Luk 24 - সান্তালী বাইবেল

Jisui jiwetʼ beretʼen

¹ Ado hapta reakʼ pạhil hilokʼ ạḍi setakʼre onko maejiu do ona mahkaokʼ mosolawante topa ṭhenko calaoena.

² Onko do topa duạr khon dhiri ocokʼ akatʼko ńelkeda.

³ Menkhan topa bhitriteko boloyen khan Probhu Jisuakʼ hoṛmo do bako ńel ńamleda.

⁴ Ar hahaṛakʼ tulucʼ ona reaṅko hudisokʼkan tahẽkanre bijli leka pĩṛĩtʼ pĩṛĩtʼ kicricʼ horokʼ akatʼ bar hoṛ onko samaṅre hecʼkatekin teṅgoyena.

⁵ Onate maejiuko do botorteko ombakʼena. Unkin dokin metatʼkoa, “Jiwetʼicʼ do gocʼko talare cedakʼpe ńam baṛayede kana?

⁶ Nonḍe do bạnugicʼan; uni doe jiwetʼ beretʼ akana. Gạlilreye tahẽkanre okae metatʼpe tahẽkan ona baṛe disạipe.

⁷ Uniye menletʼa, Manwa Hopon do kại hoṛkoakʼ tireko soprotea. Ar ona tayom doko kuruskaea ar tesar hilokʼ uni doe jiwetʼ beredokʼa.”

⁸ Unre onko do ona katha disạ hecʼatʼkoa.

⁹ Ar topa khon ruạṛ senkate gelmitʼ celako ar eṭakʼ sanamko noa kathako baḍae ocoketʼkoa.

¹⁰ Onko maejiuko modre Magdalini Mạriạm, Johanna ar Jakob eṅgat Mạriạm hõkin tahẽkana. Ar onko sãoteko tahẽkan eṭakʼ maejiuko hõ noa sanamakʼ katha do apostolko ṭhenko lạikeda.

¹¹ Menkhan onako katha do onko ṭhen ạuṛiyakʼ lekage bujhạuena. Onate onko maejiukoakʼ kathate bako pạtiạulena.

¹² Menkhan Patras doe beretʼente topa ṭhene ńir calaoena are oyoṅketʼ khan eken kicricʼkogeye ńel ńamkeda. Ar oka hoyakan onate hahaṛakʼ tulucʼe ruạṛ hecʼena.

Emao atotekin calakʼkan cela ṭhen Jisui sodoren

¹³ Enhilokʼge barea cela do Emaoko metakʼ mitʼṭecʼ atotekin calakʼkan tahẽkana. Ona ato do Jerusalem khon eae mail sạṅgińre tahẽkana.

¹⁴ Ar oka hoyakan ona reakʼkin galmarao kan tahẽkana.

¹⁵ Ona jokhecʼ Jisu do unkin ṭhene hecʼ sorente unkin tulucʼe sen idiyena.

¹⁶ Ar unkinakʼ mẽtʼ do akoṭ akan tahẽkante Jisu bạkin orom daṛeadea.

¹⁷ Unre Jisui metatʼkinạ, “Cetʼ ben galmarao idiyetʼkana?” Unkin cela do mulingekin teṅgo tahẽyena.

¹⁸ Unre unkin modre Kleopa ńutuman mitʼ hoṛ do Jisui kulikedea, “Am eskarge cetʼ Jerusalemre upriạ menama ar niạko dinre onḍe hoyakanakʼko bam baḍaea?”

¹⁹ Jisu do unkine metatʼkinạ, “Cetʼ hoyakana?” Ado Nasaretren Jisu babotre hoyakanakʼ kin lạiyadea. Uni do nạbiye tahẽkana. Kạmire ar kathate Isor ar sanam hoṛko ṭhen daṛeanicʼe tahẽkana.

²⁰ Aleren maraṅ naekeko ar sostor baḍaeko do Romren hoṛkoakʼ tireko soprotledea jemon bicạrete gujukʼ sạjạiko emae. Ar Jihudi mukhiyạko do uniko kuruskedea.

²¹ Menkhan alele asokʼkan tahẽkana uni do Israel jạtrenkoe chaḍaokoa. Ar eken ona do baṅ, teheń noako ghoṭna do pe din hoyokʼ kana.

²² Arhõ ale modren adom maejiuko do aleko hahaṛa ocoketʼlea. Onko do ạḍi setakʼre Jisuakʼ topa ṭhenko senlena,

²³ menkhan uniyakʼ hoṛmo onḍe do bako ńamletʼtaea. Ar ruạṛ hecʼkateko lạikeda, onko do serma goḍetko ńelketʼkinạ ar unkin serma goḍet dokin lạiyatʼkoa Jisu doe jiwetʼgea.

²⁴ Unre ale soṅgete tahẽkanko modre adomko do topa ṭhen senkate maejiuko lạiletʼ lekageko ńelkeda, menkhan Jisu do bako ńel ńamledea.”

²⁵ Khange Jisu do unkine metatʼkinạ, “Aben do cetʼge baben bujhạu akada. Abenakʼ mon do goṛdho akana, onate nạbikoko roṛakatʼ katha hõ baben pạtiạuakʼ kana.

