Luk 3 - সান্তালী বাইবেল

Johan bạbạptisicʼakʼ porcar

¹ Romren moharaj Tiberius Kạisạre rajokʼkan gel mõṛẽakʼ bochorre Pontus Pilạt do Jihudạren disạm cakʼlaoyicʼe tahẽkana. Unre Herod do Gạlilre ar uniren boeha Philip do Jituriạ ar Trakhonitis disạme calaoetʼ tahẽkana. Ar Lusanius do Abileneren disạm cakʼlaoyicʼe tahẽkana,

² ar Hannas ar Kaeapha do Jihudikoren maraṅ naekekin tahẽkana. Ona oktere Isor do hahaṅkar jaegare Sakariạ hopon Johan ṭhen acʼakʼ kathae sodorkeda.

³ Unre Johan do Jordan gaḍa beṛhaeteakʼ sanam jaegakore senkate porcare ehopʼena jemon hoṛko kại khon monko ạcurte ikạko ńam, ar ona reakʼ cinhạ lekate bạptismako ataṅ.

⁴ Jesaea nạbi reakʼ puthire ol akan leka, “Hahaṅkarre mitʼṭen hohokạnicʼ reakʼ aṛaṅ, ‘Probhu Isorakʼ hor tearkataepe, uniyakʼ suṛucʼ horko sojhe kataepe.

⁵ Sanam buru nalako bhataokʼa ḍuṅgriko hõ copodokʼa. Konḍeawakʼko sojhekʼa, ar khõedakʼ lopakʼakʼ hor do somanokʼa.

⁶ Manwako kại khon bańcaoko lạgitʼ Isor okae ceka akatʼ, ona do sanam hoṛko ńela.’ ”

⁷ Unre bạptisokʼ lạgitʼ ạḍi utạr hoṛ do Johan ṭhen hijukʼko ehopʼena. Uniye metatʼkoa, “E kạrinạṅgin bõsrenko! Isorakʼ daraekan sạjại khon ńir bańcaokʼ lạgitʼ do okoeye cetaoketʼpea?

⁸ Ar kại khon cetʼleka monpe ạcurakatʼ onkage ona reakʼ lek leka apeakʼ jionre jo udugpe. Ar Abrahamren bõs kanape mente alope hudisa. Sạrigeń metapekana, Isor do noako dhiri khon Abrahamren bõskoe benao daṛeakoa.

⁹ Dare gonḍarege ṭeṅgocʼ do ṭenḍar dohoakana. Oka dare bhage baṅ jokʼ ona do makʼ giḍikʼte seṅgelre khadle ocokʼa.”

¹⁰ Unre hoṛko do Johanko kulikedea, “Enḍekhan ale do cetʼle cekaea?”

¹¹ Metatʼkoae, “Jãhãeakʼ barea aṅgrop menakʼtae khan, uni do bạnukʼtaeicʼe hạṭińaema. Ar jomakʼ menakʼtaeicʼ hõe onkaema.”

¹² Ado mạsul uṭhạuko bạptisokʼ lạgitʼko hecʼen khan Johanko metadea, “E guru, ale do cetʼle cekaea?”

¹³ Uni doe metatʼkoa, “Ạnre oka menakʼ ona khon bạ̃ṛti alope hataoa.”

¹⁴ Ar palṭonko hõko kulikedea, “Ale do cetʼle cekaea?” Uni doe metatʼkoa, “Jor julumkate se behok lekate dusikate okoe ṭhen khon hõ cetʼge alope hataoa ar apeakʼ kuṛạirege kusi akae tahenpe.”

¹⁵ Hoṛko do ạḍi askate mone monete Johange Jisu kanae menteko hudisedekan tahẽkana.

¹⁶ Unre Johan do sanamkoe metatʼkoa, “Iń do dakʼteń bạptisetʼpea, menkhan okoe iń khone daṛeange uni doe daraekana. Iń do uniyakʼ panahi reakʼ phitạ raṛaetae lek geń baṅkana. Uni do sonot Jiu ar seṅgelteye bạptispea.

¹⁷ Uniyakʼ haṭakʼ do tirege menakʼtaea; onate khạrại do mońjteye saphaea ar phosol do acʼakʼ golareye doho jarwaea, menkhan peṭecʼ do baṅ iṛijokʼ seṅgelreye atar giḍikakʼa.”

