Luk 17 - সান্তালী বাইবেল

Kại reaṅ

¹ Jisu do acʼren celakoe metatʼkoa, “Kại horte idiko lạgitʼ uskạu do hijukʼte hõ hijukʼgea, menkhan hae uni hoṛ do, one okoe hotete ona udgạuko hijukʼkan!

² Noko huḍińko modre jãhãege mitʼ goṭen kại horteye idiye enḍekhan uni do hoṭokʼre jante dhiri akawaete jalapurire khadle giḍikaege bhage hoyokʼa.

³ “Men sontorokʼpe. Amren boeha am upạrteye kạilere cehaoem. Ar kại khon mone ạcurletae khan uni do ikạkaeme.

⁴ Dinre eae dhao am upạrteye kại khan ar eae dhaoge hecʼkateye men, ‘kastaokʼ kạnạń,’ enḍekhan uni do ikạkae me.”

Pạtiạu reaṅ

⁵ Onko gelbar apostolko do Probhuko metadea, “Aleakʼ biswạs baṛe bạ̃ṛti kataleme.”

⁶ Probhui menkeda, “Mitʼṭecʼ tuṛi jaṅ inạkʼgan pạtiạu tahentape ar noa loa darepe metakʼ, ‘rehetʼ sudhạ upṛạukʼte jalapurire khadlekʼme;’ ar inạtege ona dare do apeakʼ kathae ańjomtapea.

Golam reakʼ dạyik kạmi

⁷ “Ape modre okoe menaea one uni do siokʼ se gupiyicʼ golam menaetae. Ar uni golam maṭ khone hecʼlenre kisạ̃ṛ do cetʼ ‘usạrate jom lạgitʼ duṛubokʼe metaea?’

⁸ Onka do baṅa, bickome metaea, ‘jomakʼ tearạńme, ar ạuriń jom ńũi hạbicʼ ḍanḍa paṭhekate sapʼsorạńme. Ar ona tayom do amem joma.’

⁹ Ado uni guti oneye hukumade lekae kạmiketʼte kisạ̃ṛ do cetʼ bae sarhaoea?

¹⁰ Onkage Isorakʼ hukum leka sanamakʼ kạmi tayom ape do menpe, ‘okạjuạ gutiko kanale; okaṭakʼ kạmi lek tahẽkantale eken inạgele kạmi akada.’ ”

Gel murhucʼ jom rog hoṛko bogeyen

¹¹ Ado Jerusalemteko calakʼkan tahẽkanre Jisu do Samariạ ar Gạlil talateye sen paromokʼkan tahẽkana.

¹² Unre mitʼṭecʼ atoteko bolokʼkan tahẽkanre uni do gel goṭen murhucʼ jom rog hoṛe ńel ńamketʼkoa.

¹³ Onko do sạṅgińre teṅgokate hohowateko menkeda, “Jisu, Probhu, mãyãwaleme.”

¹⁴ Jisu do murhucʼ jom rog hoṛ ńelketʼkoteye metatʼkoa, “Do senkate naekeko ṭhen udugokʼpe.” Ar calakʼ calakʼtege onko doko bogeyena.

¹⁵ Ado onko modre mitʼ hoṛ do bogeyene ńelketʼ khan ãṭ aṛaṅte Isor sarhao sarhaoateye ruạṛ hecʼena ar Jisuakʼ jaṅga pheḍre taberenteye gunmanao joharadea.

¹⁶ Uni do Samariạ Prodesren hoṛe tahẽkana.

¹⁷ Unre Jisui menkeda, “Gel goṭen do cetʼ bako bogelena? Enḍekhan sarecʼ are goṭen doko okayena?

¹⁸ Isor gun manao joharae lạgitʼ nui eṭakʼ jạtren chaḍa ar okoe hõ cetʼ bako ruạṛlena?

