Mark 3 - সান্তালী বাইবেল

Borocʼ ti hoṛe bogeyen

¹ Ona tayom Jisu do arhõ sunạgogteye boloyena. Onḍe do nonkan mitʼṭen hoṛe tahẽkana okoe do mitʼ ti borocʼge tahẽkantae.

² Ar Phạrusiko modren adom hoṛ do Jisu dusire paṛaoe lạgitʼ ạtko ńam baṛayetʼkan tahẽkana. Ar jirạukʼ mãhãre Jisu jãhãeye bogekoa se baṅa onate bhageteko tạnkhiyede tahẽkana.

³ Jisu do uni borocʼ ti hoṛe metadea, “Beretʼme ar talare teṅgokʼme.”

⁴ Ona tayom Phạrusikoe kuliketʼkoa, “Jirạukʼ mãhãre bhage kạmi ganokʼa se bạṛicʼ kạmi ganokʼa? Jiwi bańcao se bạṛicʼ giḍikakʼ ganokʼa?” Menkhan Phạrusiko do cetʼge bako roṛ ruạṛadea.

⁵ Unre Jisu do edrete onkoe beṅgetʼatʼkoa ar onkoakʼ keṭecʼ mon iạte bhabna salakʼ uni hoṛe metadea, “Amakʼ ti tiạyrtam.” Adoe tiyạrketʼ khan ti do boge utạrentaea.

⁶ Unre Phạrusiko do bahrete oḍok hecʼkate Jisu cetʼlekateko gojea ona reaṅ Herod secʼrenko sãote sopolhako dhurạuena.

Probhu Jisuko pańjayede

⁷ Inạ tayom Jisu do acʼren celako sãote doreão aṛeteye calaoena. Ar Gạlil Prodesren ạḍi utạr hoṛ do uniko pańja idikedea.

⁸ Jisu okakoe kạmi akatʼ ona reakʼ katha ańjomkate Jihudạ, Jerusalem, Edom, Jordan gaḍa hanasaren, Tur ar Sidon nagraha beṛhae secʼren gadel hoṛko do uni ṭhenko hecʼena.

⁹ Jisu do acʼren celako mitʼṭecʼ huḍiń lạukạ ṭhik dohokakʼe metatʼkoa jemon bhiṛ iạte hoṛko aloko riḍạtʼ ciride.

¹⁰ Ar ḍher hoṛe boge akatʼko tahẽkante rugiko do uni joṭede lạgitʼko ṭhela ṭhilikʼkan tahẽkana.

¹¹ Ar bạṛicʼ jiuko do uniko ńelle khange uni samaṅreko bhindạṛokʼkan tahẽkana ar kikiạuateko metaekan tahẽkana, “Am dom Isorren Hopon kana.”

¹² Menkhan uni doe sontoretʼko tahẽkana okoe hõ jemon aloko sodore acʼ doe okoe kana mente.

Gelbar apostole bahaletʼko

¹³ Ona tayom Jisu do buruteye rakapʼena ar acʼakʼ kusileka uni do thoṛa hoṛ acʼ ṭhene hohowatʼkoa.

¹⁴ Arko hecʼen khan uni do gelbar hoṛko apostol hudạreye bahalketʼkoa, jemon onko do acʼ são sãoteko tahente,

¹⁵ bạṛicʼ jiuko oḍok giḍiko reakʼ daṛeye danako ar porcar lạgitʼe kol daṛeako.

¹⁶ Ar okoe gelbar hoṛe bahalketʼko onko doko hoyokʼ kana, Simon, uni do Patrase bahnakedea;

¹⁷ Sabdaeren hopon Jakob ar Johan, (nukinakʼ ńutum do Boanergise dohoketʼ tạkina metakʼme huḍurren hoponkin);

¹⁸ Andreas, Philip, Bartholomae, Mathae, Thoma, Alphaeren hopon Jakob, Thaddae, ar moullobadi Simon,

¹⁹ ar Jihudạ Iskariot, okoe do bạiriko then Jisui sapʼ ocolede.

Probhu Jisu ar bạṛicʼ jiukoren raj

²⁰ Jisu oṛakʼteye hecʼen khan uni ṭhen arhõ nunạkʼ hoṛko jarwayena je, acʼ ar acʼren celako do cetʼge bako jom daṛeada.

²¹ Ado Jisuren peṛako noa khoborko ańjomketʼ khan oḍok ạguiye lạgitʼko hecʼena. Onkoko menkeda, “Uni doe koṅka akana.”

²² Ar Jerusalem khonko hecʼakan tahẽkan sostor baḍaeko doko menkeda, “Unire do Beelsebul menaea. Uni do bạṛicʼ jiuren raj hotete bạṛicʼ jiukoe oḍok giḍiyetʼkoa.”

²³ Jisu do sostor baḍaekoe hohowatʼkoa ar cetʼako lạgitʼe metatʼkoa, “Soetan do cetʼ Soetane oḍok giḍi daṛeaea?”

²⁴ Jãhãṭakʼ rajosṭige apnar talare hạṭińlen khan ona rajosṭi do ohoge ṭikạulena.

²⁵ Mitʼṭen gharońj hạṭińlen khan ona gharońj do baṅ ṭikạukʼa.

²⁶ Onkage Soetan hõ apnar upạrte teṅgokate acʼakʼ daṛeye rạpud khan uni hõ ohoe ṭikạu daṛelena ar onḍege uni doe caba utạrokʼa.

²⁷ Noa katha do sạri kana je, mitʼṭen daṛean hoṛ do bako tol maṛaṅ lekhan okoe hõ uniyakʼ oṛakʼre bolokate jinisko ohoe luṭ daṛeletaea. Menkhane tol maṛaṅle khan doe luṭ daṛeakʼgea.

²⁸ Sạrigeń metapekana, manwakoakʼ sanam kại ar Isor upạrte henosta katha do ikạkʼtaea,

²⁹ menkhan sonot Jiu upạrte henosta katha do tisge baṅ ikạkʼtaea. Uni hoṛakʼ kại do jaejug hạbicʼ tahentaea.”

³⁰ Sostor baḍaeko oneko menletʼ tahẽkan, “Unire do bạṛicʼ jiu menaea,” Onkoakʼ ona katha iạtege Jisu do noa kathae menkeda.

Jisuren eṅgat ar boehako

³¹ Inạ tayom Jisuren eṅgat ar boehako do onḍeko hecʼena ar bahrere teṅgokate Jisu hohoae lạgitʼ khoborko kolkeda.

³² Unre Jisu beṛhaete ạḍi utạr hoṛko duṛupʼ akan tahẽkana. Adoko metadea, “Amren eṅgam ar boeham ar misramteko bahrereko khojetʼmea.”

³³ Jisui metatʼkoa, “Okoe kanae eṅgạń ar okoe kanako ińren boehańko do?”

³⁴ Ado acʼ beṛhaete duṛupʼ akanko secʼ beṅgetʼ ạcurkateye menkeda, “Noko kangeako ińren eṅgạń ar boehańko do!

³⁵ Okoe Isorakʼ sana lekako senokʼkan onkoge ińren, boeha, misera ar eṅgạń kanako.”