Mark 13 - সান্তালী বাইবেল

Jug reakʼ mucạtʼ dinko

¹ Ado Jisu mundil khone oḍok calakʼkan tahẽkanre acʼren mitʼṭen cela do uniye metadea, “E Guru, ńelme, tinạkʼ lạṭu lạṭu dhiri ar tinạkʼ mońj mońj dolanko!”

² Jisu do uniye metadea, “Am ma noako lạṭu lạṭu dolanem ńeletʼkan, menkhan noa reakʼ mitʼṭecʼ dhiri hõ ar mitʼ dhiri cetanre baṅ tahena; joto do rạputʼ giḍi ocokʼa.”

Kosṭo ar santao reaṅ

³ Jisu do mundil samaṅ senakʼ Joitun burureye duṛupʼ akan tahẽkanre Patras, Jakob, Johan ar Andreasteko do hape hapete hecʼkate uniko kulikedea,

⁴ “Lạiyaleme, noako do tis hoyokʼa? Ar okalekan cinhạko ńeltele bujhạu daṛeakʼa noako purạukʼ lạgidokʼ ghuṛi do seṭer akana mente.”

⁵ Jisui metatʼkoa, “Ńelpe, okoe hõ jemon aloko bulạupe.

⁶ Ente ḍher hoṛge iń ńutumte hecʼkateko mena, ‘iń kangeạń uni do,’ ar aema doko bulạu ocokʼa.

⁷ Ape do lạṛhại reakʼ saḍekope ańjomlere alope bilbilạukʼa. Noako do hoyokʼgea, menkhan unrehõ mucạdokʼ okte do baṅkana.

⁸ Mitʼ jạtko do eṭakʼ jạtko upạrte, ar mitʼ rajosṭi do eṭakʼ rajosṭi upạrteko lạṛhạiya; ar aema jaegare dhạrti laṛaokʼa ar akal hoyokʼa. Menkhan noako do eken saset reakʼ etohopʼ kana.

⁹ “Sontor akan tahenpe. Maraṅ bạisiren hoṛko ṭhenko soprotpea ar sunạgogkoreko dalpea. Iń iạte disạm cakʼlaoko ar rapajko samaṅre teṅgokʼ hoyokʼtapea; ar onko samaṅre iń reaṅ goha emokʼ hoyokʼtapea.

¹⁰ Sanam jạt jạtrenko ṭhen Isorakʼ bhage sombat do porcar maṛaṅ hoyokʼa.

¹¹ Ar bicạr lạgitʼko sapʼ idilepere laha khon alope bhabnakʼa cetʼko roroṛ hoyokʼtapea mente. Ona jokhecʼ oka kathape lại ocokʼ, onage roṛpe, ente apege roroṛ hoyokʼtapea ona do baṅ bickom sonot Jiugeye roṛa.

¹² “Boeha do boehatetʼe soprotea, apat do hopontetʼ gocʼ ocoye lạgitʼe sapʼocoyea. Gidrạko do go-baba upạrteko teṅgona arko khũn ocokoa.

¹³ Iń iạte sanamkogeko hirkhạwapea, menkhan mucạtʼ hạbicʼ okoeye ṭarhao tahen uni do bańcaoe ńama.

Ujạṛ utạrakʼ hirkhạwakʼ

¹⁴ “Ar ujạṛ utạrakʼ hirkhạwakʼ okare tahen baṅ ganokʼ, ona tinre onḍe tahẽ akanpe ńela (Paṛhaoicʼ doe moneyakʼma) unre Jihudạre tahenko do buruteko ńir joṅma.

¹⁵ Chatre menaeicʼ do jãhãnakʼ oḍok idi lạgitʼ aloe pheḍokʼma ar oṛakʼte aloe bolokʼma.

¹⁶ Baṛgere menaeicʼ hõ oyonakʼ ạgui lạgitʼ aloe ruạṛma.

¹⁷ Unre bhạrti hoṛmoanko ar okoe gidrạko nunuwako kan onkore do hae hae!

