Levitikus 8 - সান্তালী বাইবেল

Aron ar uniren hoponko naeke hudạre ojokʼ bahalko reaṅ

¹ Inạ tayom Probhu Isor do Moseye galmaraoadea,

² “Am do Aron ar uniren hoponko nonḍem ạgukoa. Ar ona sãote onkoakʼ kicricʼko, ojokʼ bahalokʼ reakʼ sunum, kại ńutumte samaṅokʼren ḍaṅgra, barea bheḍa ar bin khạmiyanakʼ piṭhạ reakʼ ḍạlicʼ hõm ạgu daraya.

³ Ar ńapamokʼ tạmbu reakʼ duạr ṭhen sanam Israelkom jarwakoa.”

⁴ Probhu Isorakʼ hukum leka Mose do sanamakʼe kạmikeda. Ar Israelren sanamko do ńapamokʼ tạmbu reakʼ duạr ṭhenko jarwayena.

⁵ Unre Mose do onkoe metatʼkoa, “Probhu Isor do noako hoyocoe reakʼe hukum akawạdińa.”

⁶ Ar noa katha menkate uni do Aron ar uniren hoponkoe ạguketʼkoa are ḍạbrạ sapha ocoketʼkoa.

⁷ Ona tayom Aron do bhitri reakʼ kicricʼe horokʼadete ḍanḍa totolakʼteye paṭhekedea. Ar ephod latar reakʼ kicricʼ ar ona cetanre ephode horokʼadea ar ephod sãote joṛao mitʼakatʼ ḍanḍa reakʼ ḍombete ephod doe tolkada. Onate ephod do uniyakʼ hoṛmore tahẽyena.

⁸ Ar ona cetanre uni do koṛam ḍhalwae horokʼadea ar onare Urim ar Thumime dohoadea.

⁹ Ona tayom dạhṛi do Aronakʼ bohokʼreye horokʼadete sonot mukuṭ, metakʼme ona sona reakʼ pat do dạhṛi reakʼ samaṅ secʼe lagaoadea. Ar Mose do Probhu Isore hukumade leka sanamakʼgeye kạmikeda.

¹⁰ Ona tayom uni do sekʼwa tạmbu ar ona bhitri reakʼ sanamakʼ cetanre ojokʼ bahalokʼ reakʼ sunume ojokʼada ar nonkate Probhu Isor ńutumte onakoe begarkeda.

¹¹ Uni do sunum reakʼ thoṛa hataokate pinḍ cetanre eae dhaoe ircikeda. Ar ona sunumte pinḍ ar ona reakʼ sanam thạri-bạṭiko ar gamlako sudhạ Probhu Isor ńutumteye begarkeda.

¹² Ona tayom uni do ojokʼ bahalokʼ reakʼ thoṛa sunum hataokate Aronakʼ bohokʼreye dulkeda ar Probhu Isor ńutumteye ojokʼ bahalkedea.

¹³ Ona tayom uni do Aronren hoponkoe ạguketʼkote aṅgrope horokʼatʼkoa ar ḍanḍa reakʼ paṭheakʼteye paṭheketʼkote bohokʼe dạhṛiketʼkoa. Ar Mose do sanamakʼge Probhu Isorakʼ hukum lekae kạmikeda.

¹⁴ Ona tayom uni do kại ńutumte samaṅokʼicʼ ḍaṅgrae ạgukedea. Unre Aron ar uniren hoponko do ḍaṅgrawakʼ bohokʼre akoakʼ tiko dohoketʼtakoa.

¹⁵ Ar ona tayom Mose do uni ḍaṅgrae dãṛẽkedete uniyakʼ mãyãme hataokeda ar pinḍ saphae lạgitʼ kạṭupʼte ona mãyãm hataokate pinḍ reakʼ dereńkoe ojokʼada. Ar sarecʼakʼ mãyãm do pinḍ aṛereye dulkada. Nonkate uni do puruchun reakʼe kạmiketʼte pinḍ do Probhu Isor ńutumteye begarkada.

¹⁶ Ona tayom uni ḍaṅgrawakʼ lacʼ bhitri reakʼ sanam itil, ar im cetan reakʼ gantharko ar banar kunḍi onako do pinḍ cetanreye atar giḍikada.

¹⁷ Menkhan ḍaṅgrawakʼ jel, harta ar gubriko do ḍera bahrete idikateye atar giḍikada. Mose do jotowakʼge Probhu Isorakʼ hukum lekae kạmikeda.

¹⁸ Ona tayom uni do jeredokʼ samaṅokʼren bheḍae ạgukedea. Unre Aron ar uniren hoponko do bheḍawakʼ bohokʼre akoakʼ tiko dohokeda.

¹⁹ Ar Mose do uni bheḍae makʼkedea ar uniyakʼ mãyãm hataokate pinḍ beṛhaeteye irciwada.

²⁰ Ar bheḍaye getʼ phạṛikedete uniyakʼ bohokʼ, jel ar itil doe atarkeda.

