Luk 7 - সান্তালী বাইবেল

Subedarren gutiye bogeyen

¹ Ado hoṛko ṭhen noako sanamakʼe lại mucạtʼketʼ khan, Jisu do Kapharnạhum nagrahateye calaoena.

² Onḍe mitʼṭen Rom Subedarren guti do ruạ kạhilte gujukʼ dạkhile tahẽkana. Ar Subedar do uni guti ạḍiye dulạṛedekan tahẽkana.

³ Uni do Jisu reaṅe ańjomketʼ khan Jihudikoren murubbiko Jisu ṭhen kolketʼkoteye nehõradea jemon uni doe hijukʼte acʼren gutiye bogeye.

⁴ Ado onko murubbiko do Jisu ṭhen hecʼkate nehõrateko metadea, “Okoe lạgitʼ noam kạmi, uni do noaren lek kangeae,

⁵ ente uni do aleren hoṛkoe dulạṛetʼkoa ar aleakʼ sunạgog do unigeye tearakada.”

⁶ Unre Jisu do onko soṅgeteye calaoena. Ar ona oṛakʼ khon sạṅgińreye tahẽkanrege Subedar do acʼren gateko kolketʼkoteye men gotʼadea, “E Probhu, alom haronokʼa, ente ińakʼ oṛakʼtem bolokʼ ona reakʼ lekgiń baṅkana.

⁷ Onate iń do am ṭhen senokʼ lek hõ bạń bujhạulena. Am do eken katha baṛe roṛgotʼkam, ar inạtege ińren guti doe boge utạrokʼa.

⁸ Iń do noa kathań baḍaea, ente iń hõ eṭakʼicʼakʼ katha leka calakʼ hoyokʼtińạ ar sipạhikohõ ińakʼ katha lekako calakʼ kana. Iń do mitʼṭecʼ ‘calakʼiń metae khan’ uni doe calakʼa, ar eṭagicʼ ‘hijukʼiń metae khan’ uni doe hijukʼa, ar ińren gutiń metae khan ‘noa kạmime’ uni doe onkaea.”

⁹ Noa katha ańjomkate Jisu doe hahaṛaena ar acʼ pańjayedekanko secʼ beṅgetʼ ạcurkateye menkeda, “Ińiń metapekana, Israelko talare nunạkʼ maraṅ pạtiạu do tishõ bạń ńel akawana.”

¹⁰ Ado Subedar okoekoe kolletʼko onkoko ruạṛ calaoen khan uni guti do boge akanko ńelkedea.

Rạnḍi maejiuren koṛae jiwetʼ ruạṛkede

¹¹ Noa tayom Jisu do Nạinko metakʼ mitʼṭecʼ ato secʼe calao idiyena. Unre acʼren celako ar gadel hoṛko hõ uni soṅge soṅgeteko calakʼkan tahẽkana.

¹² Ado ona ato reakʼ phaṭok-duạr ṭhene seṭeren khan mitʼṭen gocʼ hoṛ do bahreteko oḍok idiyede tahẽkana. Ar okoeye gocʼ akan tahẽkan uni do eṅgattetʼren sadher hopone tahẽkana, ar uni maejiu hõ rạnḍigeye tahẽkana. Ar atoren ḍher hoṛge uni rạnḍi maejiu sãoteko tahẽkana.

¹³ Probhu Jisu do uni rạnḍi maejiu ńelte mãyã hecʼadeteye metadea, “Alom raga.”

¹⁴ Inạ tayom uni do sen sorkate parkome joṭetʼkeda. Ar onate mạ̃ṛĩ gokʼ idiyetkan hoṛ doko teṅgoyena. Jisui menkeda, “E bạbu, metam kạnạń, ma beretʼme.”

¹⁵ Ar inạtege gocʼ akanicʼ do beretʼkateye duṛupʼena ar katha roroṛe ehopʼena. Ar Jisu do eṅgattetʼ ṭhene jimạkadea.

¹⁶ Noate sanam hoṛ do botor caṛhaoatʼkoa ar Isor sabasiaete memenko ehopʼena, “Abo talare mitʼṭen maraṅ nạbigeye upel akana. Isor do acʼren hoṛkoe hiri akatʼbona.”

¹⁷ Jisuakʼ noa katha do Jihudạ Prodes ar ona beṛhaeteakʼ sanam jaegakore pasnao idiyena.

Probhu Jisu ṭhen Johanren celako

¹⁸ Ado Johan bạbạptisicʼren celako do noako reaṅ katha Johanko baḍae ocokedea.

¹⁹ Unre Johan do acʼren barea cela hohoatʼkinte Jisu ṭhen noa katha kuliye lạgitʼe kolketʼkina, “Okoeyakʼ hijukʼ reakʼ katha menakʼtae uni dom am kangea, se eṭagicʼ lạgitʼle koyokʼ hora?”

²⁰ Unkin hoṛ do Jisu ṭhen hecʼkatekin metadea, “Johan bạbạptisicʼ do kulime lạgitʼ am ṭhene kol akatʼlińạ, ‘okoeyakʼ hijukʼ reakʼ katha menakʼtae uni dom amkangea, se eṭagicʼ lạgitʼle koyokʼ hora?’ ”

²¹ Unre Jisu do ruạ hasote jạbun akanko ar bạṛicʼ jiu sapʼakatʼko hoṛkoe bogeketʼkoa ar kãṛã hoṛko hõ ńeńel daṛeye danatʼkoa.

²² Ona tayom Johanren cela roṛ ruạṛatʼkinteye metatʼkinạ, “Okako ben ńelketʼ arben ańjomketʼ ona calaokate Johan lạiyae ben. Ar baḍae ocoyeben je, kãṛã hoṛko ńeńel kana, leḍhakoko taṛameda, murhucʼ jom hoṛko bogekʼkana, kala hoṛko ańjomeda, gocʼkoko jiwetʼ beredokʼ kana ar reṅgecʼ orecʼko ṭhen do bhage sombat porcarokʼ kana.

²³ Bhạgangeae uni do, okoe iń iạte monre bae tạkijokʼ.”

²⁴ Ado Johan okoeye kolletʼkin unkin hoṛkin calaoen khan Jisu do gadel hoṛko Johan reaṅ lạiyakoe ehopʼena, “Hahaṅkarte do cetʼ ńeńelpe oḍok senlena? Hoete hilạukʼkan chuci?

²⁵ Se cetʼ ńel lạgitʼpe oḍok calaolena? Mońj kicricʼ horokʼ akatʼ mitʼṭen hoṛ? Okoe damanakʼ kicricʼko horokʼ bandeyetʼ ar sukko jometʼkan onko ma coṅ rajakʼ oṛakʼreko tahenkan.

²⁶ Se cele ńeńelpe oḍok calaolena? Mitʼṭen nạbi? Hẽ metape kạnạń, uni do nạbi khon hõe maraṅgea.

²⁷ Johan kangeae uni do, one okoe reaṅ sonot sostorre ol akan, ‘ńelme, am lahate ińren goḍetiń kolekana. Uni do am lahate senkate amakʼ hore teara.’

²⁸ Ińiń metapekana, manwako modre Johan khon maraṅicʼ do okoe hõ bạnukʼkoa; enrehõ Isorakʼ rajre huḍiń utạricʼ do Johan khone maraṅgea.”

²⁹ Arko ańjomketʼ sanam hoṛko ar mạsul uṭhạuko do Johanakʼ porcarte Isor do dhorom menteko aṅgockedete bạptismako ataṅkeda.

³⁰ Menkhan Phạrusiko ar sostor baḍaeko do Johan ṭhen bako bạptislente Isorakʼ monejoṅakʼko neṅghaokeda.

³¹ Jisu do arhõe metatʼkoa, “Enḍekhan niạ jugren hoṛ do okoe tulucʼ iń jurikekoa? Ar okoe lekanako?

³² Onko do nonkan gidrạ lekanako, okoe do bajarre duṛupʼkate eṭakʼko hohowateko metakokan, ‘ape lạgitʼ tiriole oroṅkeda, menkhan bape enecʼlena; homor halaṅkedale, menkhan bape rakʼleda.’

³³ Johan bạbạptisicʼ do hecʼkate piṭhạ ar darkha rasa bae jomletʼtepe menkeda, ‘unire do bhut menaea.’

³⁴ Ar Manwa Hopon do hecʼkateye jom ńũiyetʼtepe meneda, ‘ńelepe, uni do lebṛa ar ńu bhuteṛicʼ, mạsul uṭhạuko ar boṅgan hoṛkoren gate kanae.’

³⁵ Menkhan okoe akel reakʼ gobolreko calakʼkan, onkoakʼ jiongeye sạbudetʼ kana, akel do khạṭigea mente.”

Phạrusi Simonakʼ oṛakʼre Probhu Jisu

³⁶ Mitʼṭen Phạrusi hoṛ do Jisu acʼ ṭhen jom ocoye lạgitʼe neotakedea. Unre Jisu do uniyakʼ oṛakʼte senkate jojome duṛupʼena.

³⁷ Ona atore mitʼṭen bạṛicʼ maejiue tahẽkana. Ar Jisu do Phạrusiyakʼ oṛakʼre jom lạgitʼe calao akana menteye baḍaeketʼ khan uni do mitʼṭecʼ ponḍ dhiri cukạkʼte mahkaokʼ sunume idi darakeda.

³⁸ Ar Jisu tayom secʼre uniyakʼ jaṅga ṭhen senkate teṅgoyente rakʼ rakʼte acʼakʼ mẽtʼ dakʼte uniyakʼ jaṅgakine lohotʼketʼtaea. Ar inạ tayom uni do acʼakʼ upʼte jaṅgae jotʼketʼtaea ar jaṅgareye cokʼadete ona mahkaokʼ sunume duladea.

³⁹ Ado okoe Phạrusi Jisui neotalede uni do noa ńelte mone monteye menkeda, “Nui hoṛ do nạbiye tahẽnlen khane baḍae daṛekea, cetʼ lekan maejiu jaṅgae joṭetʼetʼtaea mente; ente maejiu doe bạṛicʼgea.”

⁴⁰ Jisu do uniye roṛ ruạṛadea, “E Simon, am tulucʼ thoṛa katha menakʼtińạ.” Simone menkeda, “E Guru, ma roṛme.”

⁴¹ Jisui menkeda, “Mitʼ mahajon ṭhen bar hoṛkin dharaoletʼa. Mitʼ hoṛ do mõṛẽ sae Dinar ar eṭakʼicʼ do mõṛẽgel Dinar.

⁴² Unkin do okoeyakʼ hõ hala ruạṛ reakʼ daṛe baṅ tahẽkante bana hoṛge dayateye ikạ katʼkinạ. Enḍekhan mase lạime, unkin modre mahajon do okoeṭakʼ bạ̃ṛtikin dulạṛkea?”

⁴³ Simone menkeda, “Ińakʼ hudisre, okoeyakʼ bạ̃ṛti rin ikạ akantae unige.” Jisu do uniye metadea, “Am do ṭhikgem menakada.”

⁴⁴ Ona tayom Jisu do maejiu secʼ beṅgetʼkate Simone metadea, “Nui maejiu baṛe ńeleme. Iń do amakʼ oṛakʼteń hecʼena ar jaṅga ạbukokʼ lạgitʼ dakʼ hõ bam emadińạ, menkhan uni do mẽtʼ dakʼte ińakʼ jaṅgakine ạbukkeda ar acʼakʼ upʼteye jotʼketʼtińạ.

⁴⁵ Am do cokʼ hõ bam cokʼ ạdińa, menkhan ińiń boloyen tayom khon uni do ińakʼ jaṅgae cokʼ ạtiń kana.

⁴⁶ Am do bohokʼre sunum hõ bam ojokʼạdińạ, menkhan uni do ińakʼ jaṅgare mahkaokʼ sunume dulạdińa.

⁴⁷ Onateń metam kana, ḍher dulạṛe udukʼketʼte uni doe bujhạu ocoyeda je, uniyakʼ kạiko ḍhergetare hõ ona do ikạ akantaea. Ar okoeyakʼ thoṛa ikạ akantae uni do thoṛage dulạṛe uduga.”

⁴⁸ Jisu do uni maejiue metadea, “Amakʼ kạiko do ikạyena.”

⁴⁹ Unre okoe Jisu soṅgete jojomko duṛupʼakan tahẽkan onko do mone monete memenko ehopʼena, “Nui doe okoekante, kạikoe ikạyetʼ kana?”

⁵⁰ Jisu do uni maejiue metadea, “Pạtiạu akantem, kại khon bańcaoem ńamkeda. Ma sulukte calao joṅme.”