Levitikus 21 - সান্তালী বাইবেল

Naeke lạgitʼ niạmko

¹ Inạ tayom Probhu Isor do Moseye metadea, “Am do naekeko, metakʼme Aronren hoponko galmarao akome, onkoren peṛako modre jãhãegeye gocʼlenre ona iạte naeke do acʼ apnartetʼ aloe besaphakʼma.

² Tobe gogo-baba, hopontetʼ-hoponera, boehattetʼ nonkan sorren hoṛko lạgitʼ do acʼteye besaphakʼ daṛeakʼa.

³ Ona chaḍa bin baplayicʼ okoe misera do gharońjre menae uni lạgitʼ hõe besapha daṛeakʼa.

⁴ Gomke hoṛ huyạte acʼ jạtrenko talare aloe besaphakʼma jemon onate aloe besonotokʼ.

⁵ “Naekekoakʼ bohokʼ hoyo poṭorokʼ, goco getʼ se hoṛmo reakʼ jãhã jaegare alo jemonko getʼ ghaotako.

⁶ Ar onako onkaete akoren Isorakʼ ńutum jemon aloko besonot. Onko do Isor ńutumte begar akanko tahena. Naeke do Probhu Isor ńutumte seṅgelteakʼ samaṅakʼko samaṅa ar Probhu Isor lạgitʼ begar akanko tahena. Ar noa samaṅokʼakʼ jinisge akoren Isor ńutumte samaṅakʼ jomakʼ mente hoyokʼtakoa.

⁷ Kusumbiko, loṭghoṭi maejiu, se jãwãe ṭhen khone bạgi ocoakan maejiu baplako hõ baṅ ganokʼtakoa. Ente onko do Isor ńutumteko begar doho ocoakana.

⁸ E Israelko, naekeko Isor ńutumte begar doho akan hoṛ mente bujhạukope, ente onko do aperen Isor ńutumte jomakʼ samaṅokʼakʼ reakʼko kạmikana. Onate begar akan hoṛ menkate hudiskope, ente iń Probhu Isor doń sonotgea ar iń lạgitʼge ape doń begar dohoakatʼpea.

⁹ Jãhãe naekeren hoponera loṭghuṭi iạteye ńurlen khan enḍekhan uni do acʼ apattetʼe besonot ocoyedekana. Ar uni kuṛi do seṅgelre atar giḍikae hoyokʼa.

¹⁰ “Maraṅ naeke, metakʼme boehako modre okoeyakʼ bohokʼre ojokʼ bahalokʼ reakʼ sunum dul akan ar bahalokʼ reakʼ porob hotete okoeṭakʼ maraṅ naeke do sonot kicricʼ horog reakʼ ạidạriye ńamakatʼ, uni do duk sodor lạgitʼ bohokʼ bae koṭoetaea ar acʼakʼ kicricʼko hõ bae oṛejtaea.

^11-12 Mạ̃ṛĩ menakʼ onkan ṭhạ̃ite bae calakʼa. Jãhãe gocʼ hoṛ iạte, se acʼren gogo babakin gujukʼ iạte hõ bae besapha daṛeakʼa ar acʼren Isorakʼ sonot ḍera bạgikate okatehõ bae oḍokokʼa se ona reakʼ sonottetʼ do bae nosṭo ocoya, ente uniren Isor do ojokʼ bahalokʼ sunumteye begar dohoakadea. Ar Iń kangeạń aperen Probhu Isor do.

¹³ Uni do mitʼṭen ḍạṅgwạ kuṛiye bapla daṛeaea.

¹⁴ Rạnḍi se jãwãetetʼ ṭhen khone bạgi ocoakan se loṭghoṭi iạte apnare besapha ocoakan nonkan maejiu baplako do baṅ ganokʼtaea. Eken acʼ jạtren ḍạṅgwạ kuṛigeye bapla daṛeakoa,

¹⁵ jemon goṭa bõsrenko talare acʼren hoponko aloe besonot ocoko. Ente iń Probhu Isorge naekekoń begar dohoakatʼkoa.”

¹⁶ Inạ tayom Probhu Isor do Moseye metadea,

¹⁷ “Am do Aron metaeme, hoṛmore dos menakʼ nonkan okoehõ Isor ńutumte jomakʼ samaṅokʼakʼ lạgitʼ pinḍ ṭhen alo jemonko calakʼ.

^18-20 Kãṛã hoṛ, leḍha hoṛ, cepṛe mũ hoṛ, hoṛmo reakʼ jãhãṭakʼ hĩsge hara bạ̃ṛti akantae hoṛ, ṭhunṭa hoṛ, kubdhạ hoṛ, bãoṛã hoṛ, mẽtʼ bạṛicʼ hoṛ, ghao menakʼtae hoṛ, ekasirạ hoṛ, metakʼme hoṛmore dos menakʼtae nonkan jãhãe hoṛge pinḍ ṭhen do bae sor daṛeakʼa.

²¹ Hoṛmore dos menakʼtae nonkan Aron bõsren jãhãege pinḍ ṭhen senkate Probhu Isor ńutumte seṅgelre jãhãnakʼ samaṅokʼakʼ bae samaṅ daṛeakʼa. Ar dos menakʼtaete pinḍ ṭhen senkate Isor ńutumte jãhãn jomakʼ hõ bae samaṅ daṛeakʼa.

²² Isor ńutumte samaṅakʼ jomakʼ modre sonotakʼ ar sonot utạrakʼ joto jomakʼge uni doe jom daṛeakʼa,

²³ menkhan uniyakʼ hoṛmore dos menakʼtaete sonot ṭhạ̃i reakʼ orwal ṭhen se pinḍ samaṅre senkate ińakʼ ṭhạ̃iko reakʼ sonottetʼ do bae nosṭo daṛeakʼa. Iń kangeạń aperen Probhu Isor do, ińge naekekoń begar dohoakatʼkoa.”

²⁴ Mose do senkate noako katha Aron ar uniren hoponko ar sanam Israelkoe baḍae ocoketʼkoa.