Levitikus 4 - সান্তালী বাইবেল

Kại ńutumte dãṛẽko

^1-2 Probhu Isor do Mose Israelko noa katha galmaraoakoe metadea, “Monre behok reakʼ monsubạ bạnukʼtae ar Probhu Isore mana akatʼ reakʼ jãhãnakʼe ceka akatʼ khan,

³ “Uni kạkạiyicʼ do ojokʼ bahal ocoakan naekekan khane ar ona iạte sanam hoṛ dusiko hoyokʼ, enḍekhan ona lạgitʼ uni do kại reakʼ puruchun lekate Probhu Isor ṭhen mitʼṭen niphuṭ utạricʼ ḍaṅgra ạguiye hoyokʼtaea.

⁴ Uni do ńapamokʼ tạmbu reakʼ duạr ṭhen Probhu Isor samaṅreye ạguiyea. Ar uniyakʼ bohokʼre acʼakʼ tiye dohoytaea ar Probhu Isor samaṅreye gureya.

⁵ Ona tayom maraṅ naeke do uni ḍaṅgrawakʼ thoṛa mãyãm hataokate ńapamokʼ tạmbuteye adera.

⁶ Ar ona mãyãmre acʼakʼ kạṭupʼe caḍoetaea ar thoṛa mãyãm do Probhu Isor samaṅre ona sonot ṭhạ̃i reakʼ orwal secʼ eae dhaoe irciya.

⁷ Inạ tayom thoṛa mãyãm hataokate ńapamokʼ tạmbure Probhu Isor samaṅre one okare jut so mosola reakʼ pinḍ menakʼ ona reakʼ dereńkoreye ojokʼakʼa. Ar sarecʼakʼ mãyãmte do ńapamokʼ tạmbu reakʼ duạr ṭhen one okare jeredokʼ samaṅokʼakʼ reakʼ pinḍ menakʼ ona aṛereye dulkakʼa.

⁸ Ar kại ńutumte samaṅokʼ lạgitʼe ạguakan ḍaṅgra khon uni do sanam itile oḍoka. Onako do hoyokʼkana lacʼ bhitriko reakʼ itil ar onako sãote jalatʼ mitʼakan itil,

⁹ banar kunḍi ar ona sãote ḍanḍa ṭhenakʼ itil ar kunḍi sãote oḍok hecʼakan gantharko.

¹⁰ Sulukren samaṅokʼicʼ ḍaṅgra khon itil oḍok akatʼ lekage nui samaṅ akade ḍaṅgrawakʼ itil hõ oḍok hoyokʼa. Ona tayom naeke do onako itil hataokate jeredokʼ samaṅokʼakʼ reakʼ pind cetanreye jeretʼ cabaya.

^11-12 Menkhan sarecʼ hĩsko, metakʼme, harta, jel, bohokʼ, jaṅga, lacʼ ar gubriko do ḍera bahrete idikate mitʼṭecʼ sapha ṭhạ̃ire one okare torocʼ giḍikʼ ona cetanre sahan reakʼ seṅgelteye atar giḍikakʼa.

¹³ “Ar goṭa Israel jạtrenko bạṛicʼakʼ reakʼ monsubạ doho baṅkate Probhu Isore mana akatʼ jãhãnakʼge begor baḍaeteko onkae enḍekhan onko do ona bako baḍae akatʼre hõ dusiko hoyokʼa.

¹⁴ Ar tinreko bujhạu daṛeakʼa baṅmako kại akada unre onko do kại ńutumte dãṛẽye lạgitʼ mitʼṭen ḍaṅgra ńapamokʼ tạmbu samaṅre ạguiye hoyokʼtakoa.

¹⁵ Ona tayom Israelkoren mukhiyạko do Probhu Isor samaṅre uni ḍaṅgrawakʼ bohokʼre tiko dohoytakoa. Ar naeke do Probhu Isor samaṅre uniye gureya.

¹⁶ Ar ona tayom maraṅ naeke do uni ḍaṅgra khon thoṛa mãyãm hataokate ńapamokʼ tạmbuteye adera.

¹⁷ Uni do ona mãyãmre acʼakʼ kạṭupʼkoe topoetaea ar Probhu Isor samaṅre sonot ṭhạ̃i reakʼ orwal secʼ eae dhaoe irciya.

¹⁸ Ona tayom thoṛa mãyãm hataokate uni do ńapamokʼ tạmbure Probhu Isor samaṅre oka jut so dhudhup pinḍ menakʼ ona reakʼ dereńkoreye ojokʼakʼa. Ar ona tayom do ńapamokʼ tạmbu reakʼ duạr ṭhen one okare jeredokʼ samaṅokʼakʼ pinḍ menakʼ ona aṛereye dulkakʼa.

