Luk 21 - সান্তালী বাইবেল

Rạnḍi maejiuakʼ dan

¹ Niạ tayom Jisu do kisạ̃ṛ hoṛko mundil reakʼ dan sundukre onkoakʼ dan dohokane ńelketʼkoa.

² Ar mitʼṭen reṅgecʼ rạnḍi maejiu hõ hecʼkate barea huḍiń poesa dohoy ńelkedea.

³ Unre Jisu do acʼren celakoe metatʼkoa, “Sạrigeń metapekana, nui reṅgecʼ rạnḍi maejiu do eṭakʼ sanamko khon bạ̃ṛtiye dohoakada,

⁴ ente eṭakʼko do akoakʼ sareṛokʼakʼ dhon khonko dohoakada, menkhan nui maejiu doe reṅgecʼgere hõ bańcao tahen lạgitʼ oka tahẽkantae ona jotogeye emkeda”

Mundil dhaṅdhaserokʼ reaṅ

⁵ Celako modren adomko do mundil reaṅko galmarao kan tahẽkana. Onko doko menetʼ tahẽkana, mońj mońj dhiri ar dan reakʼ jiniskote dolan do cetʼleka sajao akana. Unre Jisui metatʼkoa,

⁶ “Ape ma noakope ńeletʼkan, menkhan nonkan dinge hijukʼa, unre dhiri cetan dhiri do baṅ tahena; jotoge rạputʼ giḍi ocokʼa.”

Be suluk ar santao

⁷ Celako do Jisuko kulikedea, “E Guru, tis noako do hoyokʼa ar okaṭakʼ cinhạ ńeltele bujhạu daṛeakʼa, noako hoyokʼ reakʼ okte do seṭer akana mente?”

⁸ Jisui roṛ ruạṛatʼkoa, “Ńelpe, okoe hõ jemon aloko bulạupe, ente ḍher hoṛge iń ńutumte hecʼkateko metapea, ‘iń kangeạń’ ar ‘okte do sorakana.’ Onko do alope pańjakoa.

⁹ Ape do lạṛhại ar gulmalpe ańjomlere alope botorokʼa, ente pạhilre noako do hoyokʼgea; menkhan unrehõ mucạtʼtetʼ do baṅ hoy hodokʼa.”

¹⁰ Ona tayom Jisui metatʼkoa, “Mitʼ jạtrenko do eṭakʼ jạtrenko upạrte, ar mitʼ rajosṭi do eṭakʼ rajosṭi upạrteko lạṛhạiya.

¹¹ Ạḍi ãṭ dhạrti laṛao hoyokʼa ar jaega jaegakore akal ar mahamạriko hoyokʼa. Ona chaḍa sermare nonkan ghoṭnako hoyokʼa ar cinhạko ńelokʼa, oka do ạḍi botorge.

¹² “Noako hoyokʼ lahare hoṛko do apeko sapʼpea arko santaopea. Ar bicạrpe lạgitʼ sunạgogreko idipea ar hajotreko bhoraopea. Iń iạte rapajko ar disạm cakʼlaoko samaṅreko idipea,

¹³ onate iń reaṅ goha emokʼ reakʼ ạt hoyokʼtapea.

¹⁴ Ńitge monre niṭ joṅpe, ar roṛ dogokʼ lạgitʼ do alope sapṛaokʼa,

¹⁵ ente iń do nonkan katha ar nonkan akeliń emapea, onape roṛ ruạṛakore aperen bạiriko do cetʼhõ bako roṛ daṛeakʼa, ar onahõ bako baṅ daṛeakʼa.

¹⁶ Aperen gogo-baba, boehako, gateko ar peṛa pạrbhạko do apeko sapʼocopea. Ar ape modre adomko doko gocʼ ocokoa.

¹⁷ Iń iạte joto hoṛko hirkhạwapea,

¹⁸ menkhan apeakʼ do mitʼṭecʼ upʼ hõ baṅ loksanokʼtapea.

¹⁹ Ape do ṭarhao akaepe tahente sạri jionpe labjoṅa.

