Levitikus 23 - সান্তালী বাইবেল

Israelkoakʼ judạ judạ porobko

^1-2 Inạ tayom Probhu Isor do Mose Israelko galmaraoakoe metadea, “Iń Probhu Isorge ape lạgitʼ porobkoń goṭa dohoakada; ar onako do mitʼṭecʼ sonot jarwakʼ mentepe lại sodora.

³ Hapta reakʼ turui dinpe kạmiya menkhan eaeyakʼ dinre dope jirạukʼa, metakʼme ona do sonot jarwakʼ din kana. Enhilokʼ do cetʼge alope kạmiya. Jãhãregepe girobasokʼ ona din do Probhu Isor ńutumte mitʼṭecʼ jirạukʼ dinge hoyokʼa.”

⁴ Probhu Isor okako porobe niṭ dohoakatʼ, metakʼme okako sonot jarwakʼkan ona reakʼ niṭakʼ dinpe lại sodora:

Bańcaokʼ porob ar bin khạmiyanakʼ piṭhạ porob

⁵ Bochor reakʼ pạhil cando reakʼ gelponakʼ tạrik reakʼ ạyupʼ jokhecʼ Probhu Isor ńutumte bańcao porob do ehobokʼa.

⁶ Ona cando reakʼ gel mõṛẽ tạrik do Probhu Isor ńutumte bin khạmiyanakʼ piṭhạ porob ehobokʼa. Ar ape do eae din hạbicʼ bin khạmiyanakʼ piṭhạ jojom hoyokʼtapea.

⁷ Noa eae din reakʼ pạhil hilokʼ do sonot jarwakʼpe hoeocoya ar enhilokʼ do jãhãnakʼ cetʼge alope kạmiya.

⁸ Inạ eae din reakʼ dinạm hilokʼge Probhu Isor ńutumte seṅgelre samaṅokʼakʼpe samaṅa. Ar eae mãhã hilokʼ do sonot jarwakʼpe hoeocoya ar enhilokʼ do jãhãnakʼ cetʼge alope kạmiya.

Pạhil rakapʼakʼ phosol porob

^9-10 Probhu Isor do Mose Israelko arhõ galmaraoakoe metadea, “Iń okaṭakʼ disạmiń emape lạgitʼdokʼ kan onḍe senkate tinạkʼ dhao phosolpe rakab unạkʼ dhao pạhil getʼakʼ phosol reakʼ mitʼṭecʼ ạṭi do naeke ṭhenpe idiya.

¹¹ Ar naeke do ona ạṭi Probhu Isor samaṅreye dolaoa. Ar onate Probhu Isor do ape cetanreye kusikʼa. Naeke do jirạukʼ mãhã dosar hilokʼ hõ ona do dolao hoyokʼtaea.

¹² Naeke oka hilokʼ ona ạṭiye dolaoa enhilokʼge Probhu Isor ńutumte jeredokʼ samaṅokʼakʼ lạgitʼ mitʼ bochor umerren mitʼṭen niphuṭ utạricʼ bheḍa hopon samaṅe hoyokʼtaea.

¹³ Ona sãote jomakʼ samaṅokʼakʼ lekate sunum mesalakatʼ pe keji turui sae gram holoṅ hõ samaṅ hoyokʼtaea. Noa do Probhu Isor ńutumte seṅgelteakʼ jomakʼ samaṅokʼakʼ kana one ona reakʼ jut so Probhu Isore kusiyakʼkan. Ar inạ sãote coḍor samaṅokʼakʼ lekate mitʼ liṭar darkha rasa hõ emokʼ hoyokʼtaea.

¹⁴ Aperen Isor ṭhen noa samaṅokʼakʼ ạuripe em hạbicʼ noa nãwã anaj reakʼ khon ape do bape jom daṛeakʼa. Ona chaḍa ona khon benaoakʼ jãhãn piṭhạ se seṅgelre rapakʼ hõ baṅ ganokʼa. Ar jãhãregepe girobasokʼ piṛhike piṛhi ape lạgitʼ noa do mitʼṭecʼ niạmge tahẽyena.

Eae hapta reakʼ porobko

¹⁵ “Jirạukʼ mãhã dosar hilokʼ, metakʼme oka hilokʼ dolao samaṅokʼakʼ lạgitʼ phosol reakʼ ạṭipe ạgui, enhilokʼ khon eae haptape lekhaea.

