Levitikus 6 - সান্তালী বাইবেল

^1-5 Inạ tayom Probhu Isor do Moseye metadea, “Jãhãe hoṛ ṭhen khon jimạwakʼ se jạmine dohoakatʼ se jor julumkate hataoakʼ jãhãn jiniskote cholteye ṭhokakateye hataoakatʼ se jãhãeakʼ atʼ akan jinis ńamkate eṛeye roṛ se eṛe eṛeye kiriyạkʼ, nonkan jãhãe kại hoṛ Probhu Isorre bepạtiạr iạteye dusilen khan, enḍekhan uni okaṭakʼe kombṛo akatʼ se ṭhokakateye hatao akatʼ se uni ṭhen jimạ tahẽkan se atʼ akan jinise ńamakatʼ se oka jinis cetanre eṛe eṛeye kiriạkʼkan ona do uni hoṛ ruạṛkatae hoyokʼtaea. Ar khuti purun hõ purạge emkatae hoyokʼa ar ona sãote ona jinis reakʼ mõṛẽ hĩs reakʼ mitʼ hĩs reakʼ dam hõ ḍher emae hoyokʼtaea. Ar dos ńutumte samaṅokʼ hilokʼ hõ jinisren mạlik ona emkatae hoyokʼtaea.

⁶ Behok reakʼ juribana lekate uni do amem ṭhik akawade damren mitʼṭen niphuṭ utạricʼ bheḍa do Probhu Isor ńutumte samaṅe lạgitʼ naeke ṭhene ạguiyea.

⁷ Ar naeke do Probhu Isor samaṅre kại reakʼ puruchun lạgitʼe kạmikataea. Ar noako reakʼ jãhãnakʼtegeye dusi akanʼ, uni doe ikạ ocokʼa.”

Jeredokʼ samaṅokʼakʼ reakʼ niạmko

⁸ Ona tayom Probhu Isor do Moseye metadea,

⁹ “Aron ar uniren hoponkom baḍae ocokoa, jeredokʼ samaṅokʼakʼ reakʼ niạm do nonka leka hoyokʼa. Ona samaṅokʼakʼ jinis do goṭa ńindạ ar setakʼ hạbicʼ pinḍ reakʼ seṅgel cetanre tahena, ar pinḍ reakʼ seṅgel do jol akaege dohokakʼ hoyokʼa.

¹⁰ Ar setakʼ jokhecʼ naeke do acʼakʼ mĩhĩ musnạ kicricʼ ar huḍiń penṭ horokʼkate pinḍ cetanre jeredokʼ samaṅokʼakʼ reakʼ torocʼ rakapʼkate pinḍ aṛereye dohokakʼa.

¹¹ Ar ona tayom uni do kicricʼ bodolkate ḍera bahre sapha ṭhạ̃ire ona torocʼe idiya.

¹² Menkhan pinḍ cetan reakʼ seṅgel do jol dohokakʼge hoyokʼa, ona do baṅge ĩṛĩcʼ ocowakʼ hoyokʼa. Din hilokʼ setakʼ bela naeke do ona seṅgel cetanre sahane emakʼa ar onare jeredokʼ samaṅokʼakʼe dohoyte sulukren samaṅokʼakʼ reakʼ itilkoe jereda.

¹³ Ar pinḍ reakʼ seṅgel do jao okte joltege tahena, ar baṅge ĩṛĩcʼ ocowakʼ hoyokʼa.

Jomakʼ samaṅokʼakʼ reakʼ niạm

¹⁴ “Jomakʼ samaṅokʼakʼ niạm do nonkaleka. Aronren hoponko do jomakʼ samaṅokʼakʼ jinisko pinḍ ṭhen Probhu Isor samaṅreko ạguiya.

¹⁵ Ar naeke do purạ samaṅokʼakʼ bodolte ona khon mitʼ cuputʼ mĩhĩ holoṅ, sunum ar jomakʼ samaṅokʼ jinis cetanre dohoakan sanam kunduru hataokate pinḍ cetanreye jereda. Ar noa reakʼ jut so Probhu Isor doe kusiyakʼa.

