Luk 14 - সান্তালী বাইবেল

Jisu do jirạukʼmãhãre udri hoṛe bogeyede

¹ Mitʼ jirạukʼ mãhãre Jisu do Phạrusikoren mitʼṭen mukhiyạ hoṛakʼ oṛakʼte jom lạgitʼe calaoena. Unre Phạrusiko do Jisu mońjteko tạnkhiyede tahẽkana.

² Jisu samaṅre mitʼṭen rugiye tahẽkana, okoe do goṭa hoṛmo udri rog tahẽkanteye phulạu akan tahẽkan.

³ Jisu do sostor baḍaeko ar Phạrusikoe kuliketʼkoa, “Moseyakʼ ạn lekate jirạukʼ mãhãre jãhãe bogeko do cetʼ ganokʼgea?”

⁴ Sostor baḍaeko do thir hapegeko tahẽyena. Unre Jisu do uni hoṛe joṭetʼkedea ar bogekedeteye bidạkadea.

⁵ Ona tayom sostor baḍaekoe metatʼkoa, “Jirạukʼmãhãre ape modre jãhãeren gidrạ se ḍaṅgra kũńreye ńurlenre hare phare cetʼ bape rakapʼ godea?”

⁶ Menkhan sostor baḍaeko do noa katha reakʼ bako roṛ ruạṛ daṛeada.

Nindhạnko peṛako reaṅ

⁷ Ado neota akan hoṛko laha duṛupʼakʼ jaegako bachao joṅkane ńelketʼko khan, Jisu do cetʼako lạgitʼ noa kathae metatʼkoa,

⁸ “Jãhãe bapla bhojreye neotalemre laha duṛupʼakʼre do alom duṛupʼa, ente pasere pase uni do am khon hõ manotan hoṛe neota akade.

⁹ Enḍekhan okoeye neota akatʼben uni do hecʼkateye metama, ‘noa jaega do uni aṛakʼae me.’ Unre lajaorem paṛaokʼte tayom utạrakʼ jaegare duṛubokʼ hoyokʼtama.

¹⁰ Onate amem neota ocolenre senkate tayom senakʼ jaegare duṛupʼme. Enḍekhan neotayicʼ do hecʼkateye metama ‘E gate, dela laha secʼre duṛupʼme.’ Unre eṭakʼ neota akanko samaṅre am do manotem ńama.

¹¹ Okoe acʼte usulokʼe menetʼkan uni doe copotʼ ocokʼa, ar okoe acʼteye copodokʼ uni doe usul ocokʼa.”

¹² Ado neota akadeyicʼ hõe metadea, “Am do jom ńũi reakʼem sapṛaolere, se bhojem tearlere amren gateko se boehako se peṛa pạrbhạko se aḍe paseren kisạ̃ṛ hoṛko do alom neotakoa. Arem onka lekhan onko hõ amko neotamete amakʼ neotako hala ruạṛkatama.

¹³ Menkhan bhojem tearlere am do reṅgecʼ orecʼko, ṭhunṭạko, leḍhako, ar kãṛãko neotakom.

¹⁴ Enḍekhan Isorakʼ bhorem ńama, ente onko do bako neota hala ruạṛ daṛeama. Ar dhoromko gocʼko khonko jiwetʼ beretʼ ocokʼre am do noa reakʼ halawama.”

Maraṅ bhoj reakʼ phen

¹⁵ Ado jojom duṛupʼ akanko modren mitʼ hoṛ do noa katha ańjomkate Jisui metadea, “Okoe Isorakʼ rajre jojome duṛubokʼ uni doe bhạgangea.”

¹⁶ Jisui menkeda, “Mitʼ hoṛ do maraṅ okocʼe bhojkeda ar aema hoṛe neotaketʼkoa.

¹⁷ Ado jojom okte hoyen khan uni do acʼren golame kolkedete neota akan hoṛko ṭhene roṛgotʼkada, ‘dela hijukʼpe,’ ńitokʼ do jotowakʼ sạt akana.

¹⁸ Menkhan onko sanamkoge mimitʼ mimitʼte ikạ ocokʼko ehopʼena. Pạhilicʼ do uni golame metadea, ‘iń do thoṛa jumiń kiriń akada, calaokate ńeńel hoyokʼtińạ. Onate ma ikạ kạńme.’

