Mark 5 - সান্তালী বাইবেল

Bạṛicʼ jiu capaṛ akawade hoṛ

¹ Inạ tayom Jisu ar acʼren celako do Gạlil doreão paromkate Gerasenikoakʼ elakateko calaoena.

² Ado Jisu lạukạ khone pheḍ gotʼen khan bạṛicʼ jiu capaṛ akawade mitʼṭen hoṛ do mạ̃ṛĩ poḍa khon uni samaṅreye oḍok hecʼena.

³ Uni hoṛ do mạ̃ṛĩ poḍakoregeye tahẽnkan tahẽkana ar sikṛikote hõ bako tol ṭarhao daṛeaekan tahẽkana.

⁴ Ạḍi dhao biṛikote ar sikṛikoteko tolkaekan tahẽkana, menkhan uni do onae topakʼetʼ tahẽkana ar jaṅga reakʼ biṛiko hõe rạputʼetʼ tahẽkana. Ar okoege bako sambṛao daṛeaekan tahẽkana.

⁵ Uni do siń ńindạ topa danderkore ar burukoreye kikiạu baṛayetʼ tahẽkana ar dhirite acʼakʼ hoṛmoe koṭecʼ sirạ soroyetʼ tahẽkana.

^6-7 Ado Jisu sạṅgińre tahenregeye ńel ńamkede khan uni do ńir hecʼente Jisui sewawadea, ar ãṭ aṛaṅteye menkeda, “Maraṅ Isorren Hopon Jisu, iń tulucʼ amakʼ do cetʼ? Isor ńutumteń kiriạkʼ kana, alom sasetińạ.”

⁸ Noa iạteye menkeda ente Jisu do uniye metade tahẽkana, “Bạṛicʼ jiu, nui hoṛ khon oḍok calakʼme.”

⁹ Jisu do uniye kulikedea, “Celeama ńutum do?” Uniye menkeda, “Ińakʼ ńutum do phạdạńạ, ente ale do aema menakʼlea.”

¹⁰ Uni do Jisu nehõradeteye metadea ona elaka khon jemon aloe oḍok giḍikako.

¹¹ Un jokhecʼ ona sor reakʼ buru dhasnare maraṅ mitʼ khạṛ sukriko ạtińkan tahẽkana.

¹² Bạṛicʼ jiuko do Jisu nehõradeteko metadea, “Onko khạṛ sukrikore kolkaleme; ar onko bhitrire bolo ocoaleme.”

¹³ Ado Jisui hukumatʼko khan bạṛicʼ jiuko doko oḍokente sukrikoreko boloyena. Onate onko sukri do daṛaṅ secʼteko ńir senente doreãoreko ńurhạyena arko unum gocʼena. Ona khạṛre bar hajar gan sukriko tahẽkana.

¹⁴ Ar okoe sukriko gupikan tahẽkan onko do atoteko ńir calaoena ar sanam jaegare ona reakʼko lại pasnaokeda. Unre hoṛko do cetʼ hoyakana mente ńel lạgitʼko oḍok hecʼena.

¹⁵ Ar Jisu ṭhenko hecʼen khan bhut capaṛ akawade tahẽkan hoṛ do kicricʼ horokʼkate duṛupʼ akan ar boge akanko ńelkedea. Noa ńelte hoṛko do botor caṛhaoatʼkoa.

¹⁶ Noa ghoṭna okoeko ńelletʼ onko do bạṛcʼ jiu capaṛ akawade hoṛ ar khạṛ sukriko reaṅko lại baṛakeda.

¹⁷ Onate hoṛko do Jisuko nehõradea jemon akoakʼ simạnako khone calao joṅ.

¹⁸ Ado Jisu lạukạreye dejokʼkan tahẽkanre bạṛicʼ jiu capaṛ akawade tahẽkan hoṛ do uni sãote calakʼ lạgitʼe nehõradea.

¹⁹ Menkhan Jisu do noa menkateye bidạkadea, “Amakʼ oṛakʼte ruạṛ calakʼme ar Probhu Isore daya akatʼme ar am lạgitʼ tinạkʼ maraṅakʼe kạmi akatʼ ona lạiyakome.”

²⁰ Unre uni hoṛ doe calaoena ar Jisu acʼ lạgitʼ tinạkʼ maraṅe kạmi akatʼ ona do Dekapoli elakakore lại baṛaye ehopʼena, ar onate sanam hoṛko hahaṛayena.

Mitʼṭen gocʼ akan kuṛi ar ruạkʼkan maejiu

²¹ Ado Jisu lạukạte arhõ doreão hanasae paromen khan ạḍi utạr hoṛ do uni ṭhen hecʼkateko jarwayena. Menkhan uni do unhõ doreão aṛereye tahẽkana.

