Levitikus 25 - সান্তালী বাইবেল

Jirạukʼ bochor reakʼ niạmko

^1-2 Probhu Isor do Sinại burure Mose galmaraoadeteye metadea, “Israel hoponkom metakoa, okaṭakʼ disạmiń emako lạgidokʼkan ona disạmteko bololen khan onḍenakʼ jumiko hõ jemon Probhu Isor ńutumte jirạue ńam.

³ Ape do turui bochor jumire itạpe era ar darkha nạ̃ṛĩpe kamana ar phosolpe ira.

⁴ Menkhan eae bochorre do jumikope jirạu ocowakʼa. Noa jirạukʼ do Probhu Isor ńutumtege hoyokʼa. Unre jumire jãhãn itạ alope era ar darkha nạ̃ṛĩ hõ alope kamana.

⁵ Ar jumire acʼte okako janamokʼ ona do alope ira ar alope samṭaoa se bin kamanakʼ darkha nạ̃ṛĩ reakʼ jo hõ alope goda. Jumi do mitʼ bochorpe jirạu ocowakʼa.

⁶ Jirạukʼ bochorre jumire acʼte oka janamokʼ onage apeko lạgitʼ, guti kạ̃ṛmĩko lạgitʼ, ape talareko girobasokʼkan eṭakʼ jạtren kạmiyạko lạgitʼ, eṭakʼ hoṛko lạgitʼ,

⁷ ạsul janwarko lạgitʼ ar disạm talaren bir janwarko lạgitʼ jomakʼ hoyokʼa. Unre jumire oka hoyokʼ onagepe joma.

Em ruạṛkakʼ bochor

⁸ “Eae jirạukʼ bochorre, metakʼme eae jirạukʼ bochorpe lekhaya. Ar ona eae jirạukʼ bochor paromlen khan pongel are bochor hoyokʼa.

⁹ Ar ona dosar bochor reakʼ eae cando reakʼ gelakʼ dinre, metakʼme kại reakʼ puruchun dinre apeakʼ disạmre sanam jaegare sakwape oroṅa.

¹⁰ Noa mõṛẽ gelakʼ bochor do Probhu Isor ńutumtepe begar dohoya ar disạmren sanam hoṛko ṭhen chaḍaokʼ reakʼpe lại sodora. Ape lạgitʼ niạ do ‘hulạsokʼ bochor hoyokʼa.’ Niạ bochorre ape mimitʼko do apan ạpin bõsrenko ar apan ạpin gharońjrenko reakʼ sompottirepe ruạṛ calakʼa.

¹¹ Mimitʼ mõṛẽgelakʼ bochor reakʼ mucạtʼ bochor do ape lạgitʼ hulạsokʼ bochor hoyokʼa. Ona bochorre ape do itạ alope era ar acʼte janamokʼ jumi reakʼ hõ alope ira se bin kamanakʼ darkha jõ hõ alope goda.

¹² Noa do hulạsokʼ bochor hoyokʼtapea ar ona do sonot mentepe manaoa. Ar jumi khon oka ńamokʼ onagepe joma.

¹³ “Hulạsokʼ bochorre ape mimitʼko apan ạpin gharońj reakʼ sompottire ruạṛ senokʼ hoyokʼtapea.

¹⁴ Ape talare jumi kiriń-ạkhriń jokhecʼ okoe cetanre hõ alope behoka.

¹⁵ Okoe jumiye kiriń uni do hulạsokʼ bochor tayom tinạkʼ bochor hoyakan ona hisạbkate ona jumiye kirińa ar okoe ona jumiye ạkhriń uni hõ hisạbkateye ńela darakan hulạsokʼ bochor ạuri hijukʼte jumire tinạkʼ dhao phosol rakabokʼa mente.

¹⁶ Ar ḍher bochorge phosol rakabokʼ khan jumi reakʼ dam do bạ̃ṛti ńokʼ sab hoyokʼa menkhan kom dhao phosol rakabokʼ leka khan dam komao hoyokʼa, ente jumi khon tinạkʼ dhao phosol rakabokʼ ona reakʼ lekha lekatege ạkhrińokʼkana.

¹⁷ Okoe cetanre hõ alope behoka. Ar sanamkoge aperen Isor botoraepe, ente iń Probhuge aperen Isor do.

¹⁸ “Ińakʼ niạm manaope ar ińakʼ ạn-ạriko senakʼpe; onate disạmre khạtirjomape girobasokʼa.

¹⁹ Unre ape do jumi khon purạ phosolpe ńama ar lacʼ bikʼpe jomte khạtirjomape tahena.

