Levitikus 26 - সান্তালী বাইবেল

Batao reakʼ bhorko

¹ “Jãhãn debotakoakʼ muṭhạnge alope benao joṅa. Ape lạgitʼ kaṭren jãhãn muṭhạn se jãhãn pujạwakʼ dhirire jãhãn muṭhạn alope benaojoṅa. Ar pujạwako lạgitʼ dhiriren benao jãhãn muṭhạn hõ disạmre alope dohokoa. Iń kangeạń Probhu aperen Isor do.

² Ape do ińakʼ jirạukʼ din ar bochorko manao hoyokʼtapea; ar ińakʼ sonot ṭhạ̃ipe manota. Iń kangeạń Probhu Isor do.

^3-4 “Ińakʼ sanam niạmkope manao ar ińakʼ hukum lekape senokʼ enḍekhan iń do okte nạpitre dakʼ iń kolapea. Onate apeakʼ jumire purạ phosolpe ńama ar dareko hõ jo bahakʼ tapea.

⁵ Unre apeakʼ guhum enokʼ reakʼ din do darkha jo god hạbicʼ hoyokʼtapea ar darkha jo god do erokʼ din hạbicʼ hoyokʼtapea. Unre ape do lacʼ bikʼpe joma ar disạmre khạtirjomape tahena.

⁶ “Unre iń do disạmre sulukiń emokʼa. Ar suluktepe jạpitʼjoṅa; okoe hõ bako botor ocopea. Iń do disạm khon kaṭaha janwarkoń laga ńirkoa. Cele palṭonge apeakʼ disạmre do bako cahṭao daṛeakʼa.

⁷ Aperen bạirikope laga ńirkoa ar onko do ape samaṅreko gujukʼa.

⁸ Ape do eken mõṛẽ hoṛte mitʼsae bạiriko ar mitʼsae hoṛte gel hajar bạiripe laga ńirkoa, ar bạiriko do ape samaṅreko gujukʼa.

⁹ Unre iń do daya mẽtʼteń ńelpea ar apeń bạḍ ocopea ariń saṅge ocopea, ar ape sãote ińakʼ bondobosiń bandhaoa.

¹⁰ Nãwã anaj dohoy lạgitʼ murạikoko khạliy jokhecʼ hõ laha bochor reakʼ anaj khonge apeakʼ jomakʼ do hoyokʼa.

¹¹ Iń do bạń dea giḍikapea. Ape talaregeń girobasokʼa.

¹² Ape sãotegeń dãṛãna ar aperen Isoriń hoyokʼa ar ape do ińren hoṛpe hoyokʼa.

¹³ Ińge Probhu aperen Isor do. Misor disạm khon ińgeń oḍok ạgu akatʼpea jemon Misri hoṛkoren golamko ar alope tahen. Apeakʼ taren reakʼ ãṛãṛ rạputʼkate ińge apeakʼ bohokʼ iń sojhetapea.

Bebatao reakʼ sạjại

¹⁴ “Menkhan ińakʼ katha bape ańjom ar noako hukum reakʼ bape manao,

¹⁵ ar ińakʼ niạmko bape hetawakʼ ar ińakʼ ạn-ạrikope nindạu ar ińakʼ hukumko bape senakʼte ińakʼ bondobospe rạpud,

¹⁶ enḍekhan ape cetanre noakoń ạguya, iń do ackage apeakʼ hoṛmore khoy rogko, mẽtʼ bolokʼ rog ar jiwi loraokʼ rogkoń ạguiya. Ar ape do noako rog iạte bape ńeńela ar hoṛmo reakʼ daṛeko ńur cabakʼtapea. Unre itạpe erlere hõ jãhãn lab do baṅ hoyokʼtapea, ente apeakʼ phosol do bạirikoko joma.

¹⁷ Iń do mẽtʼ ar mẽtʼteń ńelpea ar bạiriko ṭhenpe bhagao ocokʼa. Ar hirkhạwape hoṛge apeko ḍanṭaopea ar celege bako khudạupere hõ ape dope ńir baṛaea.

¹⁸ “Ar noa tayom hõ ińakʼ katha bape ańjom enḍekhan apeakʼ kại reakʼ eae doboṛiń sạjạipea.

¹⁹ Iń do apeakʼ daṛe reakʼ bạḍạigeń rạputʼ giḍitapea. Ar apeakʼ bohokʼ cetan reakʼ rimil do mẽṛhẽtʼ leka ar jaṅga latar reakʼ ot do pitạl lekań keṭecʼ ocoya.

²⁰ Unre ape do ạuṛiyakʼpe khaṭao gujukʼa. Unre apeakʼ jumikore jãhãn phosolge baṅ hoyokʼa, ar darekore hõ baṅ jokʼa.

²¹ “Apeakʼ monre bạiri lekape hudisiń ar ińakʼ katha bape luturakʼ enḍekhan apeakʼ kại reakʼ sạjại do eae doboṛiń ḍhertapea.

²² Ape talare jojom kaṭaha janwarkoń kolkoa. Onko do aperen gidrạkoko jomkoa, ar aperen mĩhũ-meromkoko maraokoa ar aperen hoṛko komaokʼtapea. Onate apeakʼ horko do khạlige tahena.

²³ “Niạko ghoṭna tayom hõ ińakʼ ḍanṭao bape manao ar iń birudrepe taṛam,

²⁴ enḍekhan iń apnarge bạiriko secʼte apeakʼ kại reakʼ eae doboṛ sạjạyiń emapea.

