Levitikus 3 - সান্তালী বাইবেল

Helmel reakʼ samaṅokʼakʼko

¹ “Jãhãege Probhu Isor ńutumte jãhãn sulukren samaṅokʼakʼ samaṅe menetʼ khan ar uniren samaṅicʼ do pal ḍaṅgrako khone ạgu ocokʼ khan, uni do eṅga se ạnḍiạ jãhãnicʼkangeye jemon niphuṭ utạricʼe hoyokʼ.

² Samaṅetʼkạnicʼ do ạgu akade janwarakʼ bohokʼre acʼakʼ tiye dohoytaea ar ńapamokʼ tạmbu reakʼ duạr thene gureya. Ona tayom Aronren hoponko, metakʼme naeke do ona mãyãm hataokate pinḍ beṛhaeteko irciyakʼa.

³ Probhu Isor ńutumte seṅgelre samaṅokʼakʼ lạgitʼ samaṅetʼkạnicʼ do sulukren samaṅokʼicʼ janwar khon thoṛa hĩs naekeye emakoa. Noako hĩs do hoyokʼ kana janwarakʼ lacʼ bhitri reakʼ judạ judạ hĩsko reakʼ itil ar onako sãote ganthar reakʼ itilko,

⁴ banar kunḍi ar ona sãote ḍanḍa ṭhenakʼ itilko ar kunḍi sãote oḍok akatʼ inboro cetan reakʼ gantharko.

⁵ Onako do pinḍ reakʼ jolokʼkan sahan cetanre one okare jeredokʼ samaṅokʼakʼ jolokʼkan ona cetanre Aronren hoponko do onako jeretʼ cabaya. Noa do seṅgelteakʼ mitʼṭen samaṅokʼakʼ kana, one ona reakʼ jut so Probhu Isor doe kusiyakʼkan.

⁶ “Probhu Isor ńutumte sulukren samaṅokʼakʼ lạgitʼ jãhãe ḍaṅgra se bheḍae samaṅe enḍekhan uni do ạnḍiạ se eṅga jãhãnicʼkangeye uni do niphuṭ utạricʼ hoyokʼ jạruṛa.

⁷ Samaṅokʼ lạgitʼ jãhãe mitʼṭen bheḍa hopone ạguiye enḍekhan uni do Probhu Isor samaṅre ạguiye hoyokʼtaea.

⁸ Uni do bheḍa hoponakʼ bohokʼ cetanre acʼakʼ tiye dohoytaea ar ńapamokʼ tạmbu samaṅreye gureya. Ona tayom Aronren hoponko do uni reakʼ mãyãm hataokate pinḍ beṛhaeteko irciyakʼa.

⁹ Probhu Isor ńutumte seṅgelre samaṅokʼ reakʼ porob lạgitʼ samaṅedekạnicʼ do noa sulukren samaṅokʼ janwarakʼ thoṛa hĩsko oḍokkate naeke emae hoyokʼtaea. Noako hĩs do hoyokʼkana uni janwarakʼ itil, itilte perecʼ canḍbol, lacʼ bhitri reakʼ eṭakʼ eṭakʼ hĩs reakʼ itil ar onako sãote jalatʼmitʼ akan itil,

¹⁰ banar kunḍi ar ona sãote jalatʼmitʼ akan ḍanḍa ṭhenakʼ itil ar kunḍi sãote oḍok hecʼakan inboro reakʼ ganthar.

¹¹ Naeke do noako samaṅokʼakʼ reakʼ jomakʼ mente pinḍreye jereda. Noa do Probhu Isor ńutumte seṅgelteakʼ jeredokʼ samaṅokʼakʼ kana.

¹² “Ar samaṅokʼicʼ do merome samaṅe khan enḍekhan uni do Probhu Isor samaṅre ạguiye hoyokʼtaea.

¹³ Uni do meromakʼ bohokʼ cetanre acʼakʼ tiye dohoytaea ar ńapamokʼ tạmbu samaṅreye gureya. Ar noa tayom Aronren hoponko do uniyakʼ mãyãm hataokate pinḍ beṛhateko irciyakʼa.

¹⁴ Ar samaṅicʼ do samaṅ akade janwar khon thoṛa hĩs oḍokkate Probhu Isor ńutumte seṅgelre samaṅokʼakʼ lạgitʼ naeke emae hoyokʼtaea. Noako hĩs do hoyokʼkana uni janwarakʼ judạ judạ hĩs reakʼ itilko ar onako sãote jalatʼmitʼ akan itilko,

¹⁵ banar kunḍi ar ona sãote jalatʼmitʼ akan ḍanḍa reakʼ itilko ar kunḍi sãote oḍok hecʼ akan inboro reakʼ gantharko.

¹⁶ Naeke do noako samaṅokʼakʼ jomakʼ lekate pinḍ cetanreye jereda. Noa do seṅgelteakʼ mitʼṭen samaṅokʼakʼ kana, one ona reakʼ jut so Probhu Isor doe kusiyakʼkan. Ar samaṅ akade janwarakʼ itil do jotoge Probhu Isorakʼ kana.

¹⁷ Jãhãregepe girobasokʼ ape do itil ar mãyãm do alope joma. Ar noage piṛhike piṛhi ape lạgitʼ niạm do tahẽyena. ”