Luk 13 - সান্তালী বাইবেল

Mon ạcur reaṅ sikhạuna

¹ Ado ona jokhecʼ onḍeko jarwa akan tahẽkan adom hoṛ do Jisu Gạlil Prodes reaṅko lạiyadea. Onkoko menkeda, Romren disạm cakʼlaoyicʼ Pilạt do Gạlilrenkoe makʼketʼkote dãṛẽ samaṅ akatʼ janwarakʼ mãyãm sãote onkoakʼ mãyãm hõe milạuketʼtakoa.

² Noa katha ańjomkate Jisui menkeda, “Ape do cetʼpe bujhạueda, onko do Gạlilrenko khon bạ̃ṛti kạiyan hoṛko tahẽkante onkako saset ocoyena?

³ Ińiń metapekana, ona do baṅa, ar onkage ape hõ kại khon mon bape ạcurle khan jotokogepe nosṭo ocokʼa.

⁴ Siloam reakʼ usul oṛakʼ bhindạṛlenre okoe gel irạl hoṛko gocʼlen, apeakʼ hudisre onko do cetʼ Jerusalemrenko khon hõ bạ̃ṛti dusiyan hoṛko tahẽkana?

⁵ Ińiń metapekana, ona do baṅ, menkhan kại khon mon bape ạcurle khan ape hõ sanamkogepe marao utạrokʼa.”

Baṅ jokʼ loa reakʼ phen

⁶ Ona tayom Jisu do cetʼako lạgitʼ noa kathae metatʼkoa: “Mitʼ hoṛakʼ darkha bagwanre mitʼṭecʼ loa dare rohoe tahẽkana. Mitʼ din uni hoṛ do hecʼkate joe ńam baṛakeda menkhan bae ńamleda.

⁷ Unre mạliye metadea, ‘ńelme, iń do pe bochor khon noa darere joń ńam baṛakana menkhan cetʼge bạń ńameda. Onate loa dare do makʼ giḍikakʼme. Cedakʼ je noa do ạuṛiyakʼ hasae nosṭo ocoyeda.’

⁸ Mạliye roṛ ruạṛkeda, ‘E baba niạ bochor hõ tahẽ ocoakʼme. Iń do beṛhaeteń la ghạḍluga ar guricʼkoń emakʼa.

⁹ Ar ona tayom jo sapʼlen khan ma bogege ar baṅ khan dom makʼ giḍikakʼge.’ ”

Jirạukʼ mãhãre kubjạ maejiue bogeyede

¹⁰ Ado mitʼ jirạukʼ mãhãre Jisu do mitʼṭecʼ sunạgogreye cetʼakokan tahẽkana.

¹¹ Onḍe do nonkan mitʼṭen maejiue tahẽkana, one uni do mitʼṭen bạṛicʼ jiue sapʼakade tahẽkante gelirạl bochor khon ruạteye jạbun akan tahẽkan. Ar kubjạgeye tahẽkante bae sojhe daṛeakʼkan tahẽkana.

¹² Jisu do uniye ńelkedea ar acʼ ṭhen hoho sorkateye metadea, “E go, amakʼ ruạ khon dom bogeyena.”

¹³ Ar noa katha menkateye capokedea ar inạtege uni doe sojheyente Isor gunmanao joharaye ehopʼena.

¹⁴ Jisu do jirạukʼ mãhãreye bogekedete sunạgogren mukhiyạ doe edreyente hoṛkoe metatʼkoa, “Kạmi lạgitʼ turui din ma menakʼge. Onate jirạukʼ mãhãre baṅ hecʼkate ona turui din bhitrire hecʼkate boge ocokʼpe.”

¹⁵ Unre Probhu do uni mukhiyại metadea, “E phạsiạrako! Jirạukʼ mãhãre ape do cetʼ aperen gadha se ḍaṅgrako goṛa khon raṛakate dakʼ ńũ bape idiyetʼkoa?

¹⁶ Menkhan Abraham bõsren nui maejiu do gel irạl bochor hạbicʼ Soetane tol akade tahẽkana, ar jirạukʼ mãhãre ona tonol khone raṛa ocokʼ do cetʼ baṅ ganokʼtaea?”

¹⁷ Noa kathae roṛketʼ khan uni upạrteko tahẽkan sanamko doko lajaoena. Menkhan eṭakʼ hoṛko do uniyakʼ maraṅ kạmi ńelte ạḍiko rạskạyena.