Jerusalem dhaṅdhaserokʼ reaṅ

²⁰ “Tinre Jerusalem do palṭonko hotete esetʼ ạcurakatʼpe ńela unre bujhạupe, Jerusalem dhaṅ dhaserokʼ din do sorakana mente.

²¹ Unre okoe Jihudạreko tahen onko do buruteko ńirjoṅma. Ar okoe nagrahareko tahen onko do nagraha bahreteko oḍok calakʼma. Ar okoe atoreko tahen, onko do nagrahate aloko hijukʼma,

²² ente noako din do sạjạiyokʼ dinge hoyokʼa, ar onate sonot sostorre oka ol menakʼ ona do purạukʼa.

²³ Unre bhạrti hoṛmoanko ar okoe do gidrạko nunuako kan onkore do hae hae! Unre dhạrtire do maraṅ dorloe hoyokʼa ar Jihudiko cetanre Isorakʼ sạjại pheḍ hijukʼa.

²⁴ Onko do tarwaṛeteko gocʼ ocokʼa ar sanam jạtrenko talare bondi akan leka chirchạturko tahena. Ar por jạtrenkoakʼ okte ạuri purạukʼ hạbicʼ Jerusalem do onkoakʼ jaṅgate lebetʼ gańjaokʼa.

Manwa hopon hijukʼ reaṅ

²⁵ “Unre siń cando, ńindạ cando ar ipilkore ạḍi lekan cinhạko ńelokʼa. Dhạrtiren sanam jạtrenko do kosṭoko ńama ar jalapuri reakʼ hudhud saḍe ar ḍheoko iạte onko do jiwi oṭaṅokʼtakoa.

²⁶ Ar dhạrtire darakanakʼko reakʼ botorte hoṛko doko keklesedokʼa, ente siń cando, ńindạ cando ar ipilko do ar bako ṭarhao tahena.

²⁷ Unre Manwa Hopon do maraṅ daṛe ar ṭhonokante rimilte hijukʼkanko ńelea.

²⁸ Noa ghoṭnako hoyokʼre ape do sojhete teṅgokʼpe ar bohokʼ rakabtape, ente apeakʼ chaḍaokʼ do sorakana.”

Loa dare khon sikhạuna

²⁹ Ona tayom Jisu do acʼren celako cetʼako lạgitʼ noa phene lạiyatʼkoa, “Loa dare ar eṭakʼ dareko beṅgetʼakʼpe.

³⁰ Sakam sagenlen khanpe bujhạu daṛeakʼkana, hoe lolo din do seṭer akana mente.

³¹ Onkage noako hoyokʼpe ńellere bujhạupe, Isorakʼ raj do sorakana.

³² Sạrigeń metapekana, noako hoylenre hõ niạ piṛhiren thoṛa hoṛ do jiwetʼko tahena.

³³ Ot ar serma do cabakʼa, menkhan ińakʼ kathako do jaejug hạbicʼ tahena.

Jagwar akae tahen reaṅ

³⁴ “Sontor akae tahenpe, jemon apeakʼ mon do rij roṅ, ńũ bulokʼ ar gharońj reakʼ dạndite ten alo tahentape.

³⁵ Ar baṅkhan cetʼleka pạsi ackage bond godokʼ onkage ona din hõ ackage apere hecʼ paṛaokʼa, ar onka leka dhạrtiren sanam hoṛko cetanre hõ hecʼ paṛaokʼa.

³⁶ Onate jagwar tahenpe ar koejoṅpe jemon jãhãnakʼge hecʼape onakope parom idite Manwa Hopon samaṅrepe teṅgo daṛeakʼ.”

³⁷ Onako dinre Jisu do dinạmge mundilreye cetʼakokan tahẽkana, menkhan ńindạ do bahrete senkate Jạitun burureye tahenkan tahẽkana.

³⁸ Ar sanam hoṛ uniyakʼ katha ańjomtae lạgitʼ setakʼ khonge mundilteko hijukʼkan tahẽkana.