Mark 2 - সান্তালী বাইবেল

Mitʼkaṛ gocʼ rog hoṛe bogeyen

¹ Thoṛa din tayom Jisu do arhõ Kapharnạhum nagrahateye calaoena. Ar hoṛko do mitʼṭecʼ oṛakʼre menaea menteko ańjomkeda.

² Unre nunạkʼ hoṛko jarwayena je, duạr bahrere hõ jaega do ar baṅ tahẽlena. Ar Jisu do hoṛko ṭhen Isorakʼ kathae porcaretʼkan tahẽkana.

³ Ona jokhecʼ mitʼṭen mitʼkaṛ gocʼ rog hoṛ do pon hoṛte gokʼkate uni ṭhenko ạgukedea.

⁴ Menkhan bhiṛ iạte Jisu ṭhen bako idi seṭer daṛeadea. Onate onko do Jisu okareye tahẽkan ṭhik ona coṭ reakʼ calko ocokʼkeda. Ar ona phãkte parkom sudhạ uni rugi hoṛ do latarteko pheḍgotʼkadea.

⁵ Jisu do onkoakʼ pạtiạu ńelte uni hoṛe metadea, “E bạbu, amakʼ kại do ikạyen tama.”

⁶ Onḍe do adom sostor baḍaekoko duṛupʼ akan tahẽkana. Onko do mone moneteko gunạnokʼkan tahẽkana,

⁷ “Nui hoṛ do cedakʼ nonkan kathae roṛeda? Nui do Isore henostawae kana. Isor chaḍa ar okoe hale kại doe ikạ daṛekea?

⁸ Jisu do unrege onkoakʼ mon reakʼ nạndi gundikʼakʼe baḍaeketʼ khane metatʼkoa, “Mone monete ona katha reakʼ do cedakʼpe hudisokʼ kana?

⁹ Nui rugi hoṛ do okaṭakʼ metae algawa, ‘amakʼ kại ikạyen tama’ se, ‘beretʼkate, amakʼ parkom kuṭuṅtam ar taṛamme?’

¹⁰ Menkhan ape jemonpe baḍae daṛeakʼ Manwa Hopon do dhạrtire kại ikạ reakʼ ektiạri menakʼtaea.” Ar ninạkʼ hạbicʼ roṛkate uni rugi hoṛe metadea,

¹¹ “Ińiń metamkana, ma beretʼme, ar amakʼ parkom kuṭuṅkate oṛakʼte calakʼme.”

¹² Unrege uni hoṛ doe beretʼena ar acʼakʼ parkom kuṭuṅkate jotoko samaṅre bahreteye oḍok calaoena. Ar noa iạte sanamkoko hahaṛayena ar Isor sarhaokedeteko menkeda, “Nonkanakʼ do tishõ babon ńelakada.”

Probhu Jisu Lewiye hohoae kan

¹³ Jisu do arhõ Gạlil doreão aṛeteye oḍok calaoena. Unre ạḍi utạr hoṛ do uni ṭhenko hecʼena ar onko cetʼakoe ehopʼena.

¹⁴ Inạ tayom horteye parom calakʼkan tahẽkanre Alphaeren hopon Lewi do mạsul uṭhạu reakʼ oṛakʼre duṛupʼ akane ńelkedea. Jisu do uniye metadea, “Dela hijukʼte, ińren cela hoyokʼme.” Unre Liwi doe beretʼente Jisui pańjakedea.

¹⁵ Tayomte Jisu do Lewi oṛakʼre jojome duṛupʼena. Unre aema mạsul uṭhạuko ar bạṛicʼ hoṛko hõ Jisu ar uniren celako sãote jom lạgitʼko duṛupʼena, ente ạḍi utạr hoṛ do Jisu sãoteko calakʼkan tahẽkana.

¹⁶ Ado Phạrusiko dolren sostor baḍaeko do Jisu mạsul uṭhạuko ar bạṛicʼ hoṛko tulucʼ jojomkanko ńelkede khan uniren celakoko metatʼkoa, “Uni do mạsul uṭhạuko ar bạṛicʼ hoṛko tulucʼ cedakʼe jom ńũiyeda?”

¹⁷ Noa katha ańjomkate Jisu do sostor baḍaekoe metatʼkoa, “Boge hoṛko lạgitʼ raranicʼ reakʼ jạruṛ do bạnukʼa, menkhan ruạkʼko lạgitʼ do jạruṛgea. Dhorom hoṛ hohoako lạgitʼ do bạń hecʼakana menkhan kại hoṛko lạgitʼgeń hecʼakana.”

Upạs tahen reaṅ

¹⁸ Mitʼ dhao Johan bạbạptisicʼren celako ar Phạrusiko doko upạsetʼ tahẽkana. Ona ńelte adom hoṛ do hecʼkate Jisuko metadea, “Johanren cela ar Phạrusiko doko upạseda, menkhan amren cela do cedakʼ bako upạsetʼ kana?”

¹⁹ Jisui metatʼkoa, “Jãwãe beṭa soṅgere tahen tulucʼ cetʼ bạriạtko doko upạs daṛekea? Tinạkʼ din soṅgere Jãwãe beṭae tahen unạkʼ din onko do bako upạsa.

²⁰ Menkhan okte hijukʼ kana Jãwãe beṭa tinre onko khone idiocokʼa, unre onko doko upạsa.

²¹ “Okoe hõ mare kicricʼre nãwã kicricʼ do bako tạli jalada. Arko onkae khan mare kicricʼ khon nãwã tạliyakʼ do oṛecʼ hijukʼa. Onate oṛecʼ do artetʼge lạṭu idikʼa.

²² Okoe hõ mare kumre nãwã darkha rasa do bako dohoya. Arko dohole khan nãwã rasate kumko oṛejokʼa ar darkha rasa hõ nosṭokʼa. Onate nãwã darkha rasa do nãwã kumregeko dul dohoya.”

Jirạukʼ mãhã reaṅ sikhạuna

²³ Mitʼ jirạukʼ mãhãre Jisu do phosol talateye parom calakʼkan tahẽkana. Ar uniren celako do calakʼ tulucʼ geleko hotʼetʼkan tahẽkana.

²⁴ Ona ńelte Phạrusiko do Jisuko metadea, “Dhorom reakʼ niạm lekate jirạukʼ mãhãre oka baṅ ganokʼ ona do cedakʼko kạmikana?”

²⁵ Jisui metatʼkoa, “Abiạthar do tinre maraṅ naekeye tahẽkana unre Dạud ar uni soṅgetenko reṅgecʼletʼkore, Dạud okae cekaletʼ ona do cetʼ tishõ bape paṛhao akada?

²⁶ Uni do Isorakʼ oṛakʼre bolokate samaṅ akan piṭhạ reakʼe jomkeda ar acʼ sãotenko hõe ematʼkoa. Menkhan ona jom reakʼ ạn do maraṅ naekeko chaḍa ar okoeyakʼge baṅ tahẽkana.”

²⁷ Jisu do arhõe metatʼkoa, “Manwa lạgitʼge jirạukʼ mãhã do hoyakana, menkhan jirạukʼ mãhã lạgitʼ manwa do baṅa.

²⁸ Onate Manwa Hopon do jirạukʼ mãhãren hõ mạlik kanae.”