Malaki 2 - সান্তালী বাইবেল

Naekeko ṭhen sontor katha

^1-2 Phạdkoren Probhu Isore meneda, “E naekeko, ńitokʼ ape ṭhen noa sontor kathań koleda. Ińakʼ katha bape ańjom ar iń bape manotiń enḍekhan ape cetanre sarapiń paṛao ocoya ar apeakʼ sanam ạsirbad do sarapakʼ iń hoeocoya. Hẽ, iń do lahate hõń onkaleda, ente manotiń secʼ do bape moneyakʼ kana.

³ Ape khạtirte aperen bõskoń sạjạikoa; apeakʼ porobre samaṅokʼkan janwarkoakʼ mạilạ do apeakʼ mẽtʼãhãregeń thopramapea ar ona mạilạ sudhạ sạṅgińteń giḍikapea.”

⁴ Phạdkoren Probhu Isor do arhõe meneda, “Baḍaekakʼpe, iń do ape ṭhen noa sontor kathań kol akada jemon Liwi bõsrenko lạgitʼ iń bạisạu akatʼ bondobos do tahẽakange tahen.

⁵ Onko lạgitʼ oka bondobosiń doholetʼ ona do jion ar bhạlại reakʼ bondobos kana. Noa bondobosge onkoń ematʼko tahẽkana. Ona chaḍa noa do botoranakʼ bondobos hõ kana, jemon ińko botorạń; ar sạrige onko do ińko botorạńkan tahẽkana.

⁶ Onkoakʼ mocare sạriyakʼ reakʼ cecetʼakʼge tahẽkana ar onare jãhãn eṛeteakʼ do baṅ tahẽkana. Sạriyakʼ ar dhoromte onko do iń sãoteko dãṛãnkan tahẽkana ar ḍherkoge kại khonko ruạṛ ạguiyetʼko tahẽkana.

⁷ Isorakʼ monsubạ babotre cecetʼakʼ emokʼ do naekekoakʼ lek kana, menkhan ona cecetʼakʼ jemon alo adokʼ. Ona chaḍa Isorakʼ katha baḍae lạgitʼ do naekeko ṭhenge calakʼ jạruṛa, ente onko do phạdkoren Probhu Isorren paṭhaona hoṛ kanako.

⁸ Menkhan ape do ṭhik hor khonpe ghańgeṛ akana ar apeakʼ cecetʼakʼte ḍher hoṛpe tohotʼ bhinḍạṛ ocoyetʼkoa. Nonkate Liwi bõsrenko lạgitʼ dohowakʼ bondobospe bad giḍikakʼ kana. Iń phạdkoren Probhu Isorge noa katha doń meneda.

⁹ Ape do ińakʼ horte bape senlena bickom ạn-ạriko babotre hoṛko sãote ape hõ mẽtʼãhãpe beṅgetʼakʼ kan tahẽkana. Ona iạte sanam hoṛko samaṅre nihạ̃t ocokʼ ar bemanot ocokʼkoń hoyoco akatʼpea.”

Jihudạren hoṛkoakʼ bepạtiạu

¹⁰ Abo sanamkoren baba do cetʼ uni mitʼ babageye baṅkana? Mitʼṭen Isorge cetʼ abo do bae sirjạu akatʼbona? Enḍekhan cedakʼ mitʼ hoṛ do armitʼ hoṛ sãote bin pạtiạr bon hoyokʼkante aboren hapṛamko lạgitʼ doho akan bondobos bon bemanotetʼ kana?

¹¹ Jihudạ doe phạsiạragea. Israel ar Jerusalemre do bạṛicʼakʼ kạmiko hoyakana. Jihudạren hoṛ do boṅgan hoṛkoren hoponerako baplaletʼko iạte Probhu Isore dulạṛetʼko hoṛko besapha ocoakatʼkoa.

¹² Okoe nonkako kạmikan onko do phạdkoren Probhu Isor ńutumte samaṅokʼakʼ jinisko ạguiyre hõ enhõ Probhu Isor do Jakob bõsrenko hotete onko sanamkoe marao giḍikoa.

¹³ Ar mitʼṭecʼ bạṛicʼ kạmipe kạmikana; apeakʼ mẽtʼ dakʼte ape do Probhu Isorakʼ pinḍpe lohotʼetʼtaea. Ape dope rakʼeda arpe homor halaṅeda, ar okape emokʼkan uni do ona ar bae moneyakʼkana ar kusi monte apeakʼ ti khon ataṅ hõ bae ataṅeda.

¹⁴ Arpe meneda, “Cetʼ iạte bae ataṅeda? Ona reakʼ karon do hoyokʼkana, Probhu Isor do aperen mimitʼ hoṛko ar onkoren juạn okteren bạhukoakʼ bapla reakʼ gohae hoylena; menkhan onkoren bạhu do onkoren sãoten hoṛkanako, onkoren bapla bondobosren bạhukanako, enhõ onko do uni tulucʼ phạsiarako hoyakana.

¹⁵ Probhu Isor do jãwãe ar maejiu cetʼ bae mitʼ akatʼkinạ? Hoṛmo ar jiu do uniren kangea kin. Unkin do cekate kin mitʼgea? Ente uni do unkin hotete Isore botorae kan mitʼ bõsrenko rukhiyạkoe menleda. Ar onate ape do apeakʼ ontor babotre sontor akae tahenpe; jemon juạn okteren bạhuko sãote phạsiạrako alope hoyokʼ.

¹⁶ Israelren Probhu Isore meneda, “Bạhu bạgiye doń hirkhạwakʼ kana.” Ona chaḍa phạdkoren Probhu Isore meneda, “Kicricʼe horokʼetʼ leka okoe do sasantaoakʼte apnare sajaokʼkan uniyakʼ kạmi doń hirkhạwakʼ kana. Onate ape do apeakʼ ontor babotre sontor akae tahenpe, ar phạsiạrako do alope hoyokʼa.”

Bicạr reakʼ din

¹⁷ Ape do apeakʼ katha hotete Probhu Isorpe laṅga ocoyede kana. Enhõpe meneda, “Cekate ale do unile laṅga ocoakadea?” Ape dope nonkayeda, arpe meneda, “Okoeko behoketʼkan onko sanamkoge Probhu Isorakʼ mẽtʼreko bhagegea ar uni hõ onko cetanreye kusigea,” Sepe meneda, “Okare menaea uni Isor do one uni dhorom reakʼe bicạretʼkan?”