Levitikus 22 - সান্তালী বাইবেল

Samaṅokʼakʼko reakʼ sonotakʼko

¹ Inạ tayom Probhu Isor do Mose galmaraoadeteye metadea,

² “Am do Aron ar uniren hoponkom metakoa, iń ńutumte Israelkoakʼ samaṅakʼ sonot jinis khon jemon sahaṛ akanko tahen. Ar ińakʼ ńutum jemon aloko besonot. Iń kangeạń Probhu Isor do.

³ Am do onkom metakoa piṛhike piṛhi onkoren bõsko talare jãhãege besapha akane tahen ar Probhu Isor ńutumte samaṅ akatʼ jãhãn sonotakʼ jinis ṭhene hijukʼ enḍekhan uni do iń samaṅ khone marao giḍi ocokʼa. Iń kangeạń Probhu Isor do.

^4-6 Hoṛmo reakʼ harta ruạ se besaphawakʼ oḍokokʼ oktere Aron bõsren jãhãege ạuriko saphakʼ hạbicʼ samaṅ akatʼ sonotakʼ jinis do bako jom daṛeakʼa. Mạ̃ṛĩre jakʼ akan jãhãn jinisge jãhãeye joṭed se herelakʼ itạ se jãhãn besapha huḍiń jiwiyanko se bhõnḍ akan hoṛe joṭede-metakʼme onko hotete hoṛko besaphakʼ, enḍekhan uni do ạyupʼ hạbicʼ besapha akane tahena. Ar ạuriye ḍạbrạ saphakʼ hạbicʼ samaṅakʼ jãhãn sonotakʼ jinis do bae jom daṛeakʼa.

⁷ Menkhan cando hạsur tayom doe jom daṛeakʼa, ente ona do uniyakʼ jomakʼ kana.

⁸ Uni do jãhãn gocʼicʼ janwar se bir janware cirạ akade janwarakʼ jel jomkate apnartetʼ bae besapha daṛeakʼa. Iń kangeạń Probhu Isor do.

⁹ “Naekeko okań hukum akatʼko ona do manao hoyokʼtakoa. Ar bako manao khan onko do dusiko hoyokʼa ar besapha iạteko gujukʼa. Iń Probhu Isorge onko doń begar dohoakatʼkoa.

¹⁰ “Naeke gharońjren hoṛko chaḍa ar okoehõ samaṅakʼ sonotakʼ jinis do bako jom daṛeakʼa. Naekeren jãhãe peṛa se kạmiyạko hõ ona do bako jom daṛeakʼa.

¹¹ Menkhan naekeye kiriń akade guti ar acʼakʼ oṛakʼreye janam akan nonkan jãhãe guti do onae jom daṛeakʼa.

¹² Naekeren hoponera jodi naeke chaḍa eṭakʼ jãhãegeye baplako enḍekhan uni do samaṅakʼ sonot jinis bae jom daṛeakʼa.

¹³ Menkhan naekeren jãhãe rạnḍi hoponera se jãwãetetʼe bạgi akade begor gidrạwan kuṛi do apatakʼ oṛakʼre tahen lạgitʼe ruạr hecʼakan khan uni do acʼ apat reakʼ hĩse ńama. Naekeakʼ gharońjrene baṅkan nonkan okoehõ ona do bako jom daṛeakʼa.

¹⁴ Jãhãege hiṛińte samaṅakʼ sonotakʼ jinise jomle khan uni do naeke ṭhen khuti purun emokʼ hoyokʼtaea. Ar ona jinis reakʼ dam sãote arhõ mõṛẽ hạṭiń reakʼ mitʼ hạṭiń bạ̃ṛti dam emokʼ hoyokʼtaea.

^15-16 Naeke do Probhu Isor ńutumte Israelkoakʼ samaṅakʼ sonotakʼ jinis eṭakʼko jemon aloe jom ocoko ar ona reakʼ sonottetʼ hõ jemon aloe nosṭo ocoy ar nonkate onko do khuti purun emokʼ lạgitʼ dusire aloe paṛao ocoko. Iń Probhu Isorge onko doń begar dohoakatʼkoa.”