^19-20 Ar ḍaṅgrawakʼ sanam itilko oḍokkate uni do pinḍ cetanreye jeretʼ cabaya ar kại ńutumte samaṅokʼicʼ eṭakʼ ḍaṅgra hõe onkayea. Nonkate naeke do Israelkoakʼ kại ńutumteye puruchuna ar onkoakʼ kại do ikạkʼtakoa.

²¹ Naeke do uni ḍaṅgrawakʼ sarecʼakʼ hạṭińko ḍera bahreteye oḍok idiya ar kại ńutumte samaṅokʼicʼ eṭakʼ ḍaṅgra lekageye atareya. Ar noage goṭa Israel jạtrenkoakʼ kại ńutumte samaṅokʼakʼ do hoyokʼa.

²² “Jãhãe mukhiyạ hoṛ monre bạṛicʼakʼ jãhãnakʼ doho baṅkate acʼren Probhu Isore mana akatʼ reakʼ jãhãnakʼe cekae enḍekhan uni hõ dusi hoṛe hoyokʼa.

²³ Ar tinre uniyakʼ behokakʼ udukʼaea unre uni do samaṅokʼ lạgitʼ mitʼṭen niphuṭ utạricʼ merom boda ạguiye hoyokʼtaea.

²⁴ Uni do bodawakʼ bohokʼre acʼakʼ tiye dohoytaea ar jeredokʼ samaṅokʼakʼ dãṛẽ mente Probhu Isor samaṅreye gureya; noa do kại ńutumte mitʼṭen samaṅokʼakʼ kana.

²⁵ Ona tayom naeke do kại ńutumte samaṅ akade janwar khon thoṛa mãyãm kạṭupʼte hataokate jeredokʼ samaṅokʼakʼ pind reakʼ dereńkoreye ojokʼakʼa; ar sarecʼakʼ mãyãm do ona pinḍ aṛereye dulkakʼa.

²⁶ Uni do sulukren samaṅokʼicʼ janwarakʼ itil lekage uniyakʼ sanam itilko do pinḍ cetanreye jereda. Ar nonkate naeke do mukhiyạ hoṛakʼ puruchun reakʼe kạmikataea ar nonkate uniyakʼ kại do ikạkʼtaea.

²⁷ “Israelko modren jãhãege monre kại reakʼ monsubạ doho baṅkate Probhu Isore mana akatʼ reakʼ jãhãnakʼe cekae enḍekhan uni hõ dusi hoṛe hoyokʼa.

²⁸ Ar tinre uniyakʼ kại reakʼ udukʼaea unre uni do samaṅokʼ lạgitʼ mitʼṭen niphuṭicʼ merome ạguyea.

²⁹ Uni do meromakʼ bohokʼre acʼakʼ tiye dohoytaea ar jeredokʼ samaṅokʼ reakʼ ṭhạ̃ireye gureya.

³⁰ Ona tayom naeke do kạṭupʼte uniyakʼ thoṛa mãyãm hataokate jeredokʼ samaṅokʼakʼ pinḍ reakʼ dereńkoreye ojokʼakʼa; ar sarecʼakʼ mãyãm do pinḍ aṛereye dulkakʼa.

³¹ Ar sulukren samaṅ akade janwarakʼ itil oḍok lekage nui samaṅ akade janwarakʼ itile oḍoktaea ar pinḍ cetanreye jeretʼ cabaya. Ar noa reakʼ jut so Probhu Isor doe kusiyakʼa. Nonkate naeke do uni hoṛakʼe puruchuna ar uniyakʼ kại do ikạkʼtaea.

³² “Kại ńutumte dãṛẽ lạgitʼ jãhãege bhiḍi hopone ạguiye, enḍekhan uni do niphuṭ utạricʼ bhiḍi ạguiye hoyokʼtaea.

³³ Ar uni do bhiḍiyakʼ bohokʼre acʼakʼ tiye dohoytaea ar jeredokʼ samaṅokʼren janwar dãṛẽko reakʼ ṭhạ̃ire idikateye gureya.

³⁴ Ona tayom naeke do kạṭupʼte uni samaṅ akade bhiḍiyakʼ mãyãm hataokate jeredokʼ samaṅokʼ pinḍ reakʼ dereńkoreye ojokʼakʼa; ar sarecʼakʼ mãyãm do pinḍ aṛereye dulkakʼa.

³⁵ Ar sulukren samaṅokʼicʼ bhiḍiyakʼ itil oḍok lekage uni do uniyakʼ hõ sanam itilkoe oḍoka. Ar ona tayom Probhu Isor ńutumte seṅgelteakʼ samaṅokʼakʼ mente uni do ona itilko pinḍ cetanreye jereda. Nonkate naeke do uni hoṛakʼe puruchuna ar onate uniyakʼ kại do ikạkʼtaea.