¹⁶ Samaṅokʼakʼ jinis reakʼ sarecʼakʼ hạṭińko do Aron ar uniren hoponkoko joma. Ona do khạmi begor mesalkate jojom hoyokʼtakoa jãhãn sonot ṭhạ̃ire, metakʼme ńapamokʼ tạmbu reakʼ racare.

¹⁷ Ar khạmi mesalkate ona do jemon alo rapagokʼ. Noa do iń ńutumte seṅgelre samaṅokʼakʼ jinis reakʼ onkoń ematʼkoa. Kại ńutumte samaṅokʼ ar dos ńutumte samaṅokʼakʼ leka jomakʼ samaṅokʼakʼ reakʼ noa hĩs hõ sonot utạrakʼ jinis kana.

¹⁸ Aron bõsren sanam herel hoponkoge ona doko jom daṛeakʼa. Probhu Isor ńutumte seṅgelre samaṅokʼakʼ jinis reakʼ noa hĩs do piṛhike piṛhi onkoakʼge hoyokʼa. Ar jãhãege ona hĩse joṭed uni do Probhu Isor ńutumte begarokʼ hoyokʼtaea.”

¹⁹ Probhu Isor do Mose arhõe metadea,

²⁰ “Arone ojokʼ bahal ocokʼ dinre Aron ar uniren hopon do jomakʼ samaṅokʼakʼ lekate jaoge mitʼ keji irạl sae gram mĩhĩ holoṅ Probhu Isor samaṅreko ạguiya. Ar ona reakʼ adha do setakʼ jokhecʼ ar adha do ạyupʼ jokhecʼko samaṅa.

²¹ Jomakʼ samaṅokʼakʼ lekate ona holoṅ do sunumre sipi mesalkate luihạre isinkate kecakʼ kecakʼge Probhu Isor samaṅre ạgui hoyokʼa. Ar noa reakʼ jut so Probhu Isor doe kusiyakʼa.

²² Aron tayom uniren okoeṭakʼ hopon do maraṅ naeke hudạ lạgitʼe ojokʼ bahal ocokʼ uni hõ noa porobe hoeocoya. Noa do Probhu Isorakʼ kana, ar ona do jotoge atar cabae hoyokʼa.

²³ Naeke ạguwakʼ jomakʼ samaṅokʼakʼ do jotoge atar cabae hoyokʼa; ona do baṅ jomogokʼa.”

Kại ńutumte samaṅokʼakʼ reakʼ niạm

²⁴ Ona tayom Probhu Isor do Moseye metadea,

²⁵ “Aron ar uniren hoponkom metakoa, noa do kại ńutumte samaṅokʼakʼ kana. Ar jeredokʼ samaṅedekạnicʼ janwar do teṅgenokʼ ṭhạ̃ire Probhu Isor samaṅre kại ńutumte samaṅedekanicʼ janwar hõ gure hoyokʼa. Noa samaṅokʼakʼ reakʼ jel do sonot utạrakʼ jinis kana.

²⁶ Okoeṭakʼ naeke noa samaṅokʼakʼ reakʼe kạmi uni do noa reakʼ jele joma. Uni do jãhãn sonot ṭhạ̃ire, metakʼme ńapamokʼ tạmbu reakʼ racare ona jojom hoyokʼtaea.

²⁷ Ar noa jel okoeye joṭed uni do Probhu Isor ńutumte begar dohokʼ hoyokʼtaea. Janwarakʼ mãyãmte kicricʼre daglen khan enḍekhan ona do sonot ṭhạ̃ire ạrupʼ saphae hoyokʼa.

²⁸ Ar hasa reakʼ okaṭakʼ ṭukucʼre noa samaṅokʼ reakʼ jel isinokʼ ona do rạputʼ giḍikakʼ hoyokʼa, menkhan pitạl reakʼ jinisre isinokʼ khan ona do gasao saphae hoyokʼa.

²⁹ Ar naekeakʼ gharońjren sanam herel hopon do onako jom daṛeakʼa. Noa do sonot utạrakʼ jinis kana.

³⁰ Sonot ṭhạ̃ire kại ńutumte samaṅokʼicʼ janwarakʼ mãyãm do ńapamokʼ tạmbure aderlen khan ona reakʼ jel do baṅ jom hoyokʼa, ar ona do atar giḍikakʼ hoyokʼa.