¹⁶ Ar niạ eae hapta reakʼ jirạukʼ mãhã reakʼ dosar hilokʼ, metakʼme dolao samaṅokʼakʼ tayom mõṛẽgelakʼ din do Probhu Isor ńutumte nãwã guhum reakʼ samaṅokʼakʼ porobpe porobokʼa.

¹⁷ Probhu Isor ńutumte dolao samaṅokʼakʼ lekate oṛakʼ khon pạhil rakapʼakʼ phosol khon thoṛape ạguiya. Ar ona dolao samaṅokʼakʼ jinis do pe keji tala holoṅte khạmiyanakʼ barea piṭhạ benao hoyokʼa.

¹⁸ Noa piṭhạ sãote eae goṭecʼ mitʼ bochorren niphuṭ utạrko bheḍa hopon, mitʼṭen ḍaṅgra ar barea bheḍa ạgukin hoyokʼa. Ar noko janwarkote Probhu Isor ńutumte mitʼṭecʼ jeredokʼ samaṅokʼakʼpe samaṅa, ar ona sãote din hilokʼ reakʼ jomakʼ samaṅokʼakʼ ar coḍor samaṅokʼakʼ hõpe samaṅa. Noako do jotoge seṅgelteakʼ samaṅokʼakʼ kana, one ona reakʼ jut so Probhu Isor doe kusiyakʼkan.

¹⁹ Ona tayom ape do kại ńutumte samaṅokʼakʼ lạgitʼ mitʼṭen merom boda ar sulukren samaṅokʼakʼ lạgitʼ mitʼ bochor umerren barea bheḍa hoponpe samaṅkinạ.

²⁰ Naeke do Probhu Isor samaṅre unkin barea bheḍa hopon ar pạhilre rakapʼakʼ phosol khon benaoakʼ ona piṭhại dolaoa. Noa do Probhu Isor ńutumte samaṅakʼ sonot jinis kana okaṭakʼ do naekeakʼ bakhra kan.

²¹ Enhilokʼ ape do mitʼṭecʼ sonot jarwakʼpe hoeocoya. Enhilokʼ do cetʼge alope kạmiya. Ar jãhãregepe girobasokʼ noa niạm do piṛhike piṛhi ape lạgitʼ tahẽyena.

²² “Apeakʼ jumi reakʼ phosolpe ir jokhecʼ aṛe reakʼ phosol do alope ira ar ńur akan gele hõ alope halaṅa. Onako do reṅgecʼ-orecʼko ar disạmreko girobasokʼkan eṭakʼ jạtren hoṛko lạgitʼ bạgi oṭowakʼ hoyokʼtapea. Ar ińkangeạń Probhu aperen Isor do.”

Nãwã bochor reakʼ porob

^23-24 Inạ tayom Probhu Isor do Mose Israelko galmaraoakoe metadea, “Bochor reakʼ eae cando reakʼ pạhil din do apeakʼ jirạukʼ din mentepe manaoa. Ona do sakwa oroṅ salakʼ mitʼṭecʼ dikʼsạ din lekatepe lại sodora ar mitʼṭecʼ sonot jarwakʼpe hoeocoya.

²⁵ Enhilokʼ do cetʼ hõ alope kạmiya. Enhilokʼ do Probhu Isor ńutumte seṅgelteakʼ samaṅokʼakʼpe samaṅa.”

Kại ńutumte puruchun reakʼ din

²⁶ Probhu Isor do Moseye metadea,

²⁷ “Niạ eae cando reakʼ gelakʼ din do kại ńutumte puruchun reakʼ din kana. Ona din do apeakʼ mitʼṭecʼ sonot jarwakʼpe hoeocoya ar apnarakʼ jiwipe nindhạntapea. Ar apeakʼ ona din do Probhu Isor ńutumte seṅgelteakʼ samaṅokʼakʼpe samaṅa.

²⁸ Enhilokʼ do cetʼge alope kạmiya, ente enhilokʼ do kại ńutumte puruchun reakʼ din kana.

²⁹ Enhilokʼ okoe acʼakʼ jiwi bae nindhạntae uni do acʼ jạtrenko khone marao ocokʼa.