²⁵ Ińakʼ bondobospe rạputʼ akatʼte ape cetanre lạṛhạikoń ạguiya. Unre bạiriko ńelte nagrahatepe bolokʼre iń do mahamạriń kola, ar onate bạirikoakʼ tirepe paṛaokʼa.

²⁶ Iń do apere akaliń kola. Unre gel goṭen maejiu do mitʼṭecʼ culhạre piṭhạko rapakʼapea, ar jojom jokhecʼ piṭhạ do soṅkatepe emokʼa. Ar lacʼ bikʼ do bape jom ńama.

²⁷ “Niạko tayom hõ ińakʼ kathako bape luturakʼ ar iń birudpe senokʼ,

²⁸ enḍekhan raṅgaote ape upạrteń colona ar apeakʼ kại reakʼ eae doboṛiń sạjạipea.

²⁹ Unre reṅgecʼte aperen gidrạkoakʼ jelpe joma.

³⁰ Iń do apeakʼ pujạ reakʼ than boṭkocʼkoń marao giḍikatapea, dhup reakʼ pinḍkoń rạputʼ giḍikakʼa ar aperen bin jiwiyan debotako cetanre apeakʼ mạ̃ṛĩkoń ṭhikikakʼa, ar edre mẽtʼteń ńelpea.

³¹ Iń do apeakʼ atoko, nagrahako ar dewa-sewa oṛakʼkoń marao giḍikatapea. Ar apeakʼ samaṅokʼakʼko bạń ataṅtapea.

³² Apeakʼ disạm do nonkań jarkhara ona ńelte aperen bạiriko hõ botorteko keklesedokʼa.

³³ Ar eṭakʼ jạtrenko talareń chirchạturpea ar tarwaṛeteń khudạu baṛapea. Apeakʼ disạm reakʼ sanam jumiko, atoko ar nagrahako do jarkharokʼtapea.

³⁴ “Tinre aperen bạirikoakʼ disạmrepe tahena unre jarkhar akan apeakʼ disạm do jirạukʼ bochor reakʼ suke joma. Hẽ unre apeakʼ disạm do jirạue ńama ar acʼakʼ jirạukʼ bochor reakʼ suke joma.

³⁵ Apnarakʼ disạmrepe girobasokʼ jokhecʼ apeakʼ jumiko jirạukʼ reakʼ bochor bae ńamleda menkhan tinre ujạṛ akan tahena unre jumiko do jirạue ńama.

³⁶ Aperen okoe do bạirikoakʼ disạmre jiwetʼko tahen onkoakʼ ontorre nonkan botor iń caṛhao ocoya, onko do hoete sakam reakʼ saḍeko ańjomlere hõ botorteko ńir pharakokʼa. Lạṛhại botorte cetʼleka manwako ńir pharakokʼ onkage onko hõko ńirjoṅa. Ar bako lagalekore hõ onko doko ńir pharakokʼa arko tohotʼ bhindạṛokʼa.

³⁷ Bako laga ocokʼre hõ lạṛhại khon bańcaokʼ lạgitʼ ńir pharakokʼ hoṛ leka am iń lad ludko bhindạṛokʼa. Ar ape do bạiriko samaṅre bape teṅgo daṛeakʼa.

³⁸ Eṭakʼ eṭakʼ jạtrenko talare chirchạturkatepe gujukʼa, ar apeakʼ disạm do bạirikoko utʼgotʼkakʼa.

³⁹ Ona tayom aperen okoe onḍeko tahen onko do akoren ar hapṛamkoakʼ dos iạteko caba idikʼa.

^40-41 “Ińre bepạtiạu ar iń birudre teṅgokʼ iạte iń hõ onko upạrteń teṅgona ar bạirikoakʼ disạmteń idikoa. Menkhan onḍe ako ar akoren hapṛamkoakʼ dosko aṅgocte ontorko nidhạntakoa ar dos akatʼ iạte sạjại reakʼko ataṅ,

⁴² enḍekhan iń do Isahak, Jakob ar Abraham sãote ińakʼ bondobos reakʼ katha ar onkoakʼ disạm reakʼ kathań disạya.

⁴³ Ar jarkhar iạte akoakʼ disạmko bạgiyakʼ tayom onkoakʼ disạm do jirạukʼ bochor reakʼ suke joma. Onko do ińakʼ bicạrko nihạ̃t akatʼte ar ińakʼ ạn-ạriko hirkhạ akatʼte sạjạiko ńamgea.

⁴⁴ Enhõ bạirikoakʼ disạmre tahen jokhecʼ bạń dea giḍi utạrkoa se bạń hirkhạ sạṅgiń utạrkoa jemon aloko marao utạrokʼ ar onko sãote ińakʼ bondobos hõ alo cabakʼ. Iń kangeạń onkoren Probhu Isor do.

⁴⁵ Onko lạgitʼge onkoren hapṛamko sãote ińakʼ bondobos reakʼ kathań disạya. Ente onkoren hapṛamkoren Isoriń hoyokʼ iạte eṭakʼ jạtrenko talate Misor disạm khoniń oḍok ạguakatʼkoa. Ar iń kangeạń Probhu Isor do.”

⁴⁶ Noa do onako ạn-ạri ar hukum ar niạmko kana okaṭakʼ do sinại burure Mose hotete Probhu Isor do acʼakʼ bondobos menkate Israelko lạgitʼe bandhaoletʼ tahẽkan.