Levitikus 7 - সান্তালী বাইবেল

Dos ńutumte samaṅokʼ reakʼ niạm

¹ “Noa do hoyokʼ kana dos ńutumte samaṅokʼakʼ niạm. Samaṅokʼakʼ reakʼ noa jel do sonot utạrakʼ kana.

² Jeredokʼ samaṅokʼicʼ janwar teṅgene ṭhạ̃ire dos ńutumte samaṅ akade janwar hõ gure hoyokʼa ar uniyakʼ mãyãm do pinḍ beṛhaete irciyakʼ hoyokʼa.

³ Ar uniyakʼ sanam itilko do samaṅ hoyokʼa, metakʼme itilte perecʼ canḍbol, lacʼ bhitri hĩsko reakʼ itil,

⁴ ar banar kunḍi ar ona sãote jalatʼmitʼ akan ḍanḍa ṭhenakʼ itil ar kunḍi sãote oḍok hecʼakan ganthar.

⁵ Naeke do noako hataokate Probhu Isor ńutumte seṅgelteakʼ samaṅokʼakʼ mente pinḍ cetanreye jereda. Noa do dos ńutumte mitʼṭen samaṅokʼakʼ kana.

⁶ Naekeakʼ gharońjren sanam herel hoponge ona doko jom daṛeakʼa, menkhan sonot tạmbu reakʼ ṭhạ̃irege. Noa do sonot utạrakʼ jinis kana.

⁷ “Kại ńutumte samaṅokʼakʼ ar dos ńutumte samaṅokʼakʼ niạm do mitʼ lekage onkae hoyokʼa. Okoeṭakʼ naeke niạ banar samaṅokʼakʼ reakʼ mitʼṭecʼte samaṅetʼkạnicʼakʼ puruchun reakʼe kạmikataere ona jel do naekeyakʼ hoyokʼa.

⁸ Jeredokʼ samaṅokʼakʼ reakʼ okoe naekeye kạmi uni do samaṅakade janwarakʼ harta acʼ lạgitʼe doho daṛeakʼa.

⁹ Culhạre sekao se celaṅre se taoware atawakʼ jomakʼ samaṅokʼakʼ jinis do uni naekeyakʼge hoyokʼa one okoe do jomakʼ samaṅokʼakʼ reakʼe kạmikatae.

¹⁰ Sunum mesal akatʼ se rohoṛteakʼ sanam jomakʼ samaṅokʼakʼ jinis khon Aronren hoponko do soman hĩsgeko ńama.

Sulukren samaṅokʼakʼ reakʼ niạm

¹¹ “Noa do hoyokʼ kana Probhu Isor ńutumte ạguakʼ sulukren samaṅokʼakʼ reakʼ niạm.

¹² Jãhãege sulukren samaṅokʼakʼ Probhu Isor ńutumte gunmanao emaeye menetʼ khan uni do noa gun makʼnao samaṅokʼakʼ sãote sunumre mesalakʼ bin khạmiyanakʼ piṭhạ, sunum ojokʼakʼ bin khạmiyanakʼ thapṛa piṭhạ ar sunumre sipiyakʼ mĩhĩ holoṅ reakʼ piṭhạ,

¹³ ar gun makʼnao johar lạgitʼ sulukren samaṅokʼakʼ jinis sãote thoṛa khạmiyanakʼ piṭhạ hõ tahena.

¹⁴ Probhu Isor emae lạgitʼ uni do joto lekanakʼ jinis khon mitʼṭecʼ mitʼṭecʼkateye ạguiya. Ar okoeṭakʼ naeke do sulukren samaṅokʼicʼ janwarakʼ mãyãme irciy noako do uniyakʼge hoyokʼtaea.

¹⁵ Gun manao johar lạgitʼ noa samaṅokʼakʼ jel do enhilokʼge jom cabae hoyokʼa, ar setakʼ hạbicʼ do baṅ sarecʼkakʼ hoyokʼa.

¹⁶ “Noa sulukren samaṅokʼakʼ do manot dohowakʼ purun lạgitʼ kan khan se samaṅetʼkạnicʼ do acʼakʼ monsubạte onae onkae enḍekhan ona samaṅ akatʼ jel do enhilokʼge jom hoyokʼa. Ar sarecʼ tahen khan dosar hilokʼ hõ ona do jomogokʼgea,

¹⁷ menkhan tesar din hạbicʼ tahẽlen khan ona do atar giḍikakʼ hoyokʼa.

¹⁸ Ar tesar hilokʼ hõ ona jel jomogokʼ enḍekhan Probhu Isor do ona samaṅakʼ bae ataṅa. Ar samaṅ akatʼicʼakʼ hõ ona do baṅ ataṅokʼtaea, ente ona jel do unre chutakʼ jinisge hoyokʼa. Ar okoe ona jele jom uni do ona kại lạgitʼ dạyike tahena.