¹⁹ Ona tayom Jisu do uni hoṛe metadea, “Ma beredokʼme ar calao joṅme. Ente pạtiạu akantem bogeyena.”

Isorakʼ raj hijukʼ reaṅ

²⁰ Ado Phạrusiko modren adomko do Isorakʼ raj tis hijukʼa menteko kulikedea. Unre Jisui roṛ ruạṛatʼkoa, “Isorakʼ raj hijukʼre jãhãn cinhạ do baṅ ńelokʼa.

²¹ Okoe hõ bako mena, ‘Isorakʼ raj do nõkʼõe nonḍe’ se, ‘hane hanḍe,’ ente Isorakʼ raj do aperege menakʼa.”

²² Ona tayom acʼren celakoe metatʼkoa, “Nonkan dinko hijukʼ kana, ape do Manwa Hopon reakʼ mitʼṭen din ńelpe mena, menkhan bape ńelńama.

²³ Ar hoṛkoko metapea, ‘hanḍe ńelepe’ se ‘nõkʼõe nonḍe ńelepe.’ Unre bahrete do alope oḍokokʼa se alope pańjakoa.

²⁴ Bijli cetʼleka sermare mitʼ nakha khon eṭakʼ nakha hạbicʼ malkaokʼ, onkage Manwa Hopon reakʼ seṭerokʼ hõ hoyokʼa.

²⁵ Menkhan pạhilre uni do ạḍi utạr duk ar saset jojom hoyokʼtaea. Ona chaḍa noa piṛhiren hoṛko do uniko nihạ̃tea.

²⁶ “Noha oktere cetʼleka hoylen onkage Manwa Hopone hijukʼre hõ hoyokʼa.

²⁷ Ente Noha do jahajre ạuriye bolokʼ hạbicʼ ar ḍubạ dakʼ hecʼkate sanamko ạuriye maraoko hạbicʼ hoṛko doko jom ńũiyetʼ tahẽkana, bạhu joṅkan tahẽkanako arko jãwãeyokʼkan tahẽkana.

²⁸ Loṭ oktere cetʼleka hoylen onkage hoyokʼa. Ona jokhecʼ hoṛko doko jom ńũiyetʼ tahẽkana, kiriń-ạkhrińetʼkan tahẽkanako, cas-basetʼkan tahẽkanako arko oṛakʼ duạretʼkan tahẽkana.

²⁹ Menkhan Loṭ do Sodom khone oḍok calaoen dinre serma khon seṅgel ar gondhok reakʼ dakʼe jạ̃ṛĩketʼ khan sanam hoṛkoe ḍahao maraoketʼkoa.

³⁰ Oka hilokʼ Manwa Hopone sodorokʼ ona din hõ onkage hoyokʼa.

³¹ “Enhilokʼ okoe sạṛim coṭreye tahen uni do jãhãnakʼ hatao lạgitʼ aloe pheḍ hujukʼma. Onkage baṛgere okoeye tahen uni hõ aloe ruạṛ hijukʼma.

³² Loṭren bạhuwakʼ katha disạipe.

³³ Jãhãege acʼakʼ jiwi rukhiyại lạgitʼe kurumuṭui, uni do acʼakʼ jiwiye khuạutaea, ar okoe acʼakʼ jiwiye khuạutae uni do onae bańcaotaea.

³⁴ Ińiń metapekana, ona ńindạ mitʼ aṭetʼre bar hoṛkin tahenre; mitʼ hoṛ doe idiocokʼa ar eṭagicʼ doe bạgi oṭokʼa.

³⁵ Unre barea maejiu jantekin riritʼre;

³⁶ Mitʼ hoṛ doe idiocokʼa ar eṭagicʼ doe bạgi oṭokʼa.”

³⁷ Ado celakoko metadea, “E Probhu, okare?” Jisui roṛ ruạṛkeda, “Jãhãrege mạ̃ṛĩ onḍege gidi hõko jarwakʼa.”