Tuṛi jaṅ ar khạmi reakʼ phen

¹⁸ Inạ tayom Jisui menkeda, “Isorakʼ raj do oka lekana? Ar cetʼ tulucʼ iń jurikea?

¹⁹ Isorakʼ raj do mitʼṭecʼ tuṛi jaṅ lekanakʼ kana, one oka do mitʼṭen hoṛ idikate acʼakʼ goḍareye erketʼ. Tayomte ona do harayente mitʼṭecʼ dare leka hoyena. Ar cẽṛẽko hõ hecʼkate ona reakʼ ḍạrkore tukạko benao joṅana.”

Khạmi reakʼ phen

²⁰ Jisu do arhõe menkeda, “Isorakʼ raj do cetʼ tulucʼ iń jurikea?

²¹ Isorakʼ raj do khạmi lekana. Mitʼṭen maejiu do ona idikate gel irạl keji holoṅ sãoteye sipi mesalkeda, onate joto holoṅ do phulạu rakapʼena.”

Sakṛa duạr

²² Ado ato ato ar nagrahakore dãṛã dãṛãte lại cetʼakote Jisu do Jerusalem secʼe calao idiyena.

²³ Ar mitʼṭen hoṛ do uniye kulikedea, “E Probhu, kại khon bańcao do cetʼ eken thoṛa hoṛgeko ńama? Unre Jisu do gadel hoṛkoe metatʼkoa,

²⁴ “Sakṛa duạrte bolokʼ lạgitʼ lạgiyạ paṛaokʼpe. Ińiń metapekana, ḍher hoṛge bolokʼ lạgitʼko kurumuṭuya, menkhan bako bolo daṛeakʼa.

²⁵ Unre oṛakʼren kisạ̃ṛ beretʼkate silpińe siń esetʼlere ape do bahrere teṅgokate silpiń ṭhopʼ ṭhopʼkatepe mena, ‘E Probhu, jhicʼ aleme.’ Menkhan uni doe roṛ ruạṛ apea, ‘bạń baḍaeyetʼpea okaren kan coṅpe.’

²⁶ Unrepe mena, ‘ale do am sãotele jom ńũleda, ar aleakʼ kulhi korem cetʼalekan tahẽkana.’

²⁷ Unreye metapea, ‘oka khon coṅpe hecʼakan, iń do bạń baḍae akatʼpea. E phạsiạrako, men iń khon ńirjoṅpe.’

²⁸ “Tinre Abraham, Isạhak, Jakob ar nạbiko do Isorakʼ rajosṭirepe ńelkoa ar ape do bahrerepe giḍi ocoakana, unre ape dope rakʼ homora ar hasotepe togocʼ ḍaṭaea.

²⁹ Unre purub, pạchim, utạr ar dạkhin khon hoṛko hijukʼte Isorakʼ rajre jojomko duṛupʼa.

³⁰ Okoe ńitokʼ tayomre menakʼko onko doko lahakʼa, ar lahare okoe menakʼko onko doko tayomokʼa.”

Jerusalem lạgitʼ Jisuakʼ dulạṛ

³¹ Ona ghuṛire tin uḍicʼ Phạrusiko coṅ Jisu ṭhen hecʼenteko menkeda, “Am do nonḍe khon senjoṅme, ente Herod do gocʼme lạgitʼe menjoṅ kana.”

³² Jisu do onkoe metatʼkoa, “Senkate uni khikṛĩ metaepe, ‘iń do teheń ar gapa bhutkoń oḍok giḍikoa ar rugikoń bogekoa ar tesar hilokʼ do kạmiń mucạda.

³³ Enhõ teheń, gapa ar meaṅ do dãṛãntege hoyokʼtińạ, ente Jerusalem bahrere jãhãe nạbiye gujukʼ do baṅ hoedaṛeakʼa.’

³⁴ “E Jerusalem, E Jerusalem! Am do nạbikom gocʼetʼkoa ar am ṭhen kol ocokʼkanko do dhiritem tińetʼkoa. Sim eṅga cetʼleka acʼren hoponko phạ̃kṛạ̃kʼ latareye guṅgutʼko onkage iń hõ amren hoṛko guṅgutʼkoń menleda, menkhan ape do bape rebenlena.

³⁵ Ńelpe, apeakʼ oṛakʼ do ape samaṅre khạlige tahena. Ińiń metapekana, tin hạbicʼ ạuripe men, ‘bhorangeae Probhu Isor ńutumte daraekanicʼ do,’ unhạbicʼ iń do ar bape ńel ńameńa.”