Levitikus 24 - সান্তালী বাইবেল

Diuheko ńeljut reaṅ

¹ Probhu Isor do Moseye galmaraoadea,

² “Am do Israelkom hukumakoa jemon jạitun reakʼ khạṭi sunum am ṭhenko ạguiyte diuheko jaoge jemon jol akaege tahen.

³ Ńapamokʼ tạmbure goha sinduk reakʼ orwal bahrere Aron do ạyupʼ khon setakʼ hạbicʼ Probhu Isor samaṅre diuheko jaogeye sajao dohoya. Ar noa niạm do piṛhike piṛhi tahena.

⁴ Uni do Probhu Isor samaṅre dohoakan khạṭi sona reakʼ diuhe dohowakʼ reakʼ diuheko jaogeye ńeljuta.

Samaṅakʼ piṭhạ

⁵ “Am do mĩhĩ holoṅ hataokate gelbar goṭecʼ piṭhạm rapaga. Ar mimitʼ goṭecʼ piṭhạ lạgitʼ do pe keji turui sae gram holoṅem hataoa.

⁶ Ar Probhu Isor samaṅre dohoakan khạṭi sona reakʼ ṭebilre ona piṭhạ do turui goṭecʼkate bar sạrtem sajao dohokakʼa.

⁷ Mimitʼ goṭecʼ piṭhạ sạrre khạṭi kunduru hõm dohoya. Ar piṭhạ bodolte noage Probhu Isor ńutumte seṅgelteakʼ samaṅokʼakʼem samaṅa.

⁸ Jirạukʼ mãhã pichạ noa piṭhạ do Israelko secʼ khon Probhu Isor samaṅre sajaokatem dohokakʼa. Onkoakʼ niạ piṭhạ dohokakʼ niạm do piṛhike piṛhi tahena.

⁹ Noa piṭhạ do Aron ar uniren hoponko sonot tạmbu reakʼ ṭhạ̃ire jojom hoyokʼtakoa, ente Probhu Isor ńutumte seṅgelteakʼ samaṅokʼakʼ jinisko modre noa do mitʼṭecʼ sonot utạrakʼ jinis kana. Ar noa do onkoakʼ jao okte reakʼ bakhra kana.”

Hok ar ṭhikte sạjại reakʼ nạmuna

¹⁰ Israelko modren mitʼ hoṛren eṅgattetʼ do Israel ar appattetʼ do Misri hoṛe tahekana. Ar ḍera talare uni hoṛ do mitʼṭen Israel hoṛ sãote lạṛhạiye ehopʼena.

^11-12 Unre uni Israel maejiuren hopon do Probhu Isorakʼ ńutume nindạukeda are sarapada. Onate hoṛko do Mose ṭhen uniko idikedea. Uni koṛaren eṅgattetʼakʼ ńutum do Salomot tahẽkana. Uni do Dan bõsren Dibriren hoponerae tahẽkana. Ar Probhu Isor acʼakʼ monsubạ onkore ạuriye pusṭạuako hạbicʼ uni do hajotreko dohokadea.

¹³ Noate Probhu Isor do Moseye galmaraoadea,

¹⁴ “Sarapicʼ uni hoṛ do ḍera bahrete idiyepe. Ar okoe ona sarap emokʼko ańjomakade onko joto hoṛ do uniyakʼ bohokʼ cetanre tiko dohoytakoma, ar ona tayom Israelko do dhirite uniko tiń gojema.

¹⁵ Ar Israelkom baḍae ocokoa jãhãege acʼren Isore sarapae enḍekhan uni do noa lạgitʼe dạyi ocokʼa.

¹⁶ Bạṛicʼ monsubạte okoe Probhu Isorakʼ ńutume ńum uni doe gocʼ ocokʼa. Ar Israelko do dhirite uniko tiń gojea. Israelkoge cetʼ ar onko talareko girobasokʼkan eṭakʼ jạtren hoṛkoge baṅ cetʼ, jãhãege bạṛicʼ monsubạte Probhu Isorakʼ ńutumko ńum uni do gojetege hoyokʼa.

¹⁷ “Ar jãhãege jãhãeye khũne enḍekhan uni hõ goje hoyokʼa.

¹⁸ Jãhãege eṭakʼ hoṛren ḍaṅgrae goje enḍekhan uni do mitʼṭen jiwi bodolte ar mitʼṭen jiwi emkate khuti purun emokʼ hoyokʼtaea.

¹⁹ Jãhãege jãhãeye hạne ar uniyakʼ hoṛmo reakʼ khuti hoyokʼtae enḍekhan uni okae ceka akatʼ unire hõ onkae hoyokʼa.

²⁰ Jaṅ rạputʼ bodolte jaṅ, mẽtʼ bodolte mẽtʼ, ḍaṭa bodolte ḍaṭa. Uni eṭakʼ hoṛakʼ okae khuti akatʼtae acʼakʼ hõ onage khutitae hoyokʼa.

²¹ Janware gocʼle khan uni do khuti purun emokʼ hoyokʼtaea, menkhan manwae gocʼle khan uni hõe gocʼ ocokʼa.

²² Israelko ar onko talareko girobasokʼ kan eṭakʼ jạtrenko, jotoko cetanre inạ mitʼ niạmge tahẽyena. Ar ińkangeạń aperen Probhu Isor do.”

²³ Mose do Israelko noa reakʼ sanam kathakoe baḍae ocoketʼkoa. Ar okoe hoṛ sarape emlen uni do ḍera bahrete idikate dhiriteko tiń gocʼkedea. Ar Probhu Isor do Mose okalekae hukumade tahẽkan onkage Israelko doko kạmikeda.