Luk 20 - সান্তালী বাইবেল

Probhu Jisu ar sostor baḍaeko

¹ Mitʼ din Jisu do mundilre hoṛkoe cetʼakokan are porcarako kan tahẽkana.

² Unre maraṅ naekeko, sostor baḍaeko ar murubbiko do hecʼkate Jisuko metadea, “Lạiyaleme, cetʼ ektiạrite am do noakom kạmikana, ar okoe noa ektiạri doe em akawatʼmea?”

³ Jisui roṛ ruạṛatʼkoa, “Iń hõ mitʼṭecʼ kathań kulipea. Mase lạiyạńpe,

⁴ Oka khon Johan do bạptisma emokʼ reakʼ ektiạriye ńamleda, serma secʼ khon se manwako secʼ khon?”

⁵ Unre onko do ako akore galmaraokateko menjoṅana, “Menle khan bon, ‘Isor secʼ khon,’ enḍekhane metabona, ‘tobe cedakʼ uni do bape pạtiạuadea?’

⁶ Ar bon menle khan, ‘manwa secʼ khon,’ enḍekhan disạm hoṛko dhiriteko tińbona, ente Johan do nạbi kanae menteko khạṭi akawana.”

⁷ Onate onko doko menkeda, “Ale do bale baḍaea oka khon ona ektiạriye ńamleda.”

⁸ Jisui metatʼkoa, “Enḍekhan iń hõ bạń lạiyapea oka ektiạrite noakoń kạmikana mente.”

Darkha bagwanren cacaskoakʼ phen

⁹ Ona tayom Jisu do disom hoṛko cetʼako lạgitʼ noae lạiyatʼkoa: “Mitʼ hoṛ do mitʼṭecʼ darkha bagwane benaokeda ar cacasko ṭhen bạisạu oṭokate ḍher din lạgitʼ eṭakʼ disạmteye calaoena.

¹⁰ Ado okte hoyen khan uni do darkha jo reakʼ bhag hatao lạgitʼ cacasko ṭhen mitʼṭen gutiye kolkedea. Menkhan cacasko do uniko dalkedea ar eken tiko kol ruạṛkadea.

¹¹ Unre uni do ar mitʼṭen gutiye kolkedea, menkhan cacasko do uni hõko dalkedea arko bemanotkedete eken tiko kolgotʼkadea.

¹² Tayomte uni do tesaricʼ gutiye kolkedea, menkhan cacasko do uni hõ ạḍi bạṛicʼko dalkedea arko laga oḍokkedea.

¹³ “Unre darkha bagwanren kisạ̃ṛe menkeda, ‘cetʼ iń cekaea? Iń do ińren sadher hopongeń kolea. Hoedaṛeakʼa onko do uniko manotea.’

¹⁴ “Menkhan cacasko do uniko ńelkede khan ako akoreko menjoṅana, ‘nuige nahakʼ sompottiren mạlik doe hoedaṛeakʼa. Onate dela bon gojea, jemon aboge onaren ạidạriko bon hoyokʼ.’

¹⁵ Noa menkate uniko sapʼkedea ar bagwan bahrete idikateko gocʼkedea. “Ńitokʼ darkha bagwanren kisạ̃ṛ do onko cacaskoe cekakoa?

¹⁶ Uni do hecʼkate onkoe gocʼkoa ar bagwan do eṭakʼko ṭhene bạisạu oṭokakʼa.” Hoṛko do Jisuakʼ noa katha ańjomkateko menkeda, “Nonka do alo baṛe hoyokʼ ma.”

¹⁷ Unre Jisu do onko secʼ beṅgetʼkateye menkeda, “Enḍekhan sonot sostorre noa katha ol akan reakʼ mane do cetʼkana, ‘raj mistiriko okaṭakʼ dhiriko nihạ̃t giḍiletʼ, onage konac reakʼ asolakʼ dhiri hoyena.’

¹⁸ Ar jãhãege ona dhiri cetanreye ńurokʼ uni doe gejerokʼa ar okoe cetanre ona dhiri ńurokʼa uni doe holoṅ ḍigir utạrokʼa.”

¹⁹ Unre sostor baḍaeko ar maraṅ naekeko do Jisu sabeko menwana, enteko bujhạu daṛeada, Jisu do ako upạrtege noako kathae roṛetʼ kana; menkhan onko do hoṛkoko botoratʼkoa.

Raj bheja emokʼ reaṅ

²⁰ Sostor baḍaeko ar maraṅ naekeko do Jisu akoakʼ nojorreko dohokedea ar guptocorko kolketʼkoa. Onko guptocor do Jisu acʼakʼ kathate jhạliye lạgitʼ dhorom hoṛ leka udugokʼko ehopʼena, jemon onko do disạm cakʼlaoyicʼ gobolreko soprot daṛeae.

²¹ Onateko metadea, “E Guru, alele baḍaea am do ṭhik ṭhikem roṛeda arem cetʼako kana. Ar okoeyakʼ mẽtʼãhã hõ bam beṅgetʼakʼ kana ar Isorakʼ hor reaṅ sạri sạrigem cetʼakokana.