¹⁹ “Sulukren samaṅokʼ reakʼ jelre jãhãn chutakʼ jinis jakʼlen khan enḍekhan ona do baṅ jom hoyokʼa, ona do atar giḍikakʼ hoyokʼa. Ar baṅ jakʼlen khan okoe sapha menakʼko onkoko jom daṛeakʼa.

²⁰ Jãhãege chute tahenre Probhu Isor ṭhen samaṅ akatʼ sulukren samaṅokʼ reakʼ jele jom enḍekhan uni do acʼakʼ jạtrenko khone biṭlạha ocokʼa.

²¹ Jãhãege manwa se janwarakʼ jãhãn chutakʼ jinis se eṭakʼ jãhãn chutakʼ hirkhạwakʼ jinise joṭed ar ona tayom Probhu Isor ṭhen samaṅ akatʼ sulukren samaṅokʼ reakʼ jele jom enḍekhan uni hõ acʼakʼ jạtrenko khone biṭlạha ocokʼa.”

^22-23 Inạ tayom Probhu Isor do Mose Israelko galmaraoakoe metadea, “Ape do ḍaṅgra, merom se bhiḍiyakʼ jãhãn itilge alope joma.

²⁴ Gocʼ janwar se bir janware or cirạ akade janwarakʼ itil do eṭakʼ kạmirepe beohar daṛeakʼa menkhan jom do bape jom daṛeakʼa.

²⁵ Okoe janwarkote Probhu Isor ńutumte seṅgelre samaṅokʼakʼ hoyokʼ uniyakʼ itil okoeye jom uni hõ acʼakʼ jạtrenko khone biṭlạha ocokʼa.

²⁶ Jãhãregepe girobasokʼ, ape do jãhãn cẽṛẽ se janwarakʼ mãyãm alope joma.

²⁷ Ar jãhãe hoṛ mãyãme jom khan uni do acʼ jạtrenko khone marao giḍi ocokʼa.”

Naekeyakʼ bakhra

^28-29 Probhu Isor do Mose Israelko galmaraoakoe metadea, “Jãhãege Probhu Isor ńutumte sulukren samaṅokʼ lạgitʼ jãhãn janware ạguiye uni do mitʼ hĩs Probhu Isor ńutumte emokʼ hoyokʼtaea.

^30-31 Probhu Isor ńutumte seṅgelteakʼ samaṅokʼakʼ noa hĩs, metakʼme koṛam reakʼ jel ar ona cetan reakʼ itil uni do apnar tite naekeye emaea. Ar naeke do koṛam reakʼ jel dolek samaṅokʼakʼ menkate Probhu Isor samaṅreye dolaoa ar ona do Aron ar uniren hoponkoakʼ hoyokʼa, menkhan itilko do pinḍ cetanreye jeretʼ giḍikakʼa.

³² Sulukren samaṅicʼ janwarakʼ jojomsa bulu phạṛi reakʼ jel do naeke emae hoyokʼa.

³³ Aronren okoeṭakʼ hopon do sulukren samaṅicʼ janwarakʼ mãyãm ar itile samaṅ uni do bakhra lekate jojom bulu phạṛi reakʼ jele ńama.

³⁴ Israelkoakʼ sanam sulukren samaṅokʼakʼ khon iń ńutumte dolek dohoakatʼ koṛam reakʼ jel ar samaṅakʼ bulu reakʼ jel do naeke Aron ar uniren hoponkoń ematʼkoa. Noa do Israelko ṭhen khon onkoakʼ bakhra hĩs kana.”

³⁵ Aron ar uniren hoponko oka hilokʼ khon naeke menkate Probhu Isor sapʼsorae lạgitʼko ojokʼ bahal ocoakan enhilokʼ khonge Probhu Isor ńutumte seṅgelre samaṅicʼ janwarakʼ niạ hĩs do onkoakʼ bakhra menkate ṭhik dohoakana.

³⁶ Ar oka hilokʼko ojokʼ bahal ocolen enhilokʼge Probhu Isor do Israelkoe hukumatʼko tahẽkana jemon piṛhike piṛhi onkoren bõs do noako ńam.

³⁷ Noa do hoyokʼkana jeredokʼ samaṅokʼakʼ, jomakʼ samaṅokʼakʼ, kại ńutumte samaṅokʼakʼ, dos ńutumte samaṅokʼakʼ, ojokʼ bahal porob reakʼ samaṅokʼakʼ ar sulukren samaṅokʼakʼ reakʼ niạmkoge.

³⁸ Probhu Isor do sinại hahaṅkarre Israelko oka hilokʼ acʼ ńutumte samaṅokʼakʼ jinisko ạguiye metatʼko tahẽkan enhilokʼge uni do sinại burure Mose noako niạme emade tahẽkana.