Mark 14 - সান্তালী বাইবেল

Jisuakʼ bohokʼre sunum dul

¹ Unre sen parom porob ar bin khạmiyanakʼ piṭhạ porob do ar bar din bạki tahẽkana. Ar maraṅ naekeko ar sostor baḍaeko do Jisu hape hapete sapʼkate goje reakʼ ạtko ńam baṛayetʼ tahẽkana.

² Onkoko menkeda, “Porobre do baṅ; baṅkhan disạm hoṛko talare gulmal hoe botejokʼa.”

Jisu Bethaniạre sunume ojokʼ ocokʼkan

³ Unre Jisu do Bethaniạren murhucʼ jom rugi Simonakʼ oṛakʼreye tahẽkana. Ado jojome duṛupʼ akan tahẽkanre mitʼṭen maejiu do ponḍ dhiri cukạkʼre ạḍi daman jaṭamaṅsi sunumanteye hecʼena. Ar cukạkʼ rạputʼkate uni do Jisuakʼ bohokʼre ona sunume dulkeda.

⁴ Menkhan onḍe okoeko tahẽkan onko modren adom hoṛ do edreyente ako akore menjoṅana, “Cedakʼ noa mahkaokʼ sunum do nosṭo giḍikakʼ hoyokʼ kana?

⁵ Noa ạkhriń lekhan pe sae Dinar khon hõ bạ̃ṛti damkokʼa ar ona do reṅgecʼ orecʼko em daṛekekoa.” Onko do noa menkate maejiu upạrte karacʼ kurujokʼko ehopʼena.

⁶ Unre Jisui metatʼkoa, “Thirokʼpe, cedakʼpe duk ocoyedea? Uni do iń lạgitʼ bhageakʼgeye kạmiakada.

⁷ Reṅgecʼ orecʼko ma jaoge ape sãore menakʼko, ar tinrepe monejoṅ unregepe goṛo daṛeakoa, menkhan iń do jao ghuṛi bape ńameńa.

⁸ Uni okae daṛeakatʼ onageye kạmi akada. Uni do topayiń lạgitʼe sapṛaoedińte laharege sunume ojokʼ ạdińa.

⁹ Sạrigeń metapekana, dhạrti reakʼ jãhã jaegarege Isorakʼ bhage sombat porcarokʼ, onḍege nui maejiue kạmi akatʼakʼ hõ uni disạye lạgitʼ lại torakʼa.”

Jihudạ do Jisui soprotede

¹⁰ Ona tayom Jihudạ Iskariotko metae mitʼ hoṛ do Jisu soprot ocoye lạgitʼ maraṅ naekeko ṭhene calaoena.

¹¹ Naekeko do Jihudạwakʼ katha ańjomkateko rạskạyena ar ṭaka emae lạgitʼ kathako emadea. Ar Jisu soprote lạgitʼ ạt ńam baṛaye ehopʼena.

Bańcaokʼ porob reakʼ bhoj

¹² Bin khạmiyanakʼ piṭhạ porob reakʼ pạhil hilokʼ do bańcaokʼ porob bhojre lạgitʼ bheḍa hoponko dãṛẽyetʼko tahẽkana. Onate celako do Jisuko kulikedea, “Bańcaokʼ porob reakʼ bhoj do okarele tearama mentem menjoṅ kana?”

¹³ Unre Jisu do acʼren barea cela noa menkateye kolketʼkinạ, “Aben do nagrahate calakʼben. Ar onḍe mitʼṭen herel hoṛ kanḍate dakʼe idikan ben ńamea. Aben do uni ben pańja idiyea.

¹⁴ Ar uni okaṭakʼ oṛakʼteye bolokʼa, ona oṛakʼren kisạ̃ṛ ben metaea, ‘Gurui menakada, celako sãote bańcaokʼ porob reakʼ bhoj okareń jom daṛeakʼ ona ińakʼ peṛa kandha do okare?’

¹⁵ Khange uni do cetan kandhare mitʼṭen sajao akatʼ oṛakʼe udukʼ abena. Ar onḍege jotowakʼ ben sapṛaoa.”