²⁶ Mạsi do cetʼ noako duk jomkate ṭhonok ńam reakʼ katha baṅ tahẽkantaea?”

²⁷ Inạ tayom uni do Moseyakʼ ar joto nạbikoakʼ olakʼ khon ehopʼkate sanam sonot sostorre acʼ reaṅ okako olakan ona jotoe bujhạuatʼkinạ.

²⁸ Ado okaṭakʼ atotekin calakʼkan tahẽkan, ona ato sorko hecʼen khan Jisu do arhõ laha secʼe sen idikʼkan tahẽkana.

²⁹ Unre unkin do nehõradetekin metadea, “Ber hõe danaṅena, ar ạyubokʼkana. Am do ạliń tulucʼ tahenme.” Onate uni do unkin tulucʼ tahen lạgitʼ oṛakʼteye boloyena.

³⁰ Ado unkin tulucʼ jojome duṛupʼenre uni do piṭhạ ataṅkate Isore gunmanao joharadea are kecakʼketʼteye ematʼkinạ.

³¹ Unre unkinakʼ mẽtʼ do jhicʼena ar Jisukin oromkedea, menkhan ona são sãote uni doe changotʼena.

³² Ado ạkin talare kin menjoṅana, “Horre uni do alaṅ sãoteye galmaraokan tahẽkanre ar sonot sostor reakʼe bujhạu alaṅkan tahekanre mon do cetʼ baṅ lolokʼkan tahẽkana?”

³³ Ar beretʼkate unkin do Jerusalamte kin calaoena ar onko gelmitʼ celako sãote eṭakʼko hõ mitʼ jaegarekin ńel ńamketʼkoa.

³⁴ Onko doko galmaraokan tahẽkana, Probhu Jisu do sạrigeye jiwetʼ beretʼ akana ar Simon ṭhene ńel ocoakana.

³⁵ Ar unkin cela do horre hoylenakʼ kin baḍae ocoketʼkoa. Unkin do arhõkin lạiyatʼkoa, piṭhại kecakʼetʼ tahẽkanre cetʼlekate kin oromkedea mente.

Jisu do apostolko ṭhene sodoren

³⁶ Ado noako reaṅko galmaraokan tahẽkanre Jisu do hecʼkate onko talare teṅgoyente sanamkoe metatʼkoa, “Suluk ape ma.”

³⁷ Onko do bhutko ńele kana menteko hudisketʼte ạḍiko botorena.

³⁸ Jisu do onkoe metatʼkoa, “Cedakʼpe torasokʼkana ar monre cedakʼpe digdhạkʼkana?

³⁹ Ińakʼ ti ar jaṅga ńelpe. Tunum legayińpe, ińkangeạń, ente bhutakʼ do iń leka jel ar jaṅ do bạnukʼtakoa.”

⁴⁰ Noa katha menkate Jisu do acʼakʼ ti ar jaṅgae udukʼatʼkoa.

⁴¹ Menkhan nunạkʼko rạskạyena arko hahaṛayena je, onko do pạtiạu hõ bako pạtiạu daṛeakʼkan tahẽkana. Unre Jisui kuliketʼkoa, “Nonḍe jãhãn jomakʼ menakʼtapea?”

⁴² Onko do mitʼ kuṭrạ rapakʼ hakoko emadea.

⁴³ Uni do ona ataṅkate onko samaṅreye jomkeda.

⁴⁴ Ar ona tayome metatʼkoa, “Iń do ape sãote tahẽkanreń menleda, Mose reakʼ ạnre, nạbikoakʼ olakʼre ar sereńkore iń reakʼ okako katha olakan ona sanamakʼ do purạukʼtehõ purạukʼgea.”

⁴⁵ Uni do sonot sostor bujhạu ocoko lạgitʼ celakoakʼ bude jhicʼketʼtakoteye metatʼkoa,

⁴⁶ “Ol menakʼa, Mạsi do duk jojom hoyokʼtaea ar pe din hilokʼre gocʼko khone jiwetʼ beredokʼa.

⁴⁷ Arhõ ol menakʼa, Jerusalem khon ehopʼkate sanam jạtrenko ṭhen kại ikạkʼ lạgitʼ mon ạcur porcarokʼa.

⁴⁸ Apege noa sanamakʼko reaṅ goha do.

⁴⁹ Ńelpe, ińren Baba okaṭakʼ emokʼ reakʼe gokʼakatʼ, onań kolapea. Serma khon daṛe ạuripe ńam hạbicʼ ape do noa nagraharege tahẽ hataṛokʼpe.”

Jisu sermateye rakapʼen

⁵⁰ Jisu do acʼren celako sãote Bethaniạ hạbicʼe calaoena. Ar onḍe uni do acʼakʼ ti tiyạrkate onkoe bhoratʼkoa.

⁵¹ Are bhorakokan tulucʼge onkoe bạgiyatʼkoa ar sermateye rakapʼ idi ocoyena.

⁵² Unre onko do uniko sewawadea ar ạḍi rạskạ salakʼ Jerusalemteko ruạṛ senena.

⁵³ Ar jaoge mundilre hecʼkate Isorko sarhaoedekan tahẽkana.