²² Ado Moseyakʼ ạn lekate Romren maharaj do cetʼ khajna emae ganokʼgea?”

²³ Jisu do onkoakʼ phundi baḍaeketʼteye metatʼkoa,

²⁴ “Mitʼṭecʼ Dinar udukʼạńpe. Noare okoeyakʼ muṭhạn ar okoeyakʼ ńutum ol menakʼa?” Onkoko menkeda, “Romren maharajakʼ.”

²⁵ Adoe metatʼkoa, “Enḍekhan okaṭakʼ maharajakʼkan ona do maharajge emkataepe ar okaṭakʼ Isorakʼkan ona do Isorge emaepe.”

²⁶ Hoṛko samaṅre Jisu okae menketʼ onate onko guptocor do bako jhạli daṛeadea. Ar uniyakʼ roṛ ruạṛteko hahaṛayente hapegeko tahẽyena.

Jiwetʼ beredokʼ reaṅ

²⁷ Sạdukiko modren adomko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reaṅ do cetʼge bạnukʼa. Onate onko do Jisuko kulikedea,

²⁸ “E Guru, Mose do noae ol oṭoakatʼ bona, begor gidrạwante jãhãe acʼren bạhui gocʼ bạgi oṭoae khan, enḍekhan bokottetʼ do uniren bạhui baplayema ar dadattetʼ lạgitʼ bõse teṅgokoma.

²⁹ Ado eae boehako tahẽkana. Ar pạhilicʼ do baplakate begor gidrạwanteye gocʼena.

³⁰ Tayomte dosaricʼ ar tesaricʼ boeha hõ uni rạnḍi maejiukin baplakedea,

³¹ ar onkaleka eae boehage begor gidrạwanteko gocʼena.

³² Ado mucạtʼre uni maejiu hõe gocʼena.

³³ Enḍekhan gocʼkoko jiwetʼ beredokʼre uni do okoeṭakʼren bạhui hoyokʼa? Ente eae boehage coṅ uni mako baplalede.”

³⁴ Jisu do onkoe metatʼkoa, “Niạ jugren hoṛko doko bạhujoṅ kana arko jãwãeyokʼ kana.

³⁵ Menkhan gocʼko khon beretʼkate darakan jugre parom calakʼ lạgitʼ lek kanako menteko lekhakʼte onko do bạhu hõ bako bạhu joṅa ar jãwãe hõ bako jãwãeyokʼa.

³⁶ Onko do ar bako gujukʼa, ente onko do serma goḍet lekako hoyokʼa. Onko do Isoren hoponko hoyokʼa ente gocʼko khonko jiwetʼ beretʼ ocoakana.

³⁷ Jolokʼkan jhạuạ reaṅ okare olakan onḍe Moseye sodorakatʼa, gocʼko do sạrigeko jiwetʼ beredokʼa. Onḍe Mose do Probhuge, ‘Abrahamren Isor, Isạhakren Isor, ar Jakobren Isor’ menteye hohoaekana.

³⁸ Menkhan Isor do gocʼkoren Isor doe baṅkana, uni do jiwetʼkoren Isorge. Uni lạgitʼge sanam hoṛ do jiwetʼko tahena.”

³⁹ Unre adom sostor baḍaeko doko menkeda, “E Guru, am do bhagegem menakada.”

⁴⁰ Onko do jãhãnakʼge Jisu kuliye ar bako dilleda.

Mạsi reaṅ kukli

⁴¹ Jisu do onko sostor baḍaekoe metatʼkoa, “Hoṛko do cekateko meneda, Mạsi do Dạud bõsren kanae mente?

^42-43 Sonot sostorre sereńko reakʼ puthire Dạud ma acʼge coṅ noa kathae menakatʼ, ‘Probhu Isor do ińren Probhui metadea, tin hạbicʼ amren bạiriko amakʼ jaṅga latarre bạń dohoko, unhạbicʼ ińakʼ jojomsa aṛere duṛupʼme.’

⁴⁴ Dạud ma Mạsige Probhu menteye hohowade tahẽkan; enḍekhan cekate Mạsi do Dạudren hopone hoydaṛekokʼa?”

Sostor baḍaekore cehaona

⁴⁵ Ado sanam hoṛ uniyakʼ kathako ańjometʼkan tahẽkanre Jisu do acʼren celakoe metatʼkoa,

⁴⁶ sostor baḍaeko khon sontor akae tahenpe. Onko do jhạl jhạl aṅgrop horokʼkate dãṛãbaṛae ar hạṭiạ bajarkore johar ocokʼgeko kusiyakʼa. Onko do sunạgogkore laha duṛupʼakʼ ar bhojkore laha reakʼ jaegako kusiyakʼ kana.

⁴⁷ Hoṛko ṭhen ńel ocokʼ lạgitʼ onko do jeleń jeleńko koejoṅa, ar eṭakʼ secʼ do rạnḍi maejiukoakʼ dhonko luṭetʼtakoa. Noko hoṛ do ạḍi bạ̃ṛti sạjạiyokʼ hukumko ńama.”