Luk 5 - সান্তালী বাইবেল

Celakoe ńametʼko

¹ Mitʼ din Jisu do Genesaret doreão aṛereye teṅgo akan tahẽkana. Unre gadel hoṛ do Isorakʼ katha ańjom lạgitʼ beṛhaete hecʼkateko riḍạtʼ ciritʼedekan tahẽkana.

² Un jokhecʼ uni do doreão aṛere barea lạukại ńel ńamkeda. Ona lạukạren jạilạko do pheḍkate akoakʼ jhạliko ạrupʼetʼkan tahẽkana.

³ Unre Jisu do Simonakʼ lạukạreye decʼena ar ḍhip khon thoṛa pharak ńokʼ idiye metadea. Ona tayom uni do lạukạreye duṛupʼena ar gadel hoṛko cetʼakoe ehopʼena.

⁴ Ado galmaraoe mucạtʼketʼ khan Jisu do Simone metadea, “Khạndrite idime ar hako sapʼko lạgitʼ apeakʼ jhạli caḍoetape.”

⁵ Simone menkeda, “E Guru, ale do goṭa ńindạle khaṭaoena, menkhan celege bale sapʼ daṛeatʼkoa; enrehõ amakʼ katha leka jhạlile caḍoea.

⁶ Ado jhạliko caḍoketʼ khan nunạkʼ hakoko beṛketʼkoa, jhạli do oṛejokʼ lekayena.

⁷ Unre goṛo ńam lạgitʼ onko do eṭakʼ lạukạren sãoten hoṛko gạwicʼatʼkoa. Ado onkoko hecʼen khan banar lạukạre nunạkʼ hakoko rakapʼketʼkoa; hakote onakin lạukạ do unumokʼ lekayena.

⁸ Noa ńelte Simon Patras do Jisu samaṅre ombakʼenteye menkeda, “E Probhu, iń doń kại hoṛ kana; iń ṭhen khon calao joṅme baṛe.”

⁹ Ar unạkʼ hako jhạliyenko ńelketʼko khan Simon Patras ar uni sãoten sanamko doko hahaṛayena.

¹⁰ Onkage Jakob ar Johanko metakin Sabdaeren banar hopon hõkin hahaṛayena. Unre Jisu do Simone metadea, “Alom botorokʼa; ńitokʼ khon am do hoṛ sasapʼ hoṛem hoyokʼa.”

¹¹ Inạ tayom onko do ḍhipte lạukạko ạgukeda ar sanamakʼ bạgi oṭowatʼte Jisuko pańjakedea.

Barea rugikin bogeyen

¹² Mitʼ din Jisu do mitʼṭecʼ atoteye calaoena. Ar onḍe do murhucʼ jom rogte perecʼ mitʼṭen hoṛe tahẽkana. Uni do Jisui ńelkede khan taberente nehõr salakʼe menkeda, “E Probhu, sanalem khanem boge daṛeạńạ.”

¹³ Jisu do ti tiyạrkate joṭetʼkedeteye metadea, “Iń hõ onageń menetʼkana, ma saphakokʼme,” Ar unrege uni doe boge utạrena.

¹⁴ Jisu do uniye hukumadea, “Noa katha do okoe ṭhen hõ alom lại baṛaea, bickom senkate naeke ṭhen ńel ocokʼme. Ar ona tayom saphakʼ babotre Mose okaṭakʼ dãṛẽ reakʼe hukumakatʼ ona baṛe samaṅ me. Enḍekhan hoṛko ṭhenem sạbudokʼa am dom boge akana.”

¹⁵ Enrehõ Jisuakʼ sombat do arhõ pasnao idiyena. Uniyakʼ katha ańjom lạgitʼ ar rog khon bogekʼ lạgitʼ ạḍi utạr hoṛ do uni ṭhen hijukʼko ehopʼena.

¹⁶ Ar Jisu do jaoge nisun jaegakore senkateye koejoṅkan tahẽkana.

Mitʼkaṛ gocʼ hoṛe bogeyede

¹⁷ Mitʼ din Jisu do hoṛkoe cetʼakokan tahẽkanre Phạrusiko ar sostor baḍaeko hõ onḍeko duṛupʼ akan tahẽkana. Noko do Gạlil ar Jihudạ reakʼ atoko ar Jerusalem nagraha khonko hecʼakan tahẽkana. Ar rugiko bogeko reakʼ Probhu Isorakʼ daṛe do Jisure tahẽkana.

¹⁸ Unre thoṛa hoṛ do parkomte mitʼkaṛ gocʼ rog hoṛko gokʼ ạgukedea. Onko do bhitrite idikate Jisu samaṅre dohoye lạgitʼko kurumuṭukeda,

¹⁹ menkhan bhiṛ iạte bhitrite bolokʼ horge bako ńamleda. Unre onko do chatreko decʼena ar chat reakʼ ṭạli ocokʼkate parkom sudhạ Jisu samaṅreko pheḍ gotʼkadea.