¹⁹ Ar mitʼ hoṛ doe menkeda, ‘iń do mõṛẽ arãṛ ḍaṅgrań kiriń akatʼkoa, onko biḍạuko lạgitʼ iń calakʼkana. Onate dayakate ikạ kạńme.’

²⁰ Eṭakʼ ar mitʼ hoṛ doe menkeda, ‘bạhu akanwạnạń, onate bạń sen daṛeakʼ kana.’

²¹ “Ado uni golam do ruạṛ senkate acʼren kisạ̃ṛ jotowakʼe lạiyadea. Onate oṛakʼ kisạ̃ṛ do ạḍiye raṅgaoena ar acʼren golame metadea, ‘usạrate nagraha reakʼ kulhiko ar kucitʼ horkote sen hodokʼme ar reṅgecʼko, ṭhunṭạko, kãṛãko ar leḍhako nonḍe ạgukom.’

²² Are onkaketʼ khan uni golam doe menkeda, ‘E Probhu, jotowakʼ do amakʼ hukum lekage hoyakana, menkhan jaega do ńit hõ menakʼgea.’

²³ Onate kisạ̃ṛ do golame metadea, ‘am do nagraha bahre soṛokkote oḍok calakʼme ar hijukʼ lạgitʼ hoṛko jormoṭkom, jemon oṛakʼ do perejokʼtiń.

²⁴ Ińiń metapekana, okoeko neota ocolen onko okoe hõ ińakʼ noa bhoj do bako cakha ńama.’ ”

Cela hoyokʼre apnar baṅokʼ reakʼ

²⁵ Ar ạḍi gadel hoṛ do Jisu sãoteko calakʼkan tahẽkana. Jisu do onko secʼ ạcurenteye metatʼkoa,

²⁶ okoe iń ṭhene hijukʼ, uni do acʼren eṅgat-apat ar bạhu ar gidrạko ar boehako ar miserako se acʼakʼ jiwi hõ iń khon bạ̃ṛtiye dulạṛ, enḍekhan ińren cela do ohoe hoydaṛelena.

²⁷ Okoe acʼakʼ kurus gokʼkate iń tayomte bae hijukʼ, uni hõ ińren cela do ohoe hoydaṛelena.

²⁸ “Ape modre jãhãege mitʼṭecʼ usul oṛakʼ benaoe menjoṅ khan uni do lahare duṛupʼkate khoroce hisạb maṛaṅa. Uni doe ńela, ona sạt lạgitʼ ṭaka menakʼtaea se baṅa.

²⁹ Ar baṅkhan rehetʼ bạisạu tayom ona oṛakʼ bae purạu daṛeakʼ khan okoe onako ńel onko doko landa dhutʼaea.

³⁰ Onkoko mena, ‘uni hoṛ do benaoe ehopʼletʼgea, menkhan bae purạu daṛeada.’

³¹ “Mitʼṭen raj do eṭakʼ raj upạrte lạṛhạiye calakʼre pạhilre duṛupʼkateye hudis maṛaṅokʼa, ‘bargel hajar sipạhiwante okoe iń upạrte lạṛhạiye hijukʼkan, uni do eken gel hajar sipạhikoteń daram daṛekea se baṅa?’

³² Ar bae daṛeakʼ khan eṭagicʼ raj sạṅgińreye tahenrege uni do mukhiyạ hoṛko kolkate sulukokʼ lạgitʼe kulijoṅa.”

³³ Ado mucạtʼre Jisui menkeda, “Onkage apeko modre jãhãe begor hudis cintạte acʼakʼ jotowakʼko bae bạgi oṭowakʼ khan, uni do ińren cela ohogeye hoydaṛelena.

Sabakʼakʼ buluṅ

³⁴ “Buluṅ ma bhagege, menkhan sabakʼlen khan cekate ona do rahamokʼa?

³⁵ Unre ona do hasa lạgitʼ hõ lek baṅ hoyokʼa, ar guricʼ mande lạgitʼ hõ baṅ; ar hoṛko do bahrete onako oḍok giḍikakʼa. Ańjom lạgitʼ lutur menakʼtae hoṛ doe ańjomma.”