Levitikus 5 - সান্তালী বাইবেল

¹ “Jãhãe hoṛ apnar ńelakʼ se ańjomakʼ jãhãnakʼ babotre bicạrre goha emokʼ reakʼ ạte ńamlere hõ thir hapegeye tahen enḍekhan uni do kại hoyokʼtaea ar ona behokʼ lạgitʼ uni do dạyireye paṛaokʼa.

² “Ar jãhãe begor baḍaete jãhãn besaphawakʼe joṭetʼ eman lekhan uni do besapha ar dusi hoṛe hoyokʼa, baṅ do besapha janwar ar ạsul janwarakʼ mạ̃ṛĩkan ar baṅ do leńokʼ ṭunḍạṅkan kạṭicʼ jãhãnkoakʼ mạ̃ṛĩkan.

³ “Manwae chutokʼ nonkan jãhãn besaphawakʼ jãhãege begor baḍaeteye joṭetʼ lekhan uni hõ baḍae tayom do dusiye hoyokʼa.

⁴ “Begor sontorteye kiriyạkʼ nonkan jãhãnakʼ reaṅ jãhãe begor hudiskate boge-bạṛicʼe kiriạkʼ enḍekhan begor baḍaeteye onka akatʼre hõ uni do dusireye paṛaokʼa.

⁵ “Noako behok reakʼ mitʼṭecʼ jãhãnakʼe onkaete jãhãe dusireye paṛaokʼ enḍekhan uni do ona behok akatʼ reakʼ aṅgoc hoyokʼtaea.

⁶ Unre ona behok reakʼ juribana lekate uni do Probhu Isor ńutumte kại reakʼ puruchun lạgitʼ mitʼṭen bhiḍi pạṭhi se merom pạṭhi ạguiye hoyokʼtaea, ar naeke do uniyakʼ puruchun reakʼe kạmikataea.

⁷ “Uni hoṛ do bhiḍi pạṭhi bae ạgu daṛeae, enḍekhan uniyakʼ ona behok reakʼ ḍanḍom lekate Probhu Isor ńutumte barea potam se barea parwa lagaoaea. Unkin modre mitʼṭen do kại ńutumte ar eṭagicʼ do jeredokʼ samaṅokʼakʼ lạgitʼ.

⁸ Unkin ạgukate uni do naekeakʼ tireye jimạkinạ ar naeke do pạhilre kại ńutumte samaṅokʼ lạgitʼ ạguakan cẽṛẽye samaṅ maṛaṅea. Uni do bae phạṛiyea menkhan bohokʼe mocṛao tapagtaea.

⁹ Ona tayom uni cẽṛẽ khon thoṛa mãyãm hataokate pinḍ beṛhaeteye irciya, ar sarecʼakʼ mãyãm do roḍocʼ oḍokkate pinḍ aṛereye joro hińjida; noa do kại ńutumte mitʼṭen samaṅokʼakʼ kana.

¹⁰ Ar eṭakʼicʼ cẽṛẽte do niạm lekate jeredokʼ samaṅokʼakʼ samaṅkate naeke do uniyakʼ puruchun reakʼe bebostawaea; ar onate uniyakʼ kại do ikạkʼtaea.

¹¹ “Ar uni hoṛ barea potam se barea parwa hõ bae ạgu daṛeakin, enḍekhan kại ńutumte samaṅokʼ lạgitʼ uni do mitʼ keji irạlsae gram mĩhĩ holoṅ ạguiy hoyokʼtaea. Noa do kại ńutumte samaṅokʼakʼ kante onare sunum ar kunduru do baṅ mesalakʼ hoyokʼa.

¹² Uni do ona holoṅ naeke ṭhene idiya. Ar naeke do sanamakʼ samaṅ baṅkate ona khon mitʼ cuputʼ locakate Probhu Isor ńutumte seṅgelre samaṅokʼakʼ jinis cetanreye atar gidikakʼa; noa do kại ńutumte mitʼṭen samaṅokʼakʼ kana.

¹³ Ar uni cetʼ lekae kại akatʼ onkage naeke do puruchun reakʼe kạmikataea ar onate uni do ikạye ńama. Ar samaṅokʼakʼ reakʼ sarecʼakʼ hĩsko do jomakʼ samaṅokʼakʼ jinis lekage naekeakʼ hoyokʼtaea.”

Hala ruạṛ ńutumte samaṅokʼakʼko

¹⁴ Noa tayom Probhu Isor do Moseye galmaraoadeteye metadea,

¹⁵ “Jãhãe hoṛ monre kại reakʼ monsubạ doho baṅkate Probhu Isor ńutumte begar dohoakan jinisko babotreye kại enḍekhan uni do kại reakʼ juribana lekate Probhu Isor samaṅre mitʼṭen niphuṭ utạricʼ bheḍa ạguiye hoyokʼtaea. Ar noa do dos ńutumte samaṅokʼakʼ kana. Ona chaḍa dhorom reakʼ sekel lekate tinạkʼ rupạte bheḍawakʼ dam ṭhik dohokʼ unạkʼ rupạ do khuti purun lekate uni emae hoyokʼtaea.

¹⁶ Ar ona sonot jinis babotreye kại akatʼ iạte uni do puruchun lekate noa emokʼ hoyokʼtaea. Ona chaḍa bheḍawakʼ dam sãote arhõ mõṛẽ hĩs reakʼ mitʼ hĩs do naeke tire emokʼ hoyokʼa. Ar naeke do uni bheḍa idikate kại reakʼ puruchunokʼ ńutumteye samaṅea ar onate uniyakʼ kại do ikạkʼtaea.

¹⁷ “Jãhãe begor baḍaete Probhu Isore mana akatʼ reakʼ jãhãnakʼe cekae enḍekhan uni do dusireye paṛaokʼa ar onate uni do dạyireye paṛaokʼa.

¹⁸ Unre uni do acʼakʼ kại ńutumte samaṅokʼakʼ lạgitʼ oneye ṭhik dohoakatʼ damren mitʼṭen bhiḍi ạgukate naekeakʼ tireye jimạyea. Ar begor baḍaeteye kại akatʼ iạte naeke do puruchun reakʼe kạmikataea; ar onate uni do ikạye ńama.

¹⁹ Noa do kại ńutumte mitʼṭen samaṅokʼakʼ kana, ente uni do Probhu Isor samaṅreye dusigea.”