¹⁸ Koejoṅpe, jemon rabaṅ dinre noako alo hoyokʼ,

¹⁹ ente unre nonkan santaoko hoyokʼa one oka do dhạrti sirjạu khon ńit hạbicʼ baṅ hoyakan ar ona tayom do ar baṅ hoyokʼa.

²⁰ Probhu Isor do onako din bae khaṭo ocole khan okoe hõ ohoko bańcao daṛekokʼa. Menkhan Isor do acʼren bachao akan hoṛko lạgitʼ ona dinkoe khaṭo akada.

²¹ “Unre jãhãegeko metape, ‘ńelpe, Mạsi do nonḍe menaea,’ se ‘hanḍe menaea,’ alope pạtiạuakʼa;

²² ente eṛe Mạsi ar eṛe nạbikoko upelokʼa ar maraṅ maraṅ hahaṛa kạmi ar cinhạkoko uduga, hoydaṛeakʼ khan Isorren bachaoko hõko bulạu daṛeakoa.

²³ Menkhan ape do sontor akae tahenpe. Ńelpe, laharege jotowakʼ iń lại dohowatʼpea.

Manwa hopon reakʼ seṭerokʼ

²⁴ “Ona okte reakʼ santao tayomge siń cando doe ńutokʼa, ar ńindạ cando do bae terdeja,

²⁵ Ipilko serma khonko ńurokʼa, siń cando, ńindạ cando ar ipilko do bako ṭarhaokʼa.

²⁶ Unre hoṛko do Manwa Hopon maraṅ daṛe ar ṭhonokante rimilte hijukʼkanko ńelea.

²⁷ Uni do acʼren serma goḍetkoe kolkote dhạrti reakʼ mitʼ mucạtʼ khon eṭakʼ mucạtʼ hạbicʼ ponon secʼ khon Isorren sanam bachao akan hoṛkoe jarwa mitʼkoa.

Loa dare khon cecetʼakʼ

²⁸ “Loa dare ńelte cetʼ joṅpe. Ente ona reakʼ dạrko balekate sakam sagenlen khanpe baḍae daṛeakʼkana, lolo din do seṭer akana.

²⁹ Onkage noako hoyokʼkanpe ńellere bujhạupe, Manwa Hopon doe seṭer akana, hẽ; duạr ṭhengeye teṅgo akana.

³⁰ Sạrigeń metapekana, noako hoylenre hõ niạ piṛhiren thoṛa hoṛ do bańcaoko tahena.

³¹ Serma ar dhạrti do cabakʼa menkhan ińakʼ kathako do jaejug hạbicʼ tahena.

Din ar okte reakʼ do okoe hõ bae baḍaea

³² “Ona din ar ona okte reakʼ katha do okoe hõ bako baḍaea, sermaren goḍetko hõ baṅ, ar Hopon hõ baṅ, eken Babageye baḍaea.

³³ Ape do sontor akan tahenpe, jagwar tahenpe ar koejoṅpe, ente bape baḍaea oktetetʼ do tiskan coṅ.

³⁴ Ona din do nonkan mitʼṭen hoṛ lekana okoe do eṭakʼ disạmteye calao lạgidokʼkan. Ar oṛakʼe bạgiyakʼ jokhecʼ acʼren gutiko joto lekan dạyike em baṛawatʼko. Ar apan ạpin kạmikoe batlao baṛawatʼkote horhoicʼ do jagwar akae tahene men oṭowadea.

³⁵ “Ape hõ onkage jagwar akae tahenpe, ente oṛakʼren mạlik baṅ do ạyupʼ, baṅ do tala ńindạ, baṅ do simrakʼ okte, baṅ do setakʼ jokhecʼe hijukʼkan ona do bape baḍaea.

³⁶ Uni do ackage hecʼkate jạpitʼ akatʼ jemon bae ńampe.

³⁷ Okaṭakʼ iń metapekan ona do sanamkoń metakokana, jagwar akae tahenpe.”