²² Unre Jihudikoakʼ sunạgogren Jaerus ńutuman mitʼṭen mukhiyạ hoṛ do onḍeye hecʼena ar Jisui ńelkede khan uniyakʼ jaṅgareye giḍiyena.

²³ Uni do Jisu nehõradeteye metadea, “Ińren kuṛi do gujukʼ dạkhilre menaea. Ado senkate dela capoyem, ar inạtege uni doe boge utạrokʼa.”

²⁴ Unre Jisu do soṅgeteye calaoena. Ar ạḍi utạr gadel hoṛ do uniko pańja idikedea ar beṛhaeteko riḍetʼ ciritʼedekan tahẽkana.

²⁵ Ona bhiṛ bhitrire mitʼṭen maejiue tahẽkana okoe do gelbar bochor khon pordhol rogteye jạbun akan tahẽkan.

²⁶ Uni do raranko ṭhen khon ạḍi duke ńamakatʼ tahẽkana, ar acʼakʼ oka tahẽkantae ona sanamakʼkoe khoroc caba akatʼ tahẽkana, menkhan boge baṅkate dinke din uni doe kạhil idikʼkan tahẽkana.

²⁷ Ado Jisu reaṅe ańjomketʼ khan bhiṛ bhitrirege uni do tayom secʼte senkate Jisuakʼ oyonakʼe joṭetʼketʼtaea,

²⁸ enteye monejoṅkan tahẽkana eken uniyakʼ kicricʼe joṭetʼ daṛeatae khangeye bogekʼa.

²⁹ Ar Jisuakʼ oyonakʼe joṭetʼketʼ são sãote mãyãm oḍokokʼ do thirentaea ar hoṛmoreye bujhạukeda rog do boge utạrentaea mente.

³⁰ Unre Jisu do acʼ khon daṛe oḍokena menteye bujhạukeda. Onate beṛhaete beṅgetʼ ạcurkateye kuliyana, “Okoeye joṭetʼkedińa?”

³¹ Unre uniren celakoko metadea, “Ńeletʼkange com gadel hoṛko riḍạtʼ ciritʼetʼmea, ar enhõm meneda, okoeye joṭetʼ kedińạ?”

³² Ado okoeṭakʼe kạmi akatʼ uni ńele lạgitʼ Jisu do beṛhaete beṅgetʼ ạcure ehopʼena.

³³ Uni maejiu do hoyakanakʼe bujhạuketʼ khan thar tharaoate hecʼkate Jisuakʼ jaṅgareye giḍiyena ar jotowakʼe lạiyadea

³⁴ Jisu do uniye metadea, “E mạ̃i, amakʼ pạtiạugeye boge akatʼmea. Sulukte calao joṅme, ar amakʼ duk khon boge akae tahenme.”

³⁵ Jisui roroṛkan tahẽkanrege sunạgogren mukhiyạ hoṛakʼ oṛakʼ khon thoṛa hoṛ do hecʼkate Jaerusko metadea, “Amren kuṛi doe gocʼena; Guru do ar alom haronea.”

³⁶ Onko hoṛkoakʼ katha ańjomkate Jisu do Jaeruse metadea, “Alom botorokʼa, eken pạtiạu dohoyme.”

³⁷ Ado Patras, Jakob, ar Johan chaḍa okoe hõ acʼ soṅgete bae sen ocoatʼkoa.

³⁸ Uni do Jaerusakʼ oṛakʼteye hecʼen khan gulmal hoyokʼkane ńelkeda. Ar hoṛko do kạuạ rạuạko rakʼ homoreda.

³⁹ Jisu do bhitrite bolokate hoṛkoe metatʼkoa, “Cedakʼpe rakʼreda? Kuṛi do bacoe gocʼ akan, ekene jạpitʼ akada.”

⁴⁰ Noa katha ańjomkate hoṛko do Jisuko landa dhutʼadea. Unre Jisu do oṛakʼ khon sanam hoṛ oḍokokʼe metatʼkoa. Ona tayom kuṛiren eṅgat-apat ar acʼren celako soṅgekate kuṛiye tahẽkan oṛakʼteye boloyena.

⁴¹ Unre kuṛiyakʼ umer do gelbar bochor tahẽkana. Ar Jisu do ti sapʼkedeteye menkeda; “Talitha kum.” Metakʼme “E mạ̃i metam kạnạń ma beretʼme.”

⁴² Ar inạtege kuṛi doe beretʼena ar taṛam baṛaye ehopʼena. Noa iạte onko do ạḍitetʼko hahaṛayena.

⁴³ Jisu do noa ghoṭna okoe ṭhen hõ baṅ lại baṛae lạgitʼe sontorkatʼkoa; ar kuṛi do thoṛa jomakʼ emae lạgitʼe metatʼkoa.