko hecʼakan tahẽkan onko modren adom Phạrusi ar sostor baḍaeko do Jisu ṭhenko hecʼ jarwayena.

² Onkoko ńelkeda, Jisuren celako modren adomko do ti begor ạbukte bhonḍ hoṛko leka jojomko duṛupʼakana.

³ Phạrusiko ar Jihudiko do sedaeren dhorom guruko okaṭakʼ niạmko emakan ona reakʼ niạm lekate ti begor ạbukte jãhãnakʼge bako jometʼ tahẽkana.

⁴ Ar hạṭiạ bajar khon hecʼkate hõ begor umte cetʼge bako jometʼ tahẽkana. Ona chaḍa onko do arhõ aema lekan ạri-cạliko pańjayetʼ tahẽkana, jemon loṭa, bạṭi, thạri gasao mańjao ar emanteakʼko.

⁵ Onate Phạrusiko ar sostor baḍaeko do Jisuko kulikedea, “Hapṛamko khon hecʼạgu akan ạri-cạli do amren celako cedakʼ bako manaoeda? Onko do begor ti ạbukte cedakʼko jom ńũiyeda.”

⁶ Jisui roṛ ruạṛatʼkoa, “Ape dope phạsiạrako kana! Jesaea nạbi do ṭhikge ape reaṅe nạbi akada. Uniyakʼ puthire ol akana: noko hoṛ do mocategeko ganaoedińa, menkhan onkoakʼ ontor do iń khon sạṅgińgetakoa.

⁷ Onko do ạuṛiyakʼgeko sewawạń kana, ar manwakoakʼ hukumkoge dhorom reakʼ sikhnạt menteko cetʼako kana.

⁸ Ape do Isor emakʼ hukumko bạgikate, manwa benaoakʼ ạri-cạlikope pańjayeda.”

⁹ Arhõe metatʼkoa, “Isorakʼ hukumko bạgikate manwakoakʼ cạliko pańja do bhagegepe baḍaekana.

¹⁰ Moseye menakada, ‘eṅgam ạpum ganaokinme,’ ar eṅgat se apat bạṛicʼ memenicʼ do gocʼte hõ goje hoyokʼa.

¹¹ Menkhan apepe meneda, jãhãege eṅgat se apattetʼe metae iń hotete okaṭakʼem porhokokʼ ona do ‘Korban,’ metakʼme Isor ṭhen samaṅ akana.

¹² Enḍekhan uni do eṅgat ar apat lạgitʼ cetʼge bape ceka ocowae kana.

¹³ Nonkate hecʼ ạgu akan ạri-cạlikope cetʼako kante Isorakʼ kathape ạuṛiyakʼeda. Ona chaḍa noa lekanakʼ arhõ ạḍi utạrakʼkope kạmiyeda.”

Okaṭakʼte manwa bae bhonḍokʼ

¹⁴ Noa tayom Jisu do hoṛko arhõ acʼ ṭhen hoho sorkateye metatʼkoa, “Jotoko ińakʼ katha ańjompe ar bujhạupe.

¹⁵ Bahre khon manwa bhitrite okaṭakʼ bolokʼkan onate manwa do ohoe bhonḍlena, bickom manwa bhitri khon okaṭakʼ oḍokokʼ kan, onatege manwa doe bhonḍokʼa.

¹⁶ Lutur menakʼtae hoṛ doe ańjomma.

¹⁷ Inạ tayom gadel hoṛko bạgikate oṛakʼe boloyen khan celako do ona katha reakʼ bhedtetʼko kulikedea.

¹⁸ Jisui metatʼkoa, “Cekate nunạkʼ dope bebujgea? Ape do cetʼ bape bujhạueda, bahre khon okaṭakʼ manwa bhitrite bolokʼkan onate manwa do bae bhonḍ daṛeaea.

¹⁹ Ente uniyakʼ ontorre ona do baṅ bolokʼ kana menkhan lacʼre bolokʼkana, ar tayomte ona do hoṛmo khon oḍok giḍikʼa.” Ona kathate uni do joto jomakʼge saphagea menteye bujhạu ocoyeda.