²⁰ Arpe menkhan, ‘eae bochor bale er ar phosol hõ bale ir enḍekhan cetʼle joma?’

²¹ Enḍekhan turuiyakʼ bochorre iń do nonkań bhorapea jemon pe bochor hạbicʼ phosol calakʼtape.

²² Onate irạlakʼ bochor itạ erokʼ jokhecʼ hõ mareakʼ phosol khonpe joma ar areyakʼ bochor phosol ạuripe rakab hạbicʼ onepe doho jarwa akatʼ phosol khonakʼpe joma.

²³ “Jaejug lạgitʼ okoeyakʼ jumi hõ baṅ ạkhrińokʼa, ente joto jumi do ińakʼ kana ar iń samaṅre ape do porjạtrenko lekape girobasokʼa.

²⁴ Ape mimitʼkoakʼ kiriń akatʼ jumi jemon arhõpe chaḍao ruạṛ daṛeakʼ ona reakʼ bebostape dohokakʼa.

²⁵ Aperen jãhãe Israel boeha reṅgecʼ iạte acʼakʼ gharońj reakʼ jumi khon thoṛa hĩse ạkhriń enḍekhan uniren joto khon sorren peṛa hecʼkate ona jumiye chaḍaokataema.

²⁶ Ar uniren chaḍao lạgitʼ celege bako tahentae enḍekhan apnarge kulạu juṛạukate onae chaḍaotaea,

²⁷ tobe oneye ạkhrińletʼ ona tayom bochor khone lekhaea ar sarecʼ bochorko reakʼ ṭakate oka jumiye kirińletʼ ona ruạṛkakʼ hoyokʼtaea. Ar inạ tayom do acʼakʼ jumireye sen ruạṛ daṛeakʼa.

²⁸ Menkhan ṭaka ruạṛkakʼ leka daṛe baṅ tahentae enḍekhan oka jumiye ạkhriń akatʼ ona do hulạsokʼ bochor hạbicʼ okoeye kiriń akatʼ uniyakʼ tirege tahena. Ar hulạsokʼ bochor ona jumi do ruạṛkatae hoyokʼa ar unre uni do apnarakʼ jumireye pheḍ daṛeakʼa.

²⁹ “Pạcrite esetʼ jãhãn nagraha reakʼ jãhãn oṛakʼ jãhãeye ạkhriń enḍekhan ạkhriń tayom mitʼ bochor hạbicʼ chaḍao ruạṛ reakʼ ạidạri tahentaea. Ar inạko dinre uni doe chaḍao daṛeakʼa.

³⁰ Menkhan mitʼ bochor bhitrire ona bae chaḍao daṛeakʼ enḍekhan okoe onae kiriń akatʼ uni ar uniren bõskoakʼ hoyokʼa. Ar hulạsokʼ bochorre hõ ona do ruạṛkakʼ baṅ hoyokʼa.

³¹ Menkhan okako ato pạcrite esetʼ bạnukʼ onḍenakʼ oṛakʼko do disạm reakʼ ot baṛge lekage bujhạu hoyokʼa. Ona dope chaḍao daṛeakʼa ar hulạsokʼ bochorre ruạṛkakʼ hoyokʼa.

³² Sompotti lekate Liwiko do ato, nagraha ar onako reakʼ oṛakʼ-duạrko do jao okteko chaḍao daṛeakʼa.

³³ Liwikoko ạkhriń akatʼ sompotti, metakʼme Liwikoakʼ ato ar nagrahare onkoakʼ ạkhriń akatʼ oṛakʼ duạr jãhãe Liwi hoṛ chaḍao joṅe men khan hulạsokʼ bochorre uni do onae chaḍao daṛeakʼa, ente Israelko modre Liwikoakʼ ato ar nagraha reakʼ oṛakʼ-duạr do onkoakʼ sompotti kana.

³⁴ Menkhan onkoakʼ ato ar nagraha reakʼ janwar ạtiń ṭạnḍiko do bako ạkhriń daṛeakʼa; ona do onkoakʼ jaejug reakʼ sompotti kana.

³⁵ “Aperen jãhãe Israel boeha reṅgecʼ iạte acʼakʼ jom ńũ reakʼ bae bebosta daṛeakʼ, enḍekhan uni do ape talarege jemone girobas daṛeakʼ ona lạgitʼ porjạtrenko cetʼlekape goṛowako onkage uni hõpe goṛowaea.

³⁶ Uni ṭhen khon jãhãn sud alope hataoa, bickom uni hoṛ jemon ape talareye tahẽdaṛeakʼ ona lạgitʼ aperen Isor botoraepe.