²⁰ Jisu do onkoakʼ pạtiạu ńelteye menkeda, “E gate, amakʼ kại do ikạyen tama.”

²¹ Noate sostor baḍaeko ar Phạrusiko do mone monete hudisokʼko ehopʼena, “Nui hoṛ doe okoekante, Isore henostawae kana? Isor chaḍa ar okoe kại doe ikạ daṛeakʼa?”

²² Ado onkoko hudisokʼkan reakʼe bujhạuketʼ khane metatʼkoa, “Mon monte cedakʼ ona katha reakʼ dope hudisokʼ kana?

²³ Okaṭakʼ memen algawa, ‘amakʼ kại ikạyen tama,’ se ‘beretʼkate taṛam baṛaeme?’

²⁴ Menkhan jemonpe baḍae daṛeakʼ Manwa Hopon do dhạrtire kại ikại reakʼ ektiạri menakʼtaea mente,” Khange Jisu do uni mitʼkaṛ gocʼ rog hoṛe metadea, “Metam kạnạń, ma beretʼme, parkom kuṭuṅtam ar oṛakʼte calakʼme.”

²⁵ Uni hoṛ do unrege jotoko samaṅreye teṅgoyena ar aṭetʼakʼ kuṭuṅkate Isor sarhao sarhaoete acʼakʼ oṛakʼteye calaoena.

²⁶ Onate sanam hoṛko ṭhak cabayena ar botorokʼ salakʼ Isor sabasiyaeteko menkeda, “Teheń do hahaṛawakʼge bon ńelkeda!”

Probhu Jisu do Lewiye hohoaekan

²⁷ Inạ tayom Jisu do bahreteye calaoena ar mạsul uṭhạu oṛakʼre Lewi ńutuman mitʼṭen mạsul-uṭhạuicʼ do duṛupʼakane ńelkedea. Jisu do Lewiye metadea, “Dela hijukʼte, ińren cela hoyokʼme.”

²⁸ Onate Lewi doe beretʼena ar acʼakʼ jotowakʼ bạgikate Jisui pańjakedea.

²⁹ Tayomte Lewi do acʼakʼ oṛakʼre Jisu lạgitʼ maraṅ okocʼe bhojkeda. Ar onko soṅgete ạḍi utạr mạsul uṭhạuko ar eṭakʼko hõ jojomko duṛupʼena.

³⁰ Unre Phạrusiko ar sostor baḍaeko doko karacʼ kurucʼente Jisuren celakoko metatʼkoa, “Mạsul uṭhạuko ar bạṛicʼ hoṛko tulucʼ do cedakʼpe jom ńũiyeda?”

³¹ Jisui metatʼkoa, “Boge hoṛko lạgitʼ raranicʼ reakʼ do jạruṛ bạnukʼa, menkhan ruạkʼko lạgitʼ do jạruṛgea.

³² Dhorom hoṛ hohowako lạgitʼ do baṅ menkhan kại hoṛko lạgitʼgeń hecʼakana.”

Upạs tahen reakʼ sikhạuna

³³ Ado onko sostor baḍaeko do Jisuko metadea, “Johanren celako do jaogeko upạseda arko koejoṅkana, ar Phạrusikoren celako hõko onkayeda, menkhan amren cela doko jom ńũiyeda.”

³⁴ Jisui metatʼkoa, “Jãwãe beṭa soṅgere tahen tulucʼ cetʼ bạriạtko doko upạs oco daṛekekoa?

³⁵ Menkhan okte daraekana Jãwãe beṭa do onko ṭhen khone idiocokʼa, ar unre onko doko upạsa.”

³⁶ Ona tayom Jisu do cetʼako lạgitʼ noa phene lạiyatʼkoa: “Nãwã kicricʼ oṛecʼkate okoe hõ marenakʼ kicricʼre bako tạli jalada, enteye onkae khan nãwã kicricʼ mae oṛecʼetʼkange; ar nãwã kuṭrạre mare kicricʼ hõ baṅ jurikʼa.

³⁷ Nãwã darkha rasa do mare kumkore bako dul dohoya, arko dohole khan nãwã darkha rasate kumko oṛejokʼa. Onate rasa do buhelokʼa ar kum hõ nosṭokʼa.

³⁸ Onate nãwã darkha rasa do nãwã kumrege dul dohoy jạruṛa.

³⁹ Ar mare darkha rasa ńũ tayom okoe hõ nãwã rasa do bae khoja, enteye mena, ‘marenakʼge bhagea.’ ”