¹⁸ Johan do arhõ ạḍi utạr sikhạunakote hoṛkoakʼ monre udgạue emakote Isorakʼ bhage sombate porcar akokan tahẽkana.

¹⁹ Disạm cakʼlaoyicʼ Herod ar bokottetʼren bạhu Herodiạwakʼ bin ganokʼ dulạṛ ar bạṛicʼ kạmiko iạte Johan do uniyakʼ doskoe udukʼade tahẽkana.

²⁰ Onate uni do hajotre Johane bhorao akade tahẽkana. Ar noate uniyakʼ eṭakʼ bạṛicʼ kạmiko sãote noa bạṛicʼ kạmi hõ juṭicʼentaea.

Jisui bạptisen

²¹ Ado okoeko hoṛ Johan ṭhenko hecʼakan tahẽkan onko bạptismako ataṅetʼ tahẽkanre Jisu hõe bạptis ocoyena. Bạptisma tayom Jisu do tinreye koejoṅkan tahẽkana unre serma do jhicʼena.

²² Ar sonot Jiu do parwa leka uni cetanreye pheḍ hecʼena, ar serma khon noa katha ańjomena, “Amge ińren dulạṛiạ Hopon, iń do amreń kusi akana.”

Probhu Jisuakʼ bõsbudạ

²³ Jisu do pegel serma umer tahẽkantaere acʼakʼ kạmiye ehopʼkeda. Hoṛkoakʼ bujhạure uni do Josephren hopone tahẽkana. Ar Joseph do Eliren hopone tahẽkana;

²⁴ Eli do Mathatren hopon, Mathat do Lewiren hopon, Lewi do Melkiren hopon, Melki do Jannaeren hopon, Jannae do Josephren hopon;

²⁵ Joseph do Matathiạren hopon, Matathiạ do Amosren hopon, Amos do Nạhumren hopon, Nạhum do Esliren hopon, Esli do Nạggạiren hopon;

²⁶ Nạggại do Mahatren hopon, Mahat do Matathiạren hopon, Matathiạ do Simạiren hopon, Simại do Josekren hopon, Josek do Jodaren hopon;

²⁷ Joda do Johananren hopon, Johanan do Resaren hopon, Resa do Serubabelren hopon, Serubabel do Sealtielren hopon, Sealtiel do Neriren hopon;

²⁸ Neri do Melkiren hopon, Melki do Addiren hopon, Addi do Kosamren hopon, Kosam do Elmadamren hopon, Elmadam do Erren hopon;

²⁹ Err do Jisuren hopon, Jisu do Elieserren hopon, Elieser do Jorimren hopon, Jorim do Mathatren hopon, Mathat do Lewiren hopon;

³⁰ Lewi do Simeonren hopon, Simeon do Jihudạren hopon, Jihudạ do Josephren hopon, Joseph do Jonamren hopon, Jonam do Eliạkimren hopon;

³¹ Eliạkim do Melearen hopon, Melea do Mennaren hopon, Menna do Mathatharen hopon, Mathatha do Nathanren hopon, Nathan do Dạudren hopon;

³² Dạud do Jisạiren hopon, Jisại do Obedren hopon, Obed do Boasren hopon, Boas do Solmonren hopon, Solmon do Nahasonren hopon;

³³ Nahason do Aminadabren hopon, Aminadab do Adminren hopon, Admin do Arniren hopon, Arnido Hesromren hopon, Hesrom do Pharesren hopon, Phares do Jihudạren hopon;

³⁴ Jihudạ do Jakobren hopon, Jakob do Isahakren hopon, Isahak do Abrahamren hopon, Abraham do Thararen hopon, Thara do Nahorren hopon;

³⁵ Nahor do Serugren hopon, Serug do Rạgạuren hopon, Rạgạu do Phalegren hopon, Phaleg do Eberren hopon, Eber do Sạlaren hopon;

³⁶ Sạla do Kenanren hopon, Kenan do Arpaksadren hopon, Arpaksad do Semren hopon, Sem do Noharen hopon, Noha do Lamekren hopon;

³⁷ Lamek do Mạthusalaren hopon, Mạthusala do Enokren hopon, Enok do Jaredren hopon, Jared do Mahalalelren hopon, Mahalalel do Kenanren hopon;

³⁸ Kenan do Enosren hopon, Enos do Sethren hopon, Seth do Adamren hopon, Ar Adam do Isorren hopone tahẽkana.