¹⁶ Unre unkin cela do senkate nagrahatekin boloyena, ar Jisui metatʼkin tahẽkan lekage jotowakʼkin ńamketʼte bańcao porob reakʼ bhojkin sapṛaokeda.

¹⁷ Ar ạyupʼen khan Jisu do gelbar celako sãote onḍeye calaoena.

¹⁸ Ado jojomko duṛupʼ akan tahẽkanre Jisui metatʼkoa, “Sạrigeń metapekana, ape modre mitʼ hoṛe soprotińa, uni do iń tulucʼ jojomkanicʼge.”

¹⁹ Unre celako doko bhabnayente mimitʼ hoṛkate memenko ehopʼena, “E Probhu Isor, uni do cetʼ iń kạnạń?

²⁰ Jisui metatʼkoa, “Uni do gelbarko modren mitʼ hoṛge, okoe do iń tulucʼ bạṭire piṭhại topoyetʼkan.

²¹ Manwa Hoponakʼ gujukʼ reaṅ sonot sostorre okaleka olakan onkage uni do gujukʼ hoyokʼtaea; menkhan hae uni hoṛ do, one okoe uniye sapʼ ocoyede! Uni hoṛakʼ janam do alo hoylen khange boge hoekokʼa.”

Probhu kedokʼ

²² Adoko jojomkan tahẽkanre Jisu do piṭhạ halaṅkate Isore gun manao joharadea ar onae kecakʼketʼte celako ematʼkoteye metatʼkoa, “Ne ataṅpe, noa do ińakʼ hoṛmo kana.”

²³ Ona tayom bạṭi hõ halaṅkate Isore gun manao joharadea are ematʼkoa. Ar sanamkoge ona bạṭi reakʼko ńũkeda.

²⁴ Unre Jisui metatʼkoa, “Noa do ińakʼ mãyãm kana, one okaṭakʼ do ạḍi hoṛko lạgitʼ emogokʼkan. Manwako lạgitʼ Isorakʼ nãwã bondobos do ińakʼ mãyãm hotetege bahal tahena.

²⁵ Sạrigeń metapekana, Isorakʼ rajre darkha rasa nãwãte ạuriń ńũi hạbicʼ noa do ar bạń ńũiya.”

²⁶ Ona tayom onko do mitʼṭecʼ sarhao sereńateko oḍokena ar jạitun buruteko rakapʼena.

Patras do Jisuye baṅekan

²⁷ Ado Jisu acʼren celakoe metatʼkoa, “Jotokoge iń iạte monrepe tạkijokʼa. Sonot sostorre ol akana, ‘gupiyicʼ iń mageya, onate bhiḍiko doko chirchạturokʼa.’

²⁸ Menkhan gocʼko khoniń jiwetʼ beredokʼ tayom iń do ape lahate Gạlilteń calakʼa.”

²⁹ Unre Patrase menkeda, “Sanamkoko tạkicʼlenre hõ iń do ohogeń tạkicʼlena.”

³⁰ Jisu do uniye metadea, “Sạrigeń metamkana, teheń ńindạ sim sạnḍi bar dhao ạuriye ragre am do pe dhaoem baṅeńa.”

³¹ Menkhan Patras do artetʼ murukteye menkeda, “Am sãote gujukʼ hoyokʼtińre hõ iń do ohogeń baṅlema.” Ar eṭakʼ celako hõ ona mitʼ kathageko roṛkeda.

Gethsimạni bagwanre Jisu

³² Ona tayom Jisu ar acʼren celako do Gethsimạniko metakʼ mitʼṭecʼ jaegateko oḍok calaoena. Jisu do celakoe metatʼkoa, “Tin hạbicʼ iń koejoṅ unhạbicʼ ape do nonḍe duṛupʼ hataṛokʼpe.”

³³ Noa menkate uni do Patras, Jakob ar Johane soṅge toraketʼkoa ar monre ạḍi duk ar dhak dhakaokʼe ehopʼena.

³⁴ Uni do onkoe metatʼkoa, “Dukte ińakʼ jiwi do oḍokokʼ kantińạ. Ape do nonḍe jagwar akae tahenpe.”

³⁵ Ona tayom uni do lahańokʼ senkate otre taberenteye koekeda jemon ona ghuṛi hoydaṛeakʼ khan acʼ ṭhen khon ocogokʼ.