³⁷ Ṭaka pańcate emkate sud hatao do baṅ ganokʼa ar uni ṭhen jãhãn jomakʼ jinis ạkhriń lekhan jãhãn lab hatao ho baṅ ganokʼa.

³⁸ Ińge Probhu aperen Isor do. Ińge Kanan disạm emape lạgitʼ ar aperen Isor hoyokʼ lạgitʼ Misor disạm khoniń oḍok ạguakatʼpea.

³⁹ “Aperen jãhãe Israel boeha reṅgecʼ khạtirte apnartetʼe ạkhrińokʼ enḍekhan uni do golam lekate alope khaṭaoea.

⁴⁰ Eṭakʼ jạtren kạmiyạko sãote metakʼme, eṭakʼ jạtren hoṛko sãote cetʼlekape beohar uni sãote hõ onkage beoharpe. Onate uni do hulạsokʼ bochor hạbicʼe kạmiya.

⁴¹ Ar ona tayom do uni ar uniren hoponko aṛakʼako hoyokʼa. Uni do unre acʼ bõsren ar hapṛamkoakʼ jumiteye ruạṛ senokʼa.

⁴² Israel do ińren golam kanako; ińge Misor disạm khoniń oḍok ạgu akatʼkoa; onate onko do ar tishõ golam lekate bako ạkhrińokʼa.

⁴³ Okoe cetanre hõ alope jor juluma; ape do aperen Isor botoraepe.

⁴⁴ “Ape aḍepasere okoe jạtrenkoko tahenkan onko mod khon ape do guti kạ̃ṛmĩkope kiriń daṛeakoa.

⁴⁵ Ar ape talareko girobasokʼkan eṭakʼ jạtrenko khon ar ape bõsren okoe do ape disạmreko janam akan onko khon hõ ape lạgitʼ guti kạ̃ṛmĩpe hatao daṛeakoa.

⁴⁶ Noko guti ar kạ̃ṛmĩko do sompotti reakʼ hĩs lekate aperen gidrạkope em daṛeakoa. Ar golam lekate jaejugpe doho daṛeakoa, menkhan aperen Israelkore do bape jor julum daṛeakʼa.

⁴⁷ “Ape modre jãhãe porjạtren hoṛ kisạ̃ṛe hoylen khan ar aperen jãhãege reṅgecʼ halotre paṛaokate uni ṭhen se acʼren bõsko ṭhene ạkhrińlen khan,

⁴⁸ enḍekhan uni do apnartetʼ chaḍaokʼ reakʼ ạidạri tahentaea. Ar acʼren nijạr boeha do uniye chaḍao daṛeaea.

⁴⁹ Ona chaḍa hoponba se maraṅba se kaka goṅgo boeha se bõsren nonkan jãhãege uni sãote uniyakʼ mãyãm reakʼ ṭan menakʼtae unihõ uniye chaḍao daṛeaea. Ar acʼteye kulạu juṛạu daṛeakʼ khan uni do apnarte hõe chaḍao daṛeakʼa.

⁵⁰ Oka bochor uniye ạkhrińokʼ ona bochor khon ehopʼkate hulạsokʼ bochor hạbicʼ tinạkʼ bochor hoyokʼ ona do uniren kisạ̃ṛe hisạba are ńela. Ar inạko bochorre mitʼṭen kạmiyạicʼ oka paona hoyokʼtae ona lekate ona chaḍaokʼ reakʼ dam hõ ṭhik hoyokʼa.

⁵¹ Ar ruạṛ hijukʼ bochor ḍherge bilomge khan enḍekhan oka damte acʼe ạkhriń akan ona dam reakʼ mitʼ hĩs apnar chaḍaokʼ lạgitʼ emokʼ hoyokʼtaea.

⁵² Hulạsokʼ bochor reakʼ jodi thoṛa bochor sarecʼ tahen khan ona reakʼ hisạb leka ṭaka emkate acʼ apnarte chaḍaokʼ hoyokʼtaea.

⁵³ Bochor hisạbte dohoakade kạmiyạ hoṛ leka uni do ńele hoyokʼa ar uniren kisạ̃ṛ uni cetanreye jor julumeda se baṅ ona hõ ńel hoyokʼtapea.

⁵⁴ Noako reakʼ jãhãn upạite uni bae chaḍao ocoakan khan enḍekhan uni ar uniren hoponko do hulạsokʼ bochorre aṛakʼako hoyokʼa.

⁵⁵ Israelko do ińren golam kanako. Ińge Misor disạm khoniń oḍokʼ ạgu akatʼkoa; onko do ińrenge golam akanko tahena. Ar ińkangeạń Probhu aperen Isor do.