²¹ Uni do bheḍawakʼ jaṅga ar lacʼ bhitri reakʼ hĩsko dakʼteye ạrupʼ saphakeda ar bheḍa do goṭate jeredokʼ samaṅokʼakʼ reakʼ pinḍ cetanreye atarkedea. Noa do Probhu Isor ńutumte seṅgelteakʼ mitʼṭecʼ samaṅokʼakʼ kana, one ona reakʼ jut so Probhu Isor doe kusiyakʼkan. Ar Mose do jotowakʼge Probhu Isorakʼ hukum lekae kạmikeda.

²² Ona tayom uni do eṭakʼ bheḍa, metakʼme samaṅokʼren bheḍae ạgukedea. Unre Aron ar uniren hoponko do uni bheḍa cetanre akoakʼ tiko dohoketʼtakoa.

²³ Mose do uni bheḍae dãṛẽkedea ar uniyakʼ ṭhoṛa mãyãm hataokate Aronakʼ jojom lutur reakʼ gonḍare ar jojomti ar jojom jaṅga reakʼ buḍhạ kạṭupʼreye jotʼadea.

²⁴ Ona tayom uni do Aronren hoponko hõe ạguketʼkote onkoakʼ jojom lutur reakʼ gonḍare ar jojomti ar jojom jaṅga reakʼ buḍhạ kạṭupʼre mãyãme jotʼatʼkoa. Ar inạ tayom do pinḍ beṛhaete mãyãme irciyada.

²⁵ Uni do bheḍawakʼ itil, canḍbol reakʼ itil, lacʼ poṭa cetan reakʼ itil, im cetan reakʼ ganthar, ar itilte esetʼ banar kunḍi ar jojomsa bulu reakʼ phạṛiye hataokeda.

²⁶ Ar ona tayom do Probhu Isor samaṅre dohoakan bin khạmiyanakʼ piṭhạ reakʼ ḍạlicʼ khon mitʼṭecʼ piṭhạ, sunum piṭhạ ar mitʼṭecʼ thapṛa piṭhạ hataokate ona do itil ar bulu cetanreye dohokeda.

²⁷ Onako uni do Aron ar uniren hoponkoakʼ tireye calatʼkote dolek samaṅokʼakʼ lekate ona do Probhu Isor samaṅreye dolaokeda.

²⁸ Ona tayom uni do onkoakʼ ti khon onako hatao ruạṛkate ojokʼ bahalokʼ reakʼ samaṅokʼakʼ pinḍre jeredokʼ samaṅokʼ cetanreye jeretʼkeda. Noa do Probhu Isor ńutumte seṅgelteakʼ mitʼṭecʼ samaṅokʼakʼ kana, one ona reakʼ jut so Probhu Isor doe kusiyakʼkan.

²⁹ Ona tayom uni do acʼakʼ bakhra reakʼ hĩs, metakʼme ojokʼ bahalokʼ samaṅokʼren bheḍawakʼ koṛam reakʼ hĩs hataokate dolek samaṅokʼakʼ lekate Probhu Isor samaṅreye dolaokeda. Ar Mose do jotowakʼge Probhu Isorakʼ hukum lekae kạmikeda.

³⁰ Ona tayom Mose do thoṛa ojokʼ bahalokʼ reakʼ sunum ar pinḍ khon thoṛa mãyãm hataokate Aron ar uniren hoponko ar onkoakʼ kicricʼko cetanreye ircikeda. Nonkate Aron ar uniren hoponko ar onkoakʼ kicricʼko Probhu Isor ńutumteye begarkeda.

³¹ Ona tayom Mose do Aron ar uniren hoponkoe metatʼkoa, “Ape do ńapamokʼ tạmbu reakʼ duạr ṭhen noa jelpe isina ar onḍege ojokʼ bahalokʼ polob reakʼ ḍạlicʼre menakʼ piṭhạ tulucʼpe joma, ente iń do noań hukumatʼme tahẽkana, am ar amren hopon do ona reakʼ jojom hoyokʼtapea mente.

³² Ar jom tayom okako jel ar piṭhạ sarecʼ tahen ona dope atar giḍikakʼa.

³³ Ar apeakʼ noa ojokʼ bahalokʼ onusṭhan do eae din hạbicʼ tahena. Onate noa onusṭhan ạuri mucạdokʼ hạbicʼ noa ńapamokʼ tạmbu reakʼ duạr bahre do alope oḍokokʼa.

³⁴ Teheń oka hoyen ona do Probhu Isorakʼ hukumtege apeakʼ puruchun reakʼ hoyena.

³⁵ Ar jemon alope gujukʼ onate teheń khon eae din hạbicʼ siń ńindạ ńapamokʼ tạmbu bhitrirepe tahena ar Probhu Isorakʼ khojakʼ lekape kạmiya. Ente iń do noa hukumgeń ńam akada.”

³⁶ Mose hotete Probhu Isor oka hukume emletʼ tahẽkan Aron ar uniren hoponko do ona sanamakʼko kạmikeda.