³⁶ Uni doe menkeda, “Abba, E Baba, am ṭhen do sanamakʼge hoedaṛeakʼa. Noa duk reakʼ bạṭi iń khon ocogme baṛe. Enhõ ińakʼ sana leka do baṅa menkhan amakʼ sanage purạukʼ ma.”

³⁷ Ona tayom celako ṭhene ruạṛ hecʼen khan jạpitʼ akatʼe ńelketʼkoa. Uni do Patrase metadea, “E Simon, am dom jạpitʼ joṅkana? Mitʼ ghonṭa hõ cetʼ jagwar bam tahẽ daṛeada?

³⁸ Jagwar tahenpe ar koejoṅpe jemon biḍạure alope paṛaokʼ. Ontorre sana menakʼgea, menkhan hoṛmo do nijorgea.

³⁹ Jisu do arhõ senkate onkageye koekeda.

⁴⁰ Ar inạ tayome ruạṛ hecʼen khan arhõ jạpitʼ akatʼgeye ńamketʼkoa, ente dudṛumte onkoakʼ mẽtʼ do hạrubokʼ kan tahẽkantakoa. Ar Jisu cetʼko roṛ ruạṛaea mente onko do bako bujhạuleda.

⁴¹ Ado tesar dhao ruạṛ hecʼkateye metatʼkoa, “Ńitokʼ hõpe jạpitʼ akatʼgea? Ḍher hoyakana. Ńelpe, okte do seṭerena. Ńitge Manwa Hopon do kại hoṛkoakʼ tireye soprot ocokʼa.

⁴² Ma beretʼpe, dela bon calakʼa, okoe bạirikoakʼ tireye soprotiń uni doe seṭerena.”

Bạirikoakʼ tire Probhu Jisu

⁴³ Jisui roroṛkan tahẽkanrege Jihudạ do onḍeye hecʼena. Uni do gelbar celako modren mitʼ hoṛe tahẽkana. Ar uni sãote ạḍi utạr hoṛ do tarwaṛe ar ṭheṅgawanteko hecʼena. Onko do maraṅ naekeko ar sostor baḍaeko ar murubbikoko kol akatʼko tahẽkana.

⁴⁴ Ar Jisu okoeye soprotlede uni do onko tulucʼ mitʼṭecʼ cinhại ṭhik dohoakatʼ tahẽkana. Uni doe metatʼko tahẽkana, “Okoeṭakʼ iń cokʼae, uni kangeae. Ape do unigepe sabea arpe pahra idiyea.”

⁴⁵ Onate Jihudạ do mitʼ mohnḍa Jisu ṭhen senkateye menkeda, “E Guru!” Ar noa menkateye cokʼadea.

⁴⁶ Unre onko hoṛ do Jisuko sapʼkedea.

⁴⁷ Menkhan sorre teṅgo akanko modren mitʼ hoṛ do acʼakʼ tarwaṛe bocʼkate maraṅ naekeren gutiyakʼ luture hese ńurketʼtaea.

⁴⁸ Jisu do onkoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawante iń sasapʼpe hecʼakana?

⁴⁹ Iń ma jaoge ape talare tahẽkate mundilreń cetʼapekan tahẽkan, ar unre ma bacope sapʼlediń. Menkhan sostor reakʼ katha do purạukʼtege hoyokʼa.”

⁵⁰ Unre celako do uniko ńir bạgiyadea.

⁵¹ Ar mitʼ juạn koṛa do eken oyonakʼte paṭhekate Jisu tayom tayomteye calakʼkan tahẽkana.

⁵² Hoṛko do uniko jhuṭiạukede khan oyonakʼ giḍikate eken hoṛmogeye ńir paskaoena.

Maraṅ bạisi samaṅre Jisu

⁵³ Onko hoṛ do maraṅ naeke ṭhen Jisuko idikedea. Ar onḍe do maraṅ naekeko, murubiko ar sostor baḍaeko mitʼ ṭhenko jarwayena.

⁵⁴ Ar Patras do pharak pharakʼre tahẽkate Jisu tayomte senkate maraṅ naekeakʼ raca hạbicʼe boloyena. Ar onḍe palṭonko sãoteye duṛupʼ panteyente seṅgel ṭhen jorogokʼe ehopʼena.