Baṅ ataṅokʼ samaṅokʼakʼko

¹⁷ Inạ tayom Probhu Isor do Moseye galmaraoadea,

¹⁸ “Am do Aron ar uniren hoponko ar sanam Israelkom metakoa, jãhãe Israel se onko talareko girobasokʼ kan eṭakʼ jạtren jãhãege manotakʼ purạu lạgitʼ se apnarakʼ kusi leka Probhu Isor ńutumte jeredokʼ samaṅokʼakʼe ạgui,

¹⁹ enḍekhan uni do mitʼṭen niphuṭ utạricʼ ḍaṅgra, bheḍa, se merom boda ạguiye hoyokʼtaea. Ar onkanicʼe baṅkan khan ona samaṅokʼakʼ do baṅ ataṅokʼtaea.

²⁰ Dos menakʼtae nonkan jãhãnicʼge jemon aloe ạguiye, ente onate jãhãn bhạlạiy do baṅ hoyokʼtaea.

²¹ Jãhãege manot akatʼakʼ purun lạgitʼ apnar kusite Probhu Isor ṭhen sulukren samaṅokʼakʼ samaṅe men khan uni do mitʼṭen niphuṭ utạricʼ ḍaṅgra, bheḍa se merom boda ạguiye hoyokʼtaea. Ar uniyakʼ hoṛmore jãhãn dos tahẽlen khan uni do samaṅokʼakʼ menkate baṅ ataṅokʼa.

²² Probhu Isor ńutumte samaṅokʼakʼ menkate okoehõ jemon kãṛãko, jaṅ rạputʼgetako se ghao akan ar ghao khon bele oḍokokʼkan se udri ruạ menakʼtae nonkan janwar do aloko ạgukoma. Probhu Isor ńutumte seṅgelteakʼ samaṅokʼakʼ lekate onkan celege jemon pinḍ cetanre alo rakapʼko.

²³ Menkhan okoe ḍaṅgra se bheḍawakʼ jãhãnakʼ hĩsge bạ̃ṛti hara akantae seye khaṭoge onkan ḍaṅgra se bheḍa apnarakʼ kusi lekae samaṅ daṛeaea, tobe manotakʼ purun lạgitʼ samaṅokʼakʼ mente ona do baṅ ataṅokʼtaea.

²⁴ Jãhãe janwarakʼ bele do lin posakʼ se koṭecʼ gejergetae khan se getʼ giḍi akantae khan onkanicʼ do Probhu Isor ńutumte alope samaṅea. Ar apeakʼ disạmte senkate hõ ona do alope onkaea.

²⁵ Eṭakʼ jạtrenkoakʼ jãhãe hoṛakʼ ti khon nonkan janwar hataokate aperen Isor ńutumte jomakʼ samaṅokʼakʼ menkate alope samaṅkoa. Onkore dos menakʼte jãhãn bhạlạiyrege bako lagaokʼa.”

²⁶ Ona tayom Probhu Isor do Moseye metadea,

²⁷ “Janam tayom ḍaṅgra, bheḍa se meron boda hopon acʼren eṅgattetʼ sãote eae din hạbicʼpe tahẽ ocoaea. Ar irạlakʼ din khon do Probhu Isor ńutumte seṅgelre samaṅokʼakʼ lekateye ataṅokʼa.

²⁸ Gại ar uniren bạchur se bhiḍi ar uniren hopon do mitʼ dinte alope dãṛẽkinạ.

²⁹ Probhu Isor ńutumte jãhãn kusiteakʼ samaṅokʼakʼpe samaṅ khan uniye kusiyakʼ leka baṛe hoyokʼtapema.

³⁰ Samaṅkede hilokʼge uniyakʼ jel do jom cabaetae hoyokʼtapea; ar dosar hilokʼ setakʼ hạbicʼ do cetʼge alope sarecʼ dohokakʼa. Iń kangeạń Probhu Isor do.

³¹ Ape do ińakʼ hukumpe manaoa ar ona lekape calakʼa. Ar ińkangeạń Probhu Isor do.

³² Ińakʼ sonot ńutum do alope besonot ocoya. Ar sonot menkate baṛe manaoińpe. Iń Probhu Isorge ape doń begar dohoakatʼpea.

³³ Ar aperen Isor hoyokʼ lạgitʼge iń do Misor disạm khoniń oḍok ạguakatʼpea. Iń kangeạń Probhu Isor do.”