Luk 15 - সান্তালী বাইবেল

Atʼlen bhiḍi

¹ Unre aema mạsul uṭhạuko ar bạṛicʼ hoṛko hõ Jisuakʼ katha ańjomtae lạgitʼ uni ṭhenko hecʼ sorena.

² Onate Phạrusiko ar sostor baḍaeko do noa menkate karacʼ kurujokʼko ehopʼena, “Nui hoṛ do kại hoṛko sãoteye gatekʼkana are jom ńũiyeda.”

³ Unre Jisu do cetʼako lạgitʼ noa kathae lạiyatʼkoa:

⁴ “Ape modre, mitʼ hoṛren mitʼ sae bhiḍiko tahentae. Ar onko modre mitʼṭene atʼlen khan, uni do cetʼ onko aregel are goṭen ṭạnḍire bạgi oṭowakote atʼakanicʼ cetʼ bae sendra baṛaea ạuriye ńame hạbicʼ?

⁵ Are sendra ńamle khan uni do rạskạte tarenreye ladeyea.

⁶ Ar oṛakʼte calaokate acʼren gateko ar aḍepaseren hoṛko hohowakoteye metakoa, ‘iń sãote rạskạkʼpe, ente atʼlen bhiḍi doń ńam ruạṛ akadea.’

⁷ Ińiń metapekana, onkage kại khon mon ạcur bako moneyakʼkan aregel are dhorom hoṛko khon bickom mitʼṭen kại hoṛ mone ạcuretʼkante sermare arhõ bạ̃ṛti rạskạ hoyokʼa.

Atʼlen siki

⁸ “Mitʼṭen maejiu do gel goṭecʼ rupạ ṭaka menakʼtaea. Ar onako modre mitʼ goṭecʼe atʼlere uni do cetʼ diuhe jeretʼkate jokʼ jokʼte bae sendraea one ạuriye ńam hạbicʼ?

⁹ Are ńamle khan acʼren gateko ar aḍepaseren hoṛko hohowakoteye metakoa, ‘iń sãote rạskạkʼpe, ente oneń atʼletʼ siki doń ńam ruạṛ akada.’

¹⁰ Ińiń metapekana, mitʼṭen kại hoṛ mone ạcurle khan Isorren goḍetko talare hõ onkage rạskạ hoyokʼa.”

Atʼlen hopon

¹¹ Ona tayom Jisui menkeda, “Mitʼ hoṛren do barea hoponkin tahẽkana.

¹² Uniren huḍińicʼ hopon do apattetʼe metadea, ‘E baba, ińakʼ bhag reakʼ sompotti do den em kạtińme.’ Onate uni hoṛ do acʼakʼ tahẽkanteakʼ acʼren banar hopone hạṭińatʼkinạ.

¹³ Thoṛa din tayom huḍińicʼ hopon do acʼakʼ sompotti ạkhrińkate ṭaka-poesawante sạṅgiń disạmteye calaoena. Ar onḍe uni do rij roṅre tahẽkate acʼakʼ sanam ṭaka-poesae ublạ ḍublạ cabaketʼtaea.

¹⁴ Ado sanam ṭaka-poesae cabaketʼ khan ona disạmre mitʼṭecʼ maraṅ akal hoyena. Onate uni do ạḍi reṅgecʼreye paṛaoena.

¹⁵ Unre uni do ona disạmren mitʼṭen kisạ̃ṛ ṭhen senkate kạmiye khojkeda. Uni hoṛ do ṭạnḍire acʼren sukri gupiko lạgitʼe kolkedea.

¹⁶ Ar sukriko oka coklakʼ baklakʼko jometʼ tahẽkan onakote uni hõ jom bikʼe menetʼ tahẽkana, menkhan okoege ona hõ bako emaekan tahẽkana.

¹⁷ “Ado mitʼ din cetao hecʼadeteye menkeda, ‘ạpuńren unạkʼ unạkʼ gutiko do sareṛokʼ leka jomakʼko ńameda, menkhan iń do nonḍe reṅgecʼteń gujukʼkana.

¹⁸ Iń do beretʼkate ạpuń ṭheniń calakʼa ariń metaea, E baba, Isor ar am samaṅreń kại akada.

¹⁹ Amren hopon ńumugokʼ lekgeń baṅkana. Onate amren gutiko modren mitʼ hoṛ menkate baṛe dohokạńme.’

²⁰ “Noa menkate uni doe beretʼente acʼ apat ṭhene calaoena. Ado sạṅgińreye tahẽkanrege uniren apattetʼ doe ńel ńamkedea ar ạḍi mãyã hecʼadea. Ar ńir senkate uniye hạṛupʼkedea are cokʼ cokʼadea.

²¹ Unre hopon doe menkeda, ‘E baba, iń do Isor ar am samaṅreń kại akada. Amren hopon ńumogokʼ lek geń baṅkana.’

²² “Menkhan apattetʼ do acʼren gutikoe metatʼkoa, ‘den usạrate mońj utạrakʼ kicricʼ ạguiype ar uni horokʼaepe. Tire mundạm ar jaṅgare panahi horokʼaepe,

²³ ar lodgopʼ ḍaṅgra ạguiyete gurepe. Ar dela, jom ńũkate bon hesecʼ sekrejokʼma,

²⁴ ente nui ińren hopon do gocʼgeye tahẽkana menkhan arhõe jiwetʼ beretʼakana; atʼgeye tahẽkana are ńam ruạṛakana.’ Ona tayom onko do hesecʼ sekrejokʼko ehopʼena.

²⁵ “Ona oktere maraṅicʼ hopon do goḍareye tahẽkana. Ado oṛakʼ sore hecʼen khan enecʼ sereń ar bajnako reakʼ saḍeye ańjomkeda.

²⁶ Unre mitʼṭen guti hohowadeteye kulikedea, ‘noako do cetʼ hoyokʼkana?’

²⁷ “Guti doe roṛ ruạṛadea, ‘bokome hecʼakana. Ar ạpum do napaegeye ńam ruạṛkedete lodgopʼ ḍaṅgrae gur akadea.’

²⁸ “Unre maraṅicʼ hopon doe raṅgaoente bhitrite bolokʼ bae rebenlena. Onate apattetʼ doe oḍok hecʼena ar bhitrite bolokʼ lạgitʼe nehõradea.

²⁹ Uni do apattetʼe metadea, ‘ńelme, iń do nunạkʼ bochor khoniń joton ạguiyetʼmea; menkhan mitʼ dhao hõ amakʼ hukum do bạń taṛam parom akada. Enhõ ińren gateko sãote hesecʼ sekrejokʼ lạgitʼ mitʼṭen merom hopon tanakʼ hõ bam em akawạdińa.

³⁰ Menkhan amren nui hopon do, kusmbiko tulucʼ amakʼ ṭaka-poesae ublạ ḍubla cabakeda, are hecʼenre uni do lodgopʼ ḍạṅgram gocʼadea.’

³¹ “Apattetʼ do uniye metadea, ‘E beṭa, am do jaoge iń soṅgere menama. Ar ińakʼ oka menakʼ ona joto do amakʼkangea.

³² Menkhan hesecʼ sekrejokʼ ar rạskạkʼ do lek kan tabona, ente amren nui boeha do gocʼgeye tahẽkana arhõe jiwetʼ akana; atʼgeye tahẽkana arhõe ńam ruạṛ akana.’ ”