³⁰ Enhilokʼ jãhãe jãhãnakʼe kạmi enḍekhan uni do acʼakʼ jạtrenko khoniń marao utạrea.

³¹ Enhilokʼ do cetʼge alope kạmiya. Ar jãhãregepe girobasokʼ piṛhike piṛhi noa niạmge tahẽyena.

³² Enhilokʼ do ape lạgitʼ mitʼṭecʼ jirạukʼ din. Enhilokʼ do jiwipe nindhạntapea. Ona cando reakʼ areakʼ din ạyupʼ khon dosar hilokʼ ạyupʼ hạbicʼ ape do noa jirạukʼ dinpe manaoa.”

Chạuni porob reaṅ

^33-34 Inạ tayom Probhu Isor do Mose Israelko galmaraoakoe metadea, “Eae cando reakʼ gel mõṛẽakʼ dinre Probhu Isor ńutumte chạuni porob ehobokʼa, ar ona porob do eae din hạbicʼ calakʼa.

³⁵ Niạ eae din reakʼ pạhil din do apeakʼ sonot jarwakʼ hoyokʼtapema. Ar enhilokʼ do cetʼge alope kạmiya.

³⁶ Ar inạ eae din reakʼ dinạm hilokʼ Probhu Isor ńutumte seṅgelteakʼ samaṅokʼakʼ samaṅ hoyokʼtapea. Ona tayom irạlakʼ din do sonot jarwakʼpe hoeocoya ar Probhu Isor ńutumte seṅgelteakʼ samaṅokʼakʼpe samaṅa. Noa mucạtʼ din do porob reakʼ maraṅ jarwakʼ hoyokʼtapea; enhilokʼ do cetʼge alope kạmiya.

³⁷ “Noa porobko do jotoge Probhu Isore ṭhik dohoakada. Jemon niạ oktere seṅgelteakʼ samaṅokʼakʼpe samaṅ daṛeakʼ ar onate apeakʼ sonot jarwakʼ do hoyokʼtapea. Ar cetʼkope samaṅa onako do hoyokʼkana jeredokʼ samaṅokʼakʼ, jomakʼ samaṅokʼakʼ, janwar samaṅokʼakʼ ar coḍor samaṅokʼakʼ.

³⁸ Okaṭakʼ samaṅokʼakʼko do lahareń lại akatʼpe onako modre noako samaṅokʼakʼ do baṅ sabokʼa. Onako do hoyokʼkana, Probhu Isorakʼ jirạuk’ mãhã reakʼ samaṅokʼakʼ, Probhu Isor emae sanamakʼ dan, manot akatʼakʼ ar apnarakʼ kusiteakʼ samaṅokʼakʼko.

³⁹ “Eae cando reakʼ gel mõṛẽakʼ dinre jumi khon phosol rakapʼkate Probhu Isor ńutumte eae din hạbicʼ noa chạuni porobpe porobokʼa. Ar niạ eae din reakʼ pạhil din ar irạlakʼ din do apeakʼ jirạukʼ din hoyokʼa.

⁴⁰ Pạhilakʼ dinre ape lạgitʼ dare reakʼ joto khon bhageakʼ jo, khijur sakam, suṛukucʼ dareko ar jhạṛpạ dareko reakʼ ḍạrkope ạguiya. Ona tayom eae din ape do aperen Probhu Isor samaṅrepe rạskạ hulạsokʼa.

⁴¹ Ar jao bochor eae din hạbicʼ Probhu Isor ńutumte apeakʼ noa porobpe porobokʼa. Piṛhike piṛhi noa do ape lạgitʼ niạm lekate tahẽyena. Ar noa porob do eaeyakʼ candorepe porobokʼa.

⁴² Eae din hạbicʼ ape do ḍera oṛakʼrepe tahena. Israel bõsren okoeko janam akan onko sanamkoge niạ jokhecʼ do ḍera oṛakʼre tahen hoyokʼtakoa.

⁴³ Onate aperen bõsko baḍae daṛeakʼa, iń do Israelko Misor disạm khoniń oḍok ạguketʼkote ḍera oṛakʼreń girobas ocoketʼkoa. Ar iń Probhuge aperen Isor do.”

⁴⁴ Inạ tayom Mose do senkate Probhu Isore ṭhik dohoakatʼ sanam porob reakʼ katha Israelkoe baḍae ocoketʼkoa.