⁵⁵ Ar maraṅ naekeko ar maraṅ bạisiren hoṛko do Jisu goje lạgitʼ gohako ńam baṛayetʼkan tahẽkana, menkhan onko do okaṭakʼ gohage bako ńamleda.

⁵⁶ Jisu upạrte aema hoṛge eṛe gohako emkeda, menkhan onkoakʼ goha hõ baṅ jurilentakoa.

⁵⁷ Unre adom hoṛ do teṅgoyente uni upạrte noa eṛe gohako emkeda,

⁵⁸ “Ale do roroṛle ańjomakadea, ‘Iń do manwa benaoakʼ noa mundil iń dhaṅ dhasera ar pe dinte nonkan mitʼṭen mundil iń benaoa okaṭakʼ do manwa tite benaoakʼ baṅkan.’ ”

⁵⁹ Menkhan enrehõ onkoakʼ goha do baṅ jurilentakoa.

⁶⁰ Unre maraṅ naeke doe teṅgoyena ar Jisui kulikedea, “Am do cetʼ bam roṛ ruạṛa? Am upạrte noko do cetʼ gohako emeda?”

⁶¹ Jisu do thirgeye tahẽyena, cetʼge bae roṛ ruạṛleda. Maraṅ naeke do arhõe kulikedea, “Am do cetʼ sarhaoanicʼ Isorren Hopon Mạsi kanam?”

⁶² Jisui menkeda, “Uni kangeạń. Ar ape do Manwa Hopon sanam daṛeanicʼ Isorakʼ jojomsa aṛere duṛupʼakan ar rimilte hijukʼkanpe ńelea.”

⁶³ Khange maraṅ naeke do acʼakʼ kicricʼ oṛecʼketʼteye menkeda, “Goha reakʼ do ar cetʼ jạruṛabona?

⁶⁴ Ape hõ coṅpe ańjomketʼ uni do Isore henostawae kana. Ado cetʼpe bujhạukea?” Onko jotoge Jisu do gujukʼ sạjại lek kanae menteko bicạr dusikedea.

⁶⁵ Unre adomko do hoṛmoreko thoadea ar uniyakʼ mẽtʼko betʼketʼtaea ar kilạukedeteko metadea, “Am do cetʼ nạbi kanam? Mase lạime okoeye dalketʼmea!” Ona tayom palṭonko do idikateko thapa baṛakedea.

Patras Jisui baṅekan

⁶⁶ Patras tinre bhitri racareye tahẽkana unre maraṅ naekeren mitʼṭen kạ̃ṛmĩ do onḍeye hecʼena.

⁶⁷ Ar Patras jorogokʼkane ńelkede khan beṅgetʼ uricʼadeteye metadea, “Am hõ coṅ uni Nasaretren Jisu sãotem tahẽkan.”

⁶⁸ Menkhan Patras doe baṅketʼteye menkeda, “Cetʼem meneda ona do baḍae hõ bạń baḍaea ar bujhạu hõ bạń bujhạueda.” Noa menkate Patras do bahre duạr ṭhene calaoen khan mitʼṭen sim sạnḍi doe rakʼgotʼkeda.

⁶⁹ Uni kạ̃ṛmĩ do Patras arhõe ńelkede khan onḍe teṅgo akankoe metatʼkoa, “Nui hoṛ do onko modren kanae.

⁷⁰ Patras do arhõe baṅkeda. Ado thoṛa ghạṛicʼ tayom sorre okoeko teṅgo akan tahẽkan onko hõ Patrasko metadea, “Khạṭige am do onko modren mitʼ hoṛ kanam, ente am dom Gạlilren kana.”

⁷¹ Unre Patras doe sarapana ar kiriạyenteye menkeda, “Okoe reakʼpe menetʼkan uni do bạń oromakadea.”

⁷² Ar unrege sim sạnḍi do dosar dhaoe rakʼgotʼkeda. Ar unre Patras do ona katha disạ hecʼadea one Jisui metade tahẽkan, “Sim sạnḍi bar dhao ạuriye ragre am do pe dhaoem baṅeńa.” Onate uni do hũk hũke rakʼkeda.