Levitikus 9 - সান্তালী বাইবেল

Naekekoakʼ sekʼwa kạmi

¹ Ojokʼ bahalokʼ reakʼ irạlakʼ din hilokʼre Aron ar uniren hoponko ar Israelren mukhiyạko do Moseye hohowatʼkoa.

² Uni do Arone metadea, “Kại ńutumte samaṅokʼakʼ lạgitʼ am do mitʼṭen ạnḍiạ mĩhũ ar jeredokʼ samaṅokʼ lạgitʼ mitʼṭen bheḍam ạguyea ar unkin do Probhu Isor samaṅrem dohokinạ. Unkin do jemon niphuṭ utạrkin hoyokʼ.

^3-4 Ar Israelkom metakoa jemon onko do Probhu Isor samaṅre kại ńutumte samaṅokʼ lạgitʼ mitʼṭen merom, jeredokʼ samaṅokʼ lạgitʼ mitʼṭen mĩhũ ar mitʼṭen bhiḍi hopon ar sulukren samaṅokʼ lạgitʼ mitʼṭen ḍaṅgra ar mitʼṭen bheḍako ạguko. Mĩhũ ar bheḍa hopon banarge jemon mitʼ bochor umerrenkin hoyokʼ ar jemon unkin do niphuṭ utạrkin hoyokʼ. Ar onko sãote jemon sunum mesalakatʼ jomakʼ samaṅokʼakʼ reakʼ jinis hõko ạgu darae. Noako nonkae hoyokʼtakoa ente Probhu Isor do onko ṭhene ńel ocokʼa.”

⁵ Onko do Moseyakʼ hukum leka ńapamokʼ tạmbu samaṅre jotowakʼ jinisko ạgukeda ar sanam Israelko do Probhu Isor samaṅreko teṅgoyena.

⁶ Unre Mose do onkoe metatʼkoa, “Probhu Isorakʼ mạhima ape samaṅre jemon sodorokʼ ar onate uni do noako kạmi lạgitʼe hukum akatʼpea.”

⁷ Ona tayom uni do Arone metadea, “Am do pinḍ ṭhen senkate kại ńutumte samaṅokʼakʼ ar jeredokʼ samaṅokʼakʼem samaṅte amakʼ ar ona sãote hoṛkoakʼ kại reakʼ puruchunme. Ona chaḍa hoṛkoakʼ samaṅokʼakʼ hõ samaṅme ar onkoakʼ kại reakʼ puruchunme; ente Probhu do onageye hukumakada.”

⁸ Onate Aron do pinḍ ṭhen senkate acʼakʼ kại samaṅokʼren bạchure gurkedea.

⁹ Unre uniren hoponko do mĩhũ reakʼ mãyãm hataokate acʼ ṭhenko ạgukeda. Ar Aron do ona mãyãmre acʼakʼ kạṭupʼkoe topoketʼte pinḍ reakʼ dereńreye ojokʼada ar sarecʼ mãyãm do pinḍ aṛereye dulkada.

¹⁰ Probhu Isor Mose okalekae hukumade tahẽkan onkage Aron do kại ńutumteye samaṅkede mĩhũ reakʼ itil, banar kunḍi ar ganthar cetan reakʼ hĩsko do pinḍ cetanreye jeretʼkeda.

¹¹ Menkhan jel ar harta do ḍera bahrete idikateye atar giḍikada.

¹² Ona tayom Aron do jeredokʼ samaṅokʼ lạgitʼ mitʼṭen bheḍae dãṛẽkedea. Ar uniren hoponko do bheḍawakʼ mãyãm ạgukate uniko emadea ar Aron do ona pinḍreye irciwada.

¹³ Onko do jeredokʼ samaṅokʼicʼ bheḍawakʼ bohokʼ ar jelko begarketʼte Aronko emadea ar uni do pinḍ cetanre onakoe jeretʼkeda.

¹⁴ Bheḍawakʼ lacʼ bhitri reakʼ hĩsko ar jaṅgako ạrupʼ saphakate uni do pinḍ cetan reakʼ jeredokʼ samaṅokʼakʼ cetanre dohokate onako hõe jeretʼkeda.

¹⁵ Ona tayom Aron do hoṛkoren samaṅokʼren janwarkoe ạguketʼkoa. Uni do hoṛkoakʼ kại ńutumte merome dãṛẽkedea ar lahate leka uni hotetege kại ńutumte samaṅokʼakʼe samaṅkeda.

¹⁶ Ona tayom uni do jeredokʼ samaṅokʼren barea janware ạguketʼkinạ ar Probhu Isore emakan niạm lekage unkin hõe samaṅketʼkinạ.

¹⁷ Setakʼ bela reakʼ jeredokʼ samaṅokʼ chaḍa uni do jomakʼ samaṅokʼ lạgitʼ ạguakʼ jinis khon thoṛa hataokate pinḍ cetanreye atarkeda.

¹⁸ Uni do hoṛkoren sulukren samaṅokʼicʼ ḍaṅgra ar bheḍae dãṛẽketʼkinạ. Ar acʼren hoponko do uni reakʼ mãyãmko soradea ar uni do pinḍ beṛhaeteye irciwada.

^19-20 Menkhan uni ḍaṅgra se bheḍawakʼ sanam itilko, metakʼme canḍbol reakʼ itil, lacʼ bhitri reakʼ itil, banar kunḍi ar gantharko do koṛam reakʼ jel cetanreko dohokeda, ar Aron do onako itil hataokate pinḍ cetanreye jeretʼkeda.

²¹ Ar Mose cetʼlekae hukumade tahẽkan onkage uni do dolek samaṅokʼakʼ lekate koṛam reakʼ jel ar jojom bulu reakʼ phạṛi do Probhu Isor samaṅreye dolaokeda.

²² Ona tayom Aron do hoṛko secʼ ti tiyạrkateye bhoratʼkoa. Uni do kại ńutumte samaṅokʼakʼ, jeredokʼ samaṅokʼakʼ ar sulukren samaṅokʼakʼ reakʼe sạtʼketʼ khan pinḍ khone pheḍena.

²³ Inạ tayom Mose ar Aron do ńapamokʼ tạmbu bhitrite kin boloyena. Ar onḍe khon oḍok hecʼkate unkin do hoṛkin bhoratʼkoa. Unre Probhu Isorakʼ ṭhonok do hoṛko samaṅre sodorena.

²⁴ Ar Probhu Isor ṭhen khon seṅgel oḍok hecʼente pinḍ cetan reakʼ jeredokʼ samaṅokʼakʼ ar sanam itilkoe jomkeda. Ar noa ńelte hoṛ doko sạhnạskeda ar taberenteko sewakeda.