²⁰ Jisu do arhõe metatʼkoa, “Manwa bhitri khon okaṭakʼ oḍok hijukʼkan onatege manwa doe bhonḍ ocokʼ kana,

²¹ ente manwa bhitri khon, metakʼme ontor khonge joto lekan bạṛicʼ hudis, laṭghaṭ, kombṛo, khũn,

²² laloc, dusṭạmi, eṛe, umtạ umti, mẽtʼ jolokʼ, opoman, bạḍại ar bebujko oḍok hijukʼa.

²³ Noako sanam bạṛicʼakʼ do manwa bhitri khonge oḍokʼ hijukʼ kana ar noatege manwa doe bhonḍokʼa.”

Boṅgan hoṛ jạtren maejiuakʼ pạtiạu

²⁴ Inạ tayom Jisu do ona jaega bạgikate Tur ar Sidon elakateye calaoena. Uni do mitʼṭecʼ oṛakʼteye boloyena ar okoe hõ aloko baḍaeyea menteye menwana, menkhan bae oko tahẽ daṛeada.

²⁵ Onḍe mitʼṭen maejiue tahẽkana ar uniren kuṛi do bạṛicʼ jiue capaṛ akawade tahẽkana. Ado Jisu reaṅe ańjomketʼ khan hecʼkate uniyakʼ jaṅgareye giḍiyena.

²⁶ Uni do Junạni maejiue tahẽkana ar Surophoenikireye janamlena. Uni do Jisui nehõradea jemon acʼren kuṛi khon bạṛicʼ jiue oḍok giḍikae.

²⁷ Jisu do uniye metadea, “Gidrạkoge lacʼ bikʼ jom maṛaṅ ocowakome, ente gidrạkoakʼ jomakʼ hataokate setako samaṅre giḍikakʼ do baṅ bhagea.”

²⁸ Maejiue roṛ ruạṛkeda, “E Probhu, am do ṭhikgem men akada, menkhan gidrạkoakʼ jomakʼ reakʼ ganḍa gunḍạ oka do mej latarre ńurokʼkan setako do onakogeko jomeda.”

²⁹ Jisui menkeda, “Katha do bhagegem menakada, Do calakʼme; ar ńelme, bạṛicʼ jiu do hoponeram khone oḍok calao akana.”

³⁰ Ado oṛakʼe ruạṛen khan, acʼren kuṛi aṭetʼreye giticʼ akan ar bạṛicʼ jiu uni khon oḍok akane ńamkedea.

Kala ar Gungạ hoṛe bogeyen

³¹ Noa tayom Jisu do Tur elakae bạgi oṭowatʼte Sidon nagraha talate Gạlil doreão sor Dekapoli elaka reakʼ atokoteye calaoena.

³² Onḍe do mitʼṭen kala ar guṅgạ hoṛ Jisu ṭhenko ạgukedea ar capoye lạgitʼko nehõraedea.

³³ Jisu do bhiṛ tala khon mitʼ aṛeteye idikedete uniyakʼ banar luturre acʼakʼ kạṭupʼe gutukeda; ar thokate uni hoṛakʼ alaṅe joṭetʼketʼtaea.

³⁴ Ona tayom serma secʼ beṅgetʼ rakapʼkate kũhrạuateye menkeda, “Ephata” mane do “Jhijokʼme.”

³⁵ Ar inạtege uniyakʼ lutur do jhicʼentaea, ar alaṅ reakʼ gitạtʼ hõ chaḍaoente pusṭạute katha roroṛe ehopʼena.

³⁶ Unre Jisu do noa reaṅ hoṛko lại baṛaeye manakatʼkoa. Menkhan tinạkʼe manaketʼko, unạkʼge onko do ona reaṅ artetʼ lại baṛaeko ehopʼena.

³⁷ Onate hoṛko do hahaṛayenteko menkeda, “Jotowakʼ tinạkʼ bhageye kạmiyeda. Uni do kalakoe ańjom ocoyetʼkoa ar guṅgạko hõ katha roṛ reakʼ daṛeye emako kana.”