Luk 6 - সান্তালী বাইবেল

Jirạukʼ mãhã manao reaṅ

¹ Mitʼ jirạukʼ mãhãre Jisu do phosol talateye calakʼkan tahẽkana. Ar uniren celako do gele hotʼkate tire ridgạukateko jometʼ tahẽkana.

² Unre adom Phạrusikoko menkeda, “Dhorom reakʼ ạn lekate jirạukʼ mãhãre baṅ ganoakʼ do cedakʼpe onkayeda?

³ Jisui metatʼkoa, “Ape do cetʼ bape paṛhao akada, Dạud ar acʼ soṅgetenko reṅgecʼ letʼkore uni do cetʼe cekaleda mente?

⁴ Uni do Isorakʼ oṛakʼre bolokate samaṅ akan piṭhạ reakʼe jomkeda ar soṅgetenko hõe ematʼko tahẽkana. Menkha eken naekeko chaḍa ar okoeyakʼ hõ ona jom reakʼ niạm do baṅ tahẽkana.”

⁵ Mucạtʼre Jisu do onko Phạrusikoe metatʼkoa, “Manwa Hopon kangeae jirạukʼ mãhãren mạlik do.”

Borocʼ ti rog hoṛe bogeyen

⁶ Ado eṭakʼ ar mitʼ jirạukʼ mãhãre Jisu do sunạgogre bolokateye cetʼakokan tahẽkana. Onḍe do nonkan mitʼṭen hoṛe tahẽkana, one uni do jojom ti borocʼge tahẽkantae.

⁷ Unre sostor baḍaeko ar Phạrusiko do Jisu dusire paṛaoe lạgitʼ ạtko ńam baṛayetʼ tahẽkana. Ar jirạukʼ mãhãre uni do jãhãeye bogekoa se baṅ, ona lạgitʼ mońjteko tạnkhi baṛayede tahẽkana.

⁸ Menkhan Jisu do onkoakʼ mon reakʼ hudisokʼakʼkoe baḍaekan tahẽkana. Onate borocʼ ti hoṛe metadea, “Beretʼme ar dela sanamko talare teṅgonme.” Ar inạtege uni doe beretʼena are teṅgoyena.

⁹ Jisu do sostor baḍaeko ar Phạrusikoe metatʼkoa, “Mitʼṭecʼ kathań kulipea, jirạukʼ mãhãre bhage kạmi ganokʼa se bạṛicʼakʼ kạmi ganokʼa, jiwi bańcao ganokʼa se nosṭo giḍikakʼ ganokʼa?”

¹⁰ Ona tayom beṛhaetenkoe beṅgetʼ ạcuratʼkote uni hoṛe metadea, “Amakʼ ti tiyạrtam.” Are onkaketʼ khan uniyakʼ ti do boge utạrentaea.

¹¹ Unre dhorom mukhiyạko do ạḍi bạṛicʼko raṅgaoena ar Jisu cetʼko cekaea ona reakʼ ako talare galmaraoko ehopʼena.

Gelbar apostolkoe bachaoetʼko

¹² Inạ tayom Jisu do koejoṅ lạgitʼ mitʼṭecʼ buruteye rakapʼ calaoena ar goṭa ńindạ Isor ṭhene koe aṅgakeda.

¹³ Ado setakʼen khan acʼren celako acʼ ṭhene hohoatʼkoa ar onko mod khon gelbar hoṛe bachaoketʼkote apostol hudại ematʼkoa.

¹⁴ Onko doko hoyokʼ kana Simon, okoe do Patrase ńutumkede; Simonren boeha Andreas; Jakob ar Johan; Philip ar Bartholomae;

¹⁵ Mathae ar Thoma; Alphaeren hopon Jakob; Simon, okoe do moulobadiko metaekan;

¹⁶ Jakobren hopon Jihudạ ar Jihudạ Iskariot, one okoe do Jisu bạirikoakʼ tireye soprotlede.

Jisu doe cetʼakokan are bogeyetʼkoa

¹⁷ Ado acʼren celako sãote buru khon pheḍkate mitʼṭecʼ soman jaegareye teṅgoyena. Onḍe do acʼren ạḍi utạr celakoko jarwa akan tahẽkana. Ona chaḍa Jihudiạ, Jerusalem, Tur ar Sidonko metakʼ doreão aṛeteakʼ nagrahako khon ạḍi utạr hoṛ do onḍeko hecʼakan tahẽkana.

¹⁸ Onko do uniyakʼ katha ańjomtae ar rog khon boge ocokʼ lạgitʼko hecʼakan tahẽkana. Ar tinạkʼ do bạṛicʼ jiu hotete kosṭoko ńametʼ tahẽkan onko hõko bogekʼkan tahẽkana.

¹⁹ Ar sanam hoṛ do uni joṭede lạgitʼko kurumuṭuyetʼ tahẽkana, ente uni khon do daṛe oḍokokʼkan tahẽkana ar onate jotokoko bogekʼkan tahẽkana.

Bhạganko ar rakʼjoṅko

²⁰ Jisu do celako secʼ beṅgetʼkate memene ehopʼena, “Bhạgangeape ape reṅgecʼ orecʼko do, ente Isorakʼ raj do apeakʼkangea.

²¹ Bhạgangeape, ape okoe ńitokʼ reṅgecʼetʼpe, ente ape dope bi ocokʼa. Bhạgangeape, ńitpe rakʼjoṅ kanko do, ente ape dope landa joṅa.

²² Bhạgangeape, Manwa Hopon iạte hoṛko hirkhạwapere, ar somaj khonko oḍoklepere arko landa dhutʼapere ar apeakʼ ńutum ańjomteko tholere.

²³ Unre ape do rạskạkʼpe ar hulạsokʼpe, ente ape lạgitʼ sermare maraṅ kuṛại menakʼa. Ente onkoren hapṛam hõ nạbikoko onkaletʼkoa.

²⁴ “Menkhan hae ape kisạ̃ṛko do! Ape do apeakʼ jiwi raṛecʼpe ńam horayeda.

²⁵ Hae ape bi akanko do! Ape do reṅgecʼpea. Hae ape landakanko do! Ape dope dukokʼa arpe rakʼjoṅa.

²⁶ Hae ape do, joto hoṛ ape reaṅ bogeko roṛlere. Ente onkoren hapṛamkoge bhonḍ nạbikoko sarhaoetʼko tahẽkana.

Bạiriko dulạṛko reaṅ

²⁷ Ape okoepe ańjometʼkan apeń metapekana, ape do aperen bạiriko dulạṛkope. Ar okoeko kurudape kan onko do bhạlạikope.

²⁸ Ar okoeko sarap apekan onko bhorakope. Ar okoe ape tulucʼ bạṛicʼko beoharetʼ onko lạgitʼ koepe.

²⁹ Jãhãe mitʼ johae thapame khan uni do eṭakʼ joha hõ ạcuraeme. Okoe amakʼ oyonakʼe recʼme uni do aṅgrop hõ idiocoaeme.

³⁰ Okoe am ṭhenko koe onko do emakom. Ar jãhãe amakʼ jãhãn jinise idile khan ona do alom koe ruạṛea.

³¹ Hoṛko ṭhen khon cetʼleka beoharpe khojkan, onkage ape hõ onko tulucʼ beoharpe.

³² “Okoeko dulạṛetʼpe, ape hõ eken onkogepe dulạṛetʼko khan; enḍekhan apeakʼ sabasi do okor? Ente boṅgan hoṛko hõ coṅ nonka mako dulạṛetʼkoge.

³³ Okoe apeko bhạlạyetʼpe, ape hõ eken onkogepe bhạlạiyetʼko khan; enḍekhan sabasikʼ reakʼ do cetʼ menakʼtapea? Ente boṅgan hoṛko hõ coṅ ona mako onkayetʼkange.

³⁴ Okoe ṭhen khon ńam ruạṛpe asokʼkan, onkoge pańcape emakokan khan; enḍekhan onare do cetʼ sabasi menakʼa? Ńam ruạṛ iạtege coṅ bạṛicʼ hoṛ ma bạṛicʼ hoṛko pańcako emakokan.

³⁵ Menkhan ape do aperen bạiriko dulạṛkope ar onko bhạlạikope. Ar baṅ ńam ruạṛokʼ reakʼ askate pańca emakope. Enḍekhan ape lạgitʼ maraṅ kuṛại menakʼa, ar ape do sanam dayawạnicʼ Isorren hoponpe hoyokʼa, ente uni do gun baṅ manaoko ar bạṛicʼko hõe dayawako kana.

³⁶ Aperen baba cetʼ lekae mãyãwạnicʼkan, onkage ape hõ mãyãwanko hoyokʼpe.

Eṭakʼko alo bicạrko reaṅ

³⁷ “Eṭakʼkoakʼ ghạṭko alope sapʼ baṛaetakoa, enḍekhan apeakʼ dos hõ baṅ sabokʼtapea. Eṭakʼko sạjại ńam lek kanako mente alope hudiskoa, onate ape hõ sạjại ńam lek mentepe menocokʼa. Eṭakʼko ikạkakope, enḍekhan ape hõpe ikạ ocokʼa.

³⁸ Dan emokʼpe, enḍekhan ape hõpe emocokʼa; ota khacao khacaote, ruku rukute, curu buruateko gochawapea, ente cetʼlekape soṅakoa onkage ape hõko soṅ ruạṛapea.”

³⁹ Jisu do acʼren celako cetʼako lạgitʼ ar mitʼṭecʼ phene lạiyatʼkoa, “Mitʼṭen kãṛã do cetʼ eṭakʼ armitʼ kãṛãe ạyur daṛekea? Onka khan bana hoṛge cetʼ ghaḍlakʼre bạkin khańjokʼa?

⁴⁰ Cela do guru khon bae maraṅa, menkhan joto cecetʼakʼe ńamlere guru lekae hoyokʼa.

⁴¹ “Amren boehamakʼ mẽtʼre menakʼ cubạkʼgem ńeletʼkana, menkhan amakʼ mẽtʼre menakʼ jobra do cedakʼ bam ńel ńameda?

Dare ar ona reakʼ jo

⁴² Amakʼ mẽtʼ reakʼ jobra bam aṭkaretʼ khan, cekate amren boeha dom metae kana, ‘okor ya amakʼ mẽtʼ reakʼ cubạkʼiń oḍok letamge?’ E bhonḍicʼ pạhilre amakʼ mẽtʼ khon jobra ocokʼ maṛaṅlem, enḍeanecʼ boehamakʼ mẽtʼre menakʼ cubạkʼ oḍok lạgitʼ pusṭạutem ńeńela.

⁴³ “Bhage darere bạricʼ jo ar bạṛicʼ darere bhage jo do baṅ jokʼa.

⁴⁴ Jo tege dare do oromokʼa. Jạnum jhạuạ khon loa ar jạnumanakʼ dare khon darkha jo do bako goda.

⁴⁵ Bhage hoṛ do acʼakʼ ontorre perecʼ bhageakʼ khon bhage kathageye oḍok ạguiya, ar bạṛicʼ hoṛ do acʼakʼ ontorre perecʼ bạṛicʼakʼ khon bạṛicʼ kathageye oḍoktaea. Manwa ontor okaṭakʼte perecʼ menakʼ, moca do ona kathageye roṛa.

Bar lekan oṛakʼ bekʼnao reaṅ

⁴⁶ “Ape do cedakʼ ‘Probhu Isor, Probhu Isorpe’ mitạń kana, menkhan iń okań metapekan ona do bape onkayeda?

⁴⁷ Jãhãege iń ṭhen hecʼkate ińakʼ kathae ańjom ar ona lekae kạmi uni do okoe lekanicʼ iń lạikepea.

⁴⁸ Uni do nonkan mitʼṭen hoṛ lekanae, one okoe do oṛakʼe benao lạgitʼ khạndri macha la kate dhiri cetanre rehetʼe bạisạuketʼ. Ado banbạsi ar ạtukʼ dakʼko hecʼena ar ona oṛakʼre bajaoena, menkhan oṛakʼ do baṅ cekalena, ente ona do kajakte benao akan tahẽkana.

⁴⁹ Okoe ińakʼ katha ańjomkate ona leka bae kạmi, uni do nonkan hoṛ lekanae, okoe do begor rehetʼ bạisạute hasa cetanre oṛakʼe benaoketʼ. Ado ạtukʼ dakʼ hecʼkate tinre ona oṛakʼre bajaoena unre ona oṛakʼ do